रायगड : रायगड जिल्ह्यातील नागोठणे परिसरात सोशल मीडियावर सुरू झालेल्या प्रेमसंबंधातून उद्भवलेल्या एका थरकाप उडवणाऱ्या खून प्रकरणाने संपूर्ण जिल्हा हादरला आहे. पत्नीनेच आपल्या प्रियकर आणि मैत्रिणीच्या मदतीने पतीचा काटा काढल्याचे समोर आले असून पोलिसांनी केवळ २४ तासांत गुन्ह्याची उकल केली आहे.

मृत व्यक्तीचे नाव कृष्णा नामदेव खंडवी (वय 23, रा. गौळवाडी, पाबळ, पेण) असे आहे. त्याचा खून त्याची पत्नी दिपाली अशोक निरगुडे (19) हिने आपल्या प्रियकर उमेश सदु महाकाळ (21) आणि मैत्रीण सुप्रिया चौधरी (19) यांच्या मदतीने केला. या तिघांना नागोठणे पोलिसांनी अटक केली आहे.

मिळालेल्या माहितीनुसार, दिपालीचे पती कृष्णाशी संबंध ताणलेले होते. त्यातच काही महिन्यांपूर्वी तिची ओळख सोशल मीडियावर उमेश महाकाळ या तरुणाशी झाली. हळूहळू दोघांचे ‘इंस्टाग्राम प्रेम’ वाढत गेले आणि त्यांनी कृष्णाला संपवण्याचा कट रचला.

यासाठी त्यांनी “वारगुडे” या नावाने बनावट इंस्टाग्राम खाते तयार केले. या खात्यामार्फत कृष्णाशी संवाद साधून त्याला “मैत्रिणी”च्या नावाखाली जाळ्यात ओढण्यात आले. १० ऑक्टोबर रोजी आरोपींनी कृष्णाला नागोठणे एस.टी. स्टँडवर बोलावले. त्यानंतर त्याचे अपहरण करून वासगावच्या जंगलात नेण्यात आले. तिथे ओढणीने गळा आवळून त्याचा खून करण्यात आला. खूनानंतर ओळख पटू नये म्हणून आरोपींनी त्याच्या चेहऱ्यावर आणि शरीरावर केमिकल टाकले तसेच मोबाईल फोडून पाली रोडलगत फेकून दिला.

तांत्रिक तपासातून आरोपी पोलिसांच्या जाळ्यात
सुरुवातीला हे प्रकरण बेपत्ता म्हणून नोंदवण्यात आले होते. मात्र, नागोठणे पोलिसांनी सीसीटीव्ही फुटेज, कॉल डिटेल्स आणि मोबाईल लोकेशन यांच्या आधारे तपासाची दिशा बदलली. तांत्रिक तपासाच्या मदतीने पोलिस आरोपींपर्यंत पोहोचले आणि अखेर तिघेही जाळ्यात अडकले.

आरोपी पत्नीची कबुली
पोलिस चौकशीत आरोपी दिपालीने गुन्ह्याची कबुली दिली आहे. पतीकडून त्रास होत असल्याची भावना तिच्या मनात निर्माण झाली होती. त्यामुळे तिने प्रियकर उमेशच्या मदतीने पतीला संपवण्याची योजना आखली होती. या कटात तिची मैत्रीण सुप्रिया देखील सहभागी होती.

पोलिसांची जलद कारवाई
ही कारवाई पोलीस अधीक्षक आंचल दलाल, अपर पोलीस अधीक्षक अभिजित शिवथरे, आणि उपविभागीय अधिकारी प्रसाद गोकुळे यांच्या मार्गदर्शनाखाली सहायक पोलीस निरीक्षक सचिन कुलकर्णी यांच्या पथकाने केली. गुन्ह्याचा तपास अत्यंत व्यावसायिक आणि वेगाने केल्याने नागोठणे पोलिस ठाण्याचे सर्वत्र कौतुक होत आहे.

पोलिसांचा नागरिकांना इशारा
“सोशल मीडियावर अपरिचित व्यक्तींशी संवाद साधताना सावध राहा. कोणतीही संशयास्पद माहिती किंवा हालचाल दिसल्यास त्वरित जवळच्या पोलीस ठाण्याशी संपर्क साधा,” असे आवाहन रायगड पोलिसांकडून करण्यात आले आहे.

