आमदार किसन कथोरे यांच्या गाडीचा भीषण अपघात, दोघांचा दुर्दैवी मृत्यू

कल्याण : भाजपचे आमदार किसन कथोरे यांच्या गाडीचा अपघात झाला आहे. या अपघातात एक तरुण आणि एक तरुणीचा मृत्यू झाला आहे. आमदार किसन कथोरे यांच्या मणक्याला दुखापत झाली आहे अशी माहिती मिळत आहे.

भाजप आमदार किसन कथोरे यांच्या गाडीने कल्याण तालुक्यातील दहागावजवळ एका दुचाकीला जोरदार धडक दिली. त्यामुळे दुचाकीवर असलेल्या एका तरुणाचा आणि तरुणीचा दुर्दैवी मृत्यू झाला. तरुणाचं नाव अमित नंदकुमार सिंग असं आहे. हा तरुण कल्याण ग्रामीणमधील पिसवली परिसरातील रहिवासी होता. त्याच्यासोबत असलेल्या तरुणीचं नाव सिमरन सिंग असं आहे.

आमदार किसन कथोरे यांच्या गाडीला अपघात; दुचाकीस्वार गंभीर जखमी

या अपघातात आमदार किसन कथोरे थोडक्यात बचावले आहेत. आमदार कथोरे यांच्या मणक्याला गंभीर दुखापत झाल्याची माहिती समोर आली आहे. त्यांच्यावर कल्याणमधील एका खासगी रुग्णालयात उपचार करण्यात आले असून कथोरे यांना डिस्चार्ज मिळाला आहे. अपघात इतका भीषण होता की गाडीची एअर बॅगही फुटली. टिटवाळा पोलीस पुढील तपास करत आहेत.