मुंबई : हरियाणवी मनोरंजन क्षेत्रातील उदयोन्मुख अभिनेत्री दिव्यांका सिरोही हिच्या आकस्मिक निधनाने चाहत्यांमध्ये शोककळा पसरली आहे. मंगळवारी रात्री उशिरा गाझियाबाद येथील निवासस्थानी तिला अचानक हृदयविकाराचा झटका आला. कुटुंबीयांनी तातडीने तिला रुग्णालयात नेले, मात्र डॉक्टरांनी पोहोचताच तिला मृत घोषित केले.

या घटनेमुळे तिचे चाहते आणि सहकारी कलाकार मोठ्या धक्क्यात आहेत. सोशल मीडियावर श्रद्धांजलींचा वर्षाव होत असून अनेकांनी तिच्या अकाली जाण्याबद्दल दु:ख व्यक्त केले आहे. कुटुंबीयांकडून अद्याप अधिकृत निवेदन जाहीर करण्यात आलेले नाही.

बुधवारी सकाळी गाझियाबादमध्ये तिच्यावर अंत्यसंस्कार पार पडले. दिव्यांका मूळची उत्तर प्रदेशातील बुलंदशहर येथील होती. आपल्या मेहनतीच्या जोरावर तिने हरियाणवी संगीत आणि चित्रपटसृष्टीत स्वतःची ओळख निर्माण केली होती.

तिने आपल्या कारकिर्दीत लोकप्रिय गायक आणि कलाकार मासूम शर्मा यांच्यासोबतही काम केले होते. अनेक हरियाणवी म्युझिक व्हिडिओंमध्ये तिची झलक पाहायला मिळाली होती, ज्यामुळे ती तरुण प्रेक्षकांमध्ये विशेष लोकप्रिय झाली होती.

१९ नोव्हेंबर १९९६ रोजी जन्मलेल्या दिव्यांकाने मेरठ येथील चौधरी चरण सिंग विद्यापीठातून बीसीए पदवी पूर्ण केली होती. त्यानंतर तिने सिक्कीम मणिपाल विद्यापीठातून एमबीए शिक्षण घेतले. तिच्या कुटुंबात भाऊ हिमांशू आणि बहिणी दीपांशू व जसमीत आहेत.

दिव्यांकाच्या यशामागे सोशल मीडियाचा मोठा वाटा होता. एका मुलाखतीत तिने सांगितले होते की, टिकटॉकवरील तिचा एक व्हिडिओ प्रचंड व्हायरल झाला होता, ज्याला जवळपास २ कोटी व्ह्यूज मिळाले होते. त्यानंतर तिची लोकप्रियता झपाट्याने वाढली आणि तिचे लाखो फॉलोअर्स तयार झाले.

इन्स्टाग्रामवर तिचे सुमारे १३ लाख फॉलोअर्स होते. तिची शेवटची पोस्ट १९ मार्च रोजी शेअर करण्यात आली होती, ज्यामध्ये ती ‘बरसाना मिला है’ या गाण्यावर रील करताना दिसली होती. तिच्या अचानक जाण्यामुळे चाहत्यांमध्ये हळहळ व्यक्त केली जात आहे.

The post लोकप्रिय अभिनेत्री दिव्यांका सिरोहीचे आकस्मिक निधन, चाहत्यांमध्ये शोककळा appeared first on थोडक्यात घडामोडी.

मुंबई : मल्याळम चित्रपटसृष्टीतील अभिनेता कमल रॉय यांचे वयाच्या 54व्या वर्षी चेन्नई येथे हृदयविकाराच्या झटक्याने निधन झाले. त्यांच्या अकाली जाण्याने चित्रपट आणि दूरदर्शन विश्वात हळहळ व्यक्त केली जात आहे.

कमल रॉय हे प्रसिद्ध नाट्य अभिनेते छावरा व्ही.पी. नायर आणि विजयालक्ष्मी यांचे पुत्र होते. कलावंतांचा वारसा लाभलेल्या या कुटुंबात त्यांचे आजोबा सुरनंद कुंजन पिल्लई हे सुप्रसिद्ध कोशकार, इतिहासकार, कवी आणि साहित्य समीक्षक म्हणून ओळखले जात होते.

