नवी दिल्ली : १९८४ च्या शीखविरोधी दंगलींमध्ये, विशेषतः सरस्वती विहार हिंसाचार प्रकरणात, दिल्लीतील राऊस अव्हेन्यू न्यायालयाने माजी काँग्रेस खासदार सज्जन कुमार यांना जन्मठेपेची शिक्षा सुनावली. दिल्ली कॅन्टोन्मेंट दंगली प्रकरणात सहभागी असल्याबद्दल शिक्षा भोगत असलेल्या कुमार यांना सुनावण्यात आलेली ही दुसरी जन्मठेपेची शिक्षा आहे.

सुनावणीदरम्यान, दिल्ली पोलिस आणि पीडितांनी न्यायालयाला हे प्रकरण “दुर्मिळातील दुर्मिळ” म्हणून वर्गीकृत करण्याची विनंती केली आणि माजी खासदार सज्जन कुमार यांना फाशीची शिक्षा देण्याची मागणी केली. त्यांच्या लेखी सादरीकरणात, पोलिसांनी असा युक्तिवाद केला की हे प्रकरण निर्भया प्रकरणापेक्षाही भयानक आहे, कारण त्यात एका व्यक्तीऐवजी संपूर्ण समुदायाला लक्ष्य करण्यात आले होते. १९८४ मधील शीख हत्याकांड हा मानवतेविरुद्धचा गुन्हा होता, असे सरकारी वकिलांनी हिंसाचाराच्या क्रूरतेवर आणि प्रमाणावर भर देत म्हटले आहे. पोलिसांनी पुढे असा युक्तिवाद केला की १९८४ च्या दंगलींनी समाजाच्या सामूहिक विवेकाला खोलवर हादरवून टाकले, कारण ते एका विशिष्ट धार्मिक समुदायाविरुद्ध रचलेले हल्ले होते.

सरस्वती विहारमधील क्रूर हत्याकांड
हा खटला १ नोव्हेंबर १९८४ रोजी दिल्लीतील सरस्वती विहार येथे झालेल्या दोन शीख पुरुषांच्या – जसवंत सिंग आणि त्यांचा मुलगा तरुणदीप सिंग – यांच्या हत्येशी संबंधित आहे. तत्कालीन पंतप्रधान इंदिरा गांधी यांच्या हत्येनंतर झालेल्या दंगलींमध्ये या दोन्ही पीडितांची निर्घृण हत्या करण्यात आली. या प्रकरणाची चौकशी करणाऱ्या विशेष तपास पथकाने (एसआयटी) आरोप केला की कुमार यांनी त्यांच्या निर्देशानुसार या दोघांना जिवंत जाळणाऱ्या जमावाचे नेतृत्व केले होते आणि त्यांची घरे उद्ध्वस्त केली आणि लुटली.

या प्रकरणातील एफआयआर उत्तर दिल्लीतील सरस्वती विहार पोलिस स्टेशनमध्ये नोंदवण्यात आला होता. १९८४ च्या दंगलींच्या चौकशीसाठी स्थापन करण्यात आलेल्या रंगनाथ मिश्रा आयोगाला पीडितांच्या कुटुंबियांनी सादर केलेल्या प्रतिज्ञापत्रांवर आधारित हा अहवाल दाखल करण्यात आला होता.

१९८४ च्या शीखविरोधी दंगलींशी संबंधित इतर अनेक खटले कुमार यांच्यावर सुरू आहेत. सप्टेंबर २०२३ मध्ये, दंगलीत सुलतानपुरी येथे शीख समुदायातील सात लोकांच्या हत्येप्रकरणी दिल्लीच्या एका न्यायालयाने त्यांना निर्दोष मुक्त केले. राऊस अव्हेन्यू न्यायालयात त्यांचा आणखी एक खटला प्रलंबित आहे, तसेच दिल्ली उच्च न्यायालयात त्यांच्या निर्दोष सुटकेविरुद्ध दोन अपील आणि सर्वोच्च न्यायालयात एका प्रकरणात त्यांच्या शिक्षेविरुद्ध अपील आहे.

