पुणे : पुणे शहर आणि जिल्ह्यात उष्णतेची तीव्रता दिवसेंदिवस वाढत असून भारतीय हवामान विभागाने (IMD) बुधवारी पुण्यासाठी यलो अलर्ट जारी केला आहे. सलग वाढणाऱ्या तापमानामुळे शहरातील नागरिकांना तीव्र उकाडा आणि दमट रात्रींचा दुहेरी त्रास सहन करावा लागत आहे.

मंगळवारी नोंदवलेल्या तापमानानुसार, पुणे जिल्ह्यातील लोहगाव येथे सर्वाधिक ४३.२ अंश सेल्सिअस तापमानाची नोंद झाली. त्यानंतर बारामतीमध्ये ४१.४ अंश तर दुदुळगावमध्ये ४१.३ अंश तापमान नोंदवण्यात आले. शहरातील मध्यवर्ती भागांमध्येही उष्णतेचा प्रभाव स्पष्टपणे जाणवत आहे.

शिवाजीनगरमध्ये ४०.८ अंश, कोरेगाव पार्कमध्ये ४०.७ अंश आणि मगरपट्टा परिसरात ४१ अंश तापमान नोंदले गेले. हवामान विभागाच्या पुढील सात दिवसांच्या अंदाजानुसार, १९ मेपर्यंत पुण्यात तापमान ४० ते ४२ अंशांच्या दरम्यान राहण्याची शक्यता आहे. आकाश प्रामुख्याने निरभ्र राहणार असल्याने उष्णतेत तातडीने दिलासा मिळण्याची चिन्हे दिसत नाहीत.

दरम्यान, पुण्यातील रात्रीचे वाढते तापमान अधिक चिंतेचा विषय ठरत आहे. पूर्वी थंडगार संध्याकाळीसाठी ओळखले जाणारे पुणे आता उष्ण रात्रींचा अनुभव घेत आहे. अनेक भागांमध्ये किमान तापमान सामान्यपेक्षा खूप जास्त नोंदवले गेले आहे.

मगरपट्टा आणि कोरेगाव पार्क येथे रात्रीचे तापमान २८.८ अंश सेल्सिअसपर्यंत पोहोचले, तर वडगावशेरीमध्ये २८ अंश आणि शिवाजीनगरमध्ये २७.४ अंश तापमानाची नोंद झाली. हवामान तज्ज्ञांच्या मते, ‘अर्बन हीट आयलंड’ परिणामामुळे ही परिस्थिती निर्माण होत आहे. काँक्रीटच्या इमारती, वाहनांची वाढती संख्या आणि डांबरी रस्ते दिवसभर उष्णता साठवून ठेवतात आणि रात्री ती हळूहळू बाहेर सोडतात.

सुरक्षेसाठी महत्त्वाच्या सूचना :
यलो अलर्ट म्हणजे उष्णतेची स्थिती सध्या नियंत्रणात असली तरी वृद्ध नागरिक, लहान मुले आणि दीर्घकालीन आजार असलेल्या व्यक्तींना विशेष धोका संभवतो. त्यामुळे नागरिकांनी आवश्यक ती काळजी घेण्याचे आवाहन करण्यात आले आहे.

हवामान विभागाने नागरिकांना पुरेसे पाणी पिण्याचा, दुपारी १२ ते ४ या वेळेत घराबाहेर पडणे टाळण्याचा आणि हलक्या रंगाचे सुती कपडे वापरण्याचा सल्ला दिला आहे. बाहेर जाताना टोपी, छत्री किंवा स्कार्फचा वापर करण्यासही सांगितले आहे.

शेतकऱ्यांनाही पिकांचे संरक्षण करण्यासाठी नियमित सिंचन सुरू ठेवण्याचा सल्ला देण्यात आला आहे. पुढील चार ते पाच दिवस हवामान कोरडे राहण्याची शक्यता असल्याने उष्णतेची तीव्रता आणखी वाढू शकते, असा अंदाज हवामान विभागाने व्यक्त केला आहे.

