वाढदिवसाच्या दिवशीच काळाचा घाला! गिझरमधील गॅस गळतीने शिवसेना नेत्याच्या मुलीचा दुर्दैवी मृत्यू

पंजाब : पंजाबमधील जालंधर शहरात एक धक्कादायक आणि हृदयद्रावक घटना समोर आली आहे. घरातील बाथरूममध्ये बसवलेल्या गिझरमधून गॅस गळती झाल्याने आंघोळ करत असताना एका २२ वर्षीय तरुणीचा मृत्यू झाला. मुनमुन चितवन असे मृत तरुणीचे नाव असून, ती शिवसेनेचे पंजाबमधील नेते दीपक कंबोज यांची कन्या होती.

ही घटना नवीन वर्षाच्या पहिल्याच दिवशी घडली. विशेष बाब म्हणजे याच दिवशी मुनमुनचा वाढदिवसही होता. त्यामुळे कुटुंबीयांनी नवीन वर्ष आणि वाढदिवसाच्या संयुक्त उत्सवाची जोरदार तयारी केली होती. घरात आनंदाचे वातावरण होते, नातेवाईक आणि मित्रमंडळींना आमंत्रण देण्यात आले होते.

सकाळच्या सुमारास मुनमुन आंघोळीसाठी बाथरूममध्ये गेली. प्राथमिक तपासानुसार, त्या वेळी गिझरमधून गॅसची गळती सुरू होती. बंद बाथरूममध्ये गॅस साचल्याने मुनमुनला श्वास घेण्यास त्रास होऊ लागला आणि काही वेळातच ती बेशुद्ध पडली.

बराच वेळ झाला तरी मुनमुन बाहेर न आल्याने कुटुंबीयांना संशय आला. त्यांनी बाथरूमचे दार ठोठावले, मात्र आतून कोणताही प्रतिसाद मिळाला नाही. अखेर दार तोडून आत प्रवेश केल्यानंतर मुनमुन बेशुद्ध अवस्थेत आढळली.

तिला तातडीने जवळच्या रुग्णालयात दाखल करण्यात आले. मात्र डॉक्टरांनी तपासणीनंतर तिला मृत घोषित केले. पोलिसांच्या प्राथमिक वैद्यकीय अहवालानुसार, गॅसमुळे श्वास कोंडल्याने मृत्यू झाल्याची शक्यता व्यक्त करण्यात आली आहे.

या घटनेनंतर पोलिसांनी अपघाती मृत्यूची नोंद करत तपास सुरू केला आहे. गिझरमध्ये तांत्रिक बिघाड होता का, की बाथरूममध्ये योग्य वायुवीजन (व्हेंटिलेशन) नसल्यामुळे हा अपघात घडला, याचा सखोल तपास केला जात आहे. शवविच्छेदन अहवाल आल्यानंतर मृत्यूचे नेमके कारण स्पष्ट होणार असल्याचे पोलिस अधिकाऱ्यांनी सांगितले.

या दुर्दैवी घटनेमुळे संपूर्ण परिसरात हळहळ व्यक्त होत असून, घरगुती गिझर वापरताना आवश्यक सुरक्षेचे महत्त्व पुन्हा एकदा अधोरेखित झाले आहे.