अहिल्यानगर : मागील काही दिवसांपासून अहिल्यानगर शहरासह परिसरात बिबट्यांचा वावर वाढला असून नागरिकांमध्ये भीतीचं वातावरण निर्माण झालं आहे. नरभक्षक बिबट्यांकडून वारंवार हल्ले होत असतानाच आता पुन्हा एकदा एक धक्कादायक घटना समोर आली आहे. एका बिबट्याने आईच्या डोळ्यादेखत पाच वर्षांच्या मुलीला उचलून नेल्याची हृदयद्रावक घटना घडली आहे.

ही घटना अहिल्यानगर तालुक्यातील खारेकर्जुने गावात बुधवारी (१२ नोव्हेंबर) सायंकाळी घडली. बिबट्याने उचलून नेलेल्या मुलीचं नाव रियांका सुनील पवार (वय ५) असं आहे.

मिळालेल्या माहितीनुसार, खारेकर्जुने येथील शेतावर काही कुटुंबे मजूर म्हणून वास्तव्यास आहेत. त्यातच रियांका कुटुंबासह शेतावर वास्तव्यास होती. बुधवारी सायंकाळी साडेसहा वाजण्याच्या सुमारास थंडी वाढल्याने कुटुंबातील सदस्य घरासमोर शेकोटीजवळ बसले होते. रियांका देखील शेकोटीजवळ खेळत असतानाच शेजारील तुरीच्या शेतातून अचानक बिबट्या आला आणि क्षणातच चिमुकलीला उचलून नेलं. आईने आरडाओरड करत पाठलाग करण्याचा प्रयत्न केला, परंतु बिबट्या अंधारात अदृश्य झाला.

घटनेची माहिती मिळताच परिसरातील ग्रामस्थांनी मोठ्या संख्येने घटनास्थळी धाव घेतली आणि शोधमोहीम सुरू केली. त्यानंतर पोलिस आणि वनविभागाचे पथकही घटनास्थळी दाखल झाले. रात्री उशिरापर्यंत शोधकार्य सुरू ठेवण्यात आलं, मात्र अद्यापही मुलीचा काहीही थांगपत्ता लागलेला नाही.

या घटनेनंतर संपूर्ण गावात भीतीचं वातावरण निर्माण झालं आहे. ग्रामस्थांनी तातडीने पिंजरा बसवण्याची आणि बिबट्याला पकडण्याची मागणी वनविभागाकडे केली आहे. प्रशासनाने नागरिकांना रात्रीच्या वेळी सावधगिरी बाळगण्याचं आवाहन केलं असून, लहान मुलांना एकटं सोडू नये आणि कोणतीही हालचाल दिसल्यास त्वरित वनविभागाशी संपर्क साधावा, अशा सूचना दिल्या आहेत.

The post अहिल्यानगरमध्ये हृदयद्रावक घटना! बिबट्याने आईच्या डोळ्यादेखत पाच वर्षांच्या मुलीला उचलून नेलं appeared first on थोडक्यात घडामोडी.

नवी दिल्ली : सोमवारी संध्याकाळी नवी दिल्लीतील लाल किल्ल्याजवळ झालेल्या प्रचंड स्फोटाने राजधानी हादरली. या स्फोटात किमान आठ जणांचा मृत्यू झाला असून, अनेकजण गंभीर जखमी झाले आहेत. सुभाष मार्ग ट्रॅफिक सिग्नलजवळ एका हुंडई आय२० कारमध्ये हा स्फोट झाला. स्फोटाची तीव्रता इतकी होती की आसपास उभ्या असलेल्या अनेक वाहनांचे आणि परिसरातील काही दुकानांचे मोठे नुकसान झाले.

सूत्रांच्या माहितीनुसार, स्फोट होण्यापूर्वी संबंधित कार लाल किल्ल्याजवळील पार्किंग क्षेत्रात जवळपास तीन तास उभी होती. सायंकाळी सुमारे सहा वाजताच्या सुमारास कारमध्ये स्फोट झाला. आवाज इतका मोठा होता की परिसरातील नागरिक आणि पर्यटकांमध्ये एकच गोंधळ उडाला. घटनेनंतर पोलिस आणि अग्निशमन दलाने तातडीने घटनास्थळी धाव घेतली. जखमींना लोकनायक जयप्रकाश रुग्णालयात उपचारासाठी दाखल करण्यात आले आहे.

