पुणे : स्वातंत्र्यदिनाच्या निमित्ताने पुणे महानगरपालिकेच्या वतीने आयोजित विशेष सत्कार समारंभात व्यसनमुक्ती अभ्यासक व सामाजिक कार्यकर्ते डॉ. सोमनाथ वेणूताई निवृत्ती गिते यांचा मा. महापौर सौ. मंजुषा नागपुरे यांच्या हस्ते सन्मान करण्यात आला.

पुणे शहरातील विविध क्षेत्रांत उल्लेखनीय कार्य करणाऱ्या व्यक्तींच्या गौरवासाठी आयोजित या विशेष समारंभात डॉ. गिते यांच्या सामाजिक व व्यसनमुक्ती क्षेत्रातील दीर्घकालीन कार्याची दखल घेण्यात आली. गेल्या अनेक वर्षांपासून ते व्यसनमुक्ती जनजागृती, युवक प्रबोधन आणि सामाजिक कार्याच्या माध्यमातून समाजात व्यसनमुक्तीचा संदेश पोहोचविण्याचे कार्य करीत आहेत.

डॉ. गिते यांनी राज्यभरातील युवक, पालक आणि नागरिकांमध्ये व्यसनाच्या दुष्परिणामांबाबत जनजागृती करण्यासाठी विविध उपक्रम राबविले आहेत. शाळा, महाविद्यालये, सामाजिक संस्था तसेच विविध सार्वजनिक उपक्रमांच्या माध्यमातून त्यांनी व्यसनमुक्तीबाबत सातत्याने प्रबोधन केले आहे. व्यसनाधीन व्यक्ती तसेच त्यांच्या कुटुंबीयांना मार्गदर्शन आणि पुनर्वसनाच्या प्रक्रियेत मदत करण्याचे कार्यही त्यांनी केले आहे.

त्यांच्या या कार्याची दखल घेत महाराष्ट्र शासनाच्या सामाजिक न्याय व विशेष सहाय्य विभागामार्फत ‘राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार’ देऊन त्यांचा गौरव करण्यात आला आहे. हा राज्यस्तरीय पुरस्कार मा. संजय शिरसाट यांच्या हस्ते प्रदान करण्यात आला होता.

सामाजिक कार्यातील योगदानाबद्दल डॉ. गिते यांना डॉक्टरेट पदवी प्राप्त झाली असून, व्यसनमुक्ती व सामाजिक जनजागृतीच्या क्षेत्रातील त्यांच्या कार्याची विविध स्तरांवर दखल घेण्यात आली आहे. त्यांच्या सामाजिक कार्याशी संबंधित विविध जागतिक विक्रमांची नोंद त्यांच्या नावावर असून, राष्ट्रीय व आंतरराष्ट्रीय स्तरावरील विविध सन्मानांनीही त्यांना गौरविण्यात आले आहे.

डॉ. गिते यांच्या कार्याला विविध मान्यवर, सामाजिक संस्था आणि लोकप्रतिनिधींनीही वेळोवेळी पाठिंबा व कौतुकाची दाद दिली आहे. त्यांच्या कार्याची प्रशंसा करणारी प्रशंसापत्रे व शिफारसपत्रेही विविध स्तरांवरून प्राप्त झाली आहेत.

पुणे महानगरपालिकेच्या वतीने झालेला हा सन्मान त्यांच्या सामाजिक कार्याची महत्त्वपूर्ण दखल मानली जात असून, या सन्मानामुळे व्यसनमुक्तीच्या कार्याला आणखी व्यापक स्वरूप देण्याची प्रेरणा मिळाल्याची भावना डॉ. गिते यांनी व्यक्त केली.

“हा सन्मान केवळ माझा नसून, माझ्या या प्रवासात साथ देणाऱ्या कुटुंबीयांचा, सहकाऱ्यांचा, मित्रांचा आणि माझ्या कार्यावर विश्वास ठेवणाऱ्या प्रत्येकाचा आहे. समाजातील युवकांना व्यसनापासून दूर ठेवण्यासाठी आणि व्यसनमुक्त, सुसंस्कारित व सशक्त पिढी घडविण्यासाठी यापुढेही सातत्याने कार्य करत राहू,” असे डॉ. गिते यांनी सांगितले.

स्वातंत्र्यदिनाच्या निमित्ताने झालेल्या या सन्मानामुळे त्यांच्या सामाजिक कार्याला नवी ऊर्जा मिळाली असून, व्यसनमुक्त समाजाच्या निर्मितीसाठी सुरू असलेली त्यांची जनजागृतीची चळवळ अधिक व्यापक करण्याचा संकल्प त्यांनी व्यक्त केला.

The post स्वातंत्र्यदिनानिमित्त डॉ. सोमनाथ गिते यांचा महापौरांच्या हस्ते गौरव appeared first on थोडक्यात घडामोडी.