The post सोशल मीडियावर सुरू झालेल्या प्रेमाचा रक्तरंजित शेवट! पत्नीने प्रियकर आणि मैत्रिणीसह केली पतीची निर्घृण हत्या, आणि… appeared first on थोडक्यात घडामोडी.

पुणे : प्रसिद्ध नृत्यांगना गौतमी पाटील हिच्या वाहनाने झालेल्या अपघातानंतर आता या प्रकरणात नवा वाद उफाळला आहे. या अपघातात रिक्षाचालक मरगळे गंभीर जखमी झाले होते. त्यांच्यावर सध्या दीनानाथ मंगेशकर रुग्णालयात उपचार सुरू आहेत. ते आयसीयूतून बाहेर आले असून तब्येत स्थिर असल्याचे समजते. मात्र, या अपघातानंतर गौतमी पाटील आणि मरगळे कुटुंब यांच्यात आरोप-प्रत्यारोपांचा सिलसिला सुरू झाला आहे.

गौतमी पाटील हिने काल पत्रकार परिषद घेऊन असा दावा केला की, “मी त्या लोकांच्या डायरेक्ट कॉन्टॅक्टमध्ये नाही. मला इकडून तिकडून खबरी येत आहेत. त्यांचा आकडा काही व्यवस्थित नाही. मदतीची मागणी करण्यासाठी त्यांचा एकच आकडा नाही. मध्येच ते 19 लाखांची मागणी करतात, नंतर 20 लाख, आता 10 लाख म्हणणार, असा त्यांचा आकडा आहे. माझ्या भावांपर्यंत आकडे येत आहेत आणि ते माझ्यापर्यंत माहिती पोहोचवत आहेत. माझा मानलेला भाऊ आहे. त्याच्याकडे पैशांची मागणी मरगळे कुटुंबांनी केली.”

या वक्तव्यानंतर आता जखमी रिक्षाचालक मरगळे यांच्या कन्या अपर्णा मरगळे यांनी गौतमी पाटीलचा चांगलाच समाचार घेतला आहे. “गौतमी पाटील आमच्या गरिबीची थट्टा करत आहेत. त्यांच्या वक्तव्यांमध्ये कमालीची विसंगती आहे. गौतमी पाटील हिने आमच्या गरिबीची थट्टा उडवली आहे. गौतमी पाटील कधी म्हणतात की, आमच्याकडे पैसे मागितले आणि कधी म्हणतात की त्यांना कायद्याने जायचं होतं. त्यांच्या दोन्ही वाक्यांमध्ये कमालीची विसंगती दिसत आहे. तुम्ही एकदा ठरवा नक्की काय बोलायचं आहे आणि तुमचा हा मानलेला भाऊ नक्की कोण आहे, तुमचा कोणता भाऊ आमच्यापर्यंत आला, हे सगळ्या महाराष्ट्राला एकदा सांगून द्या. एकीकडे तुम्ही म्हणतात की मी माझ्या मानलेल्या भावाला सांगितलं होतं ते जे मागतील ते देऊन टाका आणि दुसरीकडे जर आम्ही 19 लाखांची मागणी केली होती तर मग तुम्ही का नाही ते देऊन टाकले हे सुद्धा स्पष्ट सांगा. तुम्ही दोन्ही बाजूने बोलत आहात. तुम्ही आमच्यावर खबऱ्या ठेवत आहात का?” असा सवाल अपर्णा मरगळे यांनी केला.

गौतमी पाटील यांनी पुढे असेही म्हटले होते की, “मला कितीही कामे असली तरी मी वेळ काढून गेले असते, पण समोरून अनपेक्षित उत्तरे मिळाल्याने मी जाणं टाळलं. मी सुद्धा गरिबीतून बाहेर आले आहे आणि संकटांना सामोरी गेले आहे.”

यावर प्रत्युत्तर देताना अपर्णा मरगळे म्हणाल्या,
“गौतमी पाटील यांनी ना आमच्याशी संपर्क साधला, ना माणूस म्हणून काही नैतिकता दाखवली. आता त्यांच्याकडून कोणतीही अपेक्षा नाही. मी न्यायासाठी लढत आहे आणि न्याय मिळेपर्यंत बोलत राहणार आहे.”

या परस्परविरोधी आरोपांमुळे आता गौतमी पाटील – मरगळे कुटुंबातील वाद आणखी चिघळण्याची शक्यता व्यक्त केली जात आहे.

The post ‘गौतमी पाटीलच्या वक्तव्यांमध्ये कमालीची विसंगती’, रिक्षाचालक मरगळे यांच्या मुलीने घेतला चांगलाच समाचार appeared first on थोडक्यात घडामोडी.

छत्रपती संभाजीनगर : भीमनगर येथील १९ वर्षीय प्रारंभी दीपक इंगळे या तरुणीने तिच्या प्रियकराकडून होत असलेल्या मानसिक छळाला कंटाळून आत्महत्या केल्याची धक्कादायक घटना उघडकीस आली आहे. १९ जुलै रोजी संध्याकाळच्या सुमारास तिने आपल्या राहत्या घराच्या छताला गळफास लावून आत्महत्या केली. छावणी पोलिसांनी याप्रकरणी आरोपी सचिन राजू भिसे (वय १९, रा. मिल कॉर्नर) याला अटक केली आहे.

मिळालेल्या माहितीनुसार, प्रारंभी हिने नुकताच ‘ऑपरेशन टेक्निशियन’चा कोर्स पूर्ण केला होता आणि ती शहरातील एका खाजगी रुग्णालयात काम करत होती. याच रुग्णालयात सचिन वॉर्ड बॉय म्हणून कार्यरत होता. दोघांमध्ये जानेवारी २०२५ मध्ये ओळख झाली आणि त्याचे रूपांतर लवकरच प्रेमसंबंधात झाले. त्यांनी लग्न करण्याचाही विचार केला होता. मात्र प्रारंभीच्या वडिलांनी या नात्याला विरोध केला आणि तिला सचिनपासून दूर राहण्याचा सल्ला दिला. परंतु प्रारंभीने संबंध तोडल्यावरही सचिन तिला आणि तिच्या आईला त्रास देत राहिला. पोलिसांनी दिलेल्या माहितीनुसार, तो वारंवार आर्थिक मदतीची मागणी करत असे. एकदा प्रारंभीच्या आईने त्याला मोटारसायकलसाठी ₹३,००० रुपये दिल्याचेही निष्पन्न झाले आहे.

आत्महत्येपूर्वीचे क्षण
१९ जुलै रोजी संध्याकाळी साडेसातच्या सुमारास प्रारंभी आणि तिची आई काही कामासाठी घराबाहेर गेल्या होत्या. काही वेळातच त्या परत आल्या. प्रारंभीने त्यानंतर स्वतःला खोलीत बंद करून घेतले आणि बराच वेळ फोनवर बोलत होती. कुटुंबीयांनी आवाज दिल्यानंतरही प्रतिसाद न मिळाल्याने त्यांनी खोलीचे दार उघडून पाहिले असता ती छताच्या हुकाला लटकलेल्या अवस्थेत आढळली.

मोबाईलवरील चॅट्स आणि ब्लॅकमेलिंगचे पुरावे
प्रारंभीच्या मृत्यूनंतर तिच्या आईने मोबाईल तपासला असता, सचिनचे सलग ५-६ मिस्ड कॉल्स आणि स्नॅपचॅटवरील चॅट्स आढळले. त्या चॅट्समध्ये प्रारंभीने सचिनला तिची खासगी माहिती कुणाशीही शेअर करू नये, अशी विनंती केल्याचे दिसून आले. हे स्पष्ट संकेत आहेत की आरोपी तिच्या खासगी गोष्टींचा गैरफायदा घेत तिला ब्लॅकमेल करत होता.

प्रारंभीच्या आईने पोलिसांना दिलेल्या निवेदनात सांगितले की, सचिनने तिच्या मुलीवर मानसिक दबाव टाकला, तिला धमकावले, आणि तिच्या आयुष्यात हस्तक्षेप केला. या आरोपांच्या पुष्टीसाठी चॅट्सचे स्क्रीनशॉटही पोलिसांना सादर करण्यात आले आहेत.

