चित्रपटाच्या सेटवर प्रॉप गनमधून चुकून गोळी सुटल्याने सिनेमॅटोग्राफरचा मृत्यू, एक जखमी

निर्माते आणि अभिनेता अलेक बाल्डविन (Alec Baldwin) यांच्याकडून ‘रस्ट’ चित्रपटाच्या सेटवर प्रॉप गनमधून चुकून गोळी सुटल्याने एका महिला सिनेमॅटोग्राफरचा मृत्यू झाला तर एकजण जखमी झाला आहे. विशेष म्हणजे ही घटना चित्रपटात वापरल्या जाणाऱ्या बंदुकीने घडली आहे.

गुरुवारी न्यू मेक्सिकोमध्ये 42 वर्षीय सिनेमॅटोग्राफर हलिना हचिन्स या सेटवरील दुर्दैवी घटनेत ठार झाल्या. लेखक-दिग्दर्शक जोएल सूझा (48) हे देखील जखमी झाले. सूझा यांना रूग्णवाहिकेतून रुग्णालयात नेण्यात आले. हचिन्सला हेलिकॉप्टरने न्यू मेक्सिको युनिव्हर्सिटी हॉस्पिटलमध्ये नेण्यात आले, जिथे तिला मृत घोषित करण्यात आले, असे शेरीफच्या कार्यालयाने सांगितले.

पोलिसांनी सांगितले की, कोणताही गुन्हा दाखल करण्यात आलेला नाही आणि घटनेचा तपास सुरू आहे. दरम्यान, बाल्डविन, सूझा आणि रस्टचे कार्यकारी निर्माता प्रतिनिधी या प्रकरणावर मौन बाळगून आहेत.