The post पुण्यात उष्णतेचा कहर! IMD चा यलो अलर्ट जारी; नागरिकांना काळजी घेण्याचे आवाहन appeared first on थोडक्यात घडामोडी.

मुंबई : भारतीय हवामान खात्याच्या (आयएमडी) दिनांक २० एप्रिल २०२६ रोजी जाहीर केलेल्या पाच दिवसीय अंदाजानुसार, राज्यातील विविध भागांत २० ते २४ एप्रिल या कालावधीत वादळी वारे, विजांचा कडकडाट, गारपीट आणि पावसाची शक्यता व्यक्त करण्यात आली आहे. विशेषतः मध्य महाराष्ट्र, विदर्भ, मराठवाडा आणि कोकण विभागातील जिल्ह्यांनी सतर्कता बाळगावी, असे आवाहन राज्य आपत्कालीन कार्य केंद्राच्या वतीने करण्यात आले आहे.

या पार्श्वभूमीवर नागरिकांनी आवश्यक ती खबरदारी घेण्याचे आवाहन करण्यात आले आहे.

नागरिकांसाठी सूचना :
विजेचा कडकडाट ऐकू आला किंवा विज चमकताना दिसताच तात्काळ घरात किंवा सुरक्षित ठिकाणी आश्रय घ्यावा. झाडाखाली, मोकळ्या शेतात, पाण्याजवळ किंवा लोखंडी वस्तूंच्या जवळ उभे राहणे टाळावे. मोकळ्या जागेत मोबाईल फोन किंवा इतर इलेक्ट्रॉनिक उपकरणांचा वापर करू नये. निवाऱ्यापासून दूर असल्यास जमिनीवर आडवे न पडता पाय एकत्र करून खाली बसून राहावे.

प्रशासनासाठी उपाययोजना :
ग्रामपंचायत, पोलीस व आरोग्य विभागांनी तातडीने जनजागृती करावी. रुग्णवाहिका, अग्निशमन दल आणि आपत्कालीन पथके सज्ज ठेवावीत. शाळा, सभागृह व सार्वजनिक इमारती सुरक्षित निवाऱ्यासाठी खुल्या ठेवाव्यात. हवामान खात्याचे अद्ययावत इशारे गावपातळीपर्यंत त्वरित पोहोचवावेत.

विशेष सूचना :
शेतकरी बांधवांनी विजांच्या इशाऱ्याच्या कालावधीत शेतातील कामे टाळावीत. बांधकाम स्थळांवरील कामकाज तात्पुरते थांबवावे. तसेच यात्रा, धार्मिक कार्यक्रम आणि मोठ्या प्रमाणावरील गर्दीचे आयोजन तातडीने स्थगित करण्याचे आवाहन करण्यात आले आहे. राज्य आपत्कालीन कार्य केंद्राने सर्व संबंधित यंत्रणांना सतर्क राहण्याच्या सूचना दिल्या असून नागरिकांनी अफवांवर विश्वास न ठेवता अधिकृत सूचनांचे पालन करावे, असेही आवाहन करण्यात आले आहे.

The post राज्यात २४ एप्रिलपर्यंत वादळी वाऱ्यासह पाऊस व गारपिटीची शक्यता, नागरिकांना सतर्क राहण्याचे आवाहन appeared first on थोडक्यात घडामोडी.

मुंबई : देशातील हवामानात पुन्हा एकदा मोठे चढउतार पाहायला मिळत आहेत. हवामान विभागाने दिलेल्या ताज्या अंदाजानुसार महाराष्ट्रासह देशातील अनेक राज्यांमध्ये पुढील काही दिवसांत पावसाची शक्यता आहे. दिल्ली, उत्तर प्रदेश आणि राजस्थानसह महाराष्ट्रातही ढगाळ वातावरणासोबत पावसाचा इशारा देण्यात आला आहे. काही ठिकाणी मेघगर्जनेसह पाऊस आणि विजा कोसळण्याची शक्यता व्यक्त करण्यात आली आहे.

