बारामती : पुणे जिल्ह्यातील बारामती शहरात तरुणीचा अकस्मात आणि संशयास्पद मृत्यू झाल्याप्रकरणी तिच्या आईने दिलेल्या फिर्यादीनुसार अथर्व राजेंद्र मेहन (वय २७) याच्याविरुद्ध गुन्हा दाखल करण्यात आला आहे. अथर्व वारंवार शारीरिक संबंध ठेवण्यासाठी आग्रह करीत होता आणि काही गोळ्या देत असल्याचे मयत तरुणीच्या मैत्रिणीने सांगितल्याचा दावा आईने फिर्यादीत केला आहे.

मयत तरुणीने बी.एस्सी. अॅग्रीकल्चरचे शिक्षण पूर्ण केले होते. एमपीएससी परीक्षेच्या तयारीसाठी तिने ऑक्टोबर २०२५ पासून पुण्यात ट्यूशन्स सुरू केल्या होत्या. डिसेंबर २०२५ मध्ये तिचे अथर्वसोबत प्रेमसंबंध असल्याची माहिती तिच्या मैत्रिणीमार्फत आईला मिळाली होती.

पोलिसांनी दिलेल्या माहितीनुसार, तरुणी आणि अथर्व यांच्यात प्रेमसंबंध होते. त्यानंतर दोन्ही कुटुंबांच्या संमतीने त्यांचा विवाहही ठरला होता. मात्र, काही दिवसांपासून तरुणी शांत राहत असल्याचे तिच्या आईच्या निदर्शनास आले होते.

तरुणीच्या मैत्रिणीने अथर्व वारंवार शारीरिक संबंध ठेवण्यासाठी आग्रह करीत असल्याचे तसेच तो तिला काही गोळ्या देत असल्याचे सांगितल्याचा दावा आईने फिर्यादीत केला आहे.

६ ऑगस्ट रोजी अथर्व तरुणीला एमबीए प्रवेशाच्या कामासाठी घेऊन गेला होता. अथर्वची आई आणि मावशी यांना दौंड येथे सोडण्यासाठी जात असल्याचे त्याने सांगितले होते. आईने व्हिडिओ कॉल केला असता तरुणी अथर्वसोबत कारमध्ये असल्याचे दिसले.

सायंकाळी सातच्या सुमारास आईने मुलीला फोन केला; मात्र तिने फोन उचलला नाही. त्यानंतर अथर्वला फोन केल्यानंतर आईचे मुलीशी बोलणे झाले. त्या वेळी अथर्व मला घरी घेऊन जाणार असून, त्याला माझ्यासोबत शारीरिक संबंध ठेवायचे आहेत आणि तो मला गोळी देणार असल्याचे मुलीने सांगितल्याचा दावा फिर्यादीत करण्यात आला आहे.

आईने मुलीला अथर्वच्या घरी जाऊ नकोस आणि तातडीने घरी परत ये, असे सांगितले होते. रात्री नऊच्या सुमारास आईने मेसेज केल्यानंतर मुलीने जेवण करीत असल्याचे उत्तर दिले. त्यानंतर मात्र तिच्याकडून कोणताही प्रतिसाद मिळाला नाही.

मिळालेल्या माहितीनुसार, दोघांनी एमआयडीसी परिसरातील हॉटेलमध्ये जेवण केले. त्यानंतर ते अथर्वच्या घरी गेले. रात्री दहाच्या सुमारास आईने फोन केला असता अथर्वने फोन उचलला आणि तरुणीला चक्कर आल्याचे सांगितले.

प्रकृती बिघडल्यानंतर अथर्व तरुणीला प्रथम देवकाते हॉस्पिटल, त्यानंतर भोईटे हॉस्पिटल आणि पुढे सिल्वर जुबली हॉस्पिटल येथे घेऊन गेला. रात्री सुमारे १०.२० वाजता तिची आई सिल्वर जुबली हॉस्पिटलमध्ये पोहोचली. त्यावेळी तरुणी स्ट्रेचरवर होती. रुग्णालयात पोहोचण्यापूर्वीच तिचा मृत्यू झाल्याचे आईला समजले.

या घटनेनंतर आईने मुलीच्या मृत्यूबाबत संशय व्यक्त करीत पोलिसांत फिर्याद दिली. त्यानुसार अथर्व राजेंद्र मेहन याच्याविरुद्ध गुन्हा दाखल करण्यात आला आहे. औषधे, वैद्यकीय अहवाल तसेच डिजिटल पुराव्यांच्या आधारे पोलिसांकडून पुढील तपास सुरू आहे.

The post लग्न ठरलेल्या प्रियकरासोबत तरुणीचा संशयास्पद मृत्यू; आईचा गंभीर आरोप appeared first on थोडक्यात घडामोडी.