बारामती : पुणे जिल्ह्यातील बारामती शहरात तरुणीचा अकस्मात आणि संशयास्पद मृत्यू झाल्याप्रकरणी तिच्या आईने दिलेल्या फिर्यादीनुसार अथर्व राजेंद्र मेहन (वय २७) याच्याविरुद्ध गुन्हा दाखल करण्यात आला आहे. अथर्व वारंवार शारीरिक संबंध ठेवण्यासाठी आग्रह करीत होता आणि काही गोळ्या देत असल्याचे मयत तरुणीच्या मैत्रिणीने सांगितल्याचा दावा आईने फिर्यादीत केला आहे.

मयत तरुणीने बी.एस्सी. अॅग्रीकल्चरचे शिक्षण पूर्ण केले होते. एमपीएससी परीक्षेच्या तयारीसाठी तिने ऑक्टोबर २०२५ पासून पुण्यात ट्यूशन्स सुरू केल्या होत्या. डिसेंबर २०२५ मध्ये तिचे अथर्वसोबत प्रेमसंबंध असल्याची माहिती तिच्या मैत्रिणीमार्फत आईला मिळाली होती.

पोलिसांनी दिलेल्या माहितीनुसार, तरुणी आणि अथर्व यांच्यात प्रेमसंबंध होते. त्यानंतर दोन्ही कुटुंबांच्या संमतीने त्यांचा विवाहही ठरला होता. मात्र, काही दिवसांपासून तरुणी शांत राहत असल्याचे तिच्या आईच्या निदर्शनास आले होते.

तरुणीच्या मैत्रिणीने अथर्व वारंवार शारीरिक संबंध ठेवण्यासाठी आग्रह करीत असल्याचे तसेच तो तिला काही गोळ्या देत असल्याचे सांगितल्याचा दावा आईने फिर्यादीत केला आहे.

६ ऑगस्ट रोजी अथर्व तरुणीला एमबीए प्रवेशाच्या कामासाठी घेऊन गेला होता. अथर्वची आई आणि मावशी यांना दौंड येथे सोडण्यासाठी जात असल्याचे त्याने सांगितले होते. आईने व्हिडिओ कॉल केला असता तरुणी अथर्वसोबत कारमध्ये असल्याचे दिसले.

सायंकाळी सातच्या सुमारास आईने मुलीला फोन केला; मात्र तिने फोन उचलला नाही. त्यानंतर अथर्वला फोन केल्यानंतर आईचे मुलीशी बोलणे झाले. त्या वेळी अथर्व मला घरी घेऊन जाणार असून, त्याला माझ्यासोबत शारीरिक संबंध ठेवायचे आहेत आणि तो मला गोळी देणार असल्याचे मुलीने सांगितल्याचा दावा फिर्यादीत करण्यात आला आहे.

आईने मुलीला अथर्वच्या घरी जाऊ नकोस आणि तातडीने घरी परत ये, असे सांगितले होते. रात्री नऊच्या सुमारास आईने मेसेज केल्यानंतर मुलीने जेवण करीत असल्याचे उत्तर दिले. त्यानंतर मात्र तिच्याकडून कोणताही प्रतिसाद मिळाला नाही.

मिळालेल्या माहितीनुसार, दोघांनी एमआयडीसी परिसरातील हॉटेलमध्ये जेवण केले. त्यानंतर ते अथर्वच्या घरी गेले. रात्री दहाच्या सुमारास आईने फोन केला असता अथर्वने फोन उचलला आणि तरुणीला चक्कर आल्याचे सांगितले.

प्रकृती बिघडल्यानंतर अथर्व तरुणीला प्रथम देवकाते हॉस्पिटल, त्यानंतर भोईटे हॉस्पिटल आणि पुढे सिल्वर जुबली हॉस्पिटल येथे घेऊन गेला. रात्री सुमारे १०.२० वाजता तिची आई सिल्वर जुबली हॉस्पिटलमध्ये पोहोचली. त्यावेळी तरुणी स्ट्रेचरवर होती. रुग्णालयात पोहोचण्यापूर्वीच तिचा मृत्यू झाल्याचे आईला समजले.

या घटनेनंतर आईने मुलीच्या मृत्यूबाबत संशय व्यक्त करीत पोलिसांत फिर्याद दिली. त्यानुसार अथर्व राजेंद्र मेहन याच्याविरुद्ध गुन्हा दाखल करण्यात आला आहे. औषधे, वैद्यकीय अहवाल तसेच डिजिटल पुराव्यांच्या आधारे पोलिसांकडून पुढील तपास सुरू आहे.

The post लग्न ठरलेल्या प्रियकरासोबत तरुणीचा संशयास्पद मृत्यू; आईचा गंभीर आरोप appeared first on थोडक्यात घडामोडी.

