हिंगोली : शेतमजूर घेऊन जाणारा ट्रॅक्टर थेट विहीरीमध्ये कोसळून भीषण अपघात झाला आहे. नांदेड शहरापासून दहा किलो मीटर दूर असलेल्या आलेगाव शिवारात हा अपघात झाला आहे. टॅक्टर साठ फूट खोल विहिरीत कोसळला असून विहिरीमध्ये ट्रॅक्टर पूर्णपणे बुडाला आहे. ट्रॅक्टरचे केवळ एक टायर दिसत आहे. या घटनेत सात महिला शेतमजूरांचा मृत्यू झाला आहे, तर काहीजण जखमी झाले आहेत.

मिळालेल्या माहितीनुसार, हिंगोलीच्या वसमत तालुक्यातील गुंज गावातील शेतकरी महिला मजूर ट्रॅक्टरमध्ये बसून हळद काढण्यासाठी निघाल्या होत्या. दगडू शिंदे यांच्या शेतात काम करण्यासाठी हे मजूर आले होते. यावेळी चालकाचे नियंत्रण सुटल्याने ट्रॅक्टर विहिरीत कोसळला. या घटनेची माहिती मिळताच ग्रामस्थांनी घटनास्थळी धाव घेत मदतकार्य सुरू केले. यावेळी दोन महिलांसह एका पुरुषाला वाचवण्यात यश आहे. पुरुभाबाई कांबळे, पार्वती बुरड, सटवाजी जाधव यांना वाचवण्यात यश आले आहे. ताराबाई जाधव, धरूपता जाधव, मीना राऊत, ज्योती सरोदे, चौथराबाई पारधे, सरस्पती भूरड, सिमरन कांबळे अशा एकूण सात महिलांचा मूत्यू झाला आहे. हिंगोली सह नांदेड पोलीस देखील घटनास्थळी दाखल झाले आहेत.

The post ट्रॅक्टर मजुरांसह ६० फूट खोल विहिरीत कोसळला, सात महिला शेतमजूरांचा मृत्यू appeared first on थोडक्यात घडामोडी.

नांदेड : एका खाजगी शाळेच्या मुख्याध्यापकाने शाळेतील अल्पवयीन मुलीला व्हिडीओ कॉल करून अश्लील चाळे केल्याची धक्कादायक घटना नांदेडमध्ये घडली. दरम्यान, याप्रकरणी पोलिसांनी पॉक्सो अंतर्गत गुन्हा दाखल केल्यानंतर या मुख्याध्यापकाने विष प्राशन केले. शुक्रवारी सकाळी त्यांचा उपचारादरम्यान मृत्यू झाला. सुनील कारामुंगे (वय ५५) असे आत्महत्या या मुख्याध्यापकाचे नाव आहे.

मिळालेल्या माहितीनुसार, पासदगाव येथे पुष्पाजंली माध्यमिक शाळा आहे. या शाळेवर सुनील कारामुंगे हे मुख्याध्यापक पदी कार्यरत आहेत. कारामुंगे यांनी शहरातील दत्तनगर परिसरातील एका दहावीच्या विद्यार्थीनीला २६ मार्च २०२५ रोजी मोबाईलवर व्हिडिओ कॉल करून अश्लील चाळे केले. या संभाषणाची अधिकृत माहिती अद्याप समोर आलेली नाही. पीडित मुलीने याबाबत तिच्या पालकांना सांगितले. त्यानंतर गुरुवारी रात्री तिच्या कुटुंबियांनी सुनील कारामुंगे यांना मारहाण केली. दरम्यान पीडित मुलीने शिवाजीनगर पोलीस ठाण्यात मुख्याध्यापकाच्या विरोधात तक्रार दाखल केली. पीडित मुलगी ही अल्पवयीन असल्याने पोलिसांनी कारामुंगे यांच्याविरोधात पॉक्सो अंतर्गत गुन्हा दाखल केला. मुलीच्या तक्रारीवरून पोलिसांनी विनयभंग, जिवे मारण्याची धमकी, बाल लैंगिक अत्याचार अन्वये गुन्हा दाखल केला.

