नवी दिल्ली : फळांच्या निर्यात संधींना चालना देण्याच्या उद्देशाने केंद्रीय वाणिज्य आणि उद्योग मंत्रालयांतर्गत कृषी उत्पादन निर्यात विकास प्राधिकरणाने (अपेडा) प्रायोगिक तत्त्वावर पहिल्या चाचणी अंतर्गत ताज्या डाळिंबाची पहिली निर्यात खेप अमेरिकेला हवाई मार्गाने रवाना केली.

डाळिंबाची निर्यातीची ही पहिली खेप अपेडाने, भारतातील राष्ट्रीय वनस्पती संरक्षण संघटना (NPPO), अमेरिकेची प्राणी आणि वनस्पती आरोग्य तपासणी सेवा (US-APHIS), महाराष्ट्र राज्य कृषी पणन मंडळ (MSAMB) आणि भारतीय कृषी संशोधन परिषद-डाळिंबावरील राष्ट्रीय संशोधन केंद्र, सोलापूर (राष्ट्रीय संशोधन केंद्र-सोलापूर) आणि इतर संस्थांच्या सहकार्याने अमेरिकेला रवाना केली.

अमेरिकेला होत असलेल्या डाळिंब निर्यातीत वाढ झाल्यास परिणामी डाळिंबाला चांगला दर मिळेल आणि शेतकऱ्यांच्या उत्पन्नात वाढ होईल, असे अपेडाचे अध्यक्ष अभिषेक देव यांनी सांगितले. डाळिंबाच्या आयातदारांकडून उत्साहवर्धक प्रतिसाद मिळत आहे.

निर्यात मूल्य साखळीत आढावा घेण्याची प्रक्रिया सुलभ करण्यासाठी अपेडाने विकसित केलेली प्रणाली अनार नेट (AnarNet) अंतर्गत शेतांची नोंदणी करण्यासाठी राज्य सरकारांच्या सहकार्याने नियमितपणे जागृतीपर कार्यक्रम आयोजित केले जात आहेत. अमेरिका आणि ऑस्ट्रेलिया या देशांमध्ये भारतात तयार झालेल्या उच्च दर्जाच्या डाळिंबाच्या निर्यातीला परवानगी मिळावी, यासाठी बाजारपेठ उपलब्ध करण्यामध्ये अपेडाने महत्त्वपूर्ण भूमिका बजावली आहे.

महाराष्ट्रातील उच्च दर्जाचे ‘भगवा’ डाळिंब होणार निर्यात
मोठ्या प्रमाणात अँटी ऑक्सीडंट तत्त्व आणि उत्कृष्ट फळांच्या वैशिष्ट्यांमुळे, महाराष्ट्रातील ‘भगवा’ या प्रकारच्या डाळिंबामध्ये मोठ्या प्रमाणात निर्यात क्षमता आहे. डाळिंबाच्या भगवा या वाणाला परदेशी बाजारपेठांमध्ये तुलनेने अधिक मागणी आहे. महाराष्ट्रातील सोलापूर या जिल्ह्यात संपूर्ण देशभरातील डाळिंबाच्या उत्पादनापैकी पन्नास टक्के उत्पादन होते. डाळिंबाच्या उत्पादनात भारत जगात सातव्या क्रमांकावर आहे आणि एकूण लागवडीखालील क्षेत्र सुमारे 2,75,500 हेक्टर आहे.

The post प्रायोगिक तत्त्वावर पहिल्या चाचणी अंतर्गत ताज्या डाळिंबाची प्रथम निर्यात खेप अमेरिकेला हवाई मार्गाने रवाना appeared first on थोडक्यात घडामोडी.

अमेरिका : अमेरिकेतील टेक्सासमध्ये झालेल्या हत्याकांडानंतर आता ओक्लाहोमामध्येही गोळीबाराची घटना घडली आहे. हॉस्पिटल कॅम्पसमधील तुलसा मेडिकल बिल्डिंगमध्ये बुधवारी झालेल्या गोळीबारात चार जण ठार झाले. कॅप्टन रिचर्ड मेलेनबर्ग यांनी मृतांच्या संख्येची पुष्टी केली. गोळीबार करणाराही मृत झाल्याचे मेलेनबर्ग यांनी सांगितले. मेलेनबर्ग यांनी असेही म्हटले आहे की अनेक लोक जखमी झाले आहेत आणि वैद्यकीय संकुलमध्ये एक “आपत्तीजनक दृश्य” आहे.