रायगड : लग्नाचे खोटे आश्वासन देऊन १८ वर्षे ७ महिन्यांच्या तरुणीशी जबरदस्तीने शारीरिक संबंध ठेवण्यात आल्याचा गंभीर प्रकार अलिबाग तालुक्यात समोर आला आहे. पीडित तरुणीने अलिबाग पोलीस ठाण्यात तक्रार नोंदवत आरोपी नितेश पाटील उर्फ पप्प्या, रा. खंडाळे, याच्याविरोधात भारतीय न्याय संहिता २०२३च्या कलम ६९ अंतर्गत गुन्हा दाखल करण्यात आला आहे.

पोलिसांनी दिलेल्या माहितीनुसार, पीडित तरुणी आणि आरोपी एकमेकांच्या ओळखीचे होते आणि काही काळ त्यांच्यात प्रेमसंबंध होते. या नात्याचा फायदा घेत आरोपीने तरुणीचा विश्वास संपादन करून तिला लग्नाचे आश्वासन दिले. त्यानंतर आरोपीने तिला मौजे गोंधळपाडा येथील एका लॉजवर नेले आणि तरुणी विरोध करत असतानाही तिच्याशी जबरदस्तीने शारीरिक संबंध ठेवले, असा आरोप तक्रारीत करण्यात आला आहे.

घटना कधी घडली?
ही घटना डिसेंबर २०२५मध्ये घडली असल्याचे पीडितेने नमूद केले आहे. मात्र नेमका दिवस व वेळ आठवत नसल्याचे तीने स्पष्ट केले आहे. घटनेनंतर जेव्हा तिने आरोपीकडे लग्नाबाबत विचारणा केली, तेव्हा आरोपीने सरळ नकार देत तिची फसवणूक केल्याचे उघड झाले.

१४ जानेवारी २०२६ रोजी पहाटे ४.१७ वाजता अलिबाग पोलीस ठाण्यात गुन्हा रजिस्टर क्रमांक ०७/२०२६ नुसार गुन्हा नोंदवण्यात आला. या प्रकरणाचा तपास उपविभागीय पोलीस अधिकारी जालींदर नालकुल (पेण विभाग) यांच्या मार्गदर्शनाखाली सुरू असून तपासिक अधिकारी सरिता मुसळे, सहाय्यक पोलीस निरीक्षक, यांच्याकडे तपासाची जबाबदारी सोपवण्यात आली आहे.

आरोपीचा गुन्हेगारी इतिहास
पोलिस सूत्रांनी दिलेल्या माहितीनुसार आरोपी पाटील याच्यावर यापूर्वीही अनेक गुन्हे नोंद आहेत. २०१५ मध्ये महिलेशी छेडछाड तसेच घरात घुसखोरीचे गुन्हे; तर २०२३ मध्ये मारहाण, धमकी आणि नुकसानप्रकरणी गुन्हे नोंदवले गेले होते. त्यामुळे या प्रकरणाने प्रेमसंबंधांच्या आडून होणाऱ्या फसवणूक व अत्याचाराच्या घटनांवर पुन्हा एकदा गंभीर प्रश्नचिन्ह उपस्थित केले आहे.

पोलीस प्रशासनाने पीडित तरुणीला आवश्यक ते संरक्षण दिले असून आरोपीविरुद्ध कठोर कारवाई केली जाईल, असे स्पष्ट करण्यात आले आहे. घटनेच्या पुढील तपासावर आता सर्वांचे लक्ष लागले आहे.

The post लग्नाचे आमिष दाखवून तरुणीशी जबरदस्ती शारीरिक संबंध, तरुणीची पहाटेच पोलीस ठाण्यात धाव… appeared first on थोडक्यात घडामोडी.

नागपूर : नागपूर शहरातील हुडकेश्वर पोलिस ठाण्याच्या हद्दीतील नरसाळा गावाच्या मागील भागात मंगळवारी पहाटे एक हृदयद्रावक घटना घडली. स्मशानभूमीजवळील नाल्याच्या पलीकडे असलेल्या मजूर वस्तीमध्ये अज्ञात प्राण्याच्या हल्ल्यात अवघ्या ८ महिन्यांच्या चिमुकलीचा दुर्दैवी मृत्यू झाला. या घटनेमुळे संपूर्ण परिसरात भीतीचे वातावरण पसरले असून स्थलांतरित मजूर कुटुंबांमध्ये दहशत निर्माण झाली आहे.

