पुण्यात खळबळ! मटणाच्या सूपमध्ये आढळले भाताचे कण, तरुणांनी रागाच्या भरात केला वेटरचा खून

पुणे : किरकोळ कारणावरून तरुणांनी वेटरचा खून केल्याची खळबळजनक घटना पुणे जिल्ह्यातील पिंपळे सौदागर येथे घडली आहे. मटणाच्या सूपमध्ये भाताचे कण आढळल्याच्या रागातून थेट वेटरचा खून करण्यात आला. या घटनेत दोन जण जखमी झाले आहेत. याप्रकरणी सांगवी पोलिस ठाण्यात दोघांविरुद्ध खुनाचा गुन्हा दाखल करण्यात आला आहे. सध्या आरोपी फरार असून सांगवी पोलिस त्यांचा शोध घेत आहेत.

मिळालेल्या माहितीनुसार, मंगेश संजय पोस्ते (१९) असे खून झालेल्या वेटरचे नाव आहे, या घटनेत अजित मुठकुळे (३२) आणि सचिन भवर (२२) हे दोघे जखमी झाले आहेत. याप्रकरणी विजयराज वाघिरेव आणि त्याच्या साथीदारावर खुनाचा गुन्हा दाखल करण्यात आला आहे. पिंपळे सौदागर येथील या हॉटेलमध्ये आरोपी विजयराज आणि त्याचा मित्र नेहमी इथे जेवायला येत असत. मंगळवारी देखील हे दोघे या हॉटेलमध्ये जेवण करण्यासाठी आले होते. यावेळी त्यांनी ऑर्डर केलेल्या मटणाच्या सूपमध्ये त्यांना भाताचे काही कण आढळले. यामुळे आरोपींना राग अनावर झाला आणि त्यांनी वेटर अजित मुठकुळे, सचिन भवर आणि मंगेश यांना शिवीगाळ केला, त्यानंतर प्रकरण वाढत गेले आणि आरोपींनी लाकडी दांडक्याने तिघाजणांना बेदम मारहाण केली. यात मंगेश गंभीर जखमी झाला आणि त्याचा जागीच मृत्यू झाला. तर अन्य दोघे जखमी झाले आहेत.