राज्यात पुढील आठवडाभर मुसळधार पावसाची शक्यता

पुणे : अंदमान बेटाच्या उत्तर भागात कमी दाबाचे क्षेत्र तयार होण्याचा अंदाज आहे. परिणामी राज्यात २३ ते २८ सप्टेबर या काळात दमदार पाऊस पडण्याची शक्यता आहे. हवामान विभागाने दिलेल्या माहितीनुसार, अंदमान बेटाच्या उत्तर भागात आज हवेची चक्रीय स्थिती निर्माण होऊन कमी दाबाचे क्षेत्र तयार होण्याचा अंदाज आहे. त्यामुळे पुढील आठवडाभर विदर्भ, मराठवाड्यासह राज्यात अनेक ठिकाणी जोरदार पावसाची शक्यता वर्तवण्यात आली आहे.

हवामान विभागाने दक्षिण राजस्थानमधून मोसमी पावसाचा परतीचा प्रवास २३ सप्टेबरपासून सुरू होण्याचा अंदाज व्यक्त केला आहे. मात्र, अंदमान मधील कमी दाबाच्या क्षेत्रामुळे मध्य भारतासह महाराष्ट्रातून पावसाच्या परतीच्या प्रवासात अडथळा निर्माण होणार आहे. सध्या तरी राज्यातून मोसमी पावसाचा परतीचा प्रवास सुरू होण्यास अनुकूल वातावरण नाही. २३ ते २८ सप्टेबर, या काळात चांगला पाऊस होण्याची शक्यता आहे.