नाशिक : शनिवारी (दि. ८) झालेल्या महासभेत स्मार्टसिटी कंपनी आणि ‘एमएनजीएल’मुळे शहरातील रस्त्यांची झालेली दुरवस्था आणि खड्ड्यांचा मुद्दा गाजल्यानंतरही रस्ते खोदण्याचे प्रकार सुरूच असल्याचे समोर आले आहे. सीबीएस ते कॅनडा कॉर्नर या मार्गावरील चार महिन्यांपूर्वी काँक्रिटीकरण करण्यात आलेला रस्ता स्मार्ट सिटी कंपनीकडून ‘ऑप्टिकल फायबर केबल’ टाकण्यासाठी पुन्हा फोडण्यात आला. कुलकर्णी गार्डन परिसरात सुरू असलेले हे काम राष्ट्रवादी काँग्रेसच्या नगरसेविका डॉ. हेमलता पाटील यांनी तत्काळ बंद पाडले. तसेच संबंधित अधिकाऱ्यांना जाब विचारला.

पावसामुळे नाशिक शहरातील रस्त्यांची मोठ्या प्रमाणात दुरवस्था झाली आहे. या पार्श्वभूमीवर शनिवारी झालेल्या महासभेत स्मार्ट सिटी कंपनी आणि ‘एमएनजीएल’ला या परिस्थितीसाठी जबाबदार धरत ठेकेदारांवर दंडात्मक कारवाई करण्याचे निर्देश महापौर हिमगौरी आहेर-आडके यांनी दिले होते. महापालिकेच्या परवानगीशिवाय रस्ते फोडू नयेत, असेही स्पष्ट निर्देश देण्यात आले होते. मात्र, महासभेला दोन दिवस उलटत नाहीत तोच चार महिन्यांपूर्वी तयार केलेला सिमेंटचा रस्ता ऑप्टिकल फायबर केबलसाठी फोडण्यात आल्याचा प्रकार समोर आला.

कुलकर्णी गार्डन येथे केबल टाकण्यासाठी सिमेंटच्या रस्त्याची तोडफोड सुरू असल्याची माहिती मिळताच डॉ. हेमलता पाटील यांनी घटनास्थळी धाव घेत काम थांबवले. विशेष म्हणजे काम सुरू असताना स्मार्ट सिटी किंवा महापालिकेचा एकही अभियंता घटनास्थळी उपस्थित नसल्याचे निदर्शनास आले. या कामासाठी कामगार धुळ्याहून आल्याची माहितीही समोर आली.

संबंधित ठेकेदार फिरोज यांच्याशी संपर्क साधला असता ते देवळाली येथे असल्याचे सांगण्यात आले. स्मार्ट सिटीच्या सीसीटीव्ही कॅमेऱ्यासाठी चेंबर करण्याचे काम सुरू असल्याची माहिती मिळाल्याचे डॉ. पाटील यांनी सांगितले.

डॉ. हेमलता पाटील यांचे प्रश्न
रस्त्याचे काँक्रिटीकरण करण्यापूर्वी सीसीटीव्ही चेंबर, केबल आणि अन्य सुविधांचे नियोजन का करण्यात आले नाही?
स्मार्ट सिटी आणि महापालिका यांच्यात समन्वयाचा अभाव आहे का?
चार महिन्यांतच नव्याने तयार केलेला रस्ता पुन्हा फोडण्याची वेळ का आली?
रस्ता पुन्हा दुरुस्त करण्याचा खर्च नागरिकांच्या खिशातूनच जाणार का?
‘विकासकामांना विरोध नाही; नियोजनशून्य कामांना विरोध’

या प्रकाराची तातडीने चौकशी करून रस्ता फोडण्यासाठी आवश्यक परवानग्या घेण्यात आल्या होत्या का, याची तपासणी करावी. लेखी परवानगीशिवाय सुरू असलेले काम तातडीने थांबवावे आणि फोडलेला काँक्रीट रस्ता दर्जेदार पद्धतीने पूर्ववत करावा, अशी मागणी डॉ. हेमलता पाटील यांनी केली.

‘विकासकामांना आमचा विरोध नाही; मात्र विकासाच्या नावाखाली नियोजनशून्य कामे करून नागरिकांच्या पैशांचा अपव्यय करण्यास नक्कीच विरोध आहे,’ असे डॉ. पाटील यांनी स्पष्ट केले.

The post चार महिन्यांपूर्वीचा नवाकोरा रस्ता ऑप्टिकल फायबरसाठी फोडला; राष्ट्रवादी काँग्रेसच्या नगरसेविका डॉ. हेमलता पाटील यांचा संताप; काम बंद पाडून अधिकाऱ्यांना जाब appeared first on थोडक्यात घडामोडी.

पुणे : पारी टॉवर्स सहकारी गृहरचना संस्था मर्यादित, नऱ्हेच्या संचालक मंडळाच्या पंचवार्षिक निवडणुकीत ‘उघडलेले पुस्तक’ चिन्हाच्या परिवर्तन आणि सुशासन पॅनेलने दणदणीत विजय मिळवला. पॅनेलचे सर्व १५ उमेदवार विजयी झाले. सर्वसाधारण, महिला राखीव, इतर मागासवर्गीय, अनुसूचित जाती-जमाती तसेच विमुक्त जाती-भटक्या जमाती या सर्व प्रवर्गांत ‘उघडलेले पुस्तक’ पॅनेलच्या उमेदवारांनी बाजी मारली.