सध्या, कुमार तिहार तुरुंगात आहेत, जिथे ते १-२ नोव्हेंबर १९८४ रोजी पालम कॉलनीतील राज नगर भाग १ मध्ये पाच शीखांच्या हत्येशी संबंधित प्रकरणात आणि राज नगर भाग २ मधील गुरुद्वारा जाळल्याप्रकरणी २०१८ मध्ये दिल्ली उच्च न्यायालयाने दिलेल्या जन्मठेपेची शिक्षा भोगत आहेत.

The post काँग्रेसचे माजी खासदार सज्जन कुमार यांना जन्मठेप, १९८४ च्या शीखविरोधी दंगल प्रकरणात शिक्षा appeared first on थोडक्यात घडामोडी.

गोवा : ८ वर्षे चाललेल्या कायदेशीर लढाईनंतर अखेर, आयर्लंडच्या पर्यटकाला न्याय मिळाला. गोव्यातील एका न्यायालयाने आयर्लंडमधील डॅनिएल मॅकलॉचलिन या महिलेवर बलात्कार आणि हत्येप्रकरणी दोषी असलेल्या आरोपीला जन्मठेपेची शिक्षा ठोठावली आहे. गोव्याच्या मडगाव प्रधान जिल्हा आणि सत्र न्यायालयाने हा निकाल दिला आहे. हे प्रकरण २०१७ चे आहे. कॅनाकोना येथे आयरिश पर्यटक डॅनियल मॅकलॉचलिनची हत्या करण्यात आली होती. या प्रकरणात विकट भगत नावाच्या व्यक्तीला सक्तमजुरीची जन्मठेपेची शिक्षा सुनावण्यात आली आहे. पीडितेवर बलात्कार केल्याबद्दल त्याला सक्तमजुरीसह जन्मठेपेची शिक्षाही सुनावण्यात आली आहे.

२५ वर्षीय डॅनिएल मॅकलॉघलिन ही मूळची आयर्लंडची होती. तथापि, तिच्याकडे ब्रिटन आणि आयर्लंड दोन्ही देशांचे नागरिकत्व होते. ती तिच्या एका मैत्रिणीसोबत फेब्रुवारी २०१७ मध्ये ब्रिटिश पासपोर्टवर गोव्यात आली होती. यादरम्यान, १३ मार्च रोजी संध्याकाळी ती पालोलीम समुद्रकिनाऱ्याजवळील एका गावात होळी पार्टी साजरी करण्यासाठी गेली होती. यावेळी तिला उशीर झाला. ती गावातून तिच्या हॉटेलमध्ये एकटीच परतत होती. मात्र, ती हॉटेलच्या खोलीत परतण्यापूर्वीच तिच्यावर बलात्कार करून तिची हत्या करण्यात आली.

दुसऱ्या दिवशी सकाळी, १४ मार्च २०१७ रोजी, कॅनाकोना येथील देवबाग बीचजवळील एका रिकाम्या जागेत डॅनियल मॅकलॉफ्लिनचा मृतदेह आढळला. तिच्या शरीरावर एकही कपडा नव्हता आणि तिचे डोके आणि चेहरा दोन्ही गंभीरपणे चिरडले होते. याप्रकरणी, तब्बल ८ वर्षांच्या कायदेशीर लढाईनंतर डॅनिएलला अखेर न्याय मिळाला.

The post अखेर न्याय मिळाला! गोव्यात आयर्लंडमधील पर्यटक डॅनियलचा बलात्कार आणि खुन करणाऱ्या आरोपीला जन्मठेपेची शिक्षा appeared first on थोडक्यात घडामोडी.

नवी दिल्ली : एकतर्फी प्रेमातून मामीची हत्या करणाऱ्या आरोपीला आणि त्याच्या मित्राला न्यायालयाने जन्मठेपेची शिक्षा सुनावली आहे. आरोपींनी चाकूने भोसकून त्यांची हत्या केली होती. जिल्हा न्यायालयाने दोन्ही दोषींना जन्मठेपेची शिक्षा सुनावली असून प्रत्येकी दहा हजार रुपये दंड जमा करण्याचे आदेश दिले आहेत. दंड न भरल्यास आणखी कारावास भोगावा लागेल.