मारहाण तसेच गुन्हा दाखल झाल्यानंतर आपली बदनामी होईल या भीतीने मुख्याध्यापक सुनील कारामुंगे यांनी विष प्यायले. कुटुंबियांनी त्यांना तात्काळ नांदेडच्या ग्लोबल हाॅस्पिटलमध्ये दाखल केले. मात्र, १२ तास मृत्युशी झुंज दिल्यानंतर आज शुक्रवारी सकाळी कारामुंगे यांचा उपचारादरम्यान मृत्यू झाला.

आत्महत्या करण्यापूर्वी मुख्याध्यापक कारामुंगे यांनी चिठ्ठी लिहिली आहे. त्यात संबंधित मुलीच्या कुटुंबियांनी माझा मानसिक छळ केला, त्यामूळे आत्महत्या करत असल्याचा उल्लेख असल्याचे पोलीसांनी सांगितले. त्याबद्दलची पडताळणी सूरू असून पोलीस या संपूर्ण प्रकरणाची सर्व बाजूंनी चौकशी करीत आहेत. व्हिडिओ कॉल मध्ये झालेले संभाषण अद्याप स्पष्ट झाले नाही. ज्यांनी मारहाण केली त्याचीही चौकशी होईल. चौकशी दरम्यान जे दोषी आढळतील त्यांच्यावर कारवाई होईल, असे पोलिसांनी सांगितले.

The post मुख्याध्यापकाने व्हिडीओ कॉल करून अश्लील चाळे केल्याचा विद्यार्थीनीचा आरोप, मुख्याध्यापकाची विष पिऊन आत्महत्या appeared first on थोडक्यात घडामोडी.

नांदेड : गेल्या 48 तासांपासून नांदेड जिल्ह्यावर आभाळ कोसळले असून रविवारी जिल्ह्याच्या 93 पैकी 45 मंडळांमध्ये अतिवृष्टी झाली आहे. तर शनिवारी 26 मंडळामध्ये अतिवृष्टी झाली होती. यामध्ये शेतीचे प्रचंड नुकसान झाले असून लागवडीखालील दोन लाख हेक्टरपेक्षा अधिक क्षेत्राचे नुकसान झाल्याचा प्राथमिक अंदाज असल्याची माहिती, जिल्हाधिकारी अभिजीत राऊत यांनी दिली.

एक जण वाहून गेला
तथापि, नांदेड तालुक्यात दुपारी ४ वाजताच्या दरम्यान पासदगाव पुलावरून पाणी जात होते. प्रशासनातील कर्मचाऱ्यांनी वारंवार सांगून सुद्धा एका व्यक्तीने प्रशासनाचे काहीच न ऐकता पूल ओलांडण्याच्या प्रयत्नात तो वाहून गेला आहे. त्याचा शोध सुरु आहे.

२५ जणांची सुटका
उंचाडा येथे गावाजवळ कयाधु नदीच्या परीसरात जवळपास २५ लोक अडकले होते. जिल्‍हा आपत्ती व्यवस्थापन प्राधिकरण जिल्हाधिकारी कार्यालय नांदेड कडून राज्य आपत्ती प्रतिसाद दल ची तुकडी त्या ठिकाणी पाठवून शोध व बचाव कार्य करुन २५ जणांना पुरातून सुखरुप बाहेर काढले.

२५ जनावरे मृत्युमुखी
२५ जनावरे मृत्युमुखी पडली असून काही प्रमाणात घरांचेही नुकसान झाले आहे. उद्या पाऊस थांबल्यास नुकसानीचे पंचनामे सुरू होतील असे जिल्हाधिकाऱ्यांनी सांगितले.

गोदावरी नदीची नांदेड शहरातील धोक्याची पातळी ३५४ मीटर आहे. संध्याकाळी ८ वाजता ही पातळी ३५२.७५ होती. या परिसरात सतर्कतेचा इशारा दिला आहे. बचाव पथक तैनात असून नागरिकांनी घाबरून न जाता प्रशासनाच्या संपर्कात राहण्याचे आवाहन करण्यात आले आहे.

