ब्रेकिंग! काश्मीरमधील बांदीपोरा येथे लष्कराचे हेलिकॉप्टर कोसळले, बचावकार्य सुरू

काश्मीर : काश्मीरच्या बांदीपोरा जिल्ह्यातील गुरेझच्या तुलईल भागात शुक्रवारी दुपारी लष्कराचे हेलिकॉप्टर कोसळले. गुरेझ खोऱ्यातील गुजरन नाला परिसरात गस्त घालत असणारे लष्कराचे हेलिकॉप्टर कोसळले, त्यानंतर तातडीने बचावकार्य सुरू करण्यात आले. अचानक बिघाड झाल्याने हेलिकॉप्टर कोसळल्याची माहिती मिळत आहे.

तथापि, हेलिकॉप्टर क्रूच्या बचावासाठी सुरक्षा दलांची शोध पथकं या भागात पोहोचत आहेत. एसडीएम गुरेझ यांनी सांगितले की, अपघातापूर्वी हेलिकॉप्टरशी संपर्क तुटला होता. यामागील कारणांचा शोध घेतला जात आहे. वैमानिक आणि सह-वैमानिक यांचा शोध घेण्याचे काम सुरु असून ते या अपघातातून सुखरूप बाहेर पडल्याचे मानले जात आहे, परंतु अधिका-यांकडून अद्याप याबाबत काहीही सांगण्यात आलेले नाही.