कोल्हापूर : खेळताना नकळत झालेला निष्काळजीपणा मुलांसाठी किती घातक ठरू शकतो, याचा प्रत्यय करवीर तालुक्यातील उजळाईवाडी येथे आला. एका सातवीत शिकणाऱ्या 13 वर्षीय मुलाचा क्रिकेटचा चेंडू आणताना उच्चदाब विद्युत वाहिनीच्या संपर्कात येऊन मृत्यू झाल्याची हृदयद्रावक घटना शुक्रवारी (५ डिसेंबर) दुपारी घडली.

मृत मुलाचे नाव मोहम्मद अफान असिफ बागवान (वय 13, रा. बालाजी पार्क, उजळाईवाडी) असे आहे. तो मित्रांसोबत विमानतळ रोडलगत मोकळ्या मैदानात क्रिकेट खेळत होता. शिक्षकांच्या संपामुळे शाळेला अघोषित सुट्टी असल्याने तो घराबाहेर खेळण्यासाठी गेला होता.

क्रिकेट खेळताना चेंडू शेजारच्या हनुमंत खांडेकर यांच्या बंगल्याच्या टेरेसवर गेला. तो आणण्यासाठी अफान टेरेसवर चढला. याच वेळी इमारतीच्या अवघ्या दीड ते दोन फूट अंतरावरून जाणारी 11,000 व्होल्ट (11kV) क्षमतेची उच्चदाब विद्युत वाहिनी त्याच्या मानेला स्पर्शली आणि प्रचंड विद्युत धक्का बसताच अफान जागीच कोसळला.

स्थानिक नागरिकांनी दिलेल्या माहितीनुसार, आवाज येताच लोक धावले आणि अफानला तातडीने सीपीआर रुग्णालयात नेण्यात आले. मात्र दाखल करतानाच डॉक्टरांनी त्याला मृत घोषित केले. पोलिसांनी पंचनामा करून मृतदेह शेंडा पार्क येथे शवविच्छेदनासाठी पाठवला असून, गोकुळ शिरगाव पोलिसांनी अनैसर्गिक मृत्यूची नोंद केली आहे.

अफान हा स्वभावाने मनमिळावू आणि अभ्यासात हुशार होता. कुटुंबातील एकुलता एक मुलगा असल्याने त्याच्या निधनाने घरावर दुःखाचे सावट पसरले आहे. वडील असिफ बागवान हे खासगी कंपनीत नोकरीबरोबरच पार्टटाईम रिक्षाचालक आहेत, तर आई गृहिणी असून दोन लहान मुली आहेत.

“शाळा सुरू असती तर ही दुर्घटना टळली असती,” अशी हळहळ ग्रामस्थांनी व्यक्त केली आहे. शिक्षकांच्या संपामुळे निर्माण झालेल्या परिस्थितीवर त्यांनी नाराजी व्यक्त करत सुरक्षिततेसंबंधी प्रश्न उपस्थित केले.

दरम्यान, परिसरातील नागरिकांनी महावितरणकडून तातडीने चौकशी करून उच्चदाब वाहिन्यांचे सुरक्षित अंतर पाळले जात आहे का, याबाबत तपासणी करण्याची मागणी केली आहे. पोलिस घटनेचा पुढील तपास करत आहेत.

The post चेंडू आणण्यासाठी टेरेसवर गेलेल्या 13 वर्षीय मुलाचा विजेच्या धक्क्याने दुर्दैवी मृत्यू appeared first on थोडक्यात घडामोडी.

कोल्हापूरः कोल्हापूर जिल्हा प्रशासनाने एक अतिशय कौतुकास्पद निर्णय घेतला आहे. ज्या मुलांच्या पालकांचे कोरोनामुळे निधन झाले आहे, अशा मुलांचे पालकत्व कोल्हापूर जिल्हा प्रशासन स्वीकारणार करणार असल्याची माहिती जिल्हयाचे पालकमंत्री सतेज पाटील यांनी दिली. या मुलांची माहिती संकलित करण्याचं काम सुरु असून त्यानंतर काही मुलांना दत्तक घेण्यात येणार असल्याचे त्यांनी सांगितले.

पालकमंत्री सतेज पाटील म्हणाले कि, “कोरोना संसर्गामुळे अनेक कुटूंबातील कर्त्या व्यक्तींना आपला जीव गमवावा लागला आहे. त्यामध्ये महिलांचाही समावेश आहे. आज जवळपास जिल्ह्यातील ४५ मुलांच्या आई वडिलांपैकी एकाचा कोरोनाने मृत्यू झाला आहे. अशा मुलांच्या सामाजिक आणि शैक्षणिक भविष्याचे नुकसान होवू नये, यासाठी जिल्हा प्रशासनाच्या वतीने त्यांची माहिती संकलनाचे काम सुरू आहे. जिल्ह्यात ४५ मुलांचे आई किंवा वडील नसल्याचे समोर आले आहे. तसेच दोन मुलांचे आई-वडील असे दोन्ही हिरावून घेतल्याचे समोर आले आहे. अशा मुलांची पालनपोषणाची जबाबदारी आता कोल्हापूर जिल्हा प्रशासन घेणार आहे. वेळ पडल्यास त्यांना जिल्हा प्रशासन दत्तक ही घेणार असल्याची तयारी केली जात आहे. त्यांच्या भवितव्यासाठी सर्वोतोपरी प्रयत्न केले जाणार आहेत.”