दरम्यान, राज्यातील हवामानातही गेल्या काही दिवसांपासून सातत्याने बदल होत आहेत. मार्च महिन्यातच वळीवासारखा पाऊस पडू लागल्याने नागरिकांसह शेतकरी वर्ग चिंतेत आहे. हवामान विभागाने राज्यात पुढील तीन ते चार दिवसांत काही भागात जोरदार पावसाचा अंदाज वर्तवला आहे.

या जिल्ह्यांना पावसाचा इशारा
आज सांगली, सातारा, धाराशिव, लातूर आणि सोलापूर जिल्ह्यांमध्ये अवकाळी पावसाचा इशारा देण्यात आला आहे. गेल्या काही दिवसांपासून लातूर जिल्ह्यात अधूनमधून अवकाळी पाऊस पडत असून त्यामुळे शेती पिकांचे मोठे नुकसान झाले आहे. याशिवाय नांदेड, हिंगोली, परभणी आणि बीड जिल्ह्यांमध्येही पुढील काही दिवसांत पावसाची शक्यता हवामान विभागाने व्यक्त केली आहे. राज्यातील काही भागात कमी दाबाचा पट्टा तयार झाल्यामुळे हे अवकाळी वातावरण निर्माण झाल्याचे सांगितले जात आहे.

पिकांचे मोठे नुकसान, शेतकरी हवालदिल
मराठवाडा भागात अवकाळी पाऊस आणि गारपीटीमुळे शेतकऱ्यांचे मोठे नुकसान झाले आहे. प्राथमिक माहितीनुसार सुमारे 11 हजार हेक्टरहून अधिक क्षेत्रावरील पिके बाधित झाली आहेत.

हाताशी आलेली पिके वादळी पाऊस आणि गारपीटीमुळे जमीनदोस्त झाल्याने शेतकरी हवालदिल झाले आहेत. या पार्श्वभूमीवर नुकसानग्रस्त शेतकऱ्यांना तातडीने आर्थिक मदत आणि नुकसानभरपाई देण्याची मागणी होत आहे.

दरम्यान, कोकणात आज उष्ण आणि दमट हवामानाचा इशारा देण्यात आला असला तरी राज्यातील इतर भागात ढगाळ वातावरणासह पावसाची शक्यता कायम आहे. हवामानातील सतत होणारे बदल पुढील काही दिवस कायम राहण्याची शक्यता हवामान विभागाने व्यक्त केली आहे.

The post अवकाळीचे संकट! पुढील 4 दिवस वादळी पावसाचा इशारा; शेतकऱ्यांची चिंता वाढली… appeared first on थोडक्यात घडामोडी.

मुंबई : महाराष्ट्रातील हवामानात लक्षणीय बदल होत असून नागरिकांना थंडी, पाऊस आणि वाढत्या तापमानाचा एकाच वेळी सामना करावा लागत आहे. गेल्या काही दिवसांपासून राज्यभरात जाणवणारी तीव्र थंडी आता हळूहळू ओसरत असून, त्याचबरोबर अनेक भागांत पावसाच्या सरींनी हजेरी लावली आहे.

हवामान खात्याच्या माहितीनुसार, बंगालच्या उपसागरात तयार झालेल्या कमी दाबाच्या क्षेत्राचा परिणाम महाराष्ट्राच्या काही भागांवर होणार आहे. याच पार्श्वभूमीवर मराठवाडा आणि उत्तर महाराष्ट्रातील एकूण 6 जिल्ह्यांसाठी पावसाचा यलो अलर्ट जारी करण्यात आला आहे.

मुंबई–कोकणात ढगाळ हवामान
मुंबई, ठाणे आणि रायगड जिल्ह्यात सकाळपासून ढगाळ वातावरण असून काही ठिकाणी हलक्या पावसाच्या सरी पडल्या. रत्नागिरी आणि सिंधुदुर्ग जिल्ह्यांतही तुरळक पावसाची नोंद झाली आहे. दुपारी आकाश अंशतः ढगाळ राहण्याची शक्यता असून किनारपट्टीवर मध्यम ते जोरदार वारे वाहण्याचा अंदाज वर्तवण्यात आला आहे.
मुंबईत कमाल तापमान 28 ते 32 अंश सेल्सिअस, तर किमान तापमान 18 ते 22 अंश सेल्सिअस दरम्यान राहील.