सीसीटीव्ही फुटेजमध्ये संशयिताचा मागोवा
दिल्ली पोलिसांनी स्फोटानंतर आसपासच्या भागातील १०० हून अधिक सीसीटीव्ही फुटेज तपासण्यास सुरुवात केली आहे. प्राथमिक तपासात एका संशयित व्यक्तीला कार पार्किंग क्षेत्रात प्रवेश करताना आणि बाहेर पडताना पाहिले गेले आहे. तो त्या वेळी एकटाच असल्याचे पोलिसांनी सांगितले. पोलिस दर्यागंज दिशेने जाणाऱ्या मार्गावरील सीसीटीव्ही फुटेजचाही तपास करत आहेत. टोल प्लाझाचेही चित्रफीत तपासात समाविष्ट करण्यात आले आहे.

या स्फोटानंतर दिल्ली पोलिसांनी बेकायदेशीर क्रियाकलाप (प्रतिबंध) कायदा (UAPA), स्फोटके कायदा आणि भारतीय दंड संहितेच्या विविध कलमांखाली गुन्हा दाखल केला आहे. कोतवाली पोलीस ठाण्यात UAPA च्या कलम १६ आणि १८ अंतर्गत प्रकरणाची नोंद झाली आहे. गुन्हे शाखा आणि विशेष शाखेची संयुक्त तपासणी सुरू आहे.

केंद्रीय गृहमंत्री अमित शहा यांची प्रतिक्रिया
केंद्रीय गृहमंत्री अमित शहा यांनी घटनेची गंभीर दखल घेतली असून, त्यांनी सांगितले की, घटनेची माहिती मिळताच दिल्ली गुन्हे शाखा आणि विशेष शाखेची पथके दहा मिनिटांत घटनास्थळी पोहोचली. त्यांनी सांगितले, “दिल्लीचे पोलीस आयुक्त आणि विशेष शाखेचे प्रभारी घटनास्थळी उपस्थित आहेत. आम्ही सर्व शक्यता तपासत आहोत आणि सर्व पैलूंचा सखोल तपास केला जाईल. तपासाचे निष्कर्ष पारदर्शकपणे जनतेसमोर मांडले जातील.”

एनआयए आणि एफएसएलची तपासणी सुरू
दिल्लीचे पोलीस आयुक्त सतीश गोलचा यांनी सांगितले की, लाल किल्ला मेट्रो स्टेशनजवळील सिग्नलवर संथ गतीने चालणाऱ्या वाहनाला थांबवले असता हा स्फोट झाला. या स्फोटामुळे जवळच्या वाहनांचे आणि सार्वजनिक मालमत्तेचे नुकसान झाले. एफएसएल (Forensic Science Laboratory) आणि एनआयए (National Investigation Agency) यांची पथके घटनास्थळी पोहोचून नमुने गोळा करत आहेत. स्फोटासाठी वापरलेल्या पदार्थांचा आणि त्याच्या स्त्रोताचा शोध घेण्याचे काम सुरू आहे.

राजधानीत सुरक्षा वाढवली
घटनेनंतर संपूर्ण दिल्ली शहरात उच्चस्तरीय सुरक्षा व्यवस्था लागू करण्यात आली आहे. संवेदनशील ठिकाणांवर पोलिसांचा बंदोबस्त वाढवण्यात आला असून, मेट्रो स्टेशन, बाजारपेठा आणि पर्यटनस्थळांवर तपासणी मोहीम सुरू आहे. सर्व वाहनांची तपासणी केली जात असून, संशयास्पद हालचालींवर पोलिसांचे विशेष लक्ष आहे.

तपास यंत्रणा स्फोटामागील हेतू, संशयिताची ओळख आणि संभाव्य दहशतवादी संबंध यांचा शोध घेत आहेत. दिल्ली पोलिसांनी नागरिकांना अफवा न पसरवण्याचे आणि अधिकृत स्त्रोतांवरूनच माहिती घेण्याचे आवाहन केले आहे.

The post लाल किल्ल्याजवळ कारमध्ये भीषण स्फोट! आठ ठार, अनेक जखमी; स्फोट होण्यापूर्वी कार ३ तास ​​पार्किंगमध्ये उभी… appeared first on थोडक्यात घडामोडी.