चित्रपटसृष्टीत काही काळ सक्रिय नसतानाही कमल रॉय यांचा चाहतावर्ग मोठा होता. विशेषतः खलनायकाच्या भूमिकांमधून त्यांनी प्रेक्षकांच्या मनात वेगळी ओळख निर्माण केली होती. त्यांच्या अभिनयातील तीव्रता आणि पडद्यावरील प्रभावी उपस्थिती यासाठी ते ओळखले जात होते.

कमल रॉय यांनी ‘सयुज्यम’ (१९७९), ‘कोलिलक्कम’ (१९८१), ‘मंजू’ (१९८३), ‘किंगिनी’ (१९९२), ‘कल्याण सौगंधिकम’ (१९९६), ‘वाचलम’ (१९९७), ‘शोभनम’ (१९९७) आणि ‘द किंगमेकर लीडर’ (२००३) अशा अनेक चित्रपटांमध्ये महत्त्वाच्या भूमिका साकारल्या. मोहनलाल अभिनीत ‘युवजनोत्सवम’ (१९८६) या चित्रपटातील ‘एनुमेंटे कन्नुनिराल’ या गाजलेल्या गीतातही ते झळकले होते. याशिवाय ‘शारदा’सारख्या दूरदर्शन मालिकांमधूनही त्यांनी अभिनयाची छाप पाडली.

दिग्दर्शक विनयन दिग्दर्शित ‘कल्याण सौगंधिकम’ या चित्रपटातील कमल रॉय यांच्या खलनायकाच्या भूमिकेचे विशेष कौतुक झाले होते. त्यांच्या निधनावर शोक व्यक्त करताना विनयन यांनी सोशल मीडियावर लिहिले की, ज्येष्ठ अभिनेत्री सुकुमारी यांनी कमल रॉय यांच्याबद्दल सांगितल्यानंतरच त्यांना या चित्रपटात संधी देण्यात आली होती.

अभिनेत्री उर्वशी, कल्पना आणि कलारंजिनी यांचे बंधू असलेल्या कमल रॉय यांचे करिअर त्यांच्या बहिणींइतके दीर्घ किंवा गाजलेले नसले, तरी त्यांनी आपल्या अभिनयाने वेगळी ओळख निर्माण केली होती. त्यांच्या निधनाने मल्याळम चित्रपटसृष्टीतील एक परिचित चेहरा काळाच्या पडद्याआड गेला आहे.

The post अभिनेता कमल रॉय यांचे निधन, वयाच्या 54व्या वर्षी घेतला अखेरचा श्वास appeared first on थोडक्यात घडामोडी.

मुंबई : बॉलिवूड अभिनेता अक्षय कुमार यांच्या ताफ्यातील गाडीचा मुंबईत भीषण अपघात झाल्याची माहिती समोर आली आहे. हा अपघात जुहू परिसरात घडला असून, अक्षय कुमार आणि त्यांची पत्नी एका गाडीतून विमानतळावरून घरी जात असताना ही घटना घडली. सुदैवाने अक्षय कुमार आणि त्यांच्या पत्नीला कोणतीही इजा झाली नसल्याचे सांगण्यात येत आहे.

मिळालेल्या माहितीनुसार, अक्षय कुमार यांच्या गाडीच्या मागे त्यांच्या सुरक्षारक्षकांची कार होती. दरम्यान, एका मर्सिडीज कारचे नियंत्रण सुटल्याने तिने प्रथम एका ऑटो रिक्षाला जोरदार धडक दिली. त्यानंतर ही कार थेट अक्षय कुमार यांच्या सुरक्षारक्षकांच्या वाहनावर आदळली. ही धडक इतकी तीव्र होती की सुरक्षारक्षकांची कार रस्त्यावर पलटी झाली. पुढे अक्षय कुमार यांच्या गाडीला किरकोळ धक्का बसल्याचेही कळते.

अपघाताची माहिती मिळताच पोलिसांनी तातडीने घटनास्थळी धाव घेतली. या अपघातात जखमी झालेल्या ऑटो चालकाला तात्काळ रुग्णालयात दाखल करण्यात आले. विशेष म्हणजे, अक्षय कुमार यांनी स्वतः त्यांच्या सुरक्षारक्षकांना जखमी ऑटो चालकाला त्वरित वैद्यकीय मदत देण्याच्या सूचना दिल्याची माहिती आहे.