मराठवाडा व उत्तर महाराष्ट्रावर पावसाचं सावट
मराठवाड्यातील छत्रपती संभाजीनगर, जालना, बीड, परभणी, नांदेड आणि लातूर जिल्ह्यांत ढगाळ हवामान राहणार असून 27 व 28 जानेवारी रोजी हलक्या ते मध्यम पावसाची शक्यता आहे.
उत्तर महाराष्ट्रातील नाशिक, धुळे, जळगाव आणि नंदुरबार भागातही दिवसभर ढगाळ वातावरण राहील आणि काही ठिकाणी पावसाच्या सरी कोसळू शकतात.

पश्चिम महाराष्ट्र कोरडाच, पण उष्णतेत वाढ
पुणे, सातारा, सांगली, कोल्हापूर आणि सोलापूर जिल्ह्यांत हवामान कोरडे राहण्याचा अंदाज आहे. मात्र दुपारनंतर तापमानात वाढ होऊन उष्णतेची तीव्रता जाणवण्याची शक्यता आहे. येथे कमाल तापमान 29 ते 33 अंश, तर किमान तापमान 14 ते 18 अंश सेल्सिअस दरम्यान राहील.

विदर्भातही ढगांची दाटी
नागपूर, अमरावती, अकोला, वाशिम, यवतमाळ, चंद्रपूर आणि गडचिरोली जिल्ह्यांत हवामान अंशतः ढगाळ राहणार असून काही भागांत हलक्या पावसाच्या सरी पडू शकतात.

हवामान खात्याने नागरिकांना बदलत्या हवामानामुळे आरोग्याची काळजी घेण्याचे आवाहन केले असून, शेतकऱ्यांनीही पुढील काही दिवस हवामानाचा अंदाज लक्षात घेऊन नियोजन करण्याचा सल्ला दिला आहे.

The post राज्यात अनेक ठिकाणी पावसाची हजेरी, ‘या’ 6 जिल्ह्यांना अलर्ट जारी appeared first on थोडक्यात घडामोडी.

मुंबई : २४ सप्टेंबरला बंगालच्या उपसागरावर एक कमी दाबाचा पट्टा निर्माण होणार असून 28 तारखेपर्यंत तो राज्यात येण्याची शक्यता आहे. या कमी दाबाच्या पट्ट्याच्या प्रभावामुळे राज्यातील विविध भागांमध्ये २६ ते २८ सप्टेंबर दरम्यान ढगाळ हवामान आणि पावसात वाढ होण्याची शक्यता वर्तविण्यात आली आहे.

या आठवड्यात पाऊस परत सक्रिय होणार आहे, ज्यामुळे किमान ३० सप्टेंबरपर्यंत तरी राज्यातून पाऊस निरोप घेण्याची शक्यता नाही. सध्याच्या हवामानाच्या अंदाजानुसार २२ ते २५ सप्टेंबर दरम्यान राज्यातील विविध भागांमध्ये मेघ गर्जनेसह वादळी पाऊस अपेक्षित आहे, जो प्रामुख्याने दुपारनंतर पडेल. कमी दाबाच्या पट्ट्याचा प्रभाव २६ तारखेपासून जाणवण्याची शक्यता आहे. यादिवशी विदर्भ आणि मराठवाड्यातील पूर्व आणि दक्षिणेकडे असलेल्या भागांमध्ये दुपारनंतर पावसात वाढ होण्याची शक्यता आहे. 27 तारखेला विदर्भ, मराठवाडा, खानदेश, कोकण आणि मध्य महाराष्ट्रातील विविध भागांमध्ये पावसात वाढ होऊ शकते, आणि यातील काही भागांमध्ये मुसळधार पाऊसदेखील पडण्याची शक्यता नाकारता येत नाही. २८ तारखेला राज्यातील पश्चिम भागांमध्ये पावसाचा जोर कायम राहू शकतो.

