पुण्यात तरुणावर दिवसाढवळ्या चाकूहल्ला, कारण…

पुणे : बहिणीला ‘प्रपोज’ करणाऱ्या तरुणाला तिच्या भावाने समजावून सांगितले, मात्र, त्यामुळे राग आल्याने त्या तरुणाने तरुणीच्या भावावर चाकूने वार केल्याचा धक्कादायक प्रकार समोर आला आहे. कोंढवा पोलिस ठाण्यापासून अवघ्या पाचशे मीटर अंतरावर दिवसाढवळ्या ही घटना घडली आहे. हा प्रकार कोंढवा खुर्द येथील शितल पेट्रोल पंप चौकात घडला.

पोलिसांनी दिलेल्या माहितीनुसार, आरोपीने फिर्यादीच्या बहिणीला सात ते आठ महिन्यांपूर्वी रस्त्यात अडवून ‘प्रपोज’ केले होते. तेव्हा तरुणीचा भाऊ या आरोपीला भेटला होता आणि त्याला ‘माझ्या बहिणीला त्रास देऊ नको’ असे सांगितले होते. या गोष्टीचा राग आरोपीच्या मनात होता. त्यातूनच आरोपीने फिर्यादीला शिवीगाळ केली आणि त्यानंतर चाकूने वार करून गंभीर जखमी केले. या प्रकरणी २२ वर्षीय तरुणाने फिर्याद दिली आहे. त्यावरून अस्लम शेख (रा. येवलेवाडी) याच्यावर गुन्हा दाखल करण्यात आला आहे.