सर्वसाधारण मतदारसंघातून अतुल यादव, अमोल सावंत, गिरीश रंगे, निरंजन माळवदकर, नीरज दोन्हे, प्रवीण कुमकर, शरद शिंदे, श्रीकांत राजोबा, समीर भोकरे आणि सुरेश पिसाळ हे विजयी झाले.

महिला राखीव मतदारसंघातून किरण आगलावे आणि प्राजक्ता तट्टू यांनी विजय मिळवला. इतर मागासवर्गीय प्रवर्गातून रोहन राऊत, अनुसूचित जाती-जमाती प्रवर्गातून सुनील सांगळीकर, तर विमुक्त जाती-भटक्या जमाती प्रवर्गातून दत्तात्रय पडार विजयी झाले.

या निकालामुळे ‘उघडलेले पुस्तक’ पॅनेलने सर्व १५ जागांवर विजय मिळवत सोसायटीच्या संचालक मंडळात बहुमत मिळवले आहे. सभासदांनी दिलेला स्पष्ट कौल हा या विजयाचे वैशिष्ट्य ठरले.

विजयानंतर पॅनेलच्या समर्थकांनी आनंद व्यक्त केला. सभासदांनी दाखविलेल्या विश्वासाबद्दल विजयी उमेदवारांनी कृतज्ञता व्यक्त केली. सभासदांचा विश्वास सार्थ ठरवत सोसायटीचा पारदर्शक, शिस्तबद्ध आणि विकासाभिमुख कारभार करण्यास प्राधान्य देण्यात येईल, अशी भूमिका पॅनेलच्या वतीने व्यक्त करण्यात आली.

सोसायटीतील विकासकामे, सभासदांच्या समस्या, देखभाल-दुरुस्तीची कामे, आर्थिक पारदर्शकता तसेच सर्व सभासदांना विश्वासात घेऊन निर्णयप्रक्रिया राबविण्यावर भर देण्याचा निर्धार विजयी पॅनेलने व्यक्त केला.

निवडणूक अधिकारी संतोष तळपे यांच्या मार्गदर्शनाखाली तसेच नऱ्हे पोलीस ठाण्याचे पोलीस अधिकारी शैलेश चव्हाण आणि त्यांच्या पोलीस पथकाच्या सहकार्याने निवडणूक प्रक्रिया शांततेत आणि सुरळीत पार पडली. निवडणूक प्रक्रिया व्यवस्थित पार पाडण्यासाठी सहकार्य करणाऱ्या सर्व सभासदांचे आणि प्रशासनाचे आभार व्यक्त करण्यात आले.

विजयानंतर ‘उघडलेले पुस्तक’ पॅनेलने विजयाचा उत्सवही आगळ्या पद्धतीने साजरा केला. कोणत्याही प्रकारची हुल्लडबाजी न करता, मोठे ध्वनिक्षेपक न लावता किंवा गुलालाची उधळण न करता छत्रपती शिवाजी महाराजांचा जयघोष आणि ज्येष्ठांच्या हस्ते गणपतीची आरती करून विजयोत्सव साजरा करण्यात आला. या माध्यमातून संस्कार, शिस्त आणि सुसंस्कृतपणाचा संदेश देण्याचा प्रयत्न करण्यात आला.

‘उघडलेले पुस्तक’ हे केवळ ज्ञानाचे प्रतीक नसून विचार, सुसंस्कृतपणा आणि जबाबदारीची जाणीव करून देणारे प्रतीक आहे, याचा प्रत्यय या विजयोत्सवातून आला.

‘उघडलेले पुस्तक’ पॅनेलचा सर्व १५ जागांवरील विजय हा पारी टॉवर्सच्या सभासदांनी विकास, पारदर्शकता आणि विश्वासाला दिलेला स्पष्ट कौल मानला जात आहे.

The post ‘उघडलेले पुस्तक’ पॅनेलचा दणदणीत विजय; सर्व १५ उमेदवार विजयी; सर्व प्रवर्गांत परिवर्तन आणि सुशासन पॅनेलला यश appeared first on थोडक्यात घडामोडी.

हिंगोली : हिंगोली जिल्ह्यात घडलेल्या एका गंभीर घटनेने सार्वजनिक आरोग्य व्यवस्थेवरील विश्वास पुन्हा एकदा डळमळीत झाला आहे. सरकारी रुग्णवाहिका वेळेत उपलब्ध न झाल्याने एका गर्भवती महिलेच्या गर्भातील बाळाचा मृत्यू झाल्याचा आरोप कुटुंबीयांनी केला आहे. या घटनेनंतर परिसरात संतापाची लाट उसळली असून प्रशासनावर निष्काळजीपणाचे आरोप होत आहेत.

ही घटना हिंगोलीतील ज्वाला बाजार परिसरात घडली. संबंधित महिलेला अचानक प्रसूती वेदना सुरू झाल्यानंतर कुटुंबीयांनी तातडीने सरकारी रुग्णवाहिका सेवेशी संपर्क साधला. मात्र, जवळपास दोन तास उलटल्यानंतरही अ‍ॅम्ब्युलन्स घटनास्थळी पोहोचली नाही, असा आरोप नातेवाईकांनी केला आहे.