नांदेड, अर्धापूर सर्वाधिक पाऊस
नांदेड शहर, अर्धापूर, हदगाव, देगलूर, मुखेड, कंधार, लोहा, नायगाव, या तालुक्यांमध्ये जोरदार पर्जन्यवृष्टी झाली. अर्धापूर तालुक्यातील अर्धापूर,दभाद, भरड, मालेगाव या मंडळामध्ये सर्वाधिक पाऊस झाला अर्धापूर मध्ये 170 मिलिमीटर पाऊस बारा तासात झाला आहे. तर नांदेड उत्तर व नांदेड दक्षिण दोन्ही भागात सरासरी 125 मिलिमीटर पाऊस झाला आहे. त्यामुळे शहरात सखल भागामध्ये मोठ्या प्रमाणात पाणी साचले होते. दुपारी नांदेड शहरात अनेक भाग जलमय झाले होते. गोदावरी नदी काठावरील अनेक वस्त्यांमध्ये पाणी शिरले. वसरणी पंचवटीनगर साईबाबा कमान जवळ एका इमारतीमध्‍ये दुस-या मजल्यापर्यंत पाणी गेले होते. या इमारतीमध्ये अडकलेल्या दोन व्यक्तिंना बचाव पथकाने सुखरुप बाहेर काढले.

पावसाने जिल्ह्यातील २८ कच्च्या घरांचे अंशतः नुकसान झाले असून सखल भागातील अनेक घरांमध्ये पाणी शिरले आहे. जिल्ह्यातील अनेक नाल्यांना दुपारी पूर आल्यामुळे अनेक गावांचा संपर्क तुटला होता.

धरणांमध्ये मुबलक साठा
नांदेड जिल्ह्यातील २ सप्टेबर रोजी दुपारी ऊर्ध्व पेनगंगा प्रकल्प- ईसापूर धरणामध्ये पाणी मोठ्या प्रमाणात आले असले तरी धरणाची दारे मात्र उघडलेली नाही. शंकरराव चव्हाण विष्णूपरी प्रकल्प नांदेडची १४ उघडण्यात आली होती.

अपर मानार लिंबोटी धरणाची पंधरा पैकी ९ दरवाजे उघडलेले आहेत.लोअर मानार बारुळ धरणाला अॅटोमॅटीक गेट आहेत. त्यामुळे येणारा विसर्ग जशाला तसा पुढे जातो आहे. बळेगाव हाय लेव्‍हल बॅरेजचे एकूण १४ दरवाजे उघडलेले आहेत. आमदुरा हाय लेव्‍हल बॅरेजचे सर्व १६ दरवाजे उघडलेले आहेत. बाभळी हाय लेव्‍हल बॅरेजचे सर्व १४ दरवाजे उघडलेले आहेत. दिग्रस धरणाचे १४ दरवाजे उघडलेले आहे. जायकवाडी पासून बाभळीपर्यत सर्व गोदावरी वरील बंधाऱ्यांचे दार उघडे आहेत.

पालकमंत्र्यांकडून आढावा
ग्रामविकास मंत्री तथा जिल्ह्याचे पालकमंत्री गिरीश महाजन यांनी दुपारी जिल्हाधिकारी व अन्य प्रमुख अधिकाऱ्यांशी संपर्क साधून जिल्ह्यातील पूर परिस्थितीचा आढावा घेतला शक्य तेवढ्या लवकर नुकसानीचे पंचनामे सुरू करण्याबाबतचे निर्देश त्यांनी दिले.

The post नांदेड जिल्ह्यात अतिवृष्टी, एक जण वाहून गेला, पालकमंत्र्यांकडून पूर परिस्थितीचा आढावा appeared first on थोडक्यात घडामोडी.

नांदेड : हिमायतनगर तालुक्यातील शिवसेना ठाकरे गटाच्या माजी नगराध्यक्षावर चाकूने हल्ला करण्यात आल्याची घटना घडली आहे. भाजपा युवा मोर्चाचे माजी तालुकाध्यक्षाने हा हल्ला केल्याचा आरोप माजी नगराध्यक्षाने केला आहे. राजकीय पूर्ववैमनस्य आणि वैयक्तिक बदनामी केल्याच्या रागातून हा प्रकार घडल्याची माहिती आहे. कुणाल राठोड असं जखमी झालेल्या ठाकरे गटातील नगराध्यक्षाचं नाव आहे.

