नागपूर : संत मुक्ताई मंदिर तीर्थक्षेत्राचा सर्वांगीण विकास करण्यासाठी शासन कटिबद्ध आहे. शिखर समितीकडून मान्यता मिळताच उर्वरित कामे पूर्ण करण्यात येणार असल्याचे ग्रामविकास मंत्री जयकुमार गोरे यांनी सांगितले.

विधानपरिषद सदस्य एकनाथ खडसे यांनी उपस्थित केलेल्या प्रश्नांना उत्तर देताना ते बोलत होते.

जळगाव जिल्ह्यातील कोथळी येथील संत मुक्ताई मंदिर तिर्थक्षेत्राच्या विकासासाठी निधी उपलब्ध करून देण्याचा प्रस्ताव शिखर समितीकडे पाठविण्यात आला असल्याचे मंत्री गोरे यांनी दिले.

संत मुक्ताई मंदिर विकासासाठी सुरुवातीला 9.8 कोटी रुपयांचा प्रस्ताव सादर करण्यात आला होता. त्याला मान्यता मिळाल्यानंतर निधी वितरित करण्यात आला असून त्या कामांना सुरुवातही झाली आहे. कामास गती न मिळाल्याने खर्चात वाढ झाली असल्याचे मंत्री गोरे यांनी स्पष्ट केले.

मंत्री गोरे म्हणाले की, पूर्वी शासनाने 25 कोटींच्या आराखड्यालाच मान्यता दिली होती. परंतु आता बांधकाम विभागाने तयार केलेल्या नव्या विकास आराखड्याला शिखर समितीच्या मान्यतेनंतरच पुढील उर्वरित मंदिराचे काम होणार असल्याचे त्यांनी यावेळी सांगितले.

The post संत मुक्ताई मंदिर तीर्थक्षेत्र विकास आराखड्याला गती देण्यात येणार; निधी उपलब्धेकरीता प्रस्ताव शिखर समितीकडे – ग्रामविकास मंत्री जयकुमार गोरे appeared first on थोडक्यात घडामोडी.

जळगाव : इंदूरहून भुसावळकडे जाणारी खासगी लक्झरी बस रविवारी पहाटे भीषण अपघाताला सामोरी गेली. आमोदा गावाजवळ मोरनदीवरील पुलावरून बस अनियंत्रित होऊन थेट नदीपात्रात कोसळली. या दुर्घटनेत तिघांचा मृत्यू झाला असून तब्बल २५ प्रवासी जखमी झाले आहेत.

ही घटना पहाटे साडेसहा वाजताच्या सुमारास घडली. एमपी-०९-९००९ क्रमांकाची बस पुलावरून जात असताना चालकाचे बसवरील नियंत्रण सुटले. बसने पुलावरील बॅरिकेट्स तोडले आणि थेट कोरड्या नदीपात्रात पडली. पुलावरून कोसळल्यानंतर बस उलटली आणि अनेक प्रवासी त्याखाली अडकले.

अपघाताची माहिती मिळताच गावकरी आणि पोलिसांनी तत्काळ धाव घेत बचावकार्य सुरू केले. जखमींना स्थानिक खाजगी रुग्णालयात दाखल करण्यात आले असून काहींची प्रकृती चिंताजनक आहे.

नदीत पाणी नसल्याने मोठा अनर्थ टळला

सुदैवाने या काळात नदीला पाणी नव्हते. अन्यथा मृतांचा आकडा अधिक वाढला असता, असे प्रत्यक्षदर्शींनी सांगितले. अपघातात जखमी प्रवाशांना सुरक्षित बाहेर काढण्यासाठी ग्रामस्थांनी व पोलिसांनी मोठे प्रयत्न केले.

महिनाभरात २६ अपघातांचा शोकांतिका

फैजपूर–आमोदा रस्त्यावर अपघातांचे प्रमाण सातत्याने वाढत असून, एका महिन्यात या मार्गावर तब्बल २६ अपघात झाले आहेत. रस्त्याची अवस्था निकृष्ट असल्याने वाहन चालवताना नियंत्रण राखणे अवघड जाते, असे वाहनचालकांचे म्हणणे आहे. “ब्रेक दाबल्यावरही गाडी घसरत जाते,” अशी तक्रार चालकांनी केली. परिणामी, सार्वजनिक बांधकाम विभागाच्या कार्यक्षमतेवर प्रश्नचिन्ह उपस्थित झाले आहे.