 

View this post on Instagram

 

A post shared by F I L M Y G Y A N (@filmygyan)

अपघातानंतर परिसरात नागरिकांची मोठी गर्दी जमली होती. अनेकांनी या घटनेचे व्हिडीओ मोबाईलमध्ये चित्रीत केले असून ते सध्या सोशल मीडियावर मोठ्या प्रमाणात व्हायरल होत आहेत. काही वेळानंतर अक्षय कुमार घटनास्थळावरून निघून गेले, मात्र त्यांचे सुरक्षारक्षक तेथेच थांबले होते.

या अपघातप्रकरणी अद्याप कोणतीही एफआयआर दाखल करण्यात आलेली नाही. अपघात मर्सिडीज चालकाच्या चुकीमुळे झाला की अन्य काही कारण होते, याचा तपास पोलीस करत आहेत. अक्षय कुमार किंवा त्यांच्या टीमकडून अद्याप कोणतीही अधिकृत प्रतिक्रिया देण्यात आलेली नाही. दरम्यान, सुरक्षारक्षकांच्या गाडीचे मोठे नुकसान झाले असून जखमी ऑटो चालकावर रुग्णालयात उपचार सुरू आहेत.

The post अक्षय कुमारच्या गाडीला धडक! जुहूमध्ये थरारक अपघात, व्हिडीओ व्हायरल appeared first on थोडक्यात घडामोडी.

मुंबई : मराठी सिनेइंडस्ट्री आणि रंगभूमीवर आपल्या शांत, अभ्यासू कामामुळे ओळख निर्माण करणारे अभिनेता व दिग्दर्शक रणजित पाटील यांचे हृदयविकाराच्या तीव्र झटक्याने निधन झाले. अवघ्या ४२ व्या वर्षी त्यांनी जगाचा निरोप घेतला. त्यांच्या अचानक जाण्याने संपूर्ण मराठी कलाविश्वावर शोककळा पसरली आहे.

मिळालेल्या माहितीनुसार, मुंबईतील त्यांच्या राहत्या घरी रणजित पाटील यांना हृदयविकाराचा तीव्र झटका आला. त्यांना तातडीने जवळच्या रुग्णालयात दाखल करण्यात आले, मात्र उपचार सुरू होण्यापूर्वीच त्यांची प्राणज्योत मालवली.

रणजित पाटील यांच्या पश्चात त्यांची पत्नी, आई-वडील तसेच मोठा आप्तपरिवार आहे. त्यांच्या पार्थिवावर त्यांच्या मूळ गावी कोल्हापूर येथे अंत्यसंस्कार करण्यात येणार आहेत.

अभिनयासोबतच दिग्दर्शन क्षेत्रातही रणजित पाटील यांनी आपली वेगळी छाप उमटवली होती. मराठी रंगभूमीशी त्यांचे घट्ट नाते होते. प्रायोगिक रंगभूमी आणि एकांकिका स्पर्धांमधून त्यांनी अनेक तरुण कलाकार घडवले.

अलीकडेच प्रचंड लोकप्रिय ठरलेल्या उमेश कामत आणि प्रिया बापट यांच्या ‘जर तरची गोष्ट’ या नाटकाचे दिग्दर्शन त्यांनी केले होते. या नाटकाच्या यशामागे रणजित पाटील यांचा मोठा वाटा होता. दिग्दर्शनाबरोबरच त्यांनी अनेक मराठी मालिका, चित्रपट तसेच ‘काळे धंदे’ या लोकप्रिय वेबसीरिजमध्येही प्रभावी भूमिका साकारल्या होत्या.

रणजित पाटील यांच्या निधनाची बातमी समजताच मराठी चित्रपटसृष्टीतील अनेक कलाकारांनी सोशल मीडियावरून त्यांना श्रद्धांजली वाहिली आहे. “एक अत्यंत शांत, संयमी आणि अभ्यासू दिग्दर्शक आपल्यातून गेला,” अशा शब्दांत सहकलाकारांनी आपल्या भावना व्यक्त केल्या आहेत.

The post अभिनेता-दिग्दर्शक रणजित पाटील यांचे निधन, मराठी कलाविश्वावर शोककळा appeared first on थोडक्यात घडामोडी.

मुंबई : साऊथ स्टार समांथा रुथ प्रभूने बॉयफ्रेंड राज निदिमोरूसोबत विवाह करत आयुष्याची नवी सुरुवात केली आहे. १ डिसेंबर २०२५ रोजी कोइंबतूरमधील ईशा योगा सेंटर येथे त्यांच्या विवाहसोहळ्याचे पारंपरिक पद्धतीने आयोजन करण्यात आले.

