बंगळुरूत पोलिसांची ड्रग रॅकेटवर कारवाई; अभिनेत्री रागिनी द्विवेदी हिला अटक

मुंबईत शौविकला अटक तर बंगळुरूत क्राइम ब्रँचने आरटीओ क्लार्क रवीशंकर, इंटेरिअर डिझायनर राहुल, कन्नड अभिनेत्री रागिनी आणि पार्टी होस्ट विरेन या चौघांना अटक केली. विशेष म्हणजे मुंबईत अटक केलेले पाचजण सेलिब्रेटींना अंमली पदार्थ पुरवत असल्याचा संशय आहे. या प्रकरणात तपास सुरू आहे. आरोपींना एनडीपीएसच्या (Narcotic Drugs and Psychotropic Substances Act – NDPS ACT) ज्या कलमांखाली अटक झाली आहे त्यात दोषी आढळल्यास ते दहा वर्षांसाठी जेलमध्ये जाण्याची शक्यता आहे. बंगळुरूतही चौघांना एनडीपीएसच्या कलमांखालीच अटक झाली आहे. या चौघांनाही शिक्षा झाल्यास दहा वर्षांसाठी जेलमध्ये जावे लागण्याची शक्यता आहे. या निमित्ताने बॉलिवूडमधील (Bollywood) अंमली पदार्थांच्या व्यवहारांशी संबंधित नवी माहिती उजेडात येईल, अशी चर्चा सोशल मीडियावर सुरू झाली आहे.

शौविक आणि सॅम्युअल या दोघांना शनिवारी कोर्टासमोर हजर केले जाईल. दोघांविरोधात एनडीपीएस कायद्यांतर्गत (Narcotic Drugs and Psychotropic Substances Act – NDPS ACT) कलम ८ क, २० ब, २७ अ, २८ आणि २९ आधारे आरोप ठेवले आहेत. यात दोषी आढळल्यास दहा वर्षांच्या शिक्षेची तरतूद आहे. सॅम्युअल मिरांडा आणि शौविक चक्रवर्ती विरोधात एनसीबीने अंमली पदार्थांच्या खरेदी-विक्रीचे आर्थिक व्यवहार केल्याचा ठपका ठेवला आहे.