मुंबई : मुंबई-पुण्यासह राज्यातील प्रलंबित 29 महापालिकांच्या निवडणुकीसाठी मतदानाचे कार्यक्रम जाहीर करण्यात आले आहेत. या महापालिकांसाठी मतदान 15 जानेवारी रोजी होणार असून निकाल 16 जानेवारी रोजी जाहीर केला जाणार आहे. यासाठी आजपासूनच आचारसंहिता लागू करण्यात आली आहे, अशी माहिती राज्य निवडणूक आयोगाने पत्रकार परिषदेत दिली.

राज्यातील 29 महापालिकांमध्ये एकूण 3 कोटी 48 लाख मतदार मतदान करतील, तर एकूण मतदार केंद्रांची संख्या 39,147 आहे. मुंबईसाठी 10,111 मतदार केंद्रे, कंट्रोल युनिट 11,349 आणि बॅलेट युनिट 22,000 ठरवण्यात आले आहेत.

राज्यातील 29 महापालिकांच्या निवडणुका ओबीसी आरक्षणाच्या मुद्द्यावरून गेल्या 5-7 वर्षांपासून प्रलंबित होत्या. सर्वोच्च न्यायालयाच्या निर्देशानंतर या महापालिकांच्या निवडणुकीस मार्ग मोकळा झाला. सुरुवातीला 2 डिसेंबर रोजी नगरपालिका आणि नगरपरिषदांच्या निवडणुका पार पडल्या, आणि आता प्रलंबित 29 महापालिकांसाठी कार्यक्रम जाहीर झाला आहे.

महापालिका निवडणुकीचे वेळापत्रक

• नामनिर्देशन पत्र स्वीकारणे – 23 डिसेंबर ते 30 डिसेंबर
• अर्जाची छाननी – 31 डिसेंबर
• उमेदवारी माघारीची मुदत – 2 जानेवारी
• चिन्ह वाटप आणि अंतिम उमेदवार यादी – 3 जानेवारी
• मतदान – 15 जानेवारी
• निकाल – 16 जानेवारी

राज्यातील 27 महापालिका निवडणुकीसाठी मुदत संपली आहे. यासोबत जालना आणि इचलकरंजी या दोन नवीन महापालिकांमध्येही निवडणूक होणार आहे. या महापालिका निवडणुकांसाठी 1 जुलै 2025 रोजीची मतदान यादी ग्राह्य धरली जाईल.

निवडणूक खर्चाची मर्यादा
महापालिका निवडणुकीसाठी उमेदवारांचा खर्च आयोगाने ठरवलेला आहे:

• अ वर्ग – 15 लाख
• ब वर्ग – 13 लाख
• क वर्ग – 11 लाख
• ड वर्ग – 9 लाख

मुंबई महापालिकेमध्ये एक सदस्यीय वॉर्ड असल्यामुळे मतदारांना एकच मत द्यावे लागणार आहे, तर उर्वरित 28 महापालिकांमध्ये 1 ते 5 सदस्यीय वॉर्ड असल्याने त्यानुसार मतदान होईल.

उमेदवारीसाठी नियम

• उमेदवारी अर्ज फक्त ऑफलाईन पद्धतीने सादर करावा लागेल.
• सध्याच्या जात वैधता प्रमाणपत्र नसलेल्या उमेदवारांनी निवडणुकीपासून सहा महिन्यांच्या आत सादर करणे आवश्यक आहे.

मतदार जनजागृतीसाठी रील तयार केल्या गेल्या आहेत. जेष्ठ नागरिक आणि दिव्यांग मतदारांसाठी मतदान केंद्रावर आवश्यक सुविधा, रँप आणि व्हीलचेअर उपलब्ध राहतील.

राज्यातील 1,96,605 कर्मचारी या निवडणुकीसाठी काम करतील. मतदानापूर्वी 48 तास प्रचारावर बंदी असेल, तसेच त्या कालावधीत जाहिरातींवरही बंदी राहील.

महिला व आरक्षित वर्गासाठी जागा
राज्यातील 29 महापालिकांमध्ये एकूण 2,869 जागांसाठी मतदान होणार आहे:

• महिला सदस्य – 1,442
• इतर मागासवर्गीय सदस्य – 759
• अनुसूचित जाती सदस्य – 341
• अनुसूचित जमाती सदस्य – 77

दुबार मतदार
मुंबईत 11 लाख संभाव्य दुबार मतदार आहेत, जे एकूण मतदारांचा सुमारे 7% आहे. यांचा शोध घेऊन त्यांच्यासाठी नावासमोर दोन स्टार चिन्ह ठेवण्यात आले आहे. ज्यांच्यावर सर्वेक्षण झाले नाही, त्यांच्याकडून मतदान केंद्रावर हमीपत्र घेण्यात येईल.