The post कोरोनाकाळात आई-वडिलांचे छत्र हरपलेल्या बालकांसाठी प्रशासनाचा मोठा निर्णय appeared first on थोडक्यात घडामोडी.

कोल्हापूर : कोल्हापूर जिल्ह्यात वाढत्या कोरोना रुग्णांच्या पार्श्वभूमीवर काल दुपारी कडक लॉकडाऊनचा निर्णय जाहीर केला होता. आज सकाळी 11 वाजल्यापासून नवे निर्बंध लागू होणार होते. पण हा निर्णय अवघ्या काही तासात मागे घेण्यात आला आहे. कडक लॉकडाऊन नाही मात्र जनता कर्फ्यू पाळण्याचं आवाहन प्रशासनाने केलं आहे.

वाढत्या कोरोनाबाधित रुग्णांच्या पार्श्वभूमीवर कोल्हापूर जिल्ह्यात 5 मे पासून दहा दिवसांचा कडक लॉकडाऊन जाहीर करण्यात आला होता. ग्रामविकास मंत्री हसन मुश्रीफ, पालकमंत्री सतेज पाटील, आरोग्य राज्यमंत्री राजेंद्र पाटील-यड्रावकर यांनी याबाबत व्हिडीओ कॉन्फरन्सद्वारे बैठक घेतली होती. या बैठकीत याबाबतचा निर्णय घेण्यात आला होता. त्यानुसार 15 मे पर्यंत जिल्ह्यात कडक लॉकडाऊन असणार होता. परंतु कोल्हापूर जिल्ह्यातील सर्व नागरिकांनी 5 मे 2021 रोजी सकाळी अकरा वाजल्यापासून 13 मे 2021 सकाळी सात वाजेपर्यंत जनता कर्फ्यू उत्स्फूर्तपणे पाळावा, असं आवाहन प्रशासनाने केलं आहे. या काळात नागरिकांनी कोणत्या बाबींचं पालन करावं, याची नियमावली जाहीर करण्यात आली आहे.

नियमावली :

1. नागरिकांनी अत्यावश्यक सेवा, तातडीची वैद्यकीय गरज याशिवाय घराबाहेर पडू नये
2. वैध कारण असल्याशिवाय कोणीही घराबाहेर पडू नये
3. वैद्यकीय सुविधा व सेवा पूर्ण वेळ सुरु ठेवाव्यात
4. अत्यावश्यक सेवा, किराणा दुकाने, बेकरी इ. दुकाने सकाळी सात ते अकरा वाजेपर्यंत उघडी राहतील. परंतु नागरिकांनी दुकानात न जाता घरपोच सेवा मागवावी. अत्यावश्यक बाब नसेल तर अत्यावश्यक वस्तू खरेदीसाठी घराबाहेर पडू नये
5. हॉटेल्स, रेस्टॉरंट्स यांनी फक्त घरपोच सेवा द्यावी.
6. अत्यावश्यक, निर्यात व निरंतर प्रक्रिया उद्योग आस्थापना यापूर्वी दिलेल्या नियंत्रणास बांधील असतील.
7. शेती व शेतीशी निगडीत त्याचप्रमाणे मान्सूनपूर्व करावयाची सर्व कामे सुरु ठेवावीत.

The post कोल्हापुरातील कडक लॉकडाऊनचा निर्णय मागे, जनता कर्फ्यू पाळण्याचं आवाहन, हे असतील नियम.. appeared first on थोडक्यात घडामोडी.

कोल्हापूर : इचलकरंजी शहरातील एका खुनाच्या गुन्ह्यात जामिनावर बाहेर असणाऱ्या आरोपीने आपल्या व्हॉट्सअॅपच्या स्टेटसला ‘मर्डरला एक वर्ष पूर्ण दुसऱ्या वादळाची तयारी सुरू’ असा व्हिडीओ लावल्याचे समोर आले आहे. त्यानंतर तातडीने पोलिसांनी दहशत निर्माण करू पाहणाऱ्या आरोपी आकाश संजय वासुदेव याला तात्काळ अटक केली आहे.

पोलिसांच्या माहितीनुसार, गेल्या वर्षी 10 डिसेंबर रोजी दीपक कोळेकर नावाच्या तरुणाचा पूर्ववैमनस्यातून खून झाला होता. याप्रकरणी अटक केलेल्या रेकॉर्डवरील गुन्हेगार आकाश वासुदेव याने पुन्हा एकदा दहशत माजवण्याचा प्रयत्न केला. जामिनावर बाहेर आलेल्या या आरोपीने २१ डिसेंबरला आपल्या मोबाईलवर ‘मर्डरला एक वर्ष पूर्ण दुसऱ्या वादळाची तयारी सुरू’ अशा पद्धतीचा व्हिडीओ whatsapp स्टेटस म्हणून ठेवला. त्यानंतर पोलिसांनी हे स्टेटस सोशल मीडियावर बघताच तात्काळ या आरोपीला अटक केली आहे.

The post ‘मर्डरला एक वर्ष पूर्ण दुसऱ्या वादळाची तयारी सुरू’ असं स्टेटस ठेवणाऱ्या आरोपीला पुन्हा अटक appeared first on थोडक्यात घडामोडी.