शरद पवार यांना धमकी, सुप्रिया सुळे यांची मुंबई पोलीस आयुक्त कार्यालयात तक्रार

मुंबई : राष्ट्रवादी काँग्रेसचे नेते शरद पवार यांना व्हॉट्सऍपवर धमकी आली आहे. शरद पवार यांना धमकी मिळाल्यानंतर सुप्रिया सुळे यांनी मुंबई पोलीस आयुक्त कार्यालयात जाऊन याबाबत तक्रार केली. शरद पवार यांना धमक्या मिळाल्याची माहिती देताना सुप्रिया सुळे यांनी एका वेबसाईटच्या माध्यमातून धमक्या दिल्याचं म्हटलं आहे.

सुप्रिया सुळे यांनी महाराष्ट्राचे गृहमंत्री देवेंद्र फडणवीस आणि देशाचे गृहमंत्री अमित शहा यांनाही कठोर कारवाई करण्याचे आवाहन केले आहे. शरद पवार यांना मिळालेल्या धमकीबाबत त्यांनी हे योग्य नसल्याचे म्हटले आहे. तसेच हे राजकारण थांबायला हवे, असेदेखील म्हटले आहे. यावेळी पोलिसांकडून न्याय मागण्यासाठी मी येथे आले असल्याचे त्यांनी सांगितले.  माझ्या वडिलांना काही इजा झाली तर त्याला गृह मंत्रालय जबाबदार असेल, असेही सुप्रिया सुळे म्हणाल्या आहेत. सुप्रिया सुळे यांनी पोलिसांकडे न्यायासाठी आवाहन केले, तसेच केंद्र आणि राज्य सरकारच्या गृहमंत्र्यांकडे कारवाईची मागणी केली.

शरद पवार यांच्याबाबत व्हॉट्सऍपवरवरील धमकीच्या संदेशात काय आहे, याबाबत कोणतीही अधिकृत माहिती समोर आलेली नाही. याबाबत सुप्रिया सुळे किंवा कोणत्याही पोलीस अधिकाऱ्याने कोणतीही माहिती दिलेली नाही. मात्र, सुप्रिया सुळे यांच्या वक्तव्यानंतर पवारांना मिळालेली धमकी राजकीय असण्याची शक्यता व्यक्त केली जात आहे.