पुणे : पुणे जिल्ह्यातील मावळ तालुक्यात एक अत्यंत धक्कादायक आणि संतापजनक घटना उघडकीस आली आहे. अवघ्या पाच वर्षांच्या चिमुकलीवर बलात्कार करून तिची निर्घृण हत्या करण्यात आल्याची माहिती समोर आली असून, या घटनेमुळे संपूर्ण परिसरात तीव्र संताप व्यक्त केला जात आहे.

ही घटना शनिवारी (१३ डिसेंबर) सायंकाळी सुमारे सहा वाजण्याच्या सुमारास घडली. संबंधित चिमुकली घरातून अचानक बेपत्ता झाल्याचे निदर्शनास आले. रात्री आई कामावरून घरी परतल्यानंतर मुलगी दिसत नसल्याने तिने तातडीने परिसरात शोध घेतला. मात्र मुलगी सापडली नाही. त्यानंतर आईने पोलिस ठाण्यात धाव घेतली.

पोलिसांनी प्रकरणाचे गांभीर्य लक्षात घेऊन तातडीने तपास सुरू केला. पिंपरी–चिंचवड पोलिसांनी तातडीने शोध मोहीम सुरू केली. पोलिसांच्या प्राथमिक तपासात असे निष्पन्न झाले की, ही चिमुकली घरात अनेकदा एकटी राहायची, याच गोष्टीचा फायदा आरोपीने घेतला. शनिवारी मुलगी घरात एकटी असताना समीर कुमार मंडळ (वय ३० ते ३५, विवाहित) या आरोपीने तिला चॉकलेटचे आमिष दाखवून घराजवळच काही अंतरावर नेले. तेथे तिच्यावर अत्याचार केला आणि नंतर गळा दाबून तिची हत्या केल्याचे पोलिसांनी स्पष्ट केले.

पोलीस चौकशीत संपूर्ण घटना उघडकीस आली असून, आरोपीला पोलिसांनी अटक केली आहे. आरोपीविरोधात गंभीर कलमांखाली गुन्हा दाखल करण्यात आला असून पुढील तपास सुरू आहे. या प्रकरणातील सर्व लोक शिरगाव परंडवाडी परिसरातील एका चाळीत राहतात. आरोपी हा पीडित मुलगी आणि तिच्या कुटुंबाचा शेजारी आहे.

या अमानुष घटनेमुळे मावळ परिसरात संतापाची लाट उसळली असून, नागरिकांकडून आरोपीला कठोरात कठोर शिक्षा देण्याची मागणी केली जात आहे. पोलिस प्रशासनाने परिसरात बंदोबस्त वाढवला असून नागरिकांना शांतता राखण्याचे आवाहन करण्यात आले आहे.

The post पुणे हादरले! पाच वर्षांच्या चिमुकलीवर अत्याचार करून निर्घृण हत्या, परिसरात तीव्र संतापाची लाट appeared first on थोडक्यात घडामोडी.

पुणे : पुणे महानगरपालिकेच्या कचरा वाहतूक करणाऱ्या डंपरने एका दुचाकीस्वार विद्यार्थिनीला धडक दिल्याने तिचा जागीच मृत्यू झाला. हा हृदयद्रावक अपघात मंगळवारी (२७ मे) दुपारी १:३० वाजण्याच्या सुमारास विश्रांतवाडी परिसरात घडला. मृत मुलीचे नाव एकता भरत पटेल (वय २३) असे असून, ती पिंपळे गुरव येथील विद्यानगर भागातील रहिवासी होती.

