धक्कादायक! सासऱ्याने 42 वर्षीय सुनेवर झाडली गोळी, वेळेवर नाश्ता न दिल्याने केले भयंकर कृत्य…

ठाणे : ठाण्यातील राबोडी येथे एक अतिशय धक्कादायक घटना घडली आहे. राबोडी येथील 76 वर्षीय काशिनाथ पाटील यांनी गुरुवारी सकाळी आपल्या 42 वर्षीय सुनेवर गोळ्या झाडल्याचा आरोप आहे. सासऱ्याला वेळेवर नाश्ता न दिल्याने त्याला राग आला आणि त्याने थेट सुनेच्या पोटात गोळी झाडली.

पोलिसांनी दिलेल्या माहितीनुसार, आरोपी काशिनाथ पाटील यांचा वाळूचा व्यवसाय आहे. सीमा राजेंद्र पाटील (वय 42) असे मृत महिलेचे नाव असून ती एका 17 वर्षीय मुलाची आई आहे. गुरुवारी सकाळी 11.30 वाजण्याच्या सुमारास ही घटना घडली.  सकाळी त्या सर्वांसाठी नाश्ता बनवत होत्या. वेळेवर नाश्ता न दिल्याने सासऱ्याला राग अनावर झाला आणि सून समोर येताच त्याने सुनेवर गोळी झाडली. या घटनेत महिलेच्या पोटात गोळी लागली. त्यांच्यावर उपचार सुरू होते, मात्र शुक्रवारी सकाळी त्यांचा मृत्यू झाला. या घटनेनंतर फरार झालेल्या आरोपीचा ठाणे राबोडी पोलिसांनी शोध सुरू केला आहे.

दरम्यान, घटनेच्या वेळी कुटुंबातील सर्व सदस्य घरीच होते. कुटुंबीयांनी महिलेला तातडीने जवळच्या खासगी रुग्णालयात नेले. त्यांच्यावर उपचार सुरु होते. मात्र उपचारादरम्यान शुक्रवारी सकाळी त्यांचा मृत्यू झाला. आरोपीकडे परवाना असलेली बंदूक असून, सुनेवर गोळीबार करून त्याने घटनास्थळावरून पळ काढला. पोलिसांनी त्याला पकडण्यासाठी पथके तयार केली असून आरोपीविरुद्ध खुनाचा गुन्हा दाखल केला आहे.