निवडणूक होणाऱ्या महापालिका

1. बृहन्मुंबई – 227
2. पुणे – 162
3. भिवंडी-निजामपूर – 90
4. नागपूर – 151
5. ठाणे – 131
6. अहिल्यानगर – 68
7. नाशिक – 122
8. पिंपरी-चिंचवड – 128
9. छत्रपती संभाजीनगर – 113
10. वसई-विरार – 115
11. कल्याण-डोंबिवली – 122
12. नवी मुंबई – 111
13. अकोला – 80
14. अमरावती – 87
15. लातूर – 70
16. नांदेड-वाघाळा – 81
17. मीरा-भाईंदर – 96
18. उल्हासनगर – 78
19. चंद्रपूर – 66
20. धुळे – 74
21. जळगाव – 75
22. मालेगाव – 84
23. कोल्हापूर – 92
24. सांगली-मिरज-कुपवाड – 78
25. सोलापूर – 113
26. इचलकरंजी – 76
27. जालना – 65
28. पनवेल – 78
29. परभणी – 65

The post राज्यातील 29 महापालिकांच्या निवडणुकांचे वेळापत्रक जाहीर appeared first on थोडक्यात घडामोडी.

मुंबई – राज्यातील महानगरपालिका, नगरपालिका, जिल्हा परिषद आणि नगरपंचायत यांसारख्या स्थानिक स्वराज्य संस्थांच्या निवडणुकीसाठी सर्वोच्च न्यायालयाने राज्य सरकारला आता 31 जानेवारी 2026 पर्यंत मुदतवाढ दिली आहे. याआधी न्यायालयाने चार महिन्यांच्या आत निवडणुका घेण्याचे आदेश दिले होते, मात्र ही मुदत संपली असूनही एकाही संस्थेची निवडणूक पार पडलेली नाही.

मंगळवारी या प्रकरणाची सर्वोच्च न्यायालयात सुनावणी झाली. न्यायालयाने राज्य सरकारकडून निवडणूक प्रक्रियेतील विलंबाविषयी स्पष्टीकरण मागितले. राज्य सरकारने आपली बाजू मांडताना कर्मचाऱ्यांची कमतरता, सण, ईव्हीएम यंत्रांची नोव्हेंबर महिन्यात उपलब्धता आणि प्रभाग रचनेचा प्रकल्प पूर्ण होण्यासाठी लागणारा वेळ यासारखी कारणे पुढे मांडली.

यावर न्यायालयाने राज्य सरकारला स्थानिक स्वराज्य संस्थांच्या निवडणुकीसाठी 31 जानेवारी 2026 पर्यंत मुदतवाढ मंजूर केली. या निर्णयानुसार, राज्यातील सर्व महानगरपालिका, नगरपालिका, जिल्हा परिषद आणि नगरपंचायतींच्या निवडणुका घेऊन त्यांचा निकाल जाहीर करण्याची जबाबदारी राज्य निवडणूक आयोगावर येणार आहे.

या निर्णयामुळे मुंबई, पुणे, नाशिक, नागपूर यांसह रखडलेल्या महानगरपालिका आणि नगरपालिकांच्या निवडणुकीचा मार्ग मोकळा झाला आहे.

The post सर्वोच्च न्यायालयाने स्थानिक स्वराज्य संस्थांच्या निवडणुकांसाठी राज्य सरकारला मुदतवाढ दिली appeared first on थोडक्यात घडामोडी.

मुंबई : “एस.टी. बस चालकाचा मुलगा आपल्या कर्तृत्वाच्या बळावर राज्य विधानपरिषदेचा विरोधी पक्षनेता होतो, ही बाब अभिमानास्पदच आहे. कोणी कुठेही जन्माला आला तरी आपल्या कर्तुत्वाने मोठा होऊ शकतो, ही डॉ. बाबासाहेब आंबेडकर यांच्या संविधानाने आणि लोकशाहीने सामान्यांना दिलेली मोठी देणगी आहे,” अशा शब्दांत मुख्यमंत्री देवेंद्र फडणवीस यांनी विधानपरिषदेचे विरोधी पक्षनेते अंबादास दानवे यांच्या कार्याचा गौरवाने उल्लेख केला.