मिळालेल्या माहितीनुसार, एकता लोहगाव येथील एका खाजगी महाविद्यालयात शिकत होती. अपघाताच्या दिवशी ती तिच्या दुचाकीवरून विश्रांतवाडीहून येरवडा मध्यवर्ती कारागृहाच्या दिशेने जात होती. कॉमर्सझोन कंपनीजवळ ती येत असताना, भरधाव वेगात येणाऱ्या पुणे महानगरपालिकेच्या कचरा वाहतूक करणाऱ्या डंपरने तिच्या दुचाकीला जोरदार धडक दिली. धडकेनंतर ती रस्त्यावर पडली आणि डंपरच्या चाकाखाली आल्याने तिचा जागीच मृत्यू झाला.

घटनेची माहिती मिळताच विश्रांतवाडी पोलीस तत्काळ घटनास्थळी दाखल झाले. त्यांनी डंपर चालक त्र्यंबक शेरखाने याला ताब्यात घेतले असून, त्याच्याविरोधात निष्काळजीपणाने वाहन चालवल्यामुळे मृत्यूस कारणीभूत झाल्याचा गुन्हा दाखल करण्यात आला आहे. पोलिसांनी मृतदेह शवविच्छेदनासाठी ससून रुग्णालयात पाठवला असून अधिक तपास सुरू आहे.

वाढते अपघात आणि प्रशासनाचे दुर्लक्ष
या प्रकरणाने पीएमसीच्या कचरा वाहतुकीसाठी वापरल्या जाणाऱ्या डंपर गाड्यांच्या बिनधास्त व बेदरकार वाहनचालकांचे प्रश्न पुन्हा ऐरणीवर आणले आहेत. पोलिसांच्या मते, अनेक अपघात हे चालकांच्या निष्काळजीपणामुळेच होत आहेत. अपघातस्थळी सीसीटीव्ही नसल्यामुळे अनेकदा पुरावे मिळवणे कठीण जाते, त्यामुळे दोषींना शिक्षा होण्याचे प्रमाण अत्यल्प राहते.

नागरिकांमध्ये संतापाची लाट
या अपघातामुळे परिसरात तणावाचं वातावरण निर्माण झालं असून, स्थानिक नागरिकांमध्ये संतापाची लाट उसळली आहे. घटनास्थळी जमलेल्या नागरिकांनी महापालिकेच्या हलगर्जीपणाचा निषेध केला. अनेकांनी महापालिकेच्या कचरा वाहतूक करणाऱ्या गाड्यांच्या निष्काळजी व बेफिकीर वाहतुकीवर तीव्र शब्दांत नाराजी व्यक्त केली. एकता पटेल ही एक कष्टाळू व अभ्यासू विद्यार्थिनी होती. तिच्या अकाली निधनामुळे तिच्या कुटुंबावर दुःखाचा डोंगर कोसळला आहे. परिसरातील नागरिकांनी शोक व्यक्त करत प्रशासनाकडे कठोर कारवाईची मागणी केली आहे.

मागण्या आणि उपाय

या घटनेच्या पार्श्वभूमीवर नागरिकांनी पुढील मागण्या केल्या आहेत:

• कचरा वाहतूक करणाऱ्या वाहनांवर वेगमर्यादा अनिवार्य करावी.
• प्रत्येक वाहनामध्ये जीपीएस व कॅमेरे बसवणे बंधनकारक करावे.
• चालकांची वैद्यकीय व मानसिक चाचणी नियमित घ्यावी.
• अपघात प्रवण भागांमध्ये सीसीटीव्ही आणि गतिरोधक लावावेत.
• दोषी चालकांवर कठोरात कठोर कारवाई करावी.

पोलिस व महापालिका प्रशासन या घटनेकडे गांभीर्याने पाहतात की नाही, हे येत्या काही दिवसांत स्पष्ट होईल. सध्या तरी एक शिक्षण घेणारी निरपराध तरुणी शहरातील वाहतूक आणि प्रशासनाच्या बेफिकीरीची शिकार ठरली, हीच खंत सर्वांनाच बोचत आहे.

The post पीएमसी डंपरच्या धडकेत २३ वर्षीय विद्यार्थिनीचा मृत्यू, नागरिकांमध्ये संतापाची लाट appeared first on थोडक्यात घडामोडी.

