चिमुकलीने धाडस दाखवत वाचवले आत्महत्या करण्यासाठी गेलेल्या आईचे प्राण

भोपाळ : आत्महत्या करण्याच्या उद्देशाने रेल्वे रुळावर गेलेल्या एका महिलेला तिच्या आठ वर्षाच्या मुलीने वाचवले. मात्र, रेल्वेच्या धक्क्यामुळे ट्रॅकच्या बाजूला पडलेल्या महिलेला गंभीर दुखापत झाली. या घटनेची माहिती मिळताच पोलिसांनी घटनास्थळी धाव घेत महिलेला रुग्णालयात दाखल केले. त्यामुळे या महिलेचा जीव वाचला आहे.

पोलिसांनी दिलेल्या माहितीनुसार, गौतम नगर येथे राहणाऱ्या 30 वर्षीय महिलेच्या पतीचे निधन झाले आहे. तिला दोन मुले आहेत. ही महिला रविवारी 5.15 वाजण्याच्या सुमारास आत्महत्या करण्याच्या उद्देशाने रेल्वे रुळावर गेली होती. यावेळी तिची आठ वर्षांची मुलगीसुद्धा तिच्यामागे गेली. त्यावेळी तिने बघितले की तिची आई समोरून येणाऱ्या रेल्वेसमोर जाण्याच्या प्रयत्नात होती. त्यामुळे या चिमुकलीने धाडस दाखवत तिच्या आईचा हात धरून तिला बाजूला खेचले. मात्र तेवढ्यात रेल्वे आल्याने या महिलेला रेल्वेचा धक्का लागला आणि ती बेशुद्ध होऊन ट्रॅकच्या बाजूला पडली.

पोलिसांना या घटनेची माहिती मिळताच ते घटनास्थळी दाखल झाले. त्यांनी तात्काळ या महिलेला जेपी हॉस्पिटलमध्ये दाखल केले. तिथे उपचार केल्यानंतर या महिलेच्या प्रकृतीत सुधारणा झाली असून तिची प्रकृती स्थिर आहे.