विरोधी पक्षनेते अंबादास दानवे यांचा विधानपरिषदेतील कार्यकाळ २९ ऑगस्ट रोजी पूर्ण होत असून, त्यानिमित्त आयोजित निरोप समारंभात मुख्यमंत्री फडणवीस बोलत होते. यावेळी सभापती प्रा. राम शिंदे, उपसभापती डॉ. नीलम गोऱ्हे, उपमुख्यमंत्री एकनाथ शिंदे, उपमुख्यमंत्री अजित पवार, विविध विभागाचे मंत्री यांच्यासह गटनेते व सदस्य उपस्थित होते.

मुख्यमंत्री फडणवीस म्हणाले, योगशास्त्रात एम. ए., पत्रकारितेचा अनुभव आणि मराठवाडा विभागात बारावीमध्ये गुणवत्ता यादीत सहावे स्थान मिळवणाऱ्या युवकाने जनतेच्या प्रश्नांची समज, ठाम भूमिका, विविध संस्थांबरोबर सामाजिक, क्रीडा आणि आध्यात्मिक क्षेत्रात केलेले कार्य, यामुळे आपली वेगळी ओळख निर्माण केली. अनेक आंदोलने उभारून ती यशस्वी केली.

यावेळी सभापती प्रा. राम शिंदे, उपमुख्यमंत्री एकनाथ शिंदे, उपमुख्यमंत्री अजित पवार, सांस्कृतिक कार्य मंत्री ॲड. आशिष शेलार आदींनी विरोधी पक्षनेते दानवे यांना शुभेच्छा व्यक्त केल्या.

The post एस.टी. बस चालकाचा मुलगा विरोधी पक्षनेता होणे, ही लोकशाहीची मोठी देणगी – मुख्यमंत्री देवेंद्र फडणवीस appeared first on थोडक्यात घडामोडी.

शिबलापूर, ता. संगमनेर, जि. अहिल्यानगर – भाग्योदय नागरी पतसंस्थेच्या संचालक मंडळाच्या नुकत्याच झालेल्या निवडणुकीत श्री. प्रमोद सतीश बोंद्रे यांची चेअरमन पदी तर श्री. सुभाष भागवत मुन्तोडे यांची व्हा. चेअरमन पदी बिनविरोध निवड करण्यात आली. नवनिर्वाचित चेअरमन आणि व्हा. चेअरमन यांनी संस्थेच्या विकासासाठी स्पष्ट दिशा ठरवली आहे. संस्थेच्या कारभारात पारदर्शकता आणि गतिमानता राखण्याची आणि सदस्यांना अधिकाधिक सुविधा व आर्थिक प्रगतीसाठी प्रयत्नशील राहण्याची ग्वाही दिली. ही निवड संस्थेच्या भविष्यातील प्रगतीसाठी महत्त्वपूर्ण ठरणार आहे, असं मानलं जात आहे. निवडणुकीनंतर संस्थेच्या सदस्यांनी नवनिर्वाचित नेतृत्वाचे स्वागत करून, त्यांच्या नेतृत्वाखाली संस्थेच्या विकासाची आशा व्यक्त केली आहे.

The post भाग्योदय नागरी पतसंस्थेच्या चेअरमन व व्हा. चेअरमन पदांची बिनविरोध निवड appeared first on थोडक्यात घडामोडी.

पुणे : राष्ट्रवादी काँग्रेस (शरदचंद्र पवार) पक्षाच्या महिला शाखेच्या महाराष्ट्र अध्यक्षा, रोहिणी खडसे यांनी राज्यातील महिला सुरक्षेच्या मुद्द्यांवर गंभीर चिंता व्यक्त केली आहे आणि महाराष्ट्र महिला आयोगाच्या अध्यक्षा, रूपाली चाकणकर यांच्यावर तीव्र टीका केली आहे. खडसे यांनी चाकणकर यांच्यावर आरोप करत सांगितले की, महिला आयोगाच्या अध्यक्षांचे एकमेव काम म्हणजे चांगल्या मेकअपसह पक्षाच्या कार्यक्रमात उपस्थित राहणे, आणि त्यांना कोणत्याही पक्षाच्या कामकाजाशी काहीही घेणं देणं नाही. त्यांच्या म्हणण्यानुसार, चाकणकर यांना बाकी मुद्द्यांपेक्षा त्यांचे बाह्य रूप अधिक महत्त्वाचे वाटते.

