अर्थसंकल्प सादर होण्यापूर्वी चांगली बातमी, जानेवारी महिन्यातील जीएसटी संकलनाची आकडेवारी सर्वात मोठी

अर्थमंत्री निर्मला सीतारमण १ फेब्रुवारीला देशाचे बजेट सादर करणार आहेत. अर्थसंकल्प सादर होण्यापूर्वी अर्थव्यवस्थेसाठी एक चांगली बातमी समोर आली आहे. वित्त मंत्रालयाने सांगितले कि, जानेवारी 2021 मध्ये रविवारी संध्याकाळी 6 वाजेपर्यंत 1,19,847 लाख कोटी रुपयांचे जीएसटी (GST) संकलन झाले आहे. मागील वर्षी याच महिन्यातील जीएसटी संकलनाच्या तुलनेत 8% अधिक महसूल मिळाला आहे.

पीआयबीच्या मते, जानेवारी 2021 मध्ये जीएसटीचा एकूण महसूल 119847 कोटी आहे, त्यापैकी सीजीएसटी 21923 कोटी, एसजीएसटी 29014 कोटी, आयजीएसटी 60288 कोटी आणि उपकर म्हणजेच Cess 8622 कोटी आहे.

महत्त्वाचे म्हणजे गेल्या काही महिन्यांपासून जीएसटी संकलनात सातत्याने वाढ होत आहे. तज्ज्ञांच्या मते, हे अर्थव्यवस्थेच्या जलद रिकव्हरीचे लक्षण आहे. गेल्या चार महिन्यांपासून जीएसटी संकलन एक लाख कोटींपेक्षा जास्त आहे.

जीएसटी लागू झाल्यापासून जानेवारी महिन्यातील जीएसटी संकलनाची ही आकडेवारी सर्वात मोठी आहे. निर्मला सीतारमण यांनी १ फेब्रुवारीला अर्थसंकल्प सादर करण्यापूर्वी सध्या जीएसटी संकलनाची ही आकडेवारी सरकारला दिलासा देणारी आहे.