मुख्यमंत्री उद्धव ठाकरे आज एकदिवसीय पुणे दौऱ्यावर

पुण्याच्या वाढत्या कोरोना संसर्गाच्या पार्श्वभूमीवर पुणे विभागीय आयुक्तालयात आज एक महत्त्वाची बैठक पार पडणार आहे. या बैठकीला मुख्यमंत्री उद्धव ठाकरे, त्यांच्यासोबत उपमुख्यमंत्री तथा पुण्याचे पालकमंत्री अजित पवार, भाजप प्रदेशाध्यक्ष चंद्रकांत पाटील, महापौर मुरलीधर मोहोळ, पुण्याचे महापालिका आयुक्त, पुण्याचे पोलिस आयुक्त, महत्त्वाचे वैद्यकीय अधिकारी देखील उपस्थित असणार आहेत.

पुणे शहर तसंच पुणे जिल्ह्यात कोरोना रूग्णांची दररोजची आकडेवारी प्रशासनाची चिंता वाढवणारी आहे. शहरात दररोज जवळपास दीड हजार ते दोन हजार रूग्ण वाढतायेत. दुसरीकडे कोरोना रूग्णांची संख्या आटोक्यात यावी म्हणून प्रशासनाने कंबर कसली आहे. प्रशासनाने कोरोना उपाययोजना कश्या पद्धतीने केल्या आहेत, याचा आढावा मुख्यमंत्री आज घेतील.

ससून किंवा नायडू रूग्णालयाला मुख्यमंत्री भेट देण्याची शक्यता देखील वर्तवली जात आहे.