महिलांवरील हिंसाचाराच्या वाढत्या घटनांविरोधात पुण्यात झालेल्या निदर्शनादरम्यान खडसे यांनी त्यांचे हे विचार व्यक्त केले. त्यांनी प्रश्न उपस्थित केला की, पोलिस गुन्हेगारांवर जलद कारवाई का करत नाहीत आणि पीडितांना न्याय मिळवण्यासाठी असलेला विलंब का सहन करावा लागतो. यावरून त्यांनी राज्यातील कायदा आणि सुव्यवस्था सुधारण्याची आवश्यकता व्यक्त केली आहे.

पुणे, जे एकेकाळी महाराष्ट्राची सांस्कृतिक राजधानी आणि शैक्षणिक केंद्र म्हणून ओळखले जात होते, ते आता गुन्हेगारीचे आणि हिंसाचाराचे केंद्र बनत चालले आहे, असे खडसे यांनी नमूद केले. पुण्यातील वाढत्या कार अपघात, टोळी हिंसाचार, दिवसाढवळ्या गोळीबार, चेन स्नॅचिंग, बलात्कार आणि खून यासारख्या गुन्ह्यांमध्ये लक्षणीय वाढ झाली आहे. यावरून त्यांनी राज्य सरकारच्या पोलिस प्रशासनावर टीका केली आणि मुख्यमंत्री देवेंद्र फडणवीस आणि गृहमंत्री यांच्या नेतृत्वाखाली पोलिस प्रशासन प्रभावीपणे कार्यरत नाही, अशी टीका केली.

याशिवाय, खडसे यांनी मागील सरकारच्या काळात मंजूर झालेल्या, परंतु साडेतीन वर्षांहून अधिक काळ रखडलेल्या ‘शक्ती कायदा’च्या अंमलबजावणीची गरज अधोरेखित केली. महिलांवरील हिंसाचार रोखण्यासाठी बनवण्यात आलेला हा कायदा अद्याप अंमलात का आणला गेलेला नाही, असा सवाल त्यांनी केला.

याद्वारे, खडसे यांनी राज्य सरकारच्या महिला सुरक्षेशी संबंधित धोरणांवर गंभीर प्रश्न उपस्थित केले आणि त्यामध्ये सुधारणा होण्याची आवश्यकता व्यक्त केली.

The post फक्त चांगल्या मेकअपसह कार्यक्रमांना उपस्थिती…, रोहिणी खडसे यांचे रूपाली चाकणकर यांच्यावर टीकास्त्र appeared first on थोडक्यात घडामोडी.

पुणे : पुण्यातील कसबा मतदारसंघातून निवडून येत जायंट किलर ठरलेले, काँग्रेसचे पुणे लोकसभा मतदारसंघाचे उमेदवार रविंद्र धंगेकर यांनी काँग्रेस पक्षाचा राजीनामा दिला आहे. आज पुण्यात पत्रकार परिषदेत आपला निर्णय जाहीर करताना धंगेकर यांनी शिवसेनेत (शिंदे गट) सामील होण्याचे संकेत देत ते उपमुख्यमंत्री एकनाथ शिंदे यांची भेट घेणार असल्याचे म्हणाले.

पत्रकारांशी बोलताना धंगेकर यांनी स्पष्ट केले की त्यांचा राजीनामा काँग्रेसबद्दलच्या वैयक्तिक असंतोषामुळे नाही तर सत्तेबाहेर काम करण्याच्या आव्हानांमुळे आहे. त्यांनी सांगितले कि, “माझी नाराजी काँग्रेस पक्षावर नाही. काँग्रेस सोडल्याचे मला दुःख आहे. परंतु, सत्तेत असल्याशिवाय काम होत नाही ही कार्यकर्त्यांची आणि मतदारांची भावना होती. त्यामुळे हा निर्णय घेतला आहे. काँग्रेसने मला भरभरून दिले. पक्ष सोडणे हा एक कठीण निर्णय होता, परंतु मी माझ्या कार्यकर्त्यांशी आणि मतदारांशी चर्चा करून तो घेतला. माझी कोणावरही नाराजी नाही असे सांगतानाच ते हेदेखील म्हणाले की, सत्ता अनेक वर्ष पाहिली पण सत्तेचा लाभ मिळाला नाही.”