मृत चिमुकलीचे नाव अनुष्का रवी मेळा असे असून ती मूळची मध्यप्रदेशातील सेलमिया गावाची रहिवासी होती. कामाच्या शोधात ठेकेदारामार्फत तिचे कुटुंब नागपुरात आले होते. नरसाळा गावाच्या मागील बाजूस, स्मशानभूमीजवळ नाल्याच्या पलीकडे असलेल्या झोपडपट्टीत हे कुटुंब वास्तव्यास होते. या परिसरात बाहेरगावाहून आलेले अनेक मजूर कुटुंबांसह राहतात.

प्राथमिक माहितीनुसार, ही घटना पहाटे सुमारे २ वाजताच्या सुमारास घडली असावी. अनुष्का आपल्या आईसोबत झोपलेली असताना अज्ञात प्राण्याने तिला उचलून नेल्याचा संशय व्यक्त करण्यात येत आहे. काही वेळाने मुलगी दिसून न आल्याने कुटुंबीय घाबरले. त्यांनी तातडीने परिसरात शोधाशोध सुरू केली. त्यानंतर झोपडपट्टीजवळच काही अंतरावर छिन्नविछिन्न अवस्थेत अनुष्काचा मृतदेह आढळून आला.

हल्लेखोर प्राण्याने चिमुकलीच्या शरीराचे लचके तोडल्याचे स्पष्ट झाले असून तिच्या शरीराचा सुमारे ३० ते ४० टक्के भाग, विशेषतः छाती व हात प्राण्याने खाल्ल्याचे आढळून आले आहे. परिसरात मोठ्या प्रमाणावर अंधार असून रात्रीच्या वेळी पुरेशी प्रकाशव्यवस्था नसल्याने या अंधाराचा फायदा घेत ही घटना घडली असावी, असा प्राथमिक अंदाज पोलिसांनी व्यक्त केला आहे. मात्र, हा हल्ला नेमका कोणत्या प्राण्याने केला, याबाबत अद्याप स्पष्टता झालेली नाही. परिसरात कुत्रे, डुकरे तसेच अन्य वन्यप्राणी वावरत असल्याची चर्चा स्थानिकांमध्ये सुरू आहे.

या घटनेनंतर मजूर वस्तीत भीतीचे वातावरण पसरले असून अनेक कुटुंबांनी रात्री जागून पहारा देण्यास सुरुवात केली आहे. हुडकेश्वर पोलिसांनी घटनास्थळी पंचनामा करून पुढील तपास सुरू केला आहे. तसेच वनविभागालाही या घटनेची माहिती देण्यात आली असून संभाव्य धोकादायक प्राण्याचा शोध घेण्याची प्रक्रिया सुरू आहे.

या घटनेमुळे बाहेरगावाहून कामासाठी आलेल्या मजुरांच्या सुरक्षिततेचा गंभीर प्रश्न ऐरणीवर आला असून प्रशासनाने तातडीने प्रकाशव्यवस्था, सुरक्षा उपाय आणि आवश्यक प्रतिबंधात्मक पावले उचलावीत, अशी जोरदार मागणी स्थानिक नागरिकांकडून करण्यात येत आहे.

The post हृदयद्रावक! अज्ञात प्राण्याने आईच्या कुशीतून ८ महिन्यांच्या चिमुकलीला उचललं, छिन्नविछिन्न अवस्थेत आढळला मृतदेह appeared first on थोडक्यात घडामोडी.

राजस्थान : राजस्थानमधील उदयपूर शहरात घडलेल्या सामूहिक बलात्कार प्रकरणाने केवळ शहरच नव्हे तर संपूर्ण देशाला हादरवून सोडले आहे. कारमध्ये बसवलेल्या डॅशकॅम फुटेजमुळे या प्रकरणातील धक्कादायक सत्य उघड झाले आहे. आयटी कंपनीत मॅनेजर पदावर कार्यरत असलेल्या तरुण महिलेवर कंपनीच्या सीईओसह तिघांनी सामूहिक अत्याचार केल्याचा गंभीर आरोप आहे.

ही घटना २० डिसेंबरच्या रात्री शोभागपुरा परिसरातील एका नामांकित हॉटेलमध्ये आयोजित पार्टीदरम्यान घडली. कंपनीच्या सीईओचा वाढदिवस आणि नवीन वर्षाच्या स्वागतासाठी ही पार्टी आयोजित करण्यात आली होती. विशेष म्हणजे या कार्यक्रमासाठी सर्व कर्मचाऱ्यांना नव्हे, तर निवडक वरिष्ठ अधिकारी आणि मोजके कर्मचारी यांनाच निमंत्रण देण्यात आले होते. पीडित महिला रात्री सुमारे ९ वाजता पार्टीत सहभागी झाली होती.