आरोपी सचिन भिसे हा फक्त अकरावीपर्यंत शिकलेला असून, त्याचे आईवडील त्याच्या लहानपणीच वारले आहेत. तो आपल्या भावासोबत राहत होता. पोलिसांनी त्याला अटक करून न्यायालयात हजर केले असता, न्यायालयाने त्याला २७ जुलै २०२५ पर्यंत पोलिस कोठडी सुनावली आहे. सध्या पोलिसांकडून आरोपीविरुद्ध ब्लॅकमेलिंगचा तपास सुरू असून, मोबाईलमधील डिजिटल पुराव्यांची बारकाईने तपासणी केली जात आहे.

The post प्रियकराकडून होणाऱ्या ब्लॅकमेलिंगला कंटाळून १९ वर्षीय तरुणीची आत्महत्या appeared first on थोडक्यात घडामोडी.

उत्तर प्रदेश : पत्नीने विश्वासघात केल्यामुळे व्यथित झालेल्या राम गोपाल प्रजापती (वय ५५) यांनी १५० फूट खोल खाणीत उडी घेत आत्महत्या केली. झांसी जिल्ह्यातील रक्सा पोलीस ठाण्याच्या हद्दीतील डेली गावात ही धक्कादायक घटना घडली आहे. पत्नीने अगोदर पतीला घर विकण्यास भाग पाडले. त्यानंतर घर विकून मिळालेले पैसे घेऊन ती तिच्या प्रियकरासोबत पळून गेली. पत्नीने केलेल्या या विश्वासघातामुळे राम गोपालला दुखी झाला आणि त्याने आपले जीवन संपवले.

मिळालेल्या माहितीनुसार, राम गोपाल यांचे २५ वर्षांपूर्वी निशा नावाच्या महिलेशी लग्न झाले होते. त्यांना दोन मुलेही आहेत. कुटुंबात सगळं व्यवस्थित चाललं होतं. मात्र, काही काळापूर्वी निशाचे एका इतर पुरुषाशी प्रेमसंबंध सुरू झाले होते. दरम्यान, ६ महिन्यांपूर्वी निशाने आपल्या पतीला घर विकण्यास भाग पाडले. हे घर ११ लाख रुपयांना विकले गेले. त्यानंतर, निशा आपल्या प्रियकरासोबत दोन्ही मुलांना घेऊन पळून गेली. निशा घराचे पैसेही सोबत घेऊन गेली. त्यानंतर दोघांचे लग्नही झाले. मात्र, या सर्व घटनांमुळे राम गोपाल हे खूप काळजीत आणि तणावात होते.

राम गोपाल हे मानसिक तणावात होते. १९ एप्रिल रोजी ते त्यांच्या बहिणीकडे डेली गावात गेले. तिथे ते त्यांच्या १४ वर्षांच्या भाचीला म्हणाले की, “आज माझा शेवटचा दिवस आहे.” यानंतर त्यांनी गावाजवळील एका १५० फूट खोल खाणीत उडी घेतली. घटनेची माहिती मिळताच पोलीस घटनास्थळी दाखल झाले. राम गोपाल यांचा मृतदेह ताब्यात घेऊन शवविच्छेदनासाठी पाठवण्यात आला आहे. या प्रकरणी बोलताना झांसीचे पोलीस अधीक्षक ज्ञानेंद्र कुमार यांनी सांगितले की, “मृताच्या कुटुंबीयांनी, पत्नीने केलेला विश्वासघात या आत्महत्येला कारणीभूत असल्याचे म्हटले आहे. पुढील तपास सुरू आहे.”

The post पतीला घर विकायला भाग पाडलं, पैसे घेऊन प्रियकरासोबत फरार झाली, पतीने उचललं टोकाचं पाऊल… appeared first on थोडक्यात घडामोडी.

बीजिंग : चीनमधील नव-नवीन तंत्रज्ञानाची नेहमीच चर्चा होत असते. आतादेखील अशीच एक घटना समोर आली आहे, ज्यामुळे आश्चर्य व्यक्त करण्यात येत आहे. चीनमध्ये तंत्रज्ञानाचा वापर करून १० मजली इमारत फक्त २८ तास आणि ४५ मिनिटांत बांधण्यात आली आहे. ऐकून विश्वास बसत नाही, पण हे खरे आहे. चीनच्या अभियंत्यांनी हे शक्य करून दाखवलं आहे.