धंगेकर म्हणाले की, आज संध्याकाळी उपमुख्यमंत्री आणि शिवसेना शिंदे गटाचे प्रमुख एकनाथ शिंदे यांच्याशी बैठक होणार असून त्यानंतर अपेक्षित निर्णय घेतला जाणार आहे. एकनाथ शिंदे आणि उदय सामंत यांनी त्यांच्याशी अनेक वेळा संपर्क साधला आणि त्यांना त्यांच्या गटात सामील होण्याचे आवाहन केले, असेही त्यांनी सांगितले. शिंदे माझ्याबद्दल आधीही बोलले होते आणि उदय सामंत यांनी मला फोनही केला होता. त्यांनी मला त्यांच्यासोबत काम करण्यास सांगितले. मी त्यांच्याकडे कोणतेही पद मागितले नाही. मी महानगर पालिका निवडणूक लढवणार नाही असेही त्यांनी स्पष्ट केले.

धंगेकर यांचे काँग्रेसमधून बाहेर पडणे महाराष्ट्रातील काँग्रेस पक्षासाठी आणखी एक धक्का मानला जात आहे. शिवसेनेशी (शिंदे गट) जुळवून घेण्याचा त्यांचा निर्णय आगामी महानगरपालिका निवडणुकीपूर्वी महाविकास आघाडी पक्षावर आणखी परिणाम करू शकतो.

रविंद्र धंगेकर यांची राजकीय कारकीर्द
रविंद्र धंगेकर यांची राजकीय कारकीर्द शिवसेनेतून सुरु झाली, ते १९९७ – २००६ या काळात शिवसेनेत होते. २००६ ते २०१७ या ११ वर्षाच्या काळात ते मनसे मध्ये होते. २०१७ ला ते पुणे महानगरपालिकेच्या निवडणुकीमध्ये नगरसेवक म्हणून निवडून आले. त्यांना या निवडणुकीत काँग्रेसने मदत केली होती. त्यानंतर त्यांनी काँग्रेसमध्ये प्रवेश केला. २०२३ मध्ये कसबा या भाजपच्या बालेकिल्ल्यात पोटनिवडणुकीत विजय मिळवला. २०२४ ला काँग्रेस पक्षाने त्यांना पुणे लोकसभा मतदारसंघांची उमेदवारी दिली होती मात्र त्यांचा मंत्री मुरलीधर मोहोळ यांनी पराभव केला होता.

The post रविंद्र धंगेकर यांचा काँग्रेस पक्षाचा राजीनामा, आज घेणार उपमुख्यमंत्री एकनाथ शिंदे यांची भेट appeared first on थोडक्यात घडामोडी.

संगमनेर, ३ मार्च: संगमनेर तालुक्यातील जोर्वे ग्रामपंचायतीच्या विशेष ग्रामसभेत अप्पर तहसील कार्यालयाच्या स्थळी वादंग निर्माण झाला. आश्वी येथे प्रस्तावित असलेल्या अप्पर तहसील कार्यालयाला जोर्वे ग्रामस्थांनी कडाडून विरोध करत, हे कार्यालय जोर्वेतच व्हावे अशी ठाम मागणी केली. ग्रामसभेत काही सदस्यांनी अप्पर तहसील कार्यालयाच्या स्थापनेस विरोध करत ठराव मांडला, मात्र बहुतांश ग्रामस्थांनी याला विरोध दर्शवत अप्पर तहसील कार्यालय झाल्याशिवाय राहणार नाही, असे स्पष्ट केले. त्यामुळे ग्रामसभा वादळी ठरली.

ग्रामस्थांच्या म्हणण्यानुसार, तालुक्यात १७४ गावे असूनही फक्त एकच तहसील कार्यालय असल्याने महसूल यंत्रणेवर ताण आहे. त्यामुळे नागरिकांची महत्त्वाची कागदपत्रे, शिधापत्रिका, शेती वाद, उत्पन्न दाखले, विविध सरकारी योजनांचे लाभ यांसारखी कामे रखडत आहेत. ग्रामसभेत चर्चेच्या वेळी उपस्थित ग्रामस्थांनी जोरदार भूमिका घेत, आश्वी येथे कार्यालय करण्याऐवजी जोर्वे हेच मध्यवर्ती ठिकाण आहे. त्यामुळे नवीन अप्पर तहसील कार्यालय जोर्वेतच व्हावे, अशी मागणी केली.

