इंडिगो विमानाच्या पायलटचा बोर्डिंग गेटवरच मृत्यू, नागपूर-पुणे उड्डाणापूर्वी घडली घटना

नागपूर : गुरुवारी नागपूरहून पुण्याला जाणाऱ्या इंडिगो विमानाच्या उड्डाणाच्या काही वेळापूर्वी विमानाचा पायलट अचानक बेशुद्ध होऊन बोर्डिंग गेटवर पडला. त्यानंतर रुग्णालयात नेल्यानंतर त्यांना मृत घोषित करण्यात आले. कॅप्टन मनोज सुब्रमण्यम (वय ४०) असे मृत वैमानिकाचे नाव आहे. दोन दिवसांत भारतातील वैमानिकाच्या मृत्यूची ही दुसरी घटना आहे.

यासंदर्भात इंडिगोच्या प्रवक्त्याने सांगितले की, ‘नागपूरमध्ये आमच्या एका वैमानिकाच्या झालेल्या मृत्यूने आम्हाला दु:ख झाले आहे. नागपूर विमानतळावर त्यांची प्रकृती खालावल्याने त्यांना रुग्णालयात नेण्यात आले असता त्यांचे दुर्दैवी निधन झाले. आमच्या संवेदना आणि प्रार्थना त्यांच्या कुटुंबासह आणि प्रियजनांसोबत आहेत.

एव्हिएशन वॉचडॉग, नागरी विमान वाहतूक महासंचालनालय (डीजीसीए) नुसार, पायलटने बुधवारी पहाटे 3 ते 7 या वेळेत त्रिवेंद्रम-पुणे-नागपूर सेक्टरवर दोन उड्डाणे केली होती. पायलटच्या रोस्टरवरून असे दिसून आले की गुरुवारी कामावर हजर होण्यापूर्वी त्याला 27 तासांची विश्रांती मिळाली होती. दुसरीकडे, इंडिगो एअरलाइनने म्हटले आहे की, पायलटने बुधवारी त्रिवेंद्रम-पुणे-नागपूर हे दोन सेक्टर चालवले, जे पहाटे (पहाटे 3 ते सकाळी 7 दरम्यान) होते. यानंतर 27 तासांची विश्रांती घेण्यात आली आणि गुरुवारी 04 सेक्टरसाठी दुपारी 1 वाजता सुटण्याचे वेळापत्रक ठरले होते, नागपूरहून त्यांचे पहिले सेक्टर होते.

दोन दिवसात भारतात पायलटच्या मृत्यूची ही दुसरी घटना आहे. यापूर्वी कतार एअरवेजचा अनुभवी पायलट बुधवारी प्रवासी म्हणून दिल्लीहून दोहाला जात होता. वाटेतच त्यांचा मृत्यू झाला. यानंतर, फ्लाइट QR 579 मध्येच दुबईला वळवण्यात आली.