शेतकऱ्यांनी हवामानाच्या या अंदाजानुसार शेतीचे नियोजन करावे. काढणी केलेली पिके पाऊस आणि वाऱ्यापासून सुरक्षित ठेवावीत, असे आवाहन कृषी विभागाकडून करण्यात आले आहे.

The post राज्यात मुसळधार पावसाची शक्यता, २६ ते २८ सप्टेंबर दरम्यान पावसात वाढ appeared first on थोडक्यात घडामोडी.

मुंबई : कोकण किनारपट्टीला आज सायंकाळी ५:३० पासून दिनांक २५ जून २०२५ रोजीचे रात्री ८-३० वाजेपर्यंत भारतीय राष्ट्रीय महासागर माहिती सेवा केंद्र (आयएनसीओआयएस) तर्फे उंच लाटांचा इशारा देण्यात आला आहे. लहान होड्यांना समुद्रात न जाण्याच्या सूचनाही देण्यात आल्या आहेत. राज्यात पुढील २४ तासात रायगड, रत्नागिरी, सिंधुदुर्ग जिल्ह्यांसह पुणे घाट आणि सातारा घाट परिसरात ऑरेंज अलर्ट देण्यात आला आहे. राज्यातील पूर परिस्थिती नियंत्रणात असल्याचे राज्य आपत्कालीन कार्य केंद्राने कळविले आहे.

राज्यात मागील २४ तासांमध्ये (२३ जून २०२५ रोजी सकाळपर्यंत) पालघर जिल्ह्यात ७३.३ मिमी पाऊस झाला आहे. तर सिंधुदुर्ग जिल्ह्यात ३६.४, रत्नागिरी जिल्ह्यात २५.८ मिमी, ठाणे जिल्ह्यात १४.३ आणि कोल्हापूर जिल्ह्यात १३.९ मिमी सर्वाधिक पावसाची नोंद झाली आहे.

राज्यात कालपासून आज २३ जून रोजी सकाळपर्यंत झालेल्या पावसाची सरासरी आकडेवारी पुढीलप्रमाणे (सर्व आकडे मिलिमीटरमध्ये) :- ठाणे १४.३, रायगड १०.७, रत्नागिरी २५.८, सिंधुदुर्ग ३६.४, पालघर ७३.३, नाशिक ६.२, धुळे ०.५, नंदुरबार २.९, जळगाव ०.९, अहिल्यानगर ०.२, पुणे ४.३, सोलापूर ०.१, सातारा ४.७, सांगली २.८, कोल्हापूर १३.९, छत्रपती संभाजीनगर १, जालना १.१, धाराशिव ०.२, नांदेड ०.३, हिंगोली ०.४, बुलढाणा १.१, अकोला ३.४, वाशिम ०.४ अमरावती ०.५, यवतमाळ ०.६, वर्धा ०.२, नागपूर १.५, भंडारा ०.६, गोंदिया १.७, चंद्रपूर २.५ आणि गडचिरोली जिल्ह्यात ६.७ मिमी पावसाची नोंद झाली आहे.

ठाणे जिल्ह्यात पुरात वाहून एक व खड्यामध्ये बुडून एका व्यक्तीचा मृत्यू झाला आहे. पुणे जिह्यात नदीत वाहून एका व्यक्तीचा मृत्यू झाला आहे, असे राज्य आपत्कालीन कार्य केंद्राकडून कळविण्यात आले आहे.

The post रायगड, रत्नागिरी, सिंधुदुर्ग जिल्ह्यासह पुणे व सातारा घाट परिसरात ऑरेंज अलर्ट appeared first on थोडक्यात घडामोडी.

पुणे : काहीश्या विश्रांतीनंतर, येत्या काही दिवसांत महाराष्ट्रात तापमान पुन्हा एकदा वाढण्याची शक्यता आहे, अशी माहिती हवामान तज्ज्ञांनी दिली आहे. मार्चच्या अखेरीस पारा काहीसा घसरण्याची अपेक्षा असली तरी, पुण्यात मान्सूनपूर्व पावसाची कोणतीही आशा नाही.