ग्रामसभेत माजी आमदारांवर टीका
ग्रामसभेच्या चर्चेदरम्यान, मतदारसंघाच्या फेररचनेवेळी जोर्वे गावाचा समावेश शिर्डी मतदारसंघात करण्यात आला. त्या वेळी तालुक्याच्या माजी आमदारांनी याला विरोध का केला नाही? आणि आता मात्र जोर्वे गावाच्या मुद्द्यावर का बोलत आहेत? असा सवाल ग्रामस्थांनी उपस्थित केला. ग्रामसभा गाजवणाऱ्या गोकुळ दिघे यांनी संतप्त प्रतिक्रिया देत म्हटले, सामान्य नागरिकांच्या महसूल संबंधित कामांसाठी अप्पर तहसील कार्यालय आवश्यक आहे. शेती, शिवार रस्ते, शिधापत्रिका, न्यायालयीन प्रकरणे, निराधार योजना अशा अनेक कामांसाठी नागरिकांना मोठ्या अडचणींना सामोरे जावे लागते. हे काही लोकांना खपत नाही का?

अप्पर तहसील कार्यालयास ग्रामस्थांचा पाठिंबा, पालकमंत्र्यांकडे मागणी
ग्रामसभेच्या अखेरीस आवाजी मतदान घेण्यात आले. त्यात ग्रामस्थांनी एकमुखाने अप्पर तहसील कार्यालयाच्या स्थापनेसाठी ठराव मंजूर केला. आश्वी, उंबरी बाळापूर, पानोडी, ओझर, झरेकठी, शेडगाव, शिबलापूर, कनकापूर, चिंचपुर या गावांसाठीही जोर्वे हे अधिक सोयीचे ठिकाण असल्याचे ग्रामस्थांचे म्हणणे आहे. आम्ही लवकरच पालकमंत्री राधाकृष्ण विखे पाटील यांच्याकडे निवेदन देणार आहोत, असे गोकुळ दिघे यांनी स्पष्ट केले. त्यामुळे आगामी काळात या विषयावर प्रशासन काय भूमिका घेते, हे पाहणे महत्त्वाचे ठरणार आहे.

The post जोर्वे ग्रामसभेत अप्पर तहसील कार्यालयाच्या विषयावर वादळी चर्चा, ग्रामस्थांनी जोर्वेतच कार्यालयाची मागणी केली appeared first on थोडक्यात घडामोडी.

मुंबई, २ मार्च २०२५: मुंबईच्या चेंबूरमधून एक धक्कादायक घटना समोर आली आहे, जिथे शिवसेना शिंदे गटाच्या कार्यालयात कार्यकर्त्यांनी दारू पार्टी आयोजित केली होती. या घटनेचा व्हिडिओ सोशल मीडियावर तुफान व्हायरल झाला असून, त्यावर राजकीय वर्तुळातून मोठ्या प्रमाणावर टीका केली जात आहे.

व्हिडिओमध्ये आमदार मंगेश कुडाळकर यांचे कार्यकर्ते दारू पिताना दिसत आहेत. व्हिडिओमध्ये कार्यालयातील दोन टेबलांवर दारूच्या बाटल्या आणि भरलेले ग्लास दिसत आहेत. या व्हिडिओमध्ये छत्रपती शिवाजी महाराज, बाळासाहेब ठाकरे, उपमुख्यमंत्री एकनाथ शिंदे आणि आमदार मंगेश कुडाळकर यांचे पोस्टर दिसत आहेत.

हा व्हिडिओ सोशल मीडियावर तुफान व्हायरल झाला असून, विरोधकांनी शिंदे गटावर टीकेची झोड उठवली आहे. या घटनेवर राजकीय वर्तुळातून प्रतिक्रियांची लाट आलेली आहे. विरोधकांनी शिंदे गटावर आक्षेप घेतला आहे की, अशा प्रकारे कार्यकर्त्यांची पार्टी ठेवणे शिवसेनेच्या आदर्शांशी सुसंगत नाही.

शिवसेना शिंदे गटाच्या कार्यालयात कार्यकर्त्यांच्या दारू पार्टीमध्ये शाखाप्रमुख दीपक चव्हाण, उपविभागप्रमुख संजय कदम आणि इतर पदाधिकारी सहभागी असल्याचं या व्हिडिओमध्ये दिसत आहे. या व्हिडिओनंतर शिंदे गटावर राजकीय दबाव वाढला आहे आणि या प्रकरणावर स्पष्टीकरण देण्याची मागणी विरोधकांकडून केली जात आहे.

The post मुंबईत शिवसेना शिंदे गटाच्या कार्यालयात दारू पार्टी रंगली, व्हिडिओ व्हायरल appeared first on थोडक्यात घडामोडी.