पार्टीदरम्यान मद्यपान, संगीत आणि जल्लोषाचे वातावरण होते. वेळ जसजसा पुढे सरकत गेला, तसतशी पार्टी अधिक उग्र होत गेली. रात्री १:३० वाजताच्या सुमारास पीडित महिला थकलेली आणि अस्वस्थ दिसत असताना एक महिला एक्झिक्युटिव्ह हेड शिल्पा तिच्याकडे आली, तिला “सुरक्षितपणे घरी सोडतो” असे आश्वासन देण्यात आले. सहकारी असल्याने तिने त्यावर विश्वास ठेवला.

त्यानंतर तिला एका कारमध्ये बसवण्यात आले. कारमध्ये आधीच कंपनीचा सीईओ जितेश, महिला एक्झिक्युटिव्ह हेडचा पती गौरव उपस्थित होते. पोलिसांच्या प्राथमिक तपासानुसार, वाटेत पीडित महिलेला नशा आणणाऱ्या पदार्थांच्या संपर्कात आणण्यात आले. काही वेळातच तिची प्रकृती खालावली आणि ती अर्धबेशुद्ध अवस्थेत गेली.

याच अवस्थेचा गैरफायदा घेत सीईओ, महिला एक्झिक्युटिव्ह आणि तिचा पती या तिघांनी मिळून कारमध्येच तिच्यावर आळीपाळीने सामूहिक बलात्कार केल्याचा आरोप आहे. पीडितेच्या म्हणण्यानुसार, तिने विरोध करण्याचा प्रयत्न केला, मात्र नशेमुळे ती असहाय्य झाली होती. ही अमानुष कृत्ये अनेक तास सुरू होती. अखेर पहाटे सुमारे ५ वाजता आरोपींनी तिला तिच्या घराशेजारी सोडून पलायन केले.

शुद्धीवर आल्यानंतर पीडितेच्या शरीरावर गंभीर जखमांच्या खुणा होत्या. एका कानातील दागिना व अंतर्वस्त्रे गायब असल्याचेही तिच्या लक्षात आले. तिने हिंमत एकवटून तात्काळ उदयपूर पोलिसांशी संपर्क साधला. दरम्यान, घटनेच्या वेळी वापरण्यात आलेल्या कारमध्ये डॅशकॅम बसवलेला असल्याचे पीडितेला आठवले. पोलिसांनी त्या डॅशकॅमचे ऑडिओ-व्हिडिओ फुटेज तपासले असता, घटनेदरम्यानचे आवाज आणि महत्त्वाचे क्षण त्यात रेकॉर्ड झाल्याचे निष्पन्न झाले. हाच पुरावा तपासातील टर्निंग पॉइंट ठरला.

पीडितेचा जबाब, वैद्यकीय तपासणी अहवाल आणि डॅशकॅम फुटेज या तिन्ही ठोस पुराव्यांच्या आधारे पोलिसांनी तपास वेगाने पुढे नेला. जिल्हा पोलीस अधीक्षक योगेश गोयल यांच्या मार्गदर्शनाखाली आणि एएसपी माधुरी वर्मा यांच्या नेतृत्वाखाली विशेष तपास पथक तयार करण्यात आले. वैद्यकीय अहवालात अत्याचाराच्या स्पष्ट खुणा आढळून आल्याने सामूहिक बलात्काराचा गुन्हा प्रथमदर्शनी सिद्ध झाल्याचे पोलिसांनी सांगितले. त्यानंतर मोठी कारवाई करत पोलिसांनी आयटी कंपनीचा सीईओ जितेश, गौरव आणि त्याची पत्नी शिल्पा यांना अटक केली आहे.

आरोपींवर भारतीय न्याय संहितेतील (BNS) गंभीर कलमांखाली गुन्हे दाखल करण्यात आले असून, त्यांना न्यायालयात हजर करून पोलीस कोठडी (रिमांड) मागितली जाणार आहे. तसेच पीडितेला नशा आणण्यासाठी कोणत्या प्रकारच्या अमली किंवा गुंगीकारक पदार्थांचा वापर करण्यात आला, याचाही सखोल तपास सुरू आहे.

या घटनेमुळे कॉर्पोरेट क्षेत्रातील महिला सुरक्षिततेचा मुद्दा पुन्हा एकदा ऐरणीवर आला आहे. कार्यस्थळी विश्वासाच्या नावाखाली महिलांच्या सुरक्षिततेशी तडजोड केली जाते का, असा गंभीर प्रश्न उपस्थित झाला आहे. पीडितेला जलद न्याय मिळावा, तसेच आरोपींना कडक शिक्षा व्हावी, अशी मागणी सामाजिक संघटना, महिला हक्क कार्यकर्ते आणि सर्वसामान्य नागरिकांकडून होत आहे.