अपघाताची नोंद फैजपूर पोलीस ठाण्यात करण्यात आली असून पुढील तपास सुरू आहे.

The post जळगावात भीषण अपघात : लक्झरी बस थेट पुलावरून नदीत कोसळली – तिघांचा मृत्यू, २५ प्रवासी जखमी appeared first on थोडक्यात घडामोडी.

जळगाव : भाजपाचे तालुका उपाध्यक्ष आणि एरंडोल तालुका शेतकी संघाचे संचालक राजेंद्र रायभान पाटील यांनी पत्नी आणि मुलीसह आत्महत्या केली आहे. त्यांनी शिंदखेडा तालुक्यातील दभाशी नजीकच्या पुलावरून तापी नदीत उडी घेवून आत्महत्या केल्याची धक्कादायक घटना समोर आली आहे. या तिघांचे मृतदेह नदीतून बाहेर काढण्यात आले आहेत. राजेंद्र रायभान पाटील (वय ५४), पत्नी वंदनाबाई राजेंद्र पाटील (वय ४८), मुलगी ज्ञानल राजेंद्र पाटील (वय २१) अशी मृतांची नावे आहेत.

राजेंद्र पाटील जळगाव जिल्ह्यातील धरणगाव तालुक्यातील भोद गावचे रहिवाशी होते. राजेंद्र पाटील, त्यांची पत्नी व मुलगी हे तिघे त्यांच्या इंडीका कारमध्ये सोमवारी (दि.१७) सकाळी अमळनेर तालुक्यातील भरवस येथे त्यांच्या सासरवाडीला गेले होते. तिकडून दुपारी तीन वाजण्याच्या सुमारास ते घरी परतण्यासाठी निघाले. मात्र, ते घरी पोहचलेच नाही. दरम्यान, संध्याकाळी त्यांची गाडी शिंदखेडा तालुक्यातील दभाशी गावाजवळ तापी नदीवर असलेल्या पुलावर दिसली. त्यानतंर काल (दि. १८) दुपारी ४ वाजता एक मृतदेह तापीत तरंगतांना आसपासच्या लोकांना दिसला.

जिल्हा बँकचे संचालक संजय पवार यांनी राजेंद्र पाटील यांची गाडी ओळखली. त्यानंतर भाजपाचे जिल्हा उपाध्यक्ष पी. सी. आबा पाटील माहिती मिळताच तात्काळ घटनास्थळी दाखल झाले. तोपर्यंत राजेंद्र पाटील यांच्या मुलीचाही मृतदेह तरंगतांना दिसला. रात्र झाल्यामुळे या दोघांचे मृतदेह बाहेर काढता आले नाहीत. आज सकाळी हे मृतदेह नदीतून बाहेर काढण्यात आले. आज सकाळी त्यांच्या पत्नीचा देखील मृतदेह तरंगताना आढळला. तिन्ही मृतदेह बाहेर काढून शिरपूर रुग्णालयात शवविच्छेदनासाठी पाठविण्यात आले आहेत.

राजेंद्र पाटील यांच्या सहकुटूंब आत्महत्येचे कारण अद्याप समजलेले नाही. राजेंद्र पाटील हे अतिशय संयमी म्हणून परिचित होते, त्यांनी पत्नी व मुलीसह आत्महत्या करण्यासारखे टोकाचे पाऊल का उचलले असावे असे प्रश्न आता उपस्थित झाले आहेत. त्यांच्या कारमध्ये डेलीगेट या किटकनाशकाची बाटलीही सापडली आहे. मात्र ती उघडलेली नाही. त्यांची पत्नी वंदना या भोद ग्रामपंचायतीच्या सदस्य होत्या. मुलगी ज्ञानल धरणगाव महाविद्यालयात अंतिम वर्षात शिकत होती. त्यांचा मुलगा तेजस शेतकी संघात नोकरीला असल्याची माहिती मिळत आहे.

पोलीस आयुक्त कृष्ण प्रकाश यांच्यावर कोणाचा दबाव? ‘त्या’ कथित गोळीबार प्रकरणाचं पुढे काय?

दोन मोटारसायकल समोरासमोर धडकून भीषण अपघात, दोघांचा मृत्यू

The post धक्कादायक : भाजपाचे पदाधिकारी राजेंद्र पाटील यांची पत्नी आणि मुलीसमवेत आत्महत्या appeared first on थोडक्यात घडामोडी.