बीडच्या मस्साजोग गावचे सरपंच संतोष देशमुख हत्या प्रकरणी मंत्री धनंजय मुंडे यांचा निकटवर्तीय वाल्मिक कराड हाच सूत्रधार असल्याचे आरोपपत्र पोलिसांनी दाखल केले आहे. यामुळे धनंजय मुंडेंच्या अडचणीत वाढ होण्याची शक्यता वर्तवली जात होती. त्यातच आता राष्ट्रवादीचे नेते आणि मंत्री धनंजय मुंडेंचा उद्या राजीनामा होणार आहे, असा खळबळजनक दावा करुणा शर्मा यांनी केला आहे. त्यांनी एक फेसबुक पोस्ट केली आहे. ३ मार्च २०२५ रोजी राजीनामा होणार, असे करुणा शर्मा यांनी फेसबुक पोस्टमध्ये म्हटले आहे. या पोस्टमुळे खळबळ उडाली आहे. विशेष म्हणजे धनंजय मुंडेंचा राजीनामा दोन दिवसांपूर्वीच झालेला आहे, असा दावाही करुणा शर्मा यांनी केला आहे.

करुणा शर्मा यांनी नुकतंच न्युज चॅनलशी संवाद साधला. यावेळी त्यांनी धनंजय मुंडेंच्या राजीनाम्याबद्दल मोठा खुलासा केला आहे. “मला १०० टक्के याबद्दलची माहिती मिळालेली आहे की धनंजय मुंडे यांचा राजीनामा दोन दिवस आधीच घेतला गेला आहे. वाल्मिक कराड जर दोषी असेल तर मी स्वत: राजीनामा देईन,” असे त्यांनी सांगितले होते. त्यामुळे आता त्यांच्यासमोर काहीही राहिलेले नाही. त्यामुळे उद्या अधिवेशनाआधी त्यांचा राजीनामा होईल, असे करुणा शर्मा म्हणाल्या. धनंजय मुंडे यांचा राजीनामा अजित पवारांनी घेतला आहे. ते अजून जाहीर का झालेले नाही, याबद्दलची माहिती नाही. पण काल एसआयटी, सीआयडी चौकशीचा अहवाल समोर आला आहे. त्यामुळे १०० टक्के उद्या अधिवेशनाआधी त्यांचा राजीनामा होणार आहे, असा दावा करुणा शर्मा यांनी केला आहे.

पुढे त्या बोलल्या कि, मला १०० टक्के असं वाटतंय की अधिवेशनाआधी अजित पवार स्वत: राजीनाम्याबद्दलची घोषणा करतील. अजित पवार हे पत्रकार परिषद घेऊन याबद्दलची माहिती देतील. आता धनंजय मुंडेंकडे बोलण्यासारखे काहीही राहिलेले नाही. वाल्मिक कराड हा त्यांचा एकदम जवळचा व्यक्ती आहे. आपण त्याला त्यांची सावली असं म्हणू शकतो. त्यांच्याशिवाय धनंजय मुंडेंच्या पोटाचे पाणी हलत नाही. त्यामुळे ही १०० टक्के खरी गोष्ट आहे, असे करुणा शर्मा म्हणाल्या.

धनंजय मुंडे यांनी सांगितलं होतं की, “कोणीही दोषी असेल तर त्याला फाशीची शिक्षा झाली पाहिजे.” वाल्मिक कराड जेव्हा सरेंडर झाला, तेव्हा संतोष देशमुख हत्याप्रकरणी फाशीची शिक्षा व्हावी, असे म्हटले होते. संतोष देशमुख यांची निर्घृण हत्या झाली. या हत्येमुळे लोकांच्या मनात खूप मोठा प्रश्न निर्माण झाला आहे. बीडमध्ये वाल्मिक कराडकडून लोकांना गुंड प्रवृत्तीत परिवर्तन करायचं काम सुरु होतं. जे १० लोक आहेत, त्यात वाल्मिक कराड जे आका आहेत, त्यांचं वय हे जास्त आहे. बाकी सर्वजण २६, २७ अशा तरुण वयातील मुलं आहेत. यांची खूप मोठी टोळी आहे, असेही करुणा शर्मा यांनी सांगितले.