पुणे : पुण्याच्या पिरंगुट एमआयडीसी भागातील एका सॅनिटायझर उत्पादक कारखान्यात सायंकाळी पाचच्या सुमारास भीषण आग लागली. कारखान्यात अडकलेल्या 37 पैकी 8 महिला कामगार या भीषण आगीत मरण पावल्या आहेत. अद्याप बरेच कर्मचारी बेपत्ता आहेत. कारखान्यातून निघणारे धुराचे लॉट आजूबाजूच्या परिसरात पसरत आहेत.

घटनेची माहिती मिळताच अग्निशामक दलाच्या 3 गाड्या घटनास्थळी दाखल झाल्या आहेत. मदत व बचावकार्य सुरु आहे. सॅनिटायझरमध्ये अल्कोहोलचे प्रमाण असते, त्यामुळे आग वेगाने पसरत आहे. जेसीबीच्या साहाय्याने भिंत फोडून कामगारांना सुखरूप बाहेर काढण्याचे प्रयन्त सुरु आहेत. आग नेमकी कशामुळे लागली, ते समजू शकले नाही मात्र, आगीची तीव्रता पाहता आतमध्ये मोठ्या प्रमाणात सॅनिटायजर तसेच इतर ज्वलनशील रसायन साठा असण्याची शक्यता वर्तविण्यात येत आहे.

आगीचे कारण अद्याप स्पष्ट झालेले नसले, तरी शॉर्ट सर्किटमुळे आग लागल्याची शक्यता वर्तवण्यात येत आहे. मुळशी तहसीलदार अभय यांनी सांगितले की, तीन फायर टेंडरने आग आटोक्यात आणण्याचे प्रयत्न सुरू केले आहेत. पोलिस निरीक्षक अशोक धुमाळही घटनास्थळी दाखल झाले आहेत. अग्निशामक दलाचे जवान युद्धपातळीवर बचावकार्य करत आहेत.

The post ब्रेकिंग : पुण्यात अग्नितांडव, पिरंगुट एमआयडीसी भागातील सॅनिटायझर उत्पादक कारखान्यात भीषण आग, 8 महिला ठार appeared first on थोडक्यात घडामोडी.

पुणे : पिंपरी पोलिसांनी मोठी कारवाई करत भाजपच्या नगरसेवकाला अटक केली आहे. पिंपरी-चिंचवड नवनगर विकास प्राधिकरणाची जागा बनावट कागदपत्रे, संमतीपत्र, ताबा पावती, साठेखत बनवून परस्पर विकून १५ लाख ८० हजार रुपये उकळणाऱ्या महापालिकेतील नगरसेवक राजेंद्र लांडगे यांच्यासह दोघांना भोसरी पोलिसांनी अटक केली आहे.

नगरसेवक राजेंद्र किसन लांडगे (वय ४२) यांच्यासह मनोज महेंद्र शर्मा (वय ३८) याला अटक केली आहे. तर, रविकांत सुरेंद्र ठाकूर (वय ४०) याच्यावर गुन्हा दाखल करण्यात आला आहे. याप्रकरणी प्राधिकरणाचे सहाय्यक अभियंता एस. एस. भुजबळ यांनी भोसरी पोलीस ठाण्यात फिर्याद दिली आहे. मूळ मालक नसताना लांडगे यांनी परस्पर बनावट कागदपत्रे तयार केल्याचा आरोप करण्यात आला आहे. पोलीस याप्रकरणी रविकांत ठाकूरचा शोध घेत आहेत. राजेंद्र लांडगे प्रथमच पालिकेवर निवडून आले असून, त्यांनी शहर सुधारणा समितीचे अध्यक्षपद भूषविले आहे.

The post भाजपच्या नगरसेवकाला जमिन विक्री प्रकरणात अटक appeared first on थोडक्यात घडामोडी.