पोलिसांनी संध्याकाळी 6 वाजण्यापूर्वी फेसबुक पोस्टमध्ये म्हटले आहे कि, अधिकारी सध्या इमारतीतील प्रत्येक खोलीतून अतिरिक्त धोक्यांची तपासणी करत आहेत. आम्हाला माहित आहे की तेथे अनेक जखमा आहेत आणि संभाव्यत: अनेक बळी आहेत.”

म्यूलेनबर्ग म्हणाले की, अधिकारी घटनास्थळी पोहोचले तोपर्यंत “काही लोकांना गोळ्या घातल्या गेल्याचे त्यांना आढळले. एक जोडपे आधीच मरण पावले होते.” ते म्हणाला, “आम्हाला तो शूटरही मृत आढळला. आम्ही त्याला शूटर मानत आहोत कारण त्याच्याकडे एक लांब रायफल आणि एक पिस्तूल होती. संशयित हल्लेखोर व्यक्तीचा मृत्यू कसा झाला हे लगेच स्पष्ट होऊ शकले नाही.

आठ दिवसांपूर्वी टेक्सासमधील रॉब एलिमेंटरी स्कूलमध्ये स्वयंचलित रायफलने सशस्त्र 18 वर्षीय बंदुकधारी व्यक्तीने हत्याकांड घडवून आणले आणि 19 मुले आणि दोन शिक्षकांना ठार मारले होते. त्यामुळे अमेरिकेतील सुरक्षा व्यवस्थेवर पुन्हा एकदा प्रश्नचिन्ह उभं राहील आहे.

The post अमेरिकेत पुन्हा गोळीबाराची घटना, तुलसा मेडिकल बिल्डिंगमध्ये झालेल्या गोळीबारात चार जण ठार appeared first on थोडक्यात घडामोडी.

अमेरिकेचे परराष्ट्र मंत्री अँटनी ब्लिंकन भारताचे परराष्ट्र मंत्री एस. जयशंकर यांना म्हणाले की, अमेरिका भारतात होत असलेल्या मानवाधिकारांच्या उल्लंघनावर लक्ष ठेवून आहे. मानवाधिकाराच्या मुद्द्यावर अमेरिकेने भारताला थेट इशारा दिल्याची ही एक दुर्मिळ घटना असल्याचे सांगितले जात आहे. ते म्हणाले की आम्ही आमच्या मित्र राष्ट्र भारतासोबत मानवी हक्कांची मूल्ये नियमितपणे शेअर करतो.

भारताचे परराष्ट्र सचिव एस जयशंकर आणि संरक्षण मंत्री राजनाथ सिंह यांच्यासमवेत संयुक्त पत्रकार परिषदेत अमेरिकेचे परराष्ट्र सचिव अँटनी ब्लिंकन म्हणाले, “आम्ही आमच्या भारतीय मित्र राष्ट्रांशी या सामायिक मूल्यांबद्दल बोलत राहतो. यासाठी आम्ही भारतातील चिंताजनक गोष्टी आणि घडामोडींवर लक्ष ठेवून आहोत. यामध्ये काही सरकार, पोलीस आणि तुरुंग अधिकाऱ्यांकडून वाढत्या मानवी हक्क उल्लंघनाच्या घटनांचा समावेश आहे.”

मानवी हक्कांच्या मुद्द्यावर मोदी सरकारवर टीका करण्यास बायडेन प्रशासन इतके लाज का बाळगत आहे, असा सवाल अमेरिकेचे प्रतिनिधी इल्हान ओमर यांनी केल्यानंतर अमेरिकेच्या परराष्ट्र सचिवांनी हा मुद्दा उपस्थित केला आहे. इल्हान उमर यांनी मुस्लिमांच्या मानवी हक्कांबाबत मोदी सरकारच्या धोरणावर जोरदार टीका केली होती.

बायडेन यांच्या पक्षाचे खासदार ओमर यांनी अलीकडेच मोदी सरकार मुस्लिमांच्या मानवी हक्कांचे उल्लंघन करत असल्याचे म्हटले होते. याआधी अमेरिकेच्या परराष्ट्र मंत्रालयाच्या अहवालात म्हटले आहे की, भारतासमोर बेकायदेशीर हत्या, अभिव्यक्ती आणि प्रेस स्वातंत्र्यावरील निर्बंध, भ्रष्टाचार सहिष्णुता आणि धार्मिक स्वातंत्र्याचे उल्लंघन यासह अनेक महत्त्वपूर्ण मानवी हक्क समस्या आहेत.

The post भारतात वाढतेय मानवी हक्कांचे उल्लंघन, अमेरिकेचे परराष्ट्र मंत्री अँटनी ब्लिंकन यांनी दिला ‘हा’ इशारा appeared first on थोडक्यात घडामोडी.

शांघाई : कोरोनाच्या उगमाबाबत सुरु असलेल्या चौकशीच्या पुढच्या टप्प्यात अमेरिकेची चौकशी करण्याची मागणी चिनी शास्त्रज्ञांनी केली आहे. चायनीज सेंटर फॉर डिसीज कंट्रोल अँड प्रिव्हेंशनचे मुख्य एपिडिमोलोजिस्ट झेंग गुआंग यांनी म्हटले आहे की आता अमेरिकेवर लक्ष केंद्रित करण्याची गरज आहे. डिसेंबर २०१९ च्या अखेरीस चीनमधील वुहानमध्ये कोरोनाबाधित आढळले होते. परंतु, एका अहवालानुसार, अमेरिकेत डिसेंबर २०१९ च्या सुरुवातीच्या दिवसांमध्येच कोरोनाचा संसर्ग फैलावत होता.

युएस नॅशनल इन्स्टिट्यूट फॉर हेल्थने या आठवड्यात प्रकाशित केलेल्या अहवालानुसार, कोरोनाच्या पहिल्या बाधिताची माहिती समोर येण्याच्या काही आठवड्यांपूर्वीच अमेरिकेतील पाच वेगवेगळ्या राज्यांमध्ये किमान सात जणांना कोरोनाची लागण झाली होती. चीनने याच अहवालाच्या आधारे आता अमेरिकेची चौकशी करण्याची मागणी केली आहे.

झेंग गुआंग यांनी ‘ग्लोबल टाइम्स’ला सांगितले की, कोरोना विषाणूच्या उत्पतीबाबत सुरू असलेल्या चौकशीचा रोख आता अमेरिकेकडे नेण्याची आवश्यकता आहे. अमेरिकेतील जैविक प्रयोगशाळांशी निगडीत असलेल्या सर्व बाबींची चौकशी करण्याची आवश्यकता आहे. तसेच जैव-शस्त्रांसंबंधित विषयांची छाननी केली जावी.

मागील वर्षी कोरोनाच्या संसर्गाचा जगभरात फैलाव झाल्यानंतर तत्कालीन अमेरिकेचे राष्ट्राध्यक्ष डोनाल्ड ट्रम्प यांनी चीनवर निशाणा साधत त्यांच्याविरोधात मोहीम सुरू केली होती. कोरोनाच्या विषाणूची उत्पत्ती चीनमध्येच झाली असल्याचा दावा सातत्याने अमेरिकेकडून करण्यात येत आहे. याआधी एका संशोधनात SARS-CoV-2 चा विषाणू सप्टेंबर महिन्यात युरोपमध्ये फैलावला असल्याचा दावा करण्यात आला होता. मात्र, तेव्हादेखील तज्ज्ञांनी असं मत मांडलं होतं की याचा अर्थ असा होत नाही की विषाणूचा उगम चीनमध्ये झाला नाही, कारण चीनच्या जंगलात सार्ससारखे अनेक कोरोना विषाणू आढळतात.

The post कोरोनाच्या उगमाबाबत अमेरिकेची चौकशी करण्याची गरज, चीनने केली मागणी appeared first on थोडक्यात घडामोडी.

अमेरिकन अध्यक्षपदाच्या निवडणुकीत डेमोक्रॅटिक पक्षाच्या जो बायडन यांची अमेरिकन राष्ट्राध्यक्षपदी निवड झाली. मात्र, डोनाल्ड ट्रम्प यांनी त्यांचा पराभव अमान्य करुन पद सोडण्यास नकार दिला होता. निवडणुकीचा निकाल लागल्यानंतर तीन आठवडे झाले तरी ट्रम्प आपल्या निश्चयावर ठाम होते. निवडणुकीत गैरप्रकार झाल्याचं सांगून त्याविरोधात न्यायालयात जाणार असल्याचंही त्यांनी स्पष्ट केलं होतं. आता मात्र डोनाल्ड ट्रम्प यांनी सत्ता हस्तांतरणाची प्रक्रिया सुरु करण्यास मंजुरी दिली आहे.