सहाय्यक जिल्हा सरकारी वकील रोहतश शर्मा यांनी सांगितले की, गामा-1 सेक्टरमधील अभियंता पंकज त्यागी यांनी तत्कालीन कासना (सध्या बीटा-2) पोलिस ठाण्यात तक्रार नोंदवली होती. 24 जुलै 2013 रोजी पंकज आणि त्याचा मेहुणा ड्युटीवर गेले होते, यावेळी पंकज यांची पत्नी नेहा त्यागी आणि सहा महिन्यांचा मुलगा घरी होते. ते दुपारी घरी परतले, तेव्हा त्यांना नेहाचा मृतदेह रक्ताच्या थारोळ्यात पडलेला दिसला. याप्रकरणी तक्रार नोंदवून पोलिसांनी तपास सुरू केला. पोलिसांनी असा दावा केला होता की एकतर्फी प्रेमातून नेहाचा भाचा आकाश उर्फ ​​गोलू आणि त्याचा मेरठचा मित्र अंकुश उर्फ ​​राहुल शर्मा या दोघांनी नेहा यांची हत्या केली होती.

काय आहे प्रकरण?

नेहा खूप आनंदी राहायची आणि ती अनेकदा तिचा नवरा, भाऊ आणि भाचा आकाशसोबत फिरायला जायची. पण आकाशला वाटले की हे प्रम आहे. आकाशने 24 जुलै रोजी नेहाच्या घरी जाऊन तिच्यापुढे प्रेमाचा प्रस्ताव ठेवला होता. यावर नेहाने आरोपीच्या कानशिलात लगावली होती. नेहाने त्याला फटकारले आणि म्हणाली की मी तुला भावासारखं समजते. यामुळे आरोपी घाबरला की नेहा ही गोष्ट घरच्यांना सांगेल. यानंतर आकाश अंकुशसोबत ऑटोमध्ये सुरजपूरला पोहोचला आणि येथून एक चाकू विकत घेतला. नेहाच्या घरी पोहोचताच दोघांनी चाकूने हल्ला करून नेहाची हत्या केली.

नेहाची हत्या केल्यानंतर आरोपीने तिच्या सहा महिन्यांच्या मुलाचे तोंड बांधून त्याला दुसऱ्या खोलीत सोडले होते, असा खुलासा पोलिसांनी केला आहे. ही दरोड्याची घटना भासवण्यासाठी आरोपींनी घरातील आवश्यक कागदपत्रे, मामीचा मोबाईल, डेबिट कार्ड आदी साहित्य घेऊन कपडे व इतर वस्तू इकडे-तिकडे फेकून दिल्या होत्या. घटनेनंतर आरोपी घरी परतले आणि त्यांनी इतर कुटुंबीयांसह शोक व्यक्त करण्यास सुरुवात केली. आरोपी कुटुंबासह पोलिस ठाण्यात जाऊन खुलासा करण्याची मागणी करत अत्यंत आक्रोश दाखवत होता.

आरोपीने आपले कपडे बाथरूममध्ये टाकून पंकजचे कपडे घातले होते, या कपड्यांमध्ये बसचे तिकीट पडलेले आढळून आले. त्यावरून पोलिसांनी हा संपूर्ण प्रकार उघडकीस आणला.या खटल्याची सुनावणी होऊन न्यायालयाने साक्षीदारांचे म्हणणे ऐकून घेतल्यानंतर दोन्ही बाजूंच्या वकिलांचा युक्तिवाद ऐकून दोघांनाही दोषी ठरवून शिक्षा सुनावली.

The post एकतर्फी प्रेमातून केली मामीची हत्या, न्यायालयाने आरोपींना ठोठावली जन्मठेपेची शिक्षा appeared first on थोडक्यात घडामोडी.