उत्तर प्रदेश : मिर्झापूर येथे रेल्वे रुळ ओलांडताना झालेल्या दुर्दैवी अपघातात अनेक प्रवाशांचा मृत्यू झाला आहे. प्राथमिक माहितीनुसार, या अपघातात सुमारे सहा लोकांचा मृत्यू झाल्याची भीती व्यक्त केली जात आहे.

हे सर्वजण चोपानहून वाराणसीकडे गंगेत पवित्र स्नानासाठी निघाले होते. अपघाताची घटना चुनार रेल्वे स्थानकाजवळ घडली. हे सर्व प्रवासी चुनारमधील प्लॅटफॉर्म क्रमांक ४ वर चोपन-प्रयागराज पॅसेंजर ट्रेनमधून उतरले होते. त्यानंतर रुळ ओलांडत असताना विरुद्ध दिशेने येणाऱ्या रेल्वेगाडीने त्यांना धडक दिली.

या भीषण घटनेनंतर रेल्वे प्रशासन आणि स्थानिक पोलिसांनी घटनास्थळी धाव घेऊन बचावकार्य सुरू केले आहे. मृतदेह ओळखण्याचे काम सुरु असून अपघाताच्या कारणांचा तपास सुरू असल्याची माहिती अधिकाऱ्यांनी दिली.

The post भीषण अपघात! रेल्वे रुळ ओलांडताना रेल्वेची धडक बसल्याने सहा भाविकांचा मृत्यू appeared first on थोडक्यात घडामोडी.

छत्रपती संभाजीनगर : भीमनगर येथील १९ वर्षीय प्रारंभी दीपक इंगळे या तरुणीने तिच्या प्रियकराकडून होत असलेल्या मानसिक छळाला कंटाळून आत्महत्या केल्याची धक्कादायक घटना उघडकीस आली आहे. १९ जुलै रोजी संध्याकाळच्या सुमारास तिने आपल्या राहत्या घराच्या छताला गळफास लावून आत्महत्या केली. छावणी पोलिसांनी याप्रकरणी आरोपी सचिन राजू भिसे (वय १९, रा. मिल कॉर्नर) याला अटक केली आहे.

मिळालेल्या माहितीनुसार, प्रारंभी हिने नुकताच ‘ऑपरेशन टेक्निशियन’चा कोर्स पूर्ण केला होता आणि ती शहरातील एका खाजगी रुग्णालयात काम करत होती. याच रुग्णालयात सचिन वॉर्ड बॉय म्हणून कार्यरत होता. दोघांमध्ये जानेवारी २०२५ मध्ये ओळख झाली आणि त्याचे रूपांतर लवकरच प्रेमसंबंधात झाले. त्यांनी लग्न करण्याचाही विचार केला होता. मात्र प्रारंभीच्या वडिलांनी या नात्याला विरोध केला आणि तिला सचिनपासून दूर राहण्याचा सल्ला दिला. परंतु प्रारंभीने संबंध तोडल्यावरही सचिन तिला आणि तिच्या आईला त्रास देत राहिला. पोलिसांनी दिलेल्या माहितीनुसार, तो वारंवार आर्थिक मदतीची मागणी करत असे. एकदा प्रारंभीच्या आईने त्याला मोटारसायकलसाठी ₹३,००० रुपये दिल्याचेही निष्पन्न झाले आहे.

आत्महत्येपूर्वीचे क्षण
१९ जुलै रोजी संध्याकाळी साडेसातच्या सुमारास प्रारंभी आणि तिची आई काही कामासाठी घराबाहेर गेल्या होत्या. काही वेळातच त्या परत आल्या. प्रारंभीने त्यानंतर स्वतःला खोलीत बंद करून घेतले आणि बराच वेळ फोनवर बोलत होती. कुटुंबीयांनी आवाज दिल्यानंतरही प्रतिसाद न मिळाल्याने त्यांनी खोलीचे दार उघडून पाहिले असता ती छताच्या हुकाला लटकलेल्या अवस्थेत आढळली.