कुणाल राठोड हे शिवसेना ठाकरे गटाचे माजी नगराध्यक्ष आहेत. मंगळवारी रात्री ११ वाजेच्या सुमारास ते आपल्या मित्रासोबत हिमायतनगर शहरातील श्री. परमेश्वर मंदिर मंगल कार्यालयाजवळ चर्चा करत बसले होते. काही वेळानंतर भारतीय जनता युवा मोर्चाचे माजी तालुकाध्यक्ष राम सूर्यवंशी हा तिथे आला. यावेळी दोघांमध्ये शाब्दिक वाद झाला. त्यानंतर सूर्यवंशी याने चाकूने कुणाल राठोड याच्या पायावर वार केला. यामध्ये ते जखमी झाले. घटनेनंतर त्यांना उपचारासाठी हिमायतनगर येथील प्राथमिक आरोग्य केंद्रात दाखल करण्यात आले होत. मात्र रक्तस्त्राव होत असल्याने त्यांना नांदेडच्या एका खासगी रुग्णालयात हलविण्यात आले.

ठाकरे गटाचे माजी नगराधक्ष कुणाल राठोड आणि भाजपा युवा मोर्चाचे माजी तालुकाध्यक्ष राम सूर्यवंशी हे जिवलग मित्र होते. काही कारणावरून त्यांच्यात दुरावा निर्माण झाला. मागील चार ते पाच वर्षांपासून त्यांच्यात राजकीय पूर्ववैमनस्यातून शाब्दिक वाद देखील होत असायचे. त्यातच काही दिवसांपासून कुणाल हा वैयक्तिक बदनामी करायचा असा संशय राम सूर्यवंशीला होता. याच कारणावरून सूर्यवंशी याने कुणालवर चाकूने हल्ला केला असावा असा संशय व्यक्त केला जात आहे. दरम्यान पोलीस ठाण्यात एकमेकांविरोधात गुन्हा दाखल करण्यात आला आहे. या घटनेनं संपूर्ण नांदेड जिल्ह्यात खळबळ उडाली आहे.

The post धक्कादायक घटना! ठाकरे गटाच्या माजी नगराध्यक्षावर चाकूहल्ला, राजकीय पूर्ववैमनस्य आणि वैयक्तिक बदनामीच्या रागातून हल्ला appeared first on थोडक्यात घडामोडी.

मुंबई, दि.२६ : राज्यातील लोकसभा निवडणुकीच्या दुसऱ्या टप्प्यातील मतदान आज सकाळी ७ वाजल्यापासून सूरु झाले आहे. दुसऱ्या टप्प्यातील एकूण आठ मतदार संघात सकाळी ९ वाजेपर्यंत सरासरी ७.४५ टक्के मतदान झाले आहे.

पहिल्या टप्प्यातील एकूण ८ लोकसभा मतदारसंघनिहाय टक्केवारी पुढीलप्रमाणे :

वर्धा – ७.१८ टक्के

अकोला – ७.१७ टक्के

अमरावती -६.३४ टक्के

बुलढाणा – ६.६१ टक्के

हिंगोली – ७.२३ टक्के

नांदेड – ७.७३ टक्के

परभणी – ९.७२ टक्के

यवतमाळ – वाशिम – ७.२३ टक्के

The post लोकसभा निवडणुकीच्या दुसऱ्या टप्प्यातील आठ मतदारसंघात सकाळी ९ वाजेपर्यंत ७.४५ टक्के मतदान appeared first on थोडक्यात घडामोडी.

नांदेड, दि. 21 एप्रिल :- लोकसभा निवडणुकीच्‍या अनुषंगाने नांदेड जिल्‍ह्यात स्‍वीप अंतर्गत मतदार जागृतीचे विविध उपक्रम सुरु आहेत. या उपक्रमाच्‍या अनुषंगाने सर्वोकृष्‍ट कामगिरी व उत्‍कृष्‍ट मतदान टक्‍केवारी करणा-या गावांचा, वार्डचा त्‍याचप्रमाणे मतदानासाठी नियुक्‍त सर्वस्‍तरीय अधिकारी व कर्मचारी यांचा सन्मान करण्‍यात येणार आहे.

नांदेड जिल्‍ह्यात प्रत्‍येक विधानसभा मतदार संघातील सर्वोकृष्‍ट मतदान टक्‍केवारी असलेल्‍या तीन मतदान केंद्राचा सन्‍मान जिल्‍हास्‍तरावर करण्‍यात येणार आहे. यामध्‍ये बिलओ, मतदान कर्मचारी, मतदान केंद्रावरील पोलीस कर्मचारी , झोनल अधिकारी, झोनल पोलीस अधिकारी, बिलओ सुपरवायझर, त्‍या गावातील अथवा वार्डमधील गावस्‍तरीय व वार्डस्‍तरीय अधिकारी यांचा सन्‍मान करण्‍यात येणार आहे.

तसेच सर्वोकृष्‍ट कामगिरी करणारे मतदान केंद्र ज्‍या ठिकाणी स्थित आहे. त्‍या गावाच्‍या ग्रामसभेचा, वार्डच्‍या वार्ड सभेचा सन्‍मान करण्‍यात येणार आहे. तसेच 75 टक्‍के पेक्षा जास्‍त मतदान टक्‍केवारी साध्‍य करणा-या मतदान केंद्राचा प्रोत्‍साहनपर सत्‍कार करण्‍यात येईल. त्‍यामध्‍ये तेथील बीएलओ, मतदान कर्मचारी, पोलीस कर्मचारी , झोनल अधिकारी, झोनल पोलीस अधिकारी, बीएलओ पर्यवेक्षक तसेच स्‍थानिक ग्रामसभा,वार्डसभा यांचा सन्‍मान करण्‍यात येणार आहे. तसेच जिल्‍ह्यातील सर्वोकृष्‍ट मतदान टक्‍केवारी साध्‍य करणा-या तीन मतदान केंद्राचा विशेष पारितोषिक देवून सन्‍मान करण्‍यात येणार आहे, या संदर्भातील एक पत्र जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मीनल करनवाल, मनपा आयुक्त डॉ. महेशकुमार डोईफोडे, यांनी सर्व कर्मचाऱ्यांसाठी जारी केले आहे.

The post ७५ टक्क्‍यापेक्षा जास्‍त मतदान टक्केवारी साध्‍य करणाऱ्या केंद्राचा होणार सन्‍मान appeared first on थोडक्यात घडामोडी.

नांदेड : प्रत्येक घटकातील व्यक्तींना विकासाची संधी मिळावी यासाठी प्रधानमंत्री नरेंद्र मोदी यांनी असंख्य योजना यशस्वी करून दाखविल्या आहेत. सर्वांचा विकास हे अंतिम ध्येय बाळगुन आयुष्यमान भारत, प्रधानमंत्री आवास योजना, प्रधानमंत्री स्वनिधी योजना, उज्वला गॅस अशा कितीतरी लोककल्याणकारी योजनांनी सर्वसामान्यांना बळ दिले. आजही विकासाच्या प्रवाहाबाहेर असणाऱ्या वंचितांपर्यंत शासकीय योजना पोहोचाव्यात यादृष्टिने विकसित भारत संकल्प यात्रा अधिक महत्त्वाची असल्याचे प्रतिपादन राज्याचे ग्रामविकास व पंचायतराज, पर्यटन मंत्री तथा नांदेड जिल्ह्याचे पालकमंत्री गिरीश महाजन यांनी केले.

महानगरपालिका क्षेत्रातील विकसित भारत संकल्प यात्रेच्या चित्ररथाचे उद्घाटन पालकमंत्री गिरीश महाजन यांच्या हस्ते आज यात्री निवास परिसर नांदेड येथे करण्यात आले. यावेळी खासदार प्रताप पाटील चिखलीकर, आमदार राम पाटील रातोळीकर, जिल्हाधिकारी अभिजीत राऊत, मुख्य कार्यकारी अधिकारी मीनल करनवाल, मनपा आयुक्त डॉ. महेशकुमार डोईफोडे, मनपाचे अतिरिक्त आयुक्त गिरीश कदम, नोडल अधिकारी तथा उपायुक्त डॉ. पंजाब खानसोळे व पदाधिकारी यांची उपस्थिती होती.

जिल्हा प्रशासन व नांदेड शहर महानगरपालिकेच्यावतीने विकसीत भारत संकल्प यात्रा नांदेड महानगराच्या प्रत्येक भागात पोहचून वंचितांच्या अडीअडचणी समजून घेणार आहे. ज्या पात्र लाभार्थ्यांना लाभ मिळाला नाही अशा लाभार्थ्यांची नावे या यात्रेत नोंदविली जाऊन त्यांना लाभ दिले जाणार आहेत. दिनांक 30 डिसेंबर पर्यंत ही यात्रा महानगरपालिकेच्या 13 प्रभागातून जाणार असल्याची माहिती यावेळी मनपा आयुक्त डॉ. महेशकुमार डोईफोडे यांनी दिली.

या यात्रेत मनपा क्षेत्रात 419 जणांना आयुष्यमान भारत कार्डचे वाटप करण्यात आले. 255 जणांची वैद्यकीय तपासणी करण्यात आली. पीएम स्वनिधी या योजनेत 10 हजार रुपये कर्जासाठी 266 लाभार्थ्यांचे अर्ज भरुन घेण्यात आले. या मोहीमेत आरोग्य, कृषी, आवास, आयुष्यमान भारत, पीएम गरीब कल्याण अन्न योजना, पीएम विश्वकर्मा, जन धन योजना, अटल पेन्शन योजना, बीमा योजना, पीएम पोषण अभियान, दिनदयाल अंत्योदय योजना आदीचा समावेश आहे. यावेळी विविध योजनेच्या पात्र लाभार्थ्यांना पालकमंत्री यांच्या हस्ते प्रमाणपत्र देण्यात आले.

The post वंचित व गरजू लाभार्थ्यांना विकासाच्या प्रवाहात घेण्यासाठी विकसित भारत संकल्प यात्रा महत्त्वाची – पालकमंत्री गिरीश महाजन appeared first on थोडक्यात घडामोडी.

नांदेड : कृषी क्षेत्राच्या विकासात लहान – मोठ्या रस्त्यांची सहज, सुलभ उपलब्धता ही अत्यंत आवश्यक बाब आहे. अनेक गावात एक-दोन शेतकऱ्यांच्या अडमुठेपणामुळे शेकडो शेतकऱ्यांना शेतासाठी मार्गच उरत नाही. शेतीच्या इतर प्रश्नासमवेत महसूल विभागाच्या दृष्टीने शेतरस्ते व पांदण रस्त्याची जबाबदारी तेवढीच महत्त्वाची असून वेळप्रसंगी तहसीलदारांनी आपल्याला मिळालेल्या न्यायालयीन अधिकाराची अधिक काटेकोर अमंलबजावणी करावी, असे स्पष्ट निर्देश राज्याचे महसूल, पशुसंवर्धन, दुग्धव्यवसाय विकास मंत्री राधाकृष्ण विखे पाटील यांनी केले.

जिल्हाधिकारी कार्यालय परिसरातील नियोजन भवन येथे आयोजित बैठकीत ते बोलत होते. यावेळी खासदार प्रताप पाटील चिखलीकर, आमदार राम पाटील रातोळीकर, आमदार राजेश पवार, आमदार बालाजी कल्याणकर, संतुकराव हंबर्डे, जिल्हाधिकारी अभिजीत राऊत, जिल्हा परिषदेच्या मुख्य कार्यकारी अधिकारी मीनल करनवाल, सर्व विभागाचे प्रमुख अधिकारी उपस्थित होते.

