मंदिरा बेदीचे पती राज यांना 29 जूनच्या संध्याकाळीच अस्वस्थ वाटत होतं, पण…, सुलेमान मर्चेंट यांनी केला खुलासा

मुंबई : अभिनेत्री मंदिरा बेदीचे पती राज कौशल यांचे ३० जूनला पहाटे हृदयविकाराच्या झटक्याने निधन झाले. त्यांच्या आकस्मिक निधनामुळे मंदिरी बेदी आणि कुटुंबावर दु:खाचा डोंगर कोसळला आहे. चित्रपट निर्माता आणि दिग्दर्शक राज कौशल यांच्या निधनाच्या बातमीने बॉलिवूड इंडस्ट्रीला देखील मोठा धक्का बसला.

राज कौशल यांच्या निधनानंतर राज आणि मंदिराचे जवळचे मित्र असलेल्या सुलेमान मर्चेंट यांनी एक खुलासा केला आहे. राज कौशल यांना हार्ट अटॅक येणार याची आधीच कल्पना आली होती आणि त्यांनी याबद्दल मंदिराला सांगितले होते. ईटाइम्सला दिलेल्या मुलाखतीत म्युझिक डायरेक्टर सुलेमान यांनी याबाबत खुलासा केला आहे. त्यांनी सांगितले कि, “29 जूनच्या संध्याकाळीच राज यांना अस्वस्थ वाटत होतं. त्यामुळे त्यांनी पित्ताची काही औषधं घेतली आणि ते झोपले. त्यानंतर पुन्हा मध्यरात्री त्यांना अस्वस्थ वाटायला लागलं आणि त्यांनी मंदिराला त्यांना हृदयविकाराचा झटका येत असल्याचं सांगितलं. राजने मंदिराला हार्ट अटॅक येत असल्याचं सांगताच तिने त्यांचा मित्र आशिष चौधरीला लगेचच फोन केला.”

पुढे ते म्हणाले, “आशिष तात्काळ मंदिराच्या घरी पोहचला. मंदिरा आणि आशिष तातडीने राजला घेऊन रुग्णालयात निघाले. मात्र रुग्णालयात जाताना गाडीतच राजची प्रकृती अधिक खालावली. पुढच्या ५-१० मिनिटांत राजच्या हृदयाचे ठोके थांबल्याचं मंदिराच्या लक्षात आलं. ते रुग्णालयात पोहचले तेव्हा डॉक्टरांनी राज यांना मृत घोषित केलं.”

दुःखद! अभिनेत्री मंदिरा बेदीचे पती राज कौशल यांचे निधन