पुणे महापालिकेचे माजी महापौर दत्ता एकबोटे यांचं करोनामुळे निधन

पुणे महापालिकेचे माजी महापौर दत्ता एकबोटे यांचं करोनामुळे निधन झालं आहे. ते ८४ वर्षांचे होते. ससून हॉस्पिटलमध्ये त्यांच्यावर उपचार सुरु होते. मात्र मध्यरात्री साडे बारा वाजण्याच्या सुमारास त्यांचं निधन झालं. ३१ तारखेला त्यांचा मुलगा रवींद्र एकबोटे याचादेखील करोनामुळे मृत्यू झाला होता.

माजी महापौर दत्ता एकबोटे तसंच त्यांची आई आणि मुलगा रवींद्र हे तिघेजण रत्ना मेमोरियल हॉस्पिटलमध्ये २७ जुलैला दाखल झाले. त्यानंतर त्यांची प्रकृती सुधारली आणि १८ ऑगस्ट रोजी त्यांना हॉस्पिटलमधून डिस्चार्ज देण्यात आला. मात्र पुन्हा २२ ऑगस्ट रोजी दत्ता एकबोटे आणि त्यांचा मुलगा रवींद्र यांना त्रास होऊ लागल्यामुळे ससून हॉस्पिटलमध्ये दाखल करण्यात आलं.

ससूनमध्ये दत्ता एकबोटे यांच्यावर आयसीयूमध्ये उपचार सुरु होते, यावेळी त्यांची प्रकृती खालावल्याने त्यांचं निधन झालं. कोरेगाव पार्क येथील कैलास स्मशानभूमीत त्यांच्यावर अंत्यसंस्कार करण्यात आले. त्यांच्या मागे पत्नी, दोन मुली आणि नातू असा परिवार आहे.