जिल्ह्यातील आपत्तीच्या काळात महसूल विभागाने आपली जबाबदारी समर्थपणे पार पाडल्याबद्दल महसूल मंत्री राधाकृष्ण विखे पाटील यांनी समाधान व्यक्त केले. शासनाच्या योजना, सेवा, सुविधा या जनतेपर्यंत जलद पोहचण्यासमवेत त्याचा लाभ देण्यासाठी इतर विभागांशी परस्पर समन्वय हा अधिक महत्त्वाचा असतो. यासाठी राजस्व अभियान, ई-चावडी, मिशन 90 दिवस, सलोखा योजना याची प्रभावी अंमलबजावणी महत्त्वाची आहे. देशाप्रती आपली कटिबद्धता अधिक दृढ व्हावी यादृष्टीने “मेरी माटी मेरा देश” हे अभियान जिल्ह्यातील किमान 1 लाख मुलांपर्यंत पोहोचविण्याचे निर्देश त्यांनी विभाग प्रमुखांना दिले. तलाठी, तहसिलदार, कृषि अधिकारी, पशुसंवर्धन विभागाचे अधिकारी, जिल्हा परिषदेचे अधिकारी यांनी समन्वय ठेवून मिशन मोडवर काम केले पाहिजे, अशी अपेक्षा त्यांनी व्यक्त केली.

खासदार प्रताप पाटील चिखलीकर यांनी शेतरस्ते, पांदणरस्त्यांना गती मिळावी यादृष्टीने जलद नियोजन आवश्यक असल्याचे महसूल मंत्री राधाकृष्ण विखे पाटील यांच्या निदर्शनास आणून दिले. याचबरोबर लालकंधारी ही बैलाची जात कंधारची ओळख आहे. या भागातूनच लालकंधारी सर्वत्र पोहोचली. गौळ येथे शासनाची यासाठी जागा असून हे केंद्र कंधार येथे होण्याबाबत आग्रही मागणी त्यांनी महसूल मंत्री तथा पशु व संवर्धन मंत्री राधाकृष्ण विखे पाटील यांच्याकडे केली. आमदार राम पाटील रातोळीकर, आमदार राजेश पवार, आमदार बालाजी कल्याणकर यांनी शेतरस्ते, पांदणरस्ते व शेतीच्या विम्याची रक्कम शेतकऱ्यांना मिळावी यासाठी महसूल मंत्र्यांचे लक्ष वेधले.

The post शेतरस्ते, पांदण रस्तेप्रश्नी तहसीलदारांनी आपल्या अधिकाराची काटेकोर अंमलबजावणी करावी – राधाकृष्ण विखे पाटील appeared first on थोडक्यात घडामोडी.

नांदेड : हसण्याच्या कारणावरुन एका फळ विक्रेत्याने तरुणाचे दोन्ही हात छाटल्याची भयंकर घटना समोर आली आहे. नांदेडच्या भाग्यनगर परिसरात बुधवारी दुपारी ही घटना घडली. मोहम्मद अझर मोहम्मद अजीज असं पीडित तरुणाचं नाव असून मोहम्मद तोहीद हा आरोपी फरार आहे. शहरातील डी मार्ट परिसरात ही घटना घडली. या प्रकरणी भाग्यनगर पोलिसांनी गुन्हा दाखल केला आहे.

मोहम्मद अजहर मोहम्मद अजीज हा तरुण बुधवारी डी मार्ट परिसरातील आठवडी बाजारात लसूण विक्रीसाठी गेला होता. त्याच्याच शेजारी मोहम्मद तोहीद हा तरुण फळ विक्री करत होता. यावेळी हसण्याच्या कारणावरुन दोघांमध्ये वाद झाला. हा वाद एवढा वाढला की, आरोपी मोहम्मद तोहीद याने बाजारातून कोयता खरेदी केला आणि दुपारी चार वाजेच्या सुमारास मोहम्मद अजहर मोहम्मद अजीज याचे मनगटापासून दोन्ही हाथ कोयत्याने छाटले. त्यानंतर त्याच्या पायावर आणि पाठीवर कोयत्याने वार केले. या भयंकर घटनेनंतर परिसरात एकच खळबळ उडाली.