डोनाल्ड ट्रम्प यांनी अमेरिकेच्या जनरल सर्व्हिस ऑफ अॅडमिनिस्ट्रेशनला सत्ता हस्तांतरण प्रक्रिया सुरु करण्यास मंजुरी दिली आहे. डोनाल्ड ट्रम्प यांनी सांगितले की प्रक्रियानुसार जे काही करणे आवश्यक आहे ते केले पाहिजे. त्यानंतर जनरल सर्व्हिस ऑफ अॅडमिनिस्ट्रेशनचे प्रमुखांनी जो बायडन यांना पत्र लिहून त्यांना सत्ता हस्तांतरणाच्या प्रक्रियेमध्ये सामिल होण्याचे आमंत्रण दिले आहे. विश्लेषकांच्या मते, सत्ता हस्तांतरणाच्या प्रक्रियेला मान्यता देऊन डोनाल्ड ट्रम्प यांनी अप्रत्यक्षपणे आपला पराभव मान्य करण्याचे संकेत दिले आहेत.

या सत्ता हस्तांतरणांमुळे आता निर्वाचित अध्यक्ष जो बायडन यांच्या टीमला व्हाईट हाऊसमधील अनेक महत्वाच्या गोष्टींचा अधिकार प्राप्त होणार आहे. निर्वाचित उपाध्यक्षा कमला हॅरिस यांनी या अगोदरच संरक्षणासंबंधीच्या नियमित बैठकांमध्ये भाग घेण्यास सुरुवात केली आहे.

The post डोनाल्ड ट्रम्प यांनी अखेर मान्य केला पराभव, सत्ता हस्तांतरणाची प्रक्रिया सुरु appeared first on थोडक्यात घडामोडी.

अमेरिकेच्या परराष्ट्र व्यवहार विभागाच्या प्रवक्ता मॉर्गन ऑर्टागस यांनी म्हटले आहे की, एकटी अमेरिका जागतिक आव्हानांना सामोरे जाऊ शकत नाही. त्यासाठी भारताची साथ खूप महत्वाची आहे. दोघेही संयुक्तपणे मजबूत आणि सुरक्षित राष्ट्र आहेत. जागतिक आव्हानांचा सामना करण्यासाठी दोन्ही देश एकत्रितपणे कार्य करीत आहेत.

ऑर्टागस म्हणाल्या की, अमेरिका आणि भारत यांच्यातील संबंध पूर्वीपेक्षा अधिक मजबूत झाले आहेत. भविष्यात दोन्ही देशांमधील संबंध अधिक दृढ आणि मजबूत बनतील. दोन्ही देशांमधील संबंध राजकीय पक्षांच्या पार्टी लाइनपेक्षा वरचे आहेत. कोणत्याही प्रशासनासाठी हे आवश्यक असेल. 3 नोव्हेंबर रोजी होणाऱ्या निवडणुकीत डेमोक्रॅटिक किंवा रिपब्लिकन पार्टी या दोन्हीपैकी कोणाचाही विजय झाला तरी, भारताशी चांगले संबंध राखले जातील. यामागील धारणा अशी आहे की अमेरिकन लोकांना हे माहित आहे की अमेरिका आणि भारत एकत्र खूप मजबूत स्थितीत आहेत. दोघेही एकत्रितपणे अधिक सुरक्षित आहेत.

ऑर्टॅगस पुढे म्हणाल्या की, आम्हाला माहित आहे की येत्या 10 वर्षांत जागतिक आव्हानांचे आकार वाढतील. ही आव्हाने अधिक जटिल असतील. एकट्या अमेरिकेलाच या आव्हानांना सामोरे जात येणार नाही. हे काम आम्हाला आमच्या भागीदारांसह करावे लागेल. भारताशी आमची जागतिक भागीदारी मोठी होणार आहे. लोकशाही प्रक्रियेच्या दृष्टीने दोन्ही देश समान आहेत. भारत आणि अमेरिका हे जगातील सर्वात मोठे लोकशाहीप्रधान देश आहेत. दोन्ही देशांमधील समान मूल्ये अमेरिका आणि भारत यांना एक समान व्यासपीठ प्रदान करतात.

The post एकटी अमेरिका जागतिक आव्हानांना सामोरे जाऊ शकत नाही, भारताची साथ महत्वाची – मॉर्गन ऑर्टागस appeared first on थोडक्यात घडामोडी.