माझं धनंजय मुंडेंसोबत काहीही बोलणं झालं नाही. हे प्रकरण दाबण्याचा प्रयत्न सुरु आहे. गेल्या तीन महिन्यांपासून जनतेने जे आक्रमक रूप घेतलेलं आहे. पण तरीही राजीनामा व्हायला नको, यासाठी सातत्याने प्रयत्न सुरु आहेत. पण मला देवेंद्र भाऊंवर पूर्ण विश्वास आहे. याप्रकरणाची चौकशी इतक्या चांगल्या पद्धतीने सुरु आहे. एसआयटी, सीबीआय यांना चौकशीत चांगले यश मिळालेले आहे. वाल्मिक कराड हा जो खरा आका होता, पुण्यातील एका डॉनलाही अटक झाली. त्यामुळे देवेंद्र भाऊंचे खूप चांगले काम सुरु आहे. यासाठी मी त्यांची कौतुक करते, असेही करुणा शर्मा यांनी म्हटले.

The post अजित पवारांनी दोन दिवसांपूर्वीच धनंजय मुंडेंचा राजीनामा घेतला, पोस्टमुळे चर्चांना उधाण appeared first on थोडक्यात घडामोडी.

अश्विनी गिते, पुणे :  राजकीय, सामाजिक, सहकार व शिक्षण क्षेत्रातील अपार योगदानाबद्दल लोकनेते बाळासाहेब थोरात यांना “सहकारतीर्थ गुलाबराव पाटील पुरस्कार” जाहीर करण्यात आला आहे. हा प्रतिष्ठेचा पुरस्कार २ मार्च २०२५ रोजी सकाळी ११ वाजता सांगली येथील भावे नाट्यमंदिरात आयोजित एक सोहळ्यात प्रदान केला जाणार आहे. ९८ व्या अखिल भारतीय मराठी साहित्य संमेलनाच्या अध्यक्ष डॉ. तारा भवाळकर यांच्या हस्ते थोरात यांना हा सन्मान मिळणार आहे, अशी माहिती संस्थापक चेअरमन पृथ्वीराज गुलाबराव पाटील यांनी दिली.

काँग्रेसचे ज्येष्ठ नेते बाळासाहेब थोरात हे महाराष्ट्रातील राजकीय, सामाजिक, सहकार, शिक्षण व कृषी क्षेत्रातील त्यांच्या उल्लेखनीय कामगिरीसाठी प्रसिद्ध आहेत. थोरात यांना यावर्षीचा सहकारतीर्थ गुलाबराव पाटील पुरस्कार देण्याचा निर्णय घेण्यात आला आहे. हा पुरस्कार महाराष्ट्राच्या राजकारणातील सुसंस्कृत नेतृत्व आणि सहकार चळवळीतील अग्रगण्य नेते स्व. गुलाबराव पाटील यांच्या स्मृतिप्रित्यर्थ दरवर्षी गुलाबराव पाटील मेमोरियल ट्रस्टकडून दिला जातो. या पुरस्काराच्या माध्यमातून महाराष्ट्रातील विविध क्षेत्रातील उल्लेखनीय कार्य करणाऱ्यांना सन्मानित केले जाते. सहकारतीर्थ गुलाबराव पाटील पुरस्काराने याआधी अमृत उद्योग समूहाचे संस्थापक व स्वातंत्र्य सैनिक भाऊसाहेब थोरात यांना सन्मानित करण्यात आले होते.

लोकनेते बाळासाहेब थोरात यांनी राज्य मंत्रिमंडळामध्ये कृषी, महसूल, शिक्षण, जलसंधारण यांसारख्या महत्त्वपूर्ण खात्यांमध्ये केलेल्या ऐतिहासिक व पायाभूत कार्यांमुळे राज्याला नवी दिशा मिळाली. त्यांचे कार्य विशेषत: संगमनेर शहर व तालुक्याच्या पायाभूत विकासामध्ये दिसून आले आहे. तसेच निळवंडे धरण आणि कालव्यांच्या कामांमुळे दुष्काळी भागात पाणी पुरवठा करण्यात आले आहे.

थोरात यांना यापूर्वीही विविध प्रतिष्ठित पुरस्कार मिळाले आहेत, त्यात राष्ट्रपती द्रोपदी मुर्मु यांच्या हस्ते मिळालेला उत्कृष्ट संसदपटू पुरस्कार आणि यशवंतराव चव्हाण पुरस्कार यांचा समावेश आहे.

The post लोकनेते बाळासाहेब थोरात यांना सहकारतीर्थ गुलाबराव पाटील पुरस्कार जाहीर, २ मार्च रोजी सांगलीत डॉ. तारा भवाळकर यांच्या हस्ते प्रदान केला जाणार appeared first on थोडक्यात घडामोडी.