घटनेची माहिती मिळताच पोलिसांनी तात्काळ घटनास्थळी धाव घेतली. दरम्यान, जखमी तरुणाला तात्काळ खाजगी रुग्णालयात दाखल करण्यात आले. मनगटापासून तुटलेले हात‎ जोडण्याचे डॉक्टरांसमोर मोठे आव्हान‎ होते. मात्र डॉ. मनीष कत्रुवार, सुशांत ‎चौधरी, डॉ. श्रीहरी गुट्टे यांनी तरुणाच्या हातांवर यशस्वी‎ शस्त्रक्रिया करून सहा ‎तासांत दोन्ही हात जोडले.‎

या प्रकरणी भाग्यनगर पोलिसांनी गुन्हा दाखल केला आहे. आरोपी फरार असून पोलीस त्याचा शोध घेत आहेत. विशेष म्हणजे महिनाभरापूर्वी देखील ‎भाग्यनगर ठाण्याच्या हद्दीत हात‎ छाटल्याची घटना घडली होती.‎ त्यामुळे परिसरात घबराटीचे वातावरण निर्माण झाले आहे.

The post नांदेड हादरलं! हसण्याच्या कारणावरुन फळ विक्रेत्याने छाटले तरुणाचे दोन्ही हात appeared first on थोडक्यात घडामोडी.

नांदेड : किनवट तालुक्यातील शिवनी येथील पेट्रोल पंपाजवळ पिकअप पलटी होऊन भीषण अपघात झाला. रविवारी हदगाव तालुक्यातील हस्तरा बोरगाव येथील २8 जण तेलंगणा राज्यातील आडेली माता देवीचा नवस फेडण्यासाठी जात होते. मात्र अचानक त्यांच्या पिकअपसमोर एक शेळी आल्याने चालकाचे नियंत्रण सुटून पिकअप पलटी झाला. या भीषण अपघातात एकूण २८ जण जखमी झाले आहेत. यातील १९ जण गंभीर जखमी झाले असून रुग्णांना उपचारासाठी नांदेडला हलवण्यात आलं आहे. इतर जखमींवर हिमायतनगर येथील ग्रामीण रुग्णालयात उपचार सुरू आहेत.

याबाबत मिळालेल्या माहितीनुसार, हदगाव तालुक्यातील हस्तरा बोरगाव येथील एकाच कुटुंबातील नागरिक तेलंगणा राज्यातील आडेली माता देवीचा नवस फेडण्यासाठी गावातील काही लोकांना सोबत घेऊन पिकअपने निघाले होते. मात्र शिवनी येथे पिकअप समोर अचानक एक शेळी आल्याने भीषण अपघात झाला. या अपघातात २८ जण जखमी झाले. दरम्यान, हदगाव हिमायतनगर तालुक्याचे आमदार माधवराव पाटील जवळगावकर यांच्या मदतीने तात्काळ ५ ॲम्बुलन्सची व्यवस्था करून गंभीर जखमींना नांदेडमध्ये रुग्णालयात दाखल करण्यात आले.

जखमींची नावे :

1. साहेबराव रामराव जाधव
2. कोंडाबाई रामराव जाधव
3. लोभाजी रामराव जाधव
4. आशा लोभाजी जाधव
5. अंजली लोभाजी जाधव
6. प्रभाकर रामराव जाधव
7. सुभाष रामराव जाधव
8. भाग्यश्री प्रभाकर जाधव
9. अंकिता साहेबराव जाधव
10. सुमन सुभाष जाधव
11. परमेश्वर सुभाष जाधव
12. संदीप सुभाषराव जाधव
13. गायत्री संदीप जाधव
14. रेखा सुभाष जाधव
15. धनंजय विठ्ठलराव जाधव
16. गोदावरी शिवराम जाधव
17. चतुराबाई किशन उपरे
18. मंजुषा प्रभाकर सोळंके
19. खंडेराव बालाजी सोळंके
20. भागवत भगवान सोळंके
21. प्रभाकर दत्ताराव सोळंके
22. गोदावरी देवानंद सोळंके
23. शंकर नारायण सरोदे
24. कौशल्य शंकर सरोदे
25. प्रमोद वानखेडे
26. कौशल्या प्रमोद वानखेडे
27. रितेश प्रमोद वानखेडे
28. गणेश वानखेडे

The post अचानक समोर शेळी आल्याने पिकअपचा भीषण अपघात, देवीचा नवस फेडण्यासाठी फेडण्यासाठी निघालेले 28 जण जखमी appeared first on थोडक्यात घडामोडी.