समांथाने तिच्या लग्नाचे फोटो सोशल मीडियावर शेअर करत फक्त “01.12.2025” असे कॅप्शन लिहिले असून, हे फोटो समोर आल्यानंतर चाहत्यांकडून शुभेच्छांचा वर्षाव होत आहे. लग्नासाठी समांथाने लाल रंगाची देखणी साडी परिधान केली असून, तिच्या चेहऱ्यावरचा आनंद खुलून दिसत होता. राज आणि समांथाच्या विवाहसोहळ्याचे फोटो सोशल मीडियावर मोठ्या प्रमाणावर व्हायरल होत आहेत.

समांथा आणि राज यांची ओळख ‘द फॅमिली मॅन 2’ या सीरिज दरम्यान झाली होती. मनोज बाजपेयीच्या मुख्य भूमिकेतील या लोकप्रिय सीरिजचं दिग्दर्शन राज आणि डीके यांनी केलं होतं. याच काळात समांथाच्या वैयक्तिक आयुष्यात मोठे बदल घडले. घटस्फोटानंतर ती आणि राज अनेकदा एकत्र दिसू लागले, मात्र नात्याबद्दल त्यांनी कधीही उघडपणे सांगितलं नव्हतं. अखेर आता त्यांनी लग्न करत आपल्या नात्याला अधिकृत नाव दिलं आहे.

 

View this post on Instagram

 

A post shared by Samantha (@samantharuthprabhuoffl)

दोघांचेही हे दुसरे लग्न आहे. समांथाचे पहिले लग्न अभिनेता नागा चैतन्यासोबत झाले होते, मात्र तीन-चार वर्षांतच त्यांनी वेगळं होण्याचा निर्णय घेतला. या घटस्फोटाने चाहत्यांना मोठा धक्का बसला होता. तर राजही काही वर्षांपासून पत्नीपासून वेगळा राहत होता.

समांथा आणि राज यांच्या लग्नाची चर्चा सध्या सोशल मीडियावर जोरदार रंगत असून, चाहत्यांकडून या नवदाम्पत्यावर पुढील आयुष्यासाठी शुभेच्छांचा वर्षाव होत आहे.

The post समांथाचा राज निदिमोरूसोबत विवाह, समांथाने सोशल मीडियावर शेअर केले लग्नाचे फोटो appeared first on थोडक्यात घडामोडी.

मुंबई : बॉलिवूड अभिनेता गोविंदा काही काळासाठी बेशुद्ध पडल्याने त्याला जुहू येथील क्रिटीकेअर रुग्णालयात दाखल करण्यात आले आहे. मंगळवारी रात्री मुंबईतील जुहू येथील स्वतःच्या घरी तो अचानक चक्कर येऊन बेशुद्ध पडला. त्याला सध्या डॉक्टरांच्या देखरेखीखाली ठेवण्यात आले आहे आणि त्याची प्रकृती स्थिर असल्याचे सांगण्यात येत आहे. त्यांचे कायदेशीर सल्लागार आणि मित्र ललित बिंदल यांनी याबाबत माहिती दिली.

गोविंदा मंगळवारी रात्री ८.३० वाजता अचानक बेशुद्ध झाला, त्यानंतर डॉक्टरांचा सल्ला घेऊन त्याला काही औषधे देण्यात आली आणि औषध घेतल्यावर गोविंदाच्या तब्येतीत सुधारणा देखील झाली. परंतु, रात्री सुमारे १२.३० वाजता त्याला पुन्हा अस्वस्थ वाटू लागले, त्यानंतर १ वाजता त्याला मुंबईच्या क्रिटीकेअर रुग्णालयात दाखल करण्यात आले. सध्या ६१ वर्षीय अभिनेत्याची प्रकृती स्थिर आहे आणि क्रिटीकेअर रुग्णालयात त्याच्या चाचण्या सुरू आहेत. डॉक्टर त्यांच्यावर लक्ष ठेवून आहेत, असे बिंदल यांनी सांगितले.

The post अभिनेता गोविंदाची तब्येत बिघडली, अचानक बेशुद्ध पडल्याने जुहूच्या रुग्णालयात दाखल appeared first on थोडक्यात घडामोडी.