चीनच्या चांग्शा शहरात २८ तास आणि ४५ मिनिटांमध्ये १० मजली इमारत उभारून तयार करण्यात आली. इतक्या कमी वेळेत इमारत तयार करणाऱ्या विकासकांनी याचा पाच मिनिटांचा व्हिडिओ शेयर केला आहे. यामध्ये पूर्ण इमारत तयार करण्याची माहिती देण्यात आली आहे. त्यांनी सांगितले आहे की, हे तंत्रज्ञान अतिशय सुलभ असून कमी खर्चात दर्जेदार काम करण्यात येऊ शकते. त्यात भूकंप व वादळांचा प्रतिकार करण्याची क्षमता आहे आणि कार्बन स्टीलच्या इमारतीच्या तुलनेत त्याची किंमत कमी आहे. त्यांच्या म्हणण्यानुसार, या प्रणालीमध्ये ज्या स्टील स्लॅबचा वापर स्ट्रक्चरल घटक म्हणून केला जातो, तो पारंपारिक स्लॅबपेक्षा 10 पट हलका आणि 100 पट अधिक मजबूत आहे.

कंपनीने असा दावा केला आहे की या स्लॅबची ताकद व हलकेपणामुळे 200 मजल्यांच्या इमारती तसेच गगनचुंबी टॉवर्स याच मॉड्यूल्सचा वापर करून बांधले जाऊ शकतात.

The post VIDEO : चीनमध्ये १० मजली इमारत फक्त २८ तास आणि ४५ मिनिटांत बांधण्यात आली appeared first on थोडक्यात घडामोडी.

बँकॉक:  थायलंडमध्ये थम्माकोर्न वांगप्रीचा असे नाव असलेल्या बौद्ध भिक्खूने स्वत:चे मुंडके कापून बळी दिला.  ते ६८ वर्षांचे होते.  उच्च अध्यात्मिक रुपात पुर्नजन्म घेण्यासाठी स्वत:चा स्वत: त्याग करणे हे सर्वोच्चपणाचे लक्षण असून नव्या जीवनात अध्यात्माच्या नव्या स्तरावर पोहचण्यासाठी आणि निर्वाणासाठी संधी मिळेल असा त्यांचा दावा होता. मागील पाच वर्षांपासून या विचित्र बलिदानाची तयारी करत होते, असे म्हटले जात आहे.

थम्माकोर्न वांगप्रीचा हे मागील ११ वर्षापासून उत्तर-पूर्व थायलंडमधील एका विहारात सेवा करत होते. त्यांचे पार्थिव शरीर सर्वात पहिल्यांदा त्याचा पुतण्या बुनचर्ड बुनरोड यांनी पाहिला. बुनरोड यांना वांगप्रीचा यांचे एक पत्रदेखील मिळाले. त्या पत्रानुसार, भगवान बुद्ध यांना आपले शरीर आणि आत्मा समर्पित करण्याची इच्छा असल्याचे म्हटले. असे केल्यामुळे भगवान बुद्ध पुढील जन्मात एक उच्च अध्यात्मिक रुपात जगात पुन्हा पाठवतील. मागील पाच वर्षांपासून याची तयारी करत असल्याचे त्यांनी पत्रात म्हटले.

थम्माकोर्न वांगप्रीचा यांच्या मृत्यूचे नेमके कारण शोधण्यासाठी त्यांचा मृतदेह शवविच्छेदनासाठी पाठवण्यात आला आहे. आपण लवकरच या विहारातील सेवा बंद करणार असल्याचे याथम्माकोर्न वांगप्रीचा यांनी अन्य बौद्ध भिक्खूंना सांगितले होते. मात्र, नेमकं काय करणार आहोत याची काहीही माहिती दिली नव्हती.

The post धक्कादायक! बुद्धांना प्रसन्न करण्यासाठी बौद्ध भिक्खूने दिला स्वत:चाच बळी.. appeared first on थोडक्यात घडामोडी.