The post आयटी मॅनेजर तरुणीवर कारमध्ये सामूहिक बलात्कार, डॅशकॅम फुटेजमुळे धक्कादायक सत्य उघड, कंपनीच्या सीईओसह तिघांना अटक appeared first on थोडक्यात घडामोडी.

पुणे : राजगुरूनगरमध्ये सोमवारी सकाळी एका खासगी क्लासमध्ये घडलेल्या धक्कादायक घटनेने संपूर्ण परिसरात खळबळ उडाली आहे. क्लासमध्ये सुरू असलेल्या शिकवणीदरम्यान दोन अल्पवयीन विद्यार्थ्यांमध्ये झालेल्या गँगवॉरमध्ये एका १६ वर्षीय विद्यार्थ्याचा दुर्दैवी मृत्यू झाला आहे. लहान वयाच्या मुलांमध्ये अशा प्रकारची हिंसक घटना घडल्याने पुणे जिल्ह्यात नेमकं चाललंय काय, असा प्रश्न उपस्थित होत आहे.

मिळालेल्या माहितीनुसार, सोमवार, १५ डिसेंबर रोजी सकाळी राजगुरूनगर येथील एका खासगी क्लासमध्ये दहावीचे विद्यार्थी शिकत होते. शिक्षक अध्यापन करत असतानाच एका अल्पवयीन विद्यार्थ्याने त्याच क्लासमध्ये शिकणाऱ्या दुसऱ्या विद्यार्थ्यावर अचानक चाकूने हल्ला केला. हल्लेखोराने मयत विद्यार्थ्याचा गळा चिरल्याने तो गंभीर जखमी झाला आणि रक्ताच्या थारोळ्यात कोसळला.

घटनेनंतर जखमी विद्यार्थ्याला तातडीने रुग्णालयात दाखल करण्यात आले; मात्र उपचारादरम्यान त्याचा मृत्यू झाला, अशी माहिती सूत्रांनी दिली.

आरोपी ताब्यात, कायदेशीर कारवाई सुरू
मृत विद्यार्थी आणि हल्ला करणारा विद्यार्थी दोघेही दहावीच्या वर्गात शिकत होते. हल्ल्याचे नेमके कारण अद्याप अस्पष्ट आहे. हल्ल्यानंतर आरोपी अल्पवयीन विद्यार्थी दुचाकीवरून फरार झाला होता; मात्र पोलिसांनी तत्काळ कारवाई करत त्याला ताब्यात घेतले आहे. हल्लेखोर अल्पवयीन असल्याने, बाल न्याय (Juvenile Justice) कायद्याच्या संबंधित तरतुदींनुसार त्याच्यावर कायदेशीर कारवाई सुरू करण्यात आली आहे.

वर्गात झालेल्या भांडणातून एका मुलाच्या मृत्यूची ही दुःखद घटना पुणे जिल्ह्यातील खासगी कोचिंग सेंटर्समध्ये वाढीव देखरेख, कडक सुरक्षा उपाययोजना आणि विद्यार्थ्यांच्या वर्तनावर लक्ष ठेवण्याची नितांत गरज अधोरेखित करते. या प्रकरणाचा पुढील तपास सुरू आहे.

The post राजगुरुनगरमध्ये खाजगी कोचिंग क्लासमधील गँगवॉर, १६ वर्षीय विद्यार्थ्याचा मृत्यू appeared first on थोडक्यात घडामोडी.

गोंदिया : गोंदिया जिल्ह्यात घडलेल्या एका भीषण आणि हृदयाला चटका लावणाऱ्या घटनेने सर्वत्र खळबळ उडाली आहे. 22 वर्षीय महिलेने आपल्या अवघ्या 20 दिवसांच्या नवजात मुलाला वैनगंगा नदीत फेकून देत त्याची हत्या केल्याचा धक्कादायक प्रकार उघड झाला आहे. या प्रकरणात पोलिसांनी आरोपी आईला अटक केली असून तपासात रोज नवे धक्कादायक तपशील समोर येत आहेत.

मिळालेल्या माहितीनुसार, 17 नोव्हेंबर रोजी महिलेने पोलिसात तक्रार दाखल केली की, एका अज्ञात व्यक्तीने तिचे मूल पळवून नेले आहे. या तक्रारीनंतर पोलिसांनी तात्काळ हरवलेल्या बाळाचा शोध सुरू केला. परिसरात शोधमोहीम राबवण्यात आली, सीसीटीव्ही फुटेज पडताळण्यात आले, स्थानिक नागरिकांकडून माहिती गोळा करण्यात आली. परंतु चौकशीदरम्यान महिलेच्या कथनात अनेक विसंगती आढळू लागल्या. बाळ चोरीच्या प्रकरणात ठोस पुरावे नसल्याने पोलिसांना संशय आला. तिच्या वागणुकीतही विलक्षण अस्वस्थता आणि गोंधळ जाणवत होता.