मुंबई : ज्येष्ठ अभिनेते धर्मेंद्र यांना बुधवारी सकाळी मुंबईतील ब्रीच कँडी रुग्णालयातून डिस्चार्ज देण्यात आला आहे. गेल्या काही आठवड्यांपासून ते प्रकृती अस्वास्थ्यामुळे उपचार घेत होते. डॉक्टरांच्या सल्ल्यानुसार त्यांच्या कुटुंबाने आता घरीच त्यांच्यावर उपचार सुरू ठेवण्याचा निर्णय घेतला आहे.

धर्मेंद्र यांचे प्रमुख वैद्यकीय सल्लागार डॉ. प्रतीक समदानी यांनी माध्यमांशी बोलताना सांगितले की, “धर्मेंद्र गेल्या काही आठवड्यांपासून कधी रुग्णालयात दाखल होत होते आणि पुन्हा घरी जात होते. त्यांच्या प्रकृतीत सुधारणा होत आहे. सकाळी साडेसातच्या सुमारास त्यांना डिस्चार्ज देण्यात आला. पुढील उपचार आणि काळजी त्यांच्या घरीच घेतली जाणार आहे.”

धर्मेंद्र यांना डिस्चार्ज देण्यात आल्यानंतर जुहू येथील त्यांच्या निवासस्थानाबाहेर चाहत्यांची गर्दी होऊ नये म्हणून पोलिसांनी खबरदारीचा उपाय म्हणून परिसरातील रस्ता काही काळासाठी बंद ठेवला होता.

१० नोव्हेंबर रोजी धर्मेंद्र यांची प्रकृती अचानक बिघडल्याने त्यांना श्वास घेण्यास त्रास होत होता. त्यांना तत्काळ ब्रीच कँडी रुग्णालयात दाखल करण्यात आले होते, जिथे काही काळासाठी त्यांना व्हेंटिलेटरवर ठेवण्यात आले होते.

दरम्यान, सनी देओलच्या टीमने मंगळवारी एक निवेदन जारी करून धर्मेंद्र यांच्या प्रकृतीत सुधारणा होत असल्याचे सांगितले. निवेदनात म्हटले आहे, “धर्मेंद्र आता बरे होत आहेत. कृपया त्यांच्या चांगल्या आरोग्यासाठी आणि दीर्घायुष्यासाठी प्रार्थना करा.”

याचदरम्यान, ११ नोव्हेंबरच्या सकाळी काही माध्यमांनी धर्मेंद्र यांच्या मृत्यूबाबतची खोटी बातमी प्रसिद्ध केली होती. या अफवेवर त्यांच्या कुटुंबाने तीव्र नाराजी व्यक्त केली. धर्मेंद्र यांच्या कन्या ईशा देओल आणि पत्नी हेमा मालिनी यांनी सोशल मीडियावर प्रतिक्रिया देत म्हटले की, “अशा निराधार आणि गैरजबाबदार बातम्या पसरवणे अत्यंत दुर्दैवी आहे. धर्मेंद्र लवकरच पूर्णपणे बरे होतील.”

सध्या धर्मेंद्र आपल्या कुटुंबासोबत जुहू येथील निवासस्थानी असून, डॉक्टरांच्या देखरेखीखाली त्यांच्यावर उपचार सुरू आहेत. चाहत्यांनी त्यांच्या लवकरात लवकर पूर्ण बरे होण्यासाठी सोशल मीडियावर शुभेच्छांचा वर्षाव केला आहे.

The post धर्मेंद्र यांना ब्रीच कँडी रुग्णालयातून डिस्चार्ज, घरीच उपचार सुरू राहणार appeared first on थोडक्यात घडामोडी.

मुंबई : बॉलिवूडचे सुपरस्टार आणि ज्येष्ठ अभिनेते धर्मेंद्र यांच्या प्रकृतीबाबत मोठी बातमी समोर आली आहे. गेल्या काही दिवसांपासून तब्येत बिघडल्यामुळे त्यांना मुंबईतील ब्रीच कँडी रुग्णालयात उपचारासाठी दाखल करण्यात आले आहे. त्यांना श्वास घेण्यास त्रास होत असल्याचे सूत्रांनी सांगितले आहे.

दरम्यान, धर्मेंद्र यांच्या निधनाच्या अफवा सोशल मीडियावर व्हायरल झाल्यानंतर त्यांच्या कुटुंबाकडून स्पष्टीकरण देण्यात आले आहे. धर्मेंद्र यांची मुलगी, अभिनेत्री इशा देओल हिने इन्स्टाग्रामवर पोस्ट शेअर करत वडिलांची प्रकृती स्थिर असल्याची माहिती दिली आहे.