जळगावच्या महिला वसतीगृहात पोलिसांनी महिलांना कपडे काढून डान्स करायला लावल्याची धक्कादायक घटना घडली होती. या संतापजनक प्रकारची दखल आज विधीमंडळात घेण्यात आली. भाजपच्या आमदार श्वेता महाले यांनी हा मुद्दा विधानसभेत उपस्थित केला.

तरुणींना कपडे काढून डान्स करायला लावून त्याचा व्हिडीओ बनवला गेला. या गंभीर प्रकाराबद्दल दोषींवर कारवाई झाली पाहिजे. गृहमंत्र्यांना विनंती आहे की संबंधित पोलिसांचं निलंबन करावं, अशी मागणी श्वेता महाले यांनी केली. यावर गृहमंत्र्यांनी ‘नोंद घेतो’ एवढंच उत्तर दिलं. यावर सुधीर मुनगंटीवार यांनी आक्रमक भूमिका घेतली.

सुधीर मुनगंटीवार यांनी संताप व्यक्त करत म्हटलं कि, “सभागृहात सदस्यांनी अतिशय गंभीर मुद्दा उपस्थित केला आहे. हा इतका गंभीर विषय आहे अध्यक्ष महोदय की, उद्या माझी बहीण, तुमची बहीण एवढं एक सेकंद नजरेत आणा…तुम्ही जर गृहमंत्री असता तर खून केला असता. अशा पद्धतीने तुमच्या, माझ्या आई बहिणीला नग्न करुन, कपडे काढून नाचायला लावलं जातंय आणि आम्ही नोंद घेवू म्हणतात. इथं मृत मनाचे आमदार आहेत? आमचं मन जिवंत आहे. तळपायाची आग मस्तकात गेली पाहिजे. उत्तरात सांगितलं पाहिजे की, एक तासात चौकशी करतो. काय कारवाई करणार आहे याचा अहवाल घेतो…पण म्हणतात नोंद घेतो…हे पाप फेडावं लागेल. आमच्या आई-बहिणीला नग्न केलं जातं या महाराष्ट्रात आणि आम्ही नोंद घेतो.”

मग गृहमंत्री अनिल देशमुख यांनीही घटनेची गंभीर दखल घेत दोषींवर कारवाई होईल असं आश्वासन दिलं आहे. गृहमंत्र्यांनी विधानसभेत सांगितलं कि, “जळगावमधील आशादीप वसतीगृहात घडलेला प्रकार दुर्दैवी आहे. घटनेची चौकशी करण्यासाठी चार उच्चस्थरीय अधिकाऱ्यांची समिती गठीत करण्यात आली आहे. या समितीचा अहवाल दोन दिवसात प्राप्त होणार आहे. त्यानंतर नियमानुसार दोषींवर कारवाई होईल.”

काय आहे प्रकरण ?

जळगावच्या आशादीप वसतीगृहातील महिला आणि मुलींना काही पोलिसांनी कपडे काढून डान्स करायला लावल्याचा प्रकार घडला. या महिलांनी घडलेल्या प्रकाराची शहरातील सामाजिक कार्यकर्त्यांकडे तक्रार केल्याने ही संपूर्ण घटना उघडकीस आली. या महिलांनी आपल्यावर अन्याय, अत्याचार केला जात असल्याची तक्रार केली आहे. यामध्ये रात्री काही तरुण पैसे घेऊन या ठिकाणी प्रवेश करून अनैतिक कृत्य करत असल्याचं म्हटलं आहे.

इंदूबाई बहुउद्देशीय संघटनेच्या अध्यक्ष आणि सामाजिक कार्यकर्त्या मंगला सोनवणे आणि जनायक फाउंडेशनचे फिरोज पिंजारी यांनी जिल्हाधिकारी अभिजित राऊत यांना निवेदन देऊन योग्य ती कारवाई करण्याची मागणी केली. कारवाई न झाल्यास आंदोलनचा इशाराही त्यांनी दिला आहे. त्यावर आपण चौकशी समिती गठीत केली असून ही चौकशी समिती संपूर्ण घटनेचा तपास करून अहवाल देणार आहे. या अहवालानुसार कारवाई करण्यात येईल. अशी प्रतिक्रिया जिल्हाधिकारी अभिजित राऊत यांनी दिली.

The post जळगावच्या महिला वसतीगृहात झालेल्या ‘त्या’ संतापजनक प्रकारावरून विधानसभेत चर्चा, जाणून घ्या प्रकरण.. appeared first on थोडक्यात घडामोडी.