पीडित कुटुंबाच्या म्हणण्यानुसार, रुग्णवाहिका सेवेकडून “डिझेल उपलब्ध नसल्यामुळे वाहन पाठवता येणार नाही” असे सांगण्यात आले. महिलेची प्रकृती सतत खालावत असल्याने कुटुंबीयांनी अखेर खासगी वाहनाची व्यवस्था केली आणि तिला तातडीने हिंगोली येथील शासकीय वैद्यकीय महाविद्यालयात दाखल केले.

रुग्णालयात डॉक्टरांनी महिलेवर सिझेरियन शस्त्रक्रिया केली. मात्र, उपचार सुरू होईपर्यंत उशीर झाल्याने गर्भातील बाळाचा मृत्यू झाल्याचे समोर आले. या घटनेनंतर कुटुंबीयांनी आरोग्य विभागाच्या निष्काळजी कारभारावर तीव्र नाराजी व्यक्त केली आहे.

महिलेच्या आईने प्रशासनावर संताप व्यक्त करत म्हटले की, “आम्ही आर्थिकदृष्ट्या दुर्बल आहोत. आपत्कालीन परिस्थितीत तातडीने खासगी वाहन मिळवणे आमच्यासाठी कठीण होते. डिझेल नसल्याचे सांगून सरकारी रुग्णवाहिका देण्यास नकार देण्यात आला. जर माझ्या मुलीच्या जीवाला काही झाले असते, तर त्याची जबाबदारी कोणी घेतली असती?”

कुटुंबीयांनी आणखी गंभीर आरोप करत सांगितले की, त्यांनी १०८ आणि १०२ या दोन्ही आपत्कालीन सेवांवर वारंवार संपर्क साधला होता. मात्र, वाहनात इंधन नसल्याचे कारण देत कर्मचाऱ्यांनी पुन्हा फोन करू नका, असे सांगितल्याचा दावा त्यांनी केला. परिसरातील प्राथमिक आरोग्य केंद्राबाहेर १०२ क्रमांकाची रुग्णवाहिका उभी असतानाही ती उपलब्ध करून देण्यात आली नाही, असेही त्यांनी नमूद केले.

दरम्यान, जिल्हा आरोग्य अधिकारी डॉ. कैलाश शेळके यांनी हे आरोप फेटाळून लावले आहेत. त्यांच्या म्हणण्यानुसार, रुग्णवाहिकेत इंधनाची कमतरता नव्हती. संबंधित चालक वैयक्तिक कारणास्तव रजेवर असल्याने अडचण निर्माण झाली. पर्यायी चालकाची वेळेत व्यवस्था करण्यात संबंधित अधिकाऱ्यांकडून दुर्लक्ष झाल्याचा प्राथमिक निष्कर्ष समोर आल्याचे त्यांनी सांगितले.

या प्रकरणाची गंभीर दखल घेत जिल्हाधिकारी राहुल गुप्ता यांनी जिल्हा आरोग्य अधिकाऱ्यांना कारणे दाखवा नोटीस बजावली आहे. तसेच संपूर्ण घटनेची सखोल चौकशी करण्यात येणार असल्याचे प्रशासनाने स्पष्ट केले.

घटनेनंतर विरोधकांनीही सरकारवर जोरदार टीका केली आहे. राष्ट्रवादी काँग्रेस (शरद पवार गट) महिला प्रदेशाध्यक्ष रोहिणी खडसे यांनी सरकारच्या दाव्यांवर प्रश्न उपस्थित करत या मृत्यूसाठी नेमके कोण जबाबदार आहे, असा सवाल केला.

सार्वजनिक आरोग्य मंत्री प्रकाश आबिटकर यांनी नांदेड येथे पत्रकारांशी बोलताना या प्रकरणाची निष्पक्ष चौकशी करण्याचे आश्वासन दिले. “रुग्णवाहिकांसाठी डिझेलची पुरेशी तरतूद करण्यात आली आहे. मात्र, जर कोणत्याही स्तरावर निष्काळजीपणा आढळून आला, तर दोषींवर कठोर कारवाई केली जाईल,” असे त्यांनी स्पष्ट केले.

या घटनेमुळे राज्यातील ग्रामीण आरोग्य सेवा, आपत्कालीन प्रतिसाद व्यवस्था आणि सरकारी रुग्णवाहिका सेवांच्या कार्यक्षमतेबाबत पुन्हा एकदा गंभीर चर्चा सुरू झाली आहे.

The post हिंगोलीत धक्कादायक प्रकार! डिझेलअभावी रुग्णवाहिका न मिळाल्याने गर्भातील बाळाचा दुर्दैवी मृत्यू appeared first on थोडक्यात घडामोडी.

बुलढाणा : केंद्र सरकारच्या फुड स्ट्रीट योजने अंतर्गत विदर्भातील शेगांव आणि मराठवाडा विभागातील शिर्डी येथे फुड स्ट्रीट हबला केंद्र सरकारच्या वतीने मान्यता देण्यात आली आहे. या योजने अंतर्गत दोन्हीही धार्मिक स्थळी प्रत्येकी १ कोटी या प्रमाणे २ कोटी रुपयांचा निधी केंद्र सरकारच्या वतीने उपलब्ध करुन दिला जाणार आहे. या फुड स्ट्रीट हब सेंटर लोकांच्या सेवेसाठी उपलब्ध करुन देण्यात येणार आहे. केंद्रीय आरोग्य मंत्रालय आणि भारतीय अन्न सुरक्षा आणि मानके प्राधिकरण यांच्या संयुक्त विद्यमाने ही सेवा देशांतर्गत १०० ठिकाणी राबविण्यात येणार आहे.

रस्त्यावरील खाद्यपदार्थामुळे होणारे आजार, अन्नातून होणारी विषबाधा रोखण्यासाठी अन्न हाताळणीची सुरक्षित मानके देशभर लागू करण्यात आली आहे. त्यानुसार केंद्रीय आरोग्य मंत्रालय आणि भारतीय अन्न सुरक्षा आणि मानके प्राधिकरण यांच्या वतीने देशभरात १०० फुड स्ट्रीट योजना राबविण्यात येत आहे. या योजनेअंतर्गत विदर्भाची पंढरी म्हणून ओळख असलेल्या संतनगरी शेगांव येथे १ कोटी रुपये खर्चून आधुनिक स्वच्छ आणि “आरोग्यदायी” स्वच्छ फुड स्ट्रीट विकसित केल्या जाणार आहे. असेच फुड स्ट्रीट हब साई बाबांच्या शिर्डीतही उभारल्या जाणार आहे. पंतप्रधान नरेंद्र मोदी यांच्या नेतृत्वातील सरकारने महाराष्ट्रातील दोन्ही धार्मिक स्थळांवर हे फुड स्ट्रीट हब विकसित करण्याला मान्यता दिली आहे.

त्यामुळे विदर्भाच्या पंढरीत येणाऱ्या संत गजानन महाराजांच्या भक्तांना तसेच साईबाबांच्या भक्तांना शिर्डीत दर्जेदार आणि पौष्टीक अन्न सेवा या हबच्या माध्यमातून मिळणार आहे. शिवाय लघु व्यावसायिक विक्रेत्यांना रोजगाराची चालना मिळणार आहे. लाखो भाविकांचे श्रद्धास्थान असलेल्या महाराष्ट्रातील शेगांव आणि शिर्डी येथे फुड स्ट्रीट हब मंजुर केल्याबद्दल पंतप्रधान नरेंद्र मोदी यांचे केंद्रीय आयुष आरोग्य व कुटुंब कल्याण राज्यमंत्री प्रतापराव जाधव यांनी आभार व्यक्त केले आहेत.

The post भाविकांसाठी आनंदाची बातमी; धार्मिक स्थळांवर मिळणार दर्जेदार आणि पौष्टिक अन्न सेवा सुविधा appeared first on थोडक्यात घडामोडी.

मुंबई : पुणे शहरातील हडपसर आणि पिंपरी-चिंचवडमधील दापोडी-फुगेवाडी परिसरात विषारी दारू प्यायल्याने १२ नागरिकांचा मृत्यू झाल्याची घटना अत्यंत दुर्दैवी असून, या प्रकरणातील दोषींची गय केली जाणार नाही, असे उपमुख्यमंत्री सुनेत्रा अजित पवार यांनी स्पष्ट केले आहे. या प्रकरणाच्या मुळाशी जाऊन सखोल चौकशी करण्याचे आदेशही त्यांनी प्रशासनाला दिले आहेत.

या घटनेची गंभीर दखल घेत उपमुख्यमंत्री श्रीमती पवार यांनी पुणे व पिंपरी-चिंचवडचे पोलीस आयुक्त, राज्य उत्पादन शुल्क विभागाचे अधिकारी आणि स्थानिक प्रशासनाशी संपर्क साधला. या दुर्घटनेच्या मुळाशी जाऊन तपास करा आणि अशा बेकायदेशीर कृत्यांमध्ये सहभागी असलेल्या सर्वांवर कठोर कारवाई करावी, अशा स्पष्ट सूचना त्यांनी अधिकाऱ्यांना दिल्या.

आतापर्यंत या प्रकरणात ८ जणांना अटक करण्यात आली आहे. पोलीस आणि उत्पादन शुल्क विभागाकडून संयुक्तपणे तपास सुरू असून, या विषारी दारूचा पुरवठा कोठून झाला आणि यात कोणाचा सहभाग आहे, याचा शोध घेतला जात आहे, अशी माहितीही उपमुख्यमंत्री पवार यांनी दिली.

The post पुण्यात विषारी दारू प्यायल्याने १२ जणांचा मृत्यू, दोषींवर कठोर कारवाईचे आदेश appeared first on थोडक्यात घडामोडी.

पुणे : महाराष्ट्र शासनाच्या सामाजिक न्याय व विशेष सहाय्य विभागामार्फत प्रदान करण्यात आलेल्या “राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार” प्राप्त झाल्याबद्दल व्यसनमुक्ती अभ्यासक व सामाजिक कार्यकर्ते डॉ. सोमनाथ वेणूताई निवृत्ती गिते यांचा सत्कार करण्यात आला.