इशा देओलने आपल्या पोस्टमध्ये लिहिले आहे, “माध्यमांतून चुकीच्या बातम्या पसरवल्या जात आहेत. माझे वडील धर्मेंद्र यांची प्रकृती स्थिर आहे. कृपया आमच्या कुटुंबाची प्रायव्हेसी जपावी. वडिलांच्या लवकर बरे होण्यासाठी केलेल्या प्रार्थनांसाठी सर्वांचे आभार.”

 

View this post on Instagram

 

A post shared by ESHA DEOL (@imeshadeol)

दरम्यान, धर्मेंद्र रुग्णालयात दाखल झाल्याची माहिती मिळताच बॉलिवूडमधील अनेक कलाकारांनी त्यांची भेट घेतली. सुपरस्टार सलमान खानने सोमवारी सायंकाळी रुग्णालयात येऊन धर्मेंद्र यांच्या प्रकृतीची विचारपूस केली.

धर्मेंद्र सध्या डॉक्टरांच्या देखरेखीखाली असून त्यांची प्रकृती सुधारत असल्याचे रुग्णालय सूत्रांनी सांगितले आहे. त्यांच्या चाहत्यांनी आणि सहकाऱ्यांनी त्यांच्या लवकर बरे होण्यासाठी शुभेच्छांचा वर्षाव सुरू केला आहे.

The post ज्येष्ठ अभिनेते धर्मेंद्र यांची प्रकृती स्थिर; इशा देओलने दिली प्रकृतीविषयी माहिती, अफवा न पसरवण्याचे आवाहन appeared first on थोडक्यात घडामोडी.

मुंबई : बॉलिवूडचा ‘ही-मॅन’ म्हणून ओळखले जाणारे ज्येष्ठ अभिनेते धर्मेंद्र यांचे वयाच्या ८९व्या वर्षी निधन झाल्याचे वृत्त सर्वत्र व्हायरल होत आहे. मात्र धर्मेंद्र यांची मुलगी, अभिनेत्री इशा देओल हिने इन्स्टाग्रामवर पोस्ट शेअर करत वडिलांची प्रकृती स्थिर असल्याची माहिती दिली आहे.

सोमवारी धर्मेंद्र यांना श्वसनाचा त्रास झाल्याने मुंबईतील ब्रीच कँडी हॉस्पिटलमध्ये दाखल करण्यात आले होते. रुग्णालयात दाखल झाल्याची बातमी समजताच इंडस्ट्रीतील अनेक कलाकारांनी त्यांच्या प्रकृतीबद्दल चिंता व्यक्त केली. शाहरुख खान, सलमान खान आणि गोविंदा यांनी रुग्णालयात जाऊन त्यांच्या प्रकृतीची विचारपूस केली. संपूर्ण देओल कुटुंब यावेळी रुग्णालयात उपस्थित होते.

१० नोव्हेंबरच्या संध्याकाळी धर्मेंद्र यांच्या पत्नी हेमा मालिनी यांनी त्यांच्या सोशल मीडिया अकाउंटवर अभिनेत्याचा एक हसरा फोटो शेअर करत लिहिले – “धरमजींबद्दल काळजी दाखवणाऱ्या सर्वांचे मी आभार मानते. ते सध्या डॉक्टरांच्या देखरेखीखाली आहेत आणि त्यांच्यावर बारकाईने लक्ष ठेवले जात आहे. आम्ही सर्व त्यांच्यासोबत आहोत. कृपया त्यांच्या लवकर बरे होण्यासाठी प्रार्थना करा.”

सात दशकांची कारकीर्द आणि ३०० हून अधिक चित्रपट
धर्मेंद्र हे हिंदी चित्रपटसृष्टीतील सर्वात आदरणीय आणि लोकप्रिय स्टार आहेत. त्यांच्या सात दशकांहून अधिकच्या चमकदार कारकिर्दीत त्यांनी ३०० हून अधिक चित्रपटांमध्ये काम केले. त्यांच्या सुपरहिट चित्रपटांमध्ये “शोले”, “चुपके चुपके”, “सीता और गीता”, “धरम वीर” यांचा समावेश आहे. ‘शोले’मधील त्यांचा प्रसिद्ध संवाद “बसंती, इन कुत्तों के सामने मत नाचना” आजही प्रेक्षकांच्या मनात जिवंत आहे.