कसून चौकशीनंतर धक्कादायक कबुली
पोलिसांकडून महिलेची कसून चौकशी करण्यात आली. यावेळी पोलिसांच्या प्रश्नांना उत्तर देताना ती वारंवार अडखळत होती. अखेर तिने सत्य सांगितले – तिनेच स्वतःच्या हातांनी 20 दिवसांचे बाळ वैनगंगा नदीत फेकून दिले होते. यानंतर पोलिसांनी तत्काळ नदीकाठी शोधमोहीम सुरू केली. स्थानिक नागरिकांच्या मदतीने काही तासांच्या शोधानंतर बाळाचा मृतदेह नदीतून बाहेर काढण्यात आला. हे दृश्य पाहून पोलिस आणि नागरिक दोघेही क्षणभर निशब्द झाले.

प्राथमिक तपासात उघड झाले की, आरोपी महिला नोकरी करू इच्छित होती. तिला स्वयंपूर्ण आयुष्य जगायचे होते. परंतु नवजात बाळामुळे तिला घरातच मर्यादित राहावे लागेल, स्वतःचे करिअर थांबेल, तिच्यावर अधिक जबाबदाऱ्या पडतील असे तिला वाटू लागले.

तिने आपल्या मनात मोठा मानसिक ताण आणि अस्वस्थता जमवून ठेवली होती. कुटुंबीयांशी संवाद न होणे, प्रसूतीनंतर नैराश्य (postpartum depression) यांसारखे मुद्देही तपासात समोर येत आहेत. या सर्व कारणांमुळे ती अतिशय अतिरेकी निर्णयाकडे ढकलली गेल्याचा संशय पोलिसांनी व्यक्त केला आहे.

हत्येचा गुन्हा दाखल, पुढील तपास सुरू
या प्रकरणात पोलिसांनी आरोपी महिलेवर हत्येचा गुन्हा तसेच खोटी कहाणी सांगून पोलिसांची दिशाभूल केल्याचा आरोप ठेवला आहे. पोलिस अधिकारी या प्रकरणाच्या आणखी खोल तपासात गुंतले आहेत. या घटनेत इतर कोणाचा सहभाग होता का? तिला कुणी दबाव किंवा मानसिक त्रास दिला होता का? याचा शोध घेतला जात आहे.

परिसरात हळहळ आणि संताप
ही घटना समोर आल्यानंतर सर्वांनाच धक्का बसला असून हळहळ व्यक्त केली जात आहे. “आईनेच…?” हा प्रश्न प्रत्येकाच्या मनात ठसठसत आहे.

The post धक्कादायक! 20 दिवसांच्या बाळाला आईनेच नदीत फेकलं, नोकरी करून स्वयंपूर्ण आयुष्य जगण्यासाठी उचलले क्रूर पाऊल… appeared first on थोडक्यात घडामोडी.

पुणे : रविवारी रात्री हडपसर परिसरातील मांजरीजवळ रेल्वे रुळावरून चालत असलेल्या तीन किशोरवयीन मुलांना पुणे-दौंड डेमू ट्रेनने धडक दिल्याने त्यांचा दुर्दैवी मृत्यू झाला. ही घटना रात्री सुमारे ९ वाजण्याच्या सुमारास घडली, ज्यात तिघांनाही प्रतिक्रिया देण्यासाठी वेळच मिळाला नाही.

मृतांची नावे:

• प्रथमेश नितीन टिंडे, वय १८
• तन्मय महेंद्र तुपे, वय १७
• तुषार शिंदे, वय १७

थोडे पुढे चालत असलेल्या तीन प्रत्यक्षदर्शींनी सांगितले की, या तिघांनाही ट्रेनने धडक दिल्याचे त्यांनी पाहिले. या घटनांची नोंद सोमवारी सकाळी पोलिसांकडे झाली.

वरिष्ठ निरीक्षक संजय मोगले यांनी सांगितले की, हे तिघे रुळाच्या पलीकडे जाण्याचा विचार करत होते, परंतु त्यांनी मागून येणाऱ्या ट्रेनची हालचाल ओळखली नाही. त्यांचा अंदाज चुकल्यामुळे हा घातक अपघात घडला.

रेल्वे अधिकाऱ्यांची प्रतिक्रिया:
या अपघातानंतर काही मिनिटांतच रेल्वे सुरक्षा दल आणि स्टेशन मास्टर घटनास्थळी पोहोचले. अपघातग्रस्त मुलांमधील दोन जण रुळावर आढळले, तर एक थोडा दूर पडलेला होता. तातडीने त्यांना ससून जनरल हॉस्पिटलमध्ये नेण्यात आले, परंतु पोहोचताच सर्वांना मृत घोषित करण्यात आले.

अधिकारी अजूनही हे समजून घेण्याचा प्रयत्न करत आहेत की ही मुले रुळावर का आली असावी. पोलिसांनी या अपघाताचा संपूर्ण तपस सुरू केला आहे.

The post पुणे : रेल्वे रुळाजवळून चालत असलेल्या तीन किशोरवयीन मुलांचा ट्रेनच्या धडकेत दुर्दैवी मृत्यू appeared first on थोडक्यात घडामोडी.

नागपूर : मुलाच्या पहिल्या वाढदिवशीच भारतीय जनता पक्षाच्या वॉर्ड अध्यक्षाची दिवसाढवळ्या निर्घृण हत्या झाल्याने शहरात खळबळ उडाली आहे. ही थरारक घटना शनिवारी दुपारी 2 वाजताच्या सुमारास यशोधरानगर पोलीस ठाण्याच्या हद्दीतील विटाभट्टी चौक परिसरात घडली. सचिन उर्फ सोनू ओमप्रकाश शाहू (वय 40, रा. शाहू मोहल्ला, वृंदावननगर) असे मृत व्यक्तीचे नाव असून ते भंगारचा व्यवसाय करीत होते. दरम्यान, या थरारक घटनेमुळे परिसरात दहशतीचे वातावरण निर्माण झाले आहे.

मिळालेल्या माहितीनुसार, शनिवारी सचिन यांचा मुलगा प्रीत याचा पहिला वाढदिवस होता. त्यांनी संध्याकाळी नातेवाइक आणि मुलांसाठी छोट्या समारंभाचे आयोजन केले होते. सकाळी ते भाजपच्या एका बैठकीत सहभागी झाले होते. त्यानंतर, दुपारी २ वाजता त्यांनी विटभट्टी चौकातील एका हॉटेलमध्ये समोशांची ऑर्डर दिली. ऑर्डर देऊन ते दुचाकीवरून घरी परतत असताना चार युवक दोन दुचाकींवरून त्यांच्या जवळ आले आणि त्यांना अडविले. त्यानंतर दोघांनी धारदार शस्त्रांनी सचिन यांच्यावर वार केले. ते गंभीर जखमी अवस्थेत रक्ताच्या थारोळ्यात कोसळले आणि त्यांचा जागीच मृत्यू झाला. आरोपी तत्काळ पसार झाले.

पूर्वीचा वाद ठरला कारणीभूत?
सूत्रांच्या माहितीनुसार, गणेशोत्सवादरम्यान सोनू नावाचा युवक मंडपात येत असताना मांसाहार करून आल्याची भाषा करायचा. याबाबत सचिन यांनी त्याला फटकारले होते. या कारणावरून सोनू संतापला होता.

यानंतर त्याच युवकाने कुटुंबातील सदस्यांच्या मदतीने सचिन यांच्या घरावर हल्ला केला होता. सचिन आणि त्यांच्या कुटुंबीयांना मारहाण झाल्याने त्यांनी यशोधरानगर पोलीस ठाण्यात तक्रार दाखल केली होती. मात्र, योग्य कारवाई न झाल्याने त्यांनी पोलिस उपायुक्तांकडे धाव घेतली. त्यानंतर पोलिसांनी सोनूविरुद्ध प्रतिबंधात्मक कारवाई केली होती. याच रागातून सोनूने साथीदारांच्या मदतीने सचिनची हत्या केल्याचा संशय व्यक्त केला जात आहे.

घटनेची माहिती मिळताच यशोधरानगर पोलिसांचा ताफा घटनास्थळी पोहोचला. पंचनामा करून मृतदेह उत्तरीय तपासणीसाठी पाठविण्यात आला. प्राथमिक चौकशीनंतर पोलिसांनी खुनाचा गुन्हा दाखल केला असून दोन संशयितांना ताब्यात घेतल्याची माहिती पोलिसांनी दिली आहे.

या निर्घृण हत्येमुळे परिसरातील नागरिकांमध्ये भीती व संताप पसरला असून दिवसाढवळ्या घडलेल्या या घटनेमुळे नागरिकांच्या सुरक्षिततेवर प्रश्नचिन्ह निर्माण झाले आहे.

The post नागपूर हादरले! मुलाच्या पहिल्या वाढदिवशीच भाजप वॉर्ड अध्यक्षाची निर्घृण हत्या appeared first on थोडक्यात घडामोडी.