जळगाव : पत्नीचा लाकडी दांडा डोक्यात मारुन खून करणाऱ्या पतीला जळगाव जिल्हा व सत्र न्यायालयाने काल (१९ मे) जन्मठेपेची शिक्षा व ५ हजार रुपयांचा दंड ठोठावला आहे. पप्पू रतन पवार (वय ३१ रा. पाचोरा) असे शिक्षा झालेल्या आरोपीचे नाव आहे. त्याने पत्नी कस्तुराबाई पप्पू पवार (वय ३०) यांचा खून केला होता. प्रत्यक्षदर्शी साक्षिदार असलेल्या आरोपीच्या सात वर्षाच्या मुलीची साक्ष या खटल्यात महत्वाची ठरली.

आरोपी पप्पु रतन पवार हा त्याची पत्नी कस्तुराबाई व तीन मुलींसह पाचोरा येथील विवेकानंद नगर तांडा येथे राहत होता. पाचोरा येथील एका हॉटेलवर पप्पू काम करत होता. त्याला दारू पिण्याचे व्यसन होते. पप्पु आणि कस्तूराबाई यांना तीनही मुली असल्यामुळे पप्पू नेहमी कस्तूराबाई यांना दोष द्यायचा आणि मुलगा होत नाही या कारणावरुन वेळावेळी कस्तूराबाई यांना मारहाण करायचा. ९ जून २०१९ रोजी रात्री पप्पू पवारने ‘तुला मुलीच होतात’ असे म्हणत पत्नी कस्तुराबाईशी भांडण सुरु केले, नंतर तिला शिवीगाळ केली आणि रागाच्या भरात लाकडी दांडक्याने तिच्या डोक्यात मारले. त्यात कस्तूरीबाई यांचा मृत्यू झाला. याप्रकरणी कस्तूराबाई यांची आई पद्माबाई सखाराम राठोड (वय ६० रा. आनंद नगर तांडा) यांच्या फिर्यादीवरुन पाचोरा पोलीस स्टेशनला भा. दं. वि. कलम ३०२, ५०४ अन्वये गुन्हा दाखल करण्यात आला.

या घटनेच्या दुसर्‍या दिवशी पोलिसांनी आरोपी पप्पू पवार याला अटक केली. गुन्हा घडल्यापासून आरोपी पती कारागृहातच होता. तपास अधिकारी पोलिस उपनिरीक्षक पंकज शिंदे यांनी तपास पूर्ण करुन या गुन्ह्याचे दोषारोपपत्र जिल्हा न्यायालयात दाखल केले होते. खटल्यावर सर्वप्रथम तत्कालीन प्रमुख जिल्हा व सत्र न्यायाधीश जी. ए.सानप याच्या समोर कामकाज चालले. त्यांच्या समक्ष या खटल्यात सरकारी पक्षातर्फे जिल्हा सरकारी वकील केतन ढाके यांनी आठ साक्षीदार तपासले. त्यानंतर डिसेंबर २०२० मध्ये प्रमुख जिल्हा व सत्र न्यायाधीश एस.डी. जगमालानी यांच्या समोर सरकारी पक्षाने उर्वरित दोन साक्षीदार तपासून खटल्याचे काम पूर्ण केले.

या खटल्यात प्रामुख्याने आरोपीची सात वर्षांची मोठी मुलगी गौरी हिची साक्ष महत्वपुर्ण ठरली. ही सर्व घटना तिच्या समोर घडलेली होती. तिने सर्व घटनाक्रम न्यायालयासमोर सांगितला. न्यायालयाने तिला विचारले, मारहाण करणारा व्यक्ती कोण आहे ? तेव्हा तिने तिच्या वडिलांकडे बोट दाखवले. या व्यतिरिक्त फिर्यादी पद्माबाई राठोड, डॉ. निलेश देवराज, पंच साक्षीदार व पोलीस उपनिरिक्षक पंकज शिंदे यांच्या देखील साक्षी नोंदविण्यात आल्या. न्यायालयाने आरोपी पप्पु पवार याला पत्नी कस्तुराबाई यांचा खून केल्याप्रकरणी दोषी ठरवून जन्मठेपेची व ५ हजार रुपये दंडाची शिक्षा ठोठावली.

RTPCR चाचणीसाठी नाक आणि तोंडातून स्वॅब घेण्याची गरज नाही, वापरणार ‘ही’ सोपी पद्धत

‘लिव्ह इन रिलेशनशीप’ अस्वीकारार्ह, जोडप्याला सुरक्षा देण्यास उच्च न्यायालयाचा नकार

The post ‘तुला मुलीच होतात’ असे म्हणत केली पत्नीची हत्या, सात वर्षांच्या मुलीने दिली वडिलांविरोधात साक्ष आणि.. appeared first on थोडक्यात घडामोडी.

चोरीचा बनाव करुन स्वत:च्या पत्नीचा खून करणाऱ्या पतीस बार्शी सत्र न्यायलयाने जन्मठेपेची शिक्षा सुनावली आहे. उस्मानाबाद जिल्ह्यातील कोंबडवाडी येथील मनिषा फुगारे हिचा खामसवाडी येथील महेश मिसाळ याच्याबरोबर 7 मे 2017 रोजी विवाह झाला होता. लग्नानंतर दोघेही पुण्यात राहत होते. मनिषाला आपला पती सतत एका महिलेशी फोनवरुन बोलत असल्याचे लक्षात आले. त्याबाबत तिने आपल्या माहेरी देखील सांगितले होते.

2 जानेवारी 2018 रोजी महेश मनिषाला घेऊन अचानक तिच्या माहेरी गेला. तिथून तो मनिषाला घेऊन बार्शीतल्या पाथरी येथे आपल्या बहिणीकडे गेला. संध्याकाळी परत येत असल्याचे मनिषाचे वडील दादाराव फुगारे यांना फोनवरुन सांगितले. मात्र उशीर झाला तरीही मुलगी-जावई न आल्याने दादाराव यांनी फोन लावण्याचा प्रयत्न केला. मात्र दोघांचे फोन लागत नव्हते. त्यामुळे दादाराव नातेवाईंकासह त्यांना शोधण्यासाठी निघाले.

रात्री येरमाळ्याजवळ रस्त्याच्या कडेला जावयाची दुचाकी पडलेली आढळली. तिथे मनिषाचा मृतदेह देखील सापडला. मनिषाच्या डोक्यावर गंभीर जखमा होत्या. मात्र महेश तिथे नव्हता. त्यामुळे त्यांनी जवळच असलेल्या पांगरी पोलिस ठाण्यात धाव घेतली. त्यानंतर त्यांना त्यांचा जावई उस्मानाबाद येथील शासकीय रुग्णालयात दाखल असल्याचे कळले. महेश याला विचारणा केली असता चोरट्यांनी आपल्यावर हल्ला केला. त्यात आपण जखमी झालो आणि मनिषाचा मृत्यू झाला असे त्याने सांगितले. मात्र हे प्रकरण पांगरी पोलिस ठाण्याचे तत्कालीन स.पो.नि. धनंजय ढोणे यांना शंकास्पद वाटले. महेशच्या अंगावर असणाऱ्या जखमा किरकोळ होत्या.

धनंजय ढोणे यांनी महेश मिसाळ याची कसून चौकशी केली असता त्याने हत्येची कबुली दिली. लग्नापूर्वीच नात्यातील एका मुलीसोबत आपले प्रेमसंबंध होते. तिच्यासोबत लग्न करायचे होते. मात्र पत्नी मनिषा ही गर्भवती होती आणि ती लग्नाला अडसर ठरत होती. त्यामुळे डोक्यात दगड मारुन आणि चाकूने हल्ला करुन खून केल्याची कबुली आरोपी महेश मिसाळ याने कोर्टात दिल्याची माहिती सरकारी वकील अॅड. शांतवीर महिंद्रकर यांनी दिली. या प्रकरणी एकही प्रत्यक्षदर्शी पुरावा नव्हता, मात्र केवळ परिस्थितीजन्य पुरावे व्यवस्थितपणे सादर केल्याने न्यायालयाने जन्मठेपेची शिक्षा आणि 25 हजार रुपये दंडाची शिक्षा सुनावली आहे.

The post सोलापूर : गर्भवती पत्नीचा खून करणाऱ्या पतीस न्यायालयाने दिली जन्मठेपेची शिक्षा appeared first on थोडक्यात घडामोडी.