वयाच्या ८९व्या वर्षीही धर्मेंद्र इंडस्ट्रीत सक्रिय आहेत. अलीकडेच ते “रॉकी और रानी की प्रेम कहानी” आणि “तेरी बातें में ऐसा उलझा जिया” या चित्रपटांमध्ये झळकले होते. त्यांचा शेवटचा चित्रपट “इक्किस” असून तो २५ डिसेंबर रोजी प्रदर्शित होणार आहे. या चित्रपटात अगस्त्य नंदा प्रमुख भूमिकेत दिसणार आहे.

The post ज्येष्ठ अभिनेते धर्मेंद्र यांच्या निधनाचे वृत्त खोटे… appeared first on थोडक्यात घडामोडी.

मुंबई : १९७० आणि १९८० च्या दशकात अभिनय आणि गायन या दोन्ही क्षेत्रात आपला ठसा उमटवणाऱ्या अभिनेत्री आणि गायिका सुलक्षणा पंडित यांचे गुरुवारी निधन झाले. त्या ७१ वर्षांच्या होत्या. त्यांचे भाऊ आणि प्रसिद्ध संगीतकार ललित पंडित यांनी त्यांच्या निधनाची पुष्टी केली असून, सुलक्षणा यांना हृदयविकाराचा झटका आल्याचे सांगितले.

१२ जुलै १९५४ रोजी जन्मलेल्या सुलक्षणा पंडित या एका संगीतमय घराण्यात जन्मल्या. महान शास्त्रीय गायक पंडित जसराज या त्यांचे काका होते. त्यांच्या कुटुंबात तीन बहिणी आणि तीन भाऊ असून, जतिन आणि ललित या दोघांनी प्रसिद्ध संगीतकार जोडी जतिन-ललित म्हणून नाव कमावले.

सुलक्षणा यांनी केवळ नऊ वर्षांच्या वयात संगीत शिकण्यास सुरुवात केली. त्यांनी अनेक चित्रपटांमध्ये पार्श्वगायन केले, ज्यात चलते चलते, उलझन, अपनापन या चित्रपटांचा समावेश आहे.

१९७५ मध्ये प्रदर्शित झालेल्या संकल्प चित्रपटातील “तू ही सागर है तू ही किनारा” या गाण्यासाठी त्यांना फिल्मफेअरचा सर्वोत्कृष्ट महिला पार्श्वगायिकेचा पुरस्कार मिळाला होता. गायनासोबतच त्यांनी उलझन, संकल्प, राजा, हेरा फेरी, संकोच, अपनापन, खानदान आणि वक्त यांसारख्या अनेक चित्रपटांमध्ये अभिनयही केला. त्यांचे पहिले गाणे तकदीर (१९६७) या चित्रपटातील “सात समुंदर पार से…” होते, जे त्यांनी लता मंगेशकर यांच्यासोबत गायले होते.

सुलक्षणा यांनी किशोर कुमार आणि मोहम्मद रफी यांच्यासोबतही अनेक स्टेज कार्यक्रम सादर केले. दूर का राही (१९७१) या चित्रपटासाठी त्यांनी किशोर कुमार यांच्यासोबत “बेकरार दिल तू गाये जा…” हे लोकप्रिय गाणे गायले होते.

वैयक्तिक आयुष्यात सुलक्षणा पंडित अविवाहित राहिल्या. उलझन (१९७५) या त्यांच्या पहिल्या चित्रपटात त्यांनी संजीव कुमार यांच्यासोबत काम केले आणि त्यांच्याविषयी त्यांना प्रेमभावना निर्माण झाल्या. परंतु संजीव कुमार यांनी त्यांच्या लग्नाचा प्रस्ताव नाकारला, आणि सुलक्षणा यांनी आयुष्यभर अविवाहित राहण्याचा निर्णय घेतला.

विशेष म्हणजे, संजीव कुमार यांच्या पुण्यतिथीच्या दिवशीच, म्हणजे ६ नोव्हेंबर रोजी, सुलक्षणा पंडित यांचे निधन झाले. संजीव कुमार यांचे निधन ६ नोव्हेंबर १९८५ रोजी झाले होते.

The post अभिनेत्री आणि गायिका सुलक्षणा पंडित यांचे निधन; वयाच्या ७१व्या वर्षी घेतला अखेरचा श्वास appeared first on थोडक्यात घडामोडी.