जुन्या मुंबई-पुणे महामार्गावर भीषण अपघात, मायलेकीचा मृत्यू तर पितापुत्र गंभीर जखमी

पुणे : जुन्या मुंबई-पुणे महामार्गावर किवळे- देहूरोड परिसरात भीषण अपघात झाला आहे. एकाच कुटुंबातील चौघेजण दुचाकीवरून जात असताना कंटेनरने त्यांना जोरदार धडक दिली. या अपघातात आई आणि मुलीचा जागीच मृत्यू झाला असून वडील आणि मुलगा गंभीर जखमी झाले आहेत.

मिळालेल्या माहितीनुसार, देहूरोड किवळे ब्रिजवर दुचाकीला कंटेनरने मागून धडक दिली. ही धडक इतकी जोरदार होती की यात आई आणि मुलीचा जागीच मृत्यू झाला. तर वडील आणि मुलगा गंभीर जखमी आहेत, जखमींना खासगी रुग्णालयात दाखल केले असून त्यांच्यावर उपचार सुरु आहेत. अपघातानंतर महामार्गावरील वाहतूक विस्कळीत झाली. घटनास्थळी नागरिकांनी मोठी गर्दी केली होती. पोलिसांना घटनेची माहिती देण्यात आली, त्यानंतर पोलीस तात्काळ घटनास्थळी दाखल झाले. आई आणि मुलीचे मृतदेह शवविच्छेदनासाठी नजीकच्या रुग्णालयात पाठवण्यात आले आहेत. या अपघातानंतर कंटेनर चालक फरार झाला आहे. देहूरोड पोलीस त्याचा शोध घेत आहेत.