ठाणे : देवपूजा करताना दिव्याची पेटती वात अंगावर पडल्याने एक ४८ वर्षीय महिला गंभीररित्या भाजली. तत्काळ रुग्णालयात दाखल करूनही उपचारादरम्यान तिचा दुर्दैवी मृत्यू झाला. अर्चना धर्मेंद्र कुमार (वय ४८) असे या मयत महिलेचे नाव आहे. डोंबिवली पूर्वेतील पिसवली भागात शनिवारी सकाळी ही दुर्दैवी घटना घडली.

शनिवारी सकाळी अर्चना कुमार या त्यांच्या घरी नेहमीप्रमाणे देवपूजा करत होत्या. पूजा पूर्ण केल्यानंतर त्या दिवा ओवाळण्याच्या तयारीत होत्या. याच वेळी, दिव्यातील पेटती वात अचानक त्यांच्या अंगावर पडली. यामुळे त्यांच्या अंगावरील कपड्यांना तात्काळ आग लागली. अंगावर तलम कपडे असल्याने आगीने झपाट्याने पेट घेतला आणि काही क्षणांतच अर्चना संपूर्णतः आगीत वेढल्या गेल्या. या आकस्मिक घटनेमुळे त्यांना स्वतःला वाचवण्याची संधीही मिळाली नाही. त्यांच्या किंकाळ्या ऐकून घरातील आणि शेजारील लोकांनी तत्काळ धाव घेतली.

अर्चना यांना गंभीर अवस्थेत तातडीने कल्याण पूर्वेतील काका ढाबा परिसरातील जानकी ग्लोबल रुग्णालयात नेण्यात आले. जानकी ग्लोबल रुग्णालयातील डॉक्टरांनी त्यांची प्रकृती गंभीर असल्याचे सांगितले आणि त्यांना पुढील उच्च उपचारासाठी तत्काळ अन्य ठिकाणी नेण्याचा सल्ला दिला. यानुसार, अर्चना यांना डोंबिवली एमआयडीसीतील डॉ. मिलिंद शिरोडकर यांच्या एम्स रुग्णालयात हलवण्यात आले. तेथे डॉक्टरांनी शर्थीचे प्रयत्न करूनही अर्चना यांची प्रकृती सतत खालावत गेली. त्यांनी उपचारांना प्रतिसाद देणे थांबवले होते. अखेर त्यांचा दुर्दैवी मृत्यू झाला.

या दुर्घटनेनंतर अर्चनाचे पती धर्मेंद्र कुमार यांनी मानपाडा पोलीस ठाण्यात तक्रार दाखल केली. पोलिसांनी या घटनेची अपघाती मृत्यू म्हणून नोंद केली असून, पुढील तपास सुरू आहे. या घटनेमुळे परिसरात हळहळ व्यक्त केली जात आहे.

The post पूजा करताना पेटलेली वात अंगावर पडली, गंभीर भाजल्याने महिलेचा मृत्यू appeared first on थोडक्यात घडामोडी.

पुणे : भरधाव वेगाने जाणारी दुचाकी विजेच्या खांबाला धडकून दुचाकीस्वार आणि त्याच्या मागे बसलेल्या प्रवाशाचा मृत्यू झाल्याची घटना समोर आली आहे. जांभुळवाडी परिसरात मंगळवारी रात्री उशिरा हा भीषण अपघात घडला.

पोलिसांच्या माहितीनुसार, हा अपघात मंगळवारी मध्यरात्रीच्या सुमारास घडला. जांभुळवाडी रस्त्यावर गाथा स्विमिंग पूलजवळ दुचाकीवरील चालकाचे नियंत्रण सुटले, ज्यामुळे दुचाकी रस्त्याच्या कडेला असलेल्या धातूच्या विजेच्या खांबावर आदळली. या अपघातात चालक आणि प्रवाशाच्या डोक्याला गंभीर दुखापत झाली. पोलिसांनी तात्काळ घटनास्थळी पोहोचून जखमींना रुग्णालयात दाखल केले. मात्र, रुग्णालयात त्यांना मृत घोषित करण्यात आले.

पोलिसांनी सांगितले की, हा अपघात अतिवेगामुळे झाला आहे आणि अधिक तपास सुरू आहे. या घटनेने वाहनचालकांना वेग नियंत्रणात ठेवण्याचे महत्त्व पुन्हा एकदा अधोरेखित झाले आहे.

कात्रज डेअरीजवळ अपघात : रुग्णवाहिकेच्या धडकेत मोटारसायकलस्वाराचा मृत्यू

The post जांभुळवाडी परिसरात भीषण अपघात, भरधाव दुचाकी विजेच्या खांबाला धडकल्याने दोघांचा मृत्यू appeared first on थोडक्यात घडामोडी.

राजस्थान : राजस्थानमधील नागौर येथे श्रीबालाजीजवळ मंगळवारी सकाळी भीषण अपघात झाला आहे. या अपघातात मध्य प्रदेशातील 12 जणांचा मृत्यू झाला असून 6 जणांची प्रकृती गंभीर आहे. नोखा बायपासवर जीप आणि ट्रेलर यांच्यात भीषण धडक झाली. सर्व मृत हे मध्य प्रदेशातील उज्जैन जिल्ह्यातील सज्जन खेडा आणि दौलतपूर गावातील रहिवासी असल्याचे सांगितले जाते.

मिळालेल्या माहितीनुसार, या 12 सीटर जीपमध्ये 18 लोक बसलेले होते. रामदेवरा येथे दर्शन घेतल्यानंतर हे सर्व लोक देशनोक करणी माता येथे दर्शन घेऊन मध्य प्रदेशला निघाले होते. दरम्यान, नागौरहून नोखाकडे जाणारा ट्रेलर आणि जीप यांच्यात जोरदार धडक झाली. हा अपघात इतका भयंकर होता की 8 जणांचा जागीच मृत्यू झाला. रुग्णालयात नेत असताना तीन जणांचा मृत्यू झाला तर एकाचा उपचारादरम्यान मृत्यू झाला. अनेक लोकांचे मृतदेह जीपमध्येच अडकून पडले होते. अपघाताची माहिती मिळताच स्थानिक लोक तेथे पोहोचले आणि त्यांनी पोलिसांना आणि रुग्णवाहिकेला या अपघाताची माहिती दिली. त्यानंतर स्थानिक लोकांच्या मदतीने मृतदेह बाहेर काढण्यात आले.

The post जीप आणि ट्रेलरमध्ये भीषण अपघात, 12 जणांचा मृत्यू तर 6 जणांची प्रकृती गंभीर appeared first on थोडक्यात घडामोडी.

पालघरहून चाहडे नाक्याकडे जाणाऱ्या पिकअपला भीषण अपघात झाला आहे. पालघर-मनोर रस्त्यावर जीप आणि पीकअपच्या झालेल्या या अपघातात पिकअपमधील 12 मजूर गंभीर जखमी झाले आहेत.

चालकाचे नियंत्रण सुटल्याने हा अपघात झाल्याची माहिती मिळत आहे. यामध्ये पिकअप पलटी झाल्यामुळे मजूर गंभीर जखमी झाले. विनोद कुकवेयर कंपनी जवळ जीपचा भीषण अपघात झाला. जीपमधील 10 ते 12 मजूर गंभीर जखमी झाले आहेत.

The post पालघर-मनोर रस्त्यावर भीषण अपघात, पिकअप पलटी झाल्यामुळे 10 ते १२ मजूर गंभीर जखमी appeared first on थोडक्यात घडामोडी.