सोलापूर : शहरात एका तरुण वकिलाने अज्ञात कारणावरून राहत्या घरी गळफास घेऊन आत्महत्या केल्याची धक्कादायक घटना बुधवारी दुपारी साडेचारच्या सुमारास घडली. सागर श्रीकांत मंद्रूपकर (वय ३२, रा. समर्थ सोसायटी, एसआरपीएफ कॅम्प, विजापूर रोड) असे मृत वकिलाचे नाव आहे.

मिळालेल्या माहितीनुसार, अॅड. सागर मंद्रूपकर हे आपल्या राहत्या घरातील पहिल्या मजल्यावरील खोलीत दोरीच्या साहाय्याने स्लॅबच्या लोखंडी हुकला गळफास घेतलेल्या अवस्थेत आढळून आले. नातेवाइकांनी त्यांना तातडीने खाली उतरवून सिव्हिल हॉस्पिटलमध्ये उपचारासाठी दाखल केले. मात्र, तेथील डॉक्टरांनी उपचारापूर्वीच त्यांचा मृत्यू झाल्याचे घोषित केले.

या घटनेची नोंद सिव्हिल पोलीस चौकीत करण्यात आली असून आत्महत्येचं नेमकं कारण अद्याप समोर आलेलं नाही. घटनेची माहिती मिळताच बार असोसिएशनचे अध्यक्ष अॅड. बाबासाहेब जाधव, सचिव अॅड. बसवराज हिंगमिरे आणि इतर पदाधिकारी सिव्हिल हॉस्पिटलमध्ये दाखल झाले.

अॅड. मंद्रूपकर यांच्या पश्चात आई-वडील, पत्नी आणि दोन मुले असा परिवार आहे. विशेष म्हणजे, १८ सप्टेंबर रोजी विजापूर नाका पोलीस ठाण्यात पोलिसांकडून अॅड. सागर मंद्रूपकर यांना मारहाण झाल्याची घटना घडली होती. या प्रकरणी वकील संघटनेच्या वतीने पोलिसांकडे निवेदनही देण्यात आले होते.

या घटनेमुळे सोलापूर वकिली क्षेत्रात आणि नागरिकांमध्ये मोठी खळबळ उडाली असून आत्महत्येचं खऱ्या कारणाचा शोध घेण्यासाठी पोलिसांनी तपास सुरू केला आहे.

The post सोलापुरात तरुण वकिलाची राहत्या घरी गळफास घेत आत्महत्या, कारण अस्पष्ट appeared first on थोडक्यात घडामोडी.

पुणे : पुण्यातील लोहगावमध्ये एका ७२ वर्षीय वृद्धाविरुद्ध बाल लैंगिक शोषणाचा धक्कादायक प्रकार समोर आला आहे. पोलिसांनी दिलेल्या माहितीनुसार, आरोपीवर मुलांना अश्लील सामग्री दाखवणे आणि त्यांच्याशी अनुचित वर्तन करण्याचा आरोप आहे.

मिळालेल्या माहितीनुसार, घटनेची माहिती सात वर्षांच्या नातीने आपल्या पालकांना दिल्यानंतर कळली. नातीनं आपल्या पालकांना सांगितलेल्या गोष्टींचा पाठपुरावा करत पालकांनी विमान नगर पोलिस स्टेशनमध्ये तक्रार नोंदवली.

पोलिसांनी तपास करताना आढळून आले की आरोपीने ६ ऑक्टोबर ते १३ ऑक्टोबर २०२५ या कालावधीत मुलांच्या आणि त्यांच्या कुटुंबियांच्या विश्वासाचा गैरफायदा घेतला. पोलिसांनी आरोपीविरुद्ध भारतीय दंड संहिता कलम ७५(१)(i) आणि पॉक्सो कायदा कलम ८ व १२ अंतर्गत गुन्हा नोंदवून तपास सुरु केला आहे.

सध्या आरोपी पोलिसांच्या कोठडीत असून, तपास अधिकाऱ्यांनी घटनास्थळी उपलब्ध पुरावे आणि साक्षीदारांच्या अंदाजावर आधारित पुढील कारवाई सुरू केली आहे. स्थानिक प्रशासन आणि पोलिसांनी मुलांच्या सुरक्षेसाठी आणि अशा प्रकारच्या घटना टाळण्यासाठी जागरूकता वाढवण्यावर भर दिला आहे.

The post पुणे : ७२ वर्षीय वृद्धावर मुलाच्या लैंगिक शोषणाचा गंभीर आरोप; सात वर्षांच्या नातीने तक्रार केल्यानंतर प्रकरण समोर appeared first on थोडक्यात घडामोडी.