मुंबई : सचिन वाझे यांच्या घरात 62 जिवंत काडतुसे सापडली आहेत. ही काडतुसे घरात का ठेवली होती? याचे उत्तर वाझे देत नसल्याचं एनआयएने विशेष कोर्टाला सांगितलं आहे. यावेळी सचिन वाझे तपासात सहकार्य करत नसल्याचं एनआयएने कोर्टाला सांगितलं. तर या प्रकरणात आपल्याला बळीचा बकरा बनवलं जात असल्याचा दावा सचिन वाझे यांनी केला आहे.

सचिन वाझेंची आज कोठडी संपत असल्याने एनआयएच्या विशेष न्यायालयात त्यांना आणण्यात आले होते. सचिन वाझेंना पोलीस अधिकारी म्हणून सरकारी कोट्यातून 30 जिवंत काडतुसे देण्यात आली होती. तसेच त्यांना एक रिव्हॉल्वर देण्यात आली होती. 30 पैकी 25 काडतुसे गायब आहेत. ही 25 काडतुसे कुठे गेली याबाबत वाझे काहीही माहिती देत नसल्याचंही एनआयएने कोर्टाला सांगितलं. तसेच मनसुख हिरेन हत्या प्रकरणात दोन आरोपींना अटक केली आहे. या दोघांना वाझेंच्या समोर बसवून तपास करायचा आहे. त्यामुळे वाझेंची कोठडी वाढवून द्यावी, अशी मागणी एनआयएने केली आहे.

वाझेंच्या रक्ताचे नमुने घेण्यात आले असून त्याचा रिपोर्ट यायचा बाकी आहे. तसेच वाझेंच्या गाडीतून मिळालेले पुरावे फोरेन्सिक पुराव्याशी पडताळणी करून पाहायचे आहे. डीएनए मॅच करण्यासाठी पाचही गाड्यांचे सँपल घेण्यात आले आहेत. शिवाय आरोपीने सीसीटीव्ही डीव्हीआर गायब केला असून तोही शोधायचा आहे. पंचतारांकित हॉटेलमध्ये रुम बुक करण्यासाठी आरोपीने 12 लाख रूपये दिले होते. त्याचीही माहिती घ्यायची असल्याचं एनआयएने कोर्टात सांगितलं आहे. याशिवाय वाझेंच्या आवाजाचे नमुनेही फॉरेन्सिक तपासणीसाठी पाठवण्यात आल्याची माहिती कोर्टाला देण्यात आली आहे.

सचिन वझे यांनी कोर्टाला सांगितले की, “मी आतापर्यंतच्या तपासात मदत केली आहे. त्यामुळे मला पुन्हा पोलिस कोठडीत पाठवू नका.” त्यांच्या वकीलाने असा युक्तिवाद केला कि, “एनआयएला या प्रकरणात दहशतवादविरोधी कायदा UAPA समाविष्ट करण्याबाबत कोर्टाला उत्तर द्यावे लागेल. कारण कारमधून फक्त जिलेटिन सापडल्याने हा पुरावा अपुरा आहे. डिलेटोटर किंवा इतर कोणत्याही उत्प्रेरकासह वापरल्याशिवाय एकट्या जिलेटिनचा स्फोटक म्हणून वापर केला जाऊ शकत नाही. म्हणूनच हे UAPA लागू करण्यासाठी पुरेसे नाही.”

The post मला बळीचा बकरा बनवलं जात आहे, कोर्टात सचिन वाझे यांनी केला दावा appeared first on थोडक्यात घडामोडी.

मुंबई : मनसुख हिरेन यांच्या मृत्यूप्रकरणावरून आज विधानसभेत मोठा गदारोळ झाला. विरोधी पक्ष नेते देवेंद्र फडणवीस यांनी मनसुख हिरेन यांच्या मृत्यूप्रकरणात क्राइम ब्रांचचे पोलीस अधिकारी सचिन वाझे यांच्यावर गंभीर आरोप केले. तसंच सचिन वाझेंना अटक करण्याची मागणीही त्यांनी केली आहे. यावेळी देवेंद्र फडणवीस यांनी सभागृहात मनसुख हिरेन यांच्या पत्नी विमला हिरेन यांचा तक्रारीचा अर्ज देखील वाचून दाखवला.

देवेंद्र फडणवीस यांनी विधानसभेत काही प्रश्न उपस्थित केले आहेत. ते म्हणाले कि, “२०१७ चा एफआयआर आहे. यानुसार दोन लोकांनी ४० लाखांची खंडणी मागितल्याचा आरोप आहे. यामध्ये दोन लोकांनी अटकपूर्व जामीन घेतला. यातील एकाचं नाव आहे धनंजय विठ्ठल गावडे आणि दुसरा सचिन हिंदुराव वझे. मनसुख हिरेन यांचं शेवटचं लोकेशन धनंजय विठ्ठल गावडे याच्याकडे आहे. तिथे जाण्याचे कारण काय? काहीच नाही. गावडेच्या ठिकाणापासून ४० किमीवर हिरेन यांची बॉडी सापडली. त्यामुळे हे स्पष्ट आहे. यापेक्षा अधिक पुरावे काय हवेत? इतके पुरावे असताना अटक का होत नाही. त्यामुळं माझी मागणी आहे की तात्काळ सचिन वाझेंना अटक झाली पाहिजे.”