मंगळवारी महाराष्ट्रातील अनेक भागांमध्ये तापमान लक्षणीयपणे वाढले. अकोला येथे ४१.४ अंश सेल्सिअस तापमानासह सर्वाधिक उष्णता नोंदवली गेली. याशिवाय, कोरेगाव पार्क आणि जळगावमध्येही ४०.३ अंश सेल्सिअस तापमान नोंदले गेले. पुण्याच्या लोहगाव येथील तापमान ३९.६ अंश सेल्सिअसपर्यंत पोहोचले, तर मालेगाव ३९.२ अंश सेल्सिअस तापमानावर स्थिर राहिले. शिवाजीनगरमध्ये देखील तापमान ३८.२ अंश सेल्सिअस नोंदवले गेले.

इतर भागांत, सोलापूरमध्ये ३८.९ अंश सेल्सिअस, नाशिकमध्ये ३७.६ अंश सेल्सिअस तापमान होते. सांगली आणि सातारा येथे क्रमशः ३७.३ अंश सेल्सिअस आणि ३७.४ अंश सेल्सिअस तापमानाची नोंद झाली. महाबळेश्वर येथील तापमान देखील ३१.८ अंश सेल्सिअसपर्यंत पोहोचले.

पुण्यात पावसाची शक्यता नाही
भारतीय हवामान विभागाने (IMD) २९-३० मार्चच्या सुमारास मध्य महाराष्ट्रात तुरळक सरींचा अंदाज वर्तवला आहे, पण पुण्यात पावसाची शक्यता नाही. पुणे शहरात मार्चमध्ये सरासरी पाऊस २.२ मिमी पडतो, परंतु यंदा मार्चमध्ये अद्याप पावसाची नोंद नाही. स्कायमेट वेदर सर्व्हिसेसच्या अपडेटनुसार, २८ मार्चच्या आसपास उत्तर कर्नाटक आणि मध्य महाराष्ट्रात चक्राकार परिस्थिती निर्माण होण्याची शक्यता आहे. २९ मार्चपर्यंत, ही प्रणाली कोकण प्रदेशाकडे सरकण्याची अपेक्षा आहे, ज्यामुळे उत्तर-दक्षिण ट्रफ रेषा तयार होईल. यामुळे ३० आणि ३१ मार्च रोजी मध्य महाराष्ट्रात हलका पाऊस पडण्याची शक्यता आहे.

The post राज्यातील तापमानात लक्षणीय वाढ! मार्चअखेरीस हलका पाऊस, पुण्यात मात्र पावसाची शक्यता नाही… appeared first on थोडक्यात घडामोडी.

मुंबई : राज्यात काही दिवसांपासून अनेक ठिकाणी मुसळधार पाऊस पडत आहे. हवामान विभागाने रत्नागिरी, नाशिक, बीड, परभणी, लातूर, नांदेड आणि उस्मानाबाद या जिल्ह्यांमध्ये पुढील ३-४ तासांमध्ये मुसळधार पावसाची शक्यता असल्याचे सांगितले आहे. काही भागात वादळी वाऱ्यांसह विजांचा कडकडाट होण्याची शक्यता वर्तवण्यात आली आहे. तसेच कोकणात आज पुन्हा हाय अलर्ट असू शकतो.

Intense spells of rain very likely to occur in the districs of Ratnagiri, Nasik, Beed,Parbhani, Latur, Nanded & Osmanabad during next 3-4 hrs.Moderate to intense spells very likely over Dhule,Nandurbar,Jalgaon, Aurangabad & Solapur. Possibility of thunder/lightning in some areas pic.twitter.com/CMVW69AAi3

— Regional Meteorological Center,Mumbai (@RMC_Mumbai) September 7, 2021

येत्या २-3 दिवसांत राज्यात अनेक ठिकाणी मुसळधार ते अतिमुसळधार पावसाचा अंदाज असून काही ठिकाणी अतिवृष्टीचा इशारा देण्यात आला आहे. पूर्व विदर्भ, मध्य महाराष्ट्र, मराठवाडा आणि कोकणात सर्वाधिक प्रभाव राहणार असून कोकणातील काही भागात अतिवृष्टीची शक्यता आहे. उत्तर कोकणात याचा सर्वाधिक प्रभाव राहणार आहे. आज पुणे, ठाणे, रायगड, पालघर, सातारा, कोल्हापूर, रत्नागिरी, सिंधुदुर्ग, नाशिक, औरंगाबाद, सांगली, सोलापूर, बीड, जालना, परभणी, हिंगोली आणि नांदेड ह्या जिल्ह्यांना हवामान खात्याने ऑरेंज अलर्ट जारी केला आहे. कोकणात पुन्हा हाय अलर्ट देण्यात आला आहे.

