महाबळेश्वरहून निघालेल्या दांपत्याची कार दरीत कोसळून अपघात

वाई : महाबळेश्वरहून मुंबईला जात असताना पाचगणी-वाई रस्त्यावर पसरणी घाटात सकाळी पर्यटकांची कार सहाशे फूट खोल दरीत कोसळून झालेल्या अपघातात एक महिला ठार तर दोन जण गंभीर जखमी झाले.

मुंब्रा येथील दांपत्य कारने (MH 02 EH 1208) मुंबईकडे जात असताना पाचगणी-वाई रस्त्यावर पसरणी घाटात बुवासाहेब मंदिरानजीक चालकाचे गाडीवरील नियंत्रण सुटल्याने संरक्षक कठडा तोडून गाडी ६०० फूट खोल दरीत कोसळली .अपघातात नेहा मोहम्मद चौधरी (वय २२) ही महिला जागीच ठार झाली. मोहम्मद इर्शाद चौधरी व सिराज हमीद शेख (चालक) गंभीर जखमी झाले.

अपघाताची माहिती मिळताच वाईचे पोलीस निरीक्षक आनंदराव खोबरे, सहाय्यक निरीक्षक आशिष कांबळे, उपनिरीक्षक राजेंद्र कदम आणि कर्मचाऱ्यांनी घटनास्थळी धाव घेतली. महाबळेश्वर ट्रेकर्स व स्थानिक ग्रामस्थांच्या मदतीने बचावकार्य राबवण्यात आले. गाडी खोल दरीत कोसळल्यामुळे गाडीजवळ पोहोचण्यास फार शिकस्त करावी लागली. अपघातामुळे पसरणी घाटात वाहतूक ठप्प झाली होती. जखमींना वाई येथील खासगी रुग्णालयात दाखल करण्यात आलं आहे.