देवेंद्र फडणवीस यांनी पुढे म्हटलं कि, “आम्हाला संशय आहे की मनसुख हिरेन यांची हत्या गाडीतच करण्यात आली आहे. त्यानंतर त्यांचा मृतदेह मुंब्रा येथील खाडीत फेकून देण्यात आला. खाडीत भरतीची वेळ असल्यानं मनसुख हिरन यांचा मृतदेह किनाऱ्यावर येणार नाही, असं मारेकऱ्यांना वाटलं. आणि तिथेच त्यांची चूक झाली. त्यांच्या दुर्दैवानं आणि कायद्याच्या सुदैवानं खाडीत भरती न आल्यानं मृतदेह किनाऱ्यावर आला आणि हे सगळं प्रकरण उघडकीस आलं.”

विमला हिरेन यांचा जबाब :

विमला हिरेन यांनी जबाबात म्हटलं आहे कि, “२६ फेब्रुवारी २०२१ रोजी सकाळी माझे पती चौकशीसाठी सचिन वाझे यांच्यासोबत गुन्हे शाखेत गेले. त्यानंतर ते १०. ३० वाजता आले. दिवसभर सचिन वाझेंसोबत होतो. असं त्यांनी मला सांगितलं. २७ फेब्रुवारीला सकाळी माझे पती पुन्हा मुंबई गुन्हे शाखेत गेले आणि रात्री १०.३० वाजता आले. त्यानंतर २८ फेब्रुवारीला पुन्हा सचिन वाझेंसोबत गेले आणि जबाब नोंदवला. जबाबाची प्रत घरी आणून ठेवली. त्यावर सचिन वाझे यांचे नाव व स्वाक्षरीदेखील आहे.’ ३ मार्च रोजी माझे पती दुकान बंद करुन घरी आले, घरी आल्यानंतर त्यांनी मला सांगितलं की सचिन वाझेंनी मला सांगितलं की तु या प्रकरणात अटक हो. मी तुला दोन दिवसांत जामिनावर सोडवतो. संपूर्ण परिस्थिती पाहता माझ्या पतीचा खून झाला असावा अशी खात्री आहे. सदरचा खून सचिन वाझे यांनी केला असावा असा माझा संशय आहे, त्यामुळे सखोल चौकशी करुन कायदेशीर कारवाई कऱण्याची विनंती आहे.”

The post विधानसभेत देवेंद्र फडणवीस यांचे सचिन वाझे यांच्यावर गंभीर आरोप, उपस्थित केले ‘हे’ प्रश्न appeared first on थोडक्यात घडामोडी.

मुंबई : मनसुख हिरेन यांच्या संशयास्पद मृत्यू प्रकरणाचा तपास दहशतवादविरोधी पथकाकडे (एटीएस) देण्यात आला आहे. एटीएसने हिरेन यांच्या मृत्यूप्रकरणात हत्येचा गुन्हा दाखल केला आहे. आज महाराष्ट्र एटीएसचं पथक मनसुख हिरेन यांच्या घरी चौकशीसाठी दाखल झालं होतं. त्यावेळी मनसुख हिरेन यांच्या पत्नी विमला हिरेन यांच्या फिर्यादीवरुन हत्येचा गुन्हा दाखल करण्यात आला आहे.

आज एटीएसच्या पथकाने मनसुख हिरेन यांच्या घरी जाऊन त्यांच्या कुटुंबियांचे जबाब नोंदवले. यावेळी ही आत्महत्या नसून हत्या असल्याचा आरोप कुटुंबियांनी केला. तसेच या प्रकरणी हत्येचा गुन्हा दाखल करण्याची मागणी मनसुख हिरेन यांच्या मुलानं केली. या प्रकरणी अपघाती मृत्यूची नोंद करण्यात आली होती. परंतु, आता याप्रकरणी कुटुंबियांच्या वतीनं हत्येचा गुन्हा दाखल करण्यात येणार आहे. दरम्यान, एटीएसच्या पथकानं मनसुख हिरेन यांच्या घरी तब्बल साडेतीन तास चौकशी केली.

गृहमंत्री अनिल देशमुख यांनी या प्रकरणाचा तपास एटीएसकडे सोपवल्याची माहिती दिली. त्यानंतर एटीएसने याप्रकरणाचा तपास सुरु करत ज्या ठिकाणी मनसुख हिरेन यांचा मृतदेह आढळला होता, त्याठिकाणी जाऊन घटनास्थळाची पाहणी केली. एटीएसचं पथक संपूर्ण परिसरातील cctv फुटेज देखील तपासात आहे.

The post मनसुख हिरेन मृत्यू प्रकरणी एटीएसने दाखल केला हत्येचा गुन्हा, तपासाला वेग appeared first on थोडक्यात घडामोडी.