7Sept, 1.15pm latest satellite obs indicate mod to intense dense clouds over N Madhya Maharashtra, S Konkan & parts of Marathwada.
Mumbai Thane mod clouds with so far no rains since morning.
Konkan could be on high alert today again. Watch for IMD warnings pl.
Stay home Stay safe pic.twitter.com/ePQSzKpXra

— K S Hosalikar (@Hosalikar_KS) September 7, 2021

The post ‘या’ जिल्ह्यांत पुढील ३-४ तासांमध्ये मुसळधार पावसाची शक्यता, कोकणात हाय अलर्ट appeared first on थोडक्यात घडामोडी.

मुंबई : मुंबईत मान्सून दाखल झाला असून आठवडाभरापासून मुसळधार पावसाने हजेरी लावली आहे. आज पावसाने विश्रांती घेतली असली तरी ढगाळ वातावरण कायम आहे. हवामान खात्याने राज्यात ४८ तासांसाठी ऑरेंज अलर्ट जारी केला आहे. मुंबईसह अनेक जिल्ह्यांमध्ये आज अतिवृष्टीचा इशारा देण्यात आला आहे.

आज मुंबई, ठाणे, पालघर, सिंधुदुर्ग, पुणे, कोल्हापुर, सातारा व घाटमाथ्यासह संपूर्ण महाराष्ट्र ऑरेंज जारी करण्यात आला. इतकंच नाहीतर आज मुंबईत अतिमुसळधार पावसाचा इशारा हवामान विभागाने वर्तवला आहे. रायगड आणि रत्नागिरीला मात्र आज रेड अलर्ट जारी करण्यात आला आहे. दरम्यान, मुंबई उपनगरांसह कोकणातील सर्व जिल्ह्यांमध्ये अतिवृष्टी होणार असल्याचा इशारा हवामान खात्याकडून देण्यात आला होता. ९ ते १३ जूनपर्यंत राज्यात मुसळधार पाऊस होईल. यामुळे नागरिकांनी काळजी घ्यावी. प्रशासनानेही सतर्क राहत योग्य ती योजना आखावी अशा सूचना मुख्यमंत्री उद्धव ठाकरे यांच्याकडून देण्यात आल्या आहेत. मुंबई, नवी मुंबई, ठाणे, कल्याण, पालघर आणि अलिबागमध्ये पूर येण्याचा धोका आहे.

हवामान खात्याने दिलेल्या माहितीनुसार, आज कोकणातील सिंधुदुर्ग, रायगड, महाबळेश्वर आणि रत्नागिरीसह इतर भागातही मुसळधार पावसाचा अंदाज आहे. अरबी समुद्राच्या पूर्व-मध्य आणि उत्तरेकडील बाजूने आणि बंगालच्या उपसागरात कमी दाबाच्या क्षेत्र तयार झाल्यामुळे मुंबईत मुसळधार पाऊस सुरू आहे. समुद्राच्या लाटांची उंची 10 मीटरपर्यंत जाऊ शकते, असं हवामान खात्याकडून सांगण्यात आलं आहे.

हवामान खात्याकडून देण्यात येणारे ‘रेड’, ‘ऑरेंज’, ‘ग्रीन’ आणि ‘येलो’ अलर्ट म्हणजे नक्की काय? जाणून घ्या…

The post हवामान खात्याकडून राज्यात ऑरेंज अलर्ट जारी, आज अनेक जिल्ह्यांमध्ये अतिवृष्टीचा इशारा appeared first on थोडक्यात घडामोडी.