हा सत्कार मा. माधुरीताई मिसाळ यांच्या हस्ते पार पडला. त्या महाराष्ट्र राज्याच्या नगरविकास, परिवहन, सामाजिक न्याय, वैद्यकीय शिक्षण व अल्पसंख्यांक विकास विभागाच्या राज्यमंत्री तसेच पर्वती विधानसभा मतदारसंघाच्या आमदार म्हणून कार्यरत आहेत. त्यांच्या हस्ते झालेला हा सन्मान डॉ. गिते यांच्या व्यसनमुक्ती क्षेत्रातील दीर्घकालीन, प्रभावी आणि समाजहितकारी कार्याची महत्त्वपूर्ण दखल मानली जात आहे.

या प्रसंगी डॉ. गिते यांच्या कार्याचा गौरव करताना मान्यवरांनी सांगितले की, त्यांनी व्यसनमुक्ती जनजागृती, युवक प्रबोधन या क्षेत्रात सातत्यपूर्ण योगदान दिले आहे. राज्यभरातील हजारो युवक, पालक व नागरिकांपर्यंत व्यसनमुक्तीचा प्रभावी संदेश पोहोचविला आहे.

डॉ. गिते यांच्या कार्याची दखल महाराष्ट्र शासनाने घेत त्यांना “राष्ट्रपिता महात्मा गांधी राज्यस्तरीय व्यसनमुक्ती सेवा पुरस्कार” प्रदान केला होता. हा राज्यस्तरीय सन्मान मा. संजय शिरसाट यांच्या हस्ते देण्यात आला होता. या पुरस्कारामुळे त्यांच्या सामाजिक कार्याला अधिक बळ व प्रेरणा मिळाली आहे.

डॉ. गिते यांच्या कार्याबाबत राज्यपालांसह विविध सामाजिक संस्था, मान्यवर व लोकप्रतिनिधींनीही प्रशंसापत्रे व शिफारसपत्रांच्या माध्यमातून पाठिंबा दर्शविला आहे. त्यांना डॉक्टरेट पदवी प्राप्त असून सामाजिक कार्याशी संबंधित अनेक जागतिक विक्रम त्यांच्या नावावर नोंदवले गेले आहेत. तसेच त्यांना विविध राष्ट्रीय व आंतरराष्ट्रीय सन्मानही प्राप्त झाले आहेत.

सत्कार समारंभात उपस्थित मान्यवरांनी डॉ. गिते यांच्या व्यसनमुक्ती चळवळीतील समर्पित कार्याचे कौतुक करत, समाजात व्यसनमुक्त, सुसंस्कारित आणि सशक्त पिढी घडविण्यासाठी त्यांचे कार्य अधिक व्यापक स्वरूपात पुढे जावे, अशा शुभेच्छा दिल्या.

The post व्यसनमुक्ती क्षेत्रातील अविरत समाजकार्याची दखल; डॉ. सोमनाथ गिते यांचा मा. माधुरीताई मिसाळ यांच्या हस्ते सत्कार appeared first on थोडक्यात घडामोडी.

मुंबई : ‘महात्मा गांधी राष्ट्रीय ग्रामीण रोजगार हमी योजना’अंतर्गत महाराष्ट्रात विविध पदांसाठी तात्काळ भरती सुरू असल्याची बोगस जाहिरात सोशल मीडियाद्वारे प्रसारित करण्यात येत आहे. अशा जाहिरातींना बळी पडून सर्वसामान्य नागरिक व बेरोजगार युवकांचे आर्थिक नुकसान होऊ नये, यासाठी दक्षता घेण्याचे आवाहन रोजगार हमी योजना विभागाचे मंत्री भरत गोगावले यांनी केले आहे. या प्रकरणी संबंधित अज्ञात व्यक्तींविरोधात मरीन लाईन्स पोलीस ठाण्यात तक्रार दाखल करण्यात आली आहे.

‘रोजगार हमी योजना विभागांतर्गत महाराष्ट्रात तात्काळ भरती! स्थिर नोकरीची आकर्षक संधी!’ अशा आशयाची जाहिरात व्हॉट्सॲपद्वारे राज्यभर व्हायरल करण्यात आली आहे. या जाहिरातीत कार्यक्रम तांत्रिक अधिकारी (PTO), सहायक कार्यक्रम अधिकारी (APO) आणि क्लार्क कम डेस्क ऑफिसर (CDO) पदांसाठी भरती सुरू असल्याचे नमूद करण्यात आले आहे. सदर जाहिरातीत नोंदणीसाठी १ हजार ५०० रुपये शुल्क भरण्याची अट घालण्यात आली असून, ५८ वर्षांच्या कराराधारित नियुक्तीचे आमिष दाखविण्यात आले आहे.

याबाबत अधिक माहिती देताना मंत्री भरत गोगावले यांनी म्हटले आहे की, अशी कोणतीही भरती प्रक्रिया शासनामार्फत सुरू नसून संबंधित जाहिरात पूर्णपणे खोटी व दिशाभूल करणारी आहे. शासनाकडून थेट भरतीसाठी कोणतीही जाहिरात प्रसिद्ध करण्यात आलेली नाही. यामुळे विशेषतः ग्रामीण भागातील बेरोजगार युवकांची आर्थिक फसवणूक होण्याची शक्यता असून या बोगस जाहिरातीमुळे शासनाची प्रतिमा मलीन होत असल्याने संबंधित अज्ञात व्यक्तींविरोधात कठोर कारवाई करण्याबाबत विभागामार्फत तक्रार दाखल करण्यात आली आहे.

The post भरतीच्या बोगस जाहिरातींपासून सावध राहण्याचे आवाहन appeared first on थोडक्यात घडामोडी.

पुणे : पुणे शहर आणि जिल्ह्यात उष्णतेची तीव्रता दिवसेंदिवस वाढत असून भारतीय हवामान विभागाने (IMD) बुधवारी पुण्यासाठी यलो अलर्ट जारी केला आहे. सलग वाढणाऱ्या तापमानामुळे शहरातील नागरिकांना तीव्र उकाडा आणि दमट रात्रींचा दुहेरी त्रास सहन करावा लागत आहे.

मंगळवारी नोंदवलेल्या तापमानानुसार, पुणे जिल्ह्यातील लोहगाव येथे सर्वाधिक ४३.२ अंश सेल्सिअस तापमानाची नोंद झाली. त्यानंतर बारामतीमध्ये ४१.४ अंश तर दुदुळगावमध्ये ४१.३ अंश तापमान नोंदवण्यात आले. शहरातील मध्यवर्ती भागांमध्येही उष्णतेचा प्रभाव स्पष्टपणे जाणवत आहे.

शिवाजीनगरमध्ये ४०.८ अंश, कोरेगाव पार्कमध्ये ४०.७ अंश आणि मगरपट्टा परिसरात ४१ अंश तापमान नोंदले गेले. हवामान विभागाच्या पुढील सात दिवसांच्या अंदाजानुसार, १९ मेपर्यंत पुण्यात तापमान ४० ते ४२ अंशांच्या दरम्यान राहण्याची शक्यता आहे. आकाश प्रामुख्याने निरभ्र राहणार असल्याने उष्णतेत तातडीने दिलासा मिळण्याची चिन्हे दिसत नाहीत.

दरम्यान, पुण्यातील रात्रीचे वाढते तापमान अधिक चिंतेचा विषय ठरत आहे. पूर्वी थंडगार संध्याकाळीसाठी ओळखले जाणारे पुणे आता उष्ण रात्रींचा अनुभव घेत आहे. अनेक भागांमध्ये किमान तापमान सामान्यपेक्षा खूप जास्त नोंदवले गेले आहे.

मगरपट्टा आणि कोरेगाव पार्क येथे रात्रीचे तापमान २८.८ अंश सेल्सिअसपर्यंत पोहोचले, तर वडगावशेरीमध्ये २८ अंश आणि शिवाजीनगरमध्ये २७.४ अंश तापमानाची नोंद झाली. हवामान तज्ज्ञांच्या मते, ‘अर्बन हीट आयलंड’ परिणामामुळे ही परिस्थिती निर्माण होत आहे. काँक्रीटच्या इमारती, वाहनांची वाढती संख्या आणि डांबरी रस्ते दिवसभर उष्णता साठवून ठेवतात आणि रात्री ती हळूहळू बाहेर सोडतात.

सुरक्षेसाठी महत्त्वाच्या सूचना :
यलो अलर्ट म्हणजे उष्णतेची स्थिती सध्या नियंत्रणात असली तरी वृद्ध नागरिक, लहान मुले आणि दीर्घकालीन आजार असलेल्या व्यक्तींना विशेष धोका संभवतो. त्यामुळे नागरिकांनी आवश्यक ती काळजी घेण्याचे आवाहन करण्यात आले आहे.

हवामान विभागाने नागरिकांना पुरेसे पाणी पिण्याचा, दुपारी १२ ते ४ या वेळेत घराबाहेर पडणे टाळण्याचा आणि हलक्या रंगाचे सुती कपडे वापरण्याचा सल्ला दिला आहे. बाहेर जाताना टोपी, छत्री किंवा स्कार्फचा वापर करण्यासही सांगितले आहे.

शेतकऱ्यांनाही पिकांचे संरक्षण करण्यासाठी नियमित सिंचन सुरू ठेवण्याचा सल्ला देण्यात आला आहे. पुढील चार ते पाच दिवस हवामान कोरडे राहण्याची शक्यता असल्याने उष्णतेची तीव्रता आणखी वाढू शकते, असा अंदाज हवामान विभागाने व्यक्त केला आहे.

The post पुण्यात उष्णतेचा कहर! IMD चा यलो अलर्ट जारी; नागरिकांना काळजी घेण्याचे आवाहन appeared first on थोडक्यात घडामोडी.