मोबाईलवरील चॅट्स आणि ब्लॅकमेलिंगचे पुरावे
प्रारंभीच्या मृत्यूनंतर तिच्या आईने मोबाईल तपासला असता, सचिनचे सलग ५-६ मिस्ड कॉल्स आणि स्नॅपचॅटवरील चॅट्स आढळले. त्या चॅट्समध्ये प्रारंभीने सचिनला तिची खासगी माहिती कुणाशीही शेअर करू नये, अशी विनंती केल्याचे दिसून आले. हे स्पष्ट संकेत आहेत की आरोपी तिच्या खासगी गोष्टींचा गैरफायदा घेत तिला ब्लॅकमेल करत होता.

प्रारंभीच्या आईने पोलिसांना दिलेल्या निवेदनात सांगितले की, सचिनने तिच्या मुलीवर मानसिक दबाव टाकला, तिला धमकावले, आणि तिच्या आयुष्यात हस्तक्षेप केला. या आरोपांच्या पुष्टीसाठी चॅट्सचे स्क्रीनशॉटही पोलिसांना सादर करण्यात आले आहेत.

आरोपी सचिन भिसे हा फक्त अकरावीपर्यंत शिकलेला असून, त्याचे आईवडील त्याच्या लहानपणीच वारले आहेत. तो आपल्या भावासोबत राहत होता. पोलिसांनी त्याला अटक करून न्यायालयात हजर केले असता, न्यायालयाने त्याला २७ जुलै २०२५ पर्यंत पोलिस कोठडी सुनावली आहे. सध्या पोलिसांकडून आरोपीविरुद्ध ब्लॅकमेलिंगचा तपास सुरू असून, मोबाईलमधील डिजिटल पुराव्यांची बारकाईने तपासणी केली जात आहे.

The post प्रियकराकडून होणाऱ्या ब्लॅकमेलिंगला कंटाळून १९ वर्षीय तरुणीची आत्महत्या appeared first on थोडक्यात घडामोडी.

पुणे : कल्याणी नगरमधील स्पा सेंटरच्या आड चालणाऱ्या मानवी तस्करी रॅकेटचा पर्दाफाश करण्यात आला आहे. या कारवाईत दोन आरोपींना अटक करण्यात आली असून कथित सूत्रधार सध्या फरार आहे. येरवडा पोलिस स्टेशन आणि पुणे गुन्हे शाखेच्या युनिट ४ च्या संयुक्त कारवाईत हा प्रकार समोर आला.

मिळालेल्या माहितीनुसार, ही कारवाई शुक्रवारी १६ मे रोजी कल्याणी नगर येथील ‘गुडविल एन्क्लेव्ह’मध्ये स्थित ‘निद्रा बॉडी स्पा’ येथे छापा टाकून करण्यात आली. छाप्यादरम्यान स्पामधून तीन महिलांची सुटका करण्यात आली. संबंधित महिलांना आर्थिक लाभाचे खोटे आमिष दाखवून जबरदस्तीने वेश्याव्यवसायात ढकलण्यात आले होते, अशी माहिती पोलिसांनी दिली. अटक करण्यात आलेल्या आरोपींची नावे हर्षवर्धन सिंग भरत मोदासिया (२२, रा. कोरेगाव पार्क) आणि असफुल इस्लाम मुजीबुर रहमान (२३, रा. नागाव, आसाम) अशी आहेत. त्यांना शनिवारी पहाटे ३:१० वाजता ताब्यात घेण्यात आले. या प्रकरणातील मुख्य सूत्रधार आणि स्पाचा मालक जुनैद फारुख शेख याचा शोध सुरु आहे.

याप्रकरणी पोलीस कॉन्स्टेबल मयुरी नलावडे यांनी फिर्याद दिली असून, आरोपींनी महिलांना पैशाचे आमिष दाखवून त्यांच्या नकळत आणि जबरदस्तीने वेश्याव्यवसायात सहभागी केले, असे फिर्यादीत नमूद आहे. पोलिसांनी आरोपींविरुद्ध अनैतिक व्यापार (प्रतिबंध) कायदा, १९५६ अंतर्गत कलम ३, ४ आणि ५ तसेच भारतीय न्याय संहिता (बीएनएस) अंतर्गत कलम १४३ आणि ३(५) अन्वये गुन्हा दाखल केला आहे.

छाप्यादरम्यान पोलिसांनी १५,००० रुपये रोख, १०,००० रुपये किमतीचा मोबाईल फोन आणि कंडोम जप्त केले. या प्रकरणाचा तपास येरवडा पोलीस करत आहेत. सूत्रधाराच्या अटकेसाठी पोलिसांचे पथक विविध ठिकाणी शोधमोहीम राबवत आहे.

The post पुण्यात स्पा सेंटरच्या आड सुरु असलेल्या सेक्स रॅकेटचा पर्दाफाश, दोघांना अटक appeared first on थोडक्यात घडामोडी.

नवी दिल्ली : जम्मू-काश्मीरमधील पहलगाम येथे २२ एप्रिल रोजी झालेल्या दहशतवादी हल्ल्यामुळे भारत आणि पाकिस्तान यांच्यातील तणाव वाढला आहे. परिस्थिती युद्धजन्य होत असल्याने केंद्र सरकारने नागरिकांचे संरक्षण सुनिश्चित करण्यासाठी एक महत्त्वाचा निर्णय घेतला आहे. केंद्रीय गृह मंत्रालयाने सर्व राज्यांना ७ मे २०२५ रोजी ‘सिव्हिल डिफेन्स मॉक ड्रिल’ घेण्याचे आदेश दिले आहेत.

मॉक ड्रिल म्हणजे काय?
मॉक ड्रिल म्हणजे आपत्कालीन परिस्थितीत नागरिकांनी कसे वागावे, कसे सुरक्षित राहावे आणि आपली व इतरांची मदत कशी करावी, याचे प्रत्यक्ष प्रशिक्षण. युद्ध, दहशतवादी हल्ला, नैसर्गिक आपत्ती किंवा इतर संकटाच्या वेळी जी परिस्थिती निर्माण होते, तशीच कृत्रिम परिस्थिती तयार करून सराव केला जातो.

तज्ज्ञांच्या मते, ही एक केवळ सराव प्रक्रिया नसून, नागरिकांमध्ये आत्मविश्वास निर्माण करणारे आणि संकटाच्या वेळी योग्य निर्णय घ्यायला शिकवणारे प्रशिक्षण आहे.

गृह मंत्रालयाच्या सूचनांनुसार मॉक ड्रिलमध्ये खालील ५ महत्त्वाच्या बाबींचा समावेश असेल:

1. हवाई हल्ल्याचा सायरन:
   हवाई हल्ला होण्याची शक्यता दर्शवणारा सायरन वाजवून नागरिकांना सतर्क केले जाईल.
2. नागरिकांना बचाव प्रशिक्षण:
   हल्ला झाल्यास किंवा ब्लॅक आऊट झाल्यास शाळा, कॉलेज, कार्यालय, इमारतींमध्ये लोकांनी कसा बचाव करावा, याचे थेट मार्गदर्शन दिले जाईल.
3. त्वरित ब्लॅक आऊट:
   हवाई हल्ल्याच्या स्थितीत शत्रूला दिशा आणि ठिकाणं कळू नयेत म्हणून लाईट बंद करण्याचा सराव केला जाईल.
4. महत्त्वाची ठिकाणं झाकण्याची यंत्रणा:
   सरकारची, लष्कराची आणि इतर महत्त्वाच्या इमारती शत्रूच्या लक्षात येऊ नयेत म्हणून त्यांना झाकण्याची व्यवस्था पाहिली जाईल.
5. नागरिकांचे स्थलांतर आणि सुरक्षितता:
   संकटाच्या वेळी नागरिकांना सुरक्षित ठिकाणी स्थलांतरित करण्याचा सराव होईल. त्यासाठी वाहनांची, आश्रयस्थानांची आणि स्वयंसेवकांची व्यवस्था तपासली जाईल.

का आवश्यक आहे मॉक ड्रिल?
सिव्हिल डिफेन्स मॉक ड्रिल नागरिकांना कोणत्याही आपत्कालीन परिस्थितीस तोंड देण्यास सज्ज करते. त्यामुळे अनपेक्षित प्रसंगात घबराट टाळता येते, लोकांचा जीव वाचू शकतो आणि मालमत्तेचे नुकसान कमी करता येते.
युरोपीय देशांमध्ये अशी मॉक ड्रिल नियमितपणे घेतली जाते. त्यामुळे युद्धजन्य किंवा आपत्तीजनक प्रसंगी नागरिकांना संकट हाताळण्यात अडचण येत नाही.

फिरोजपूर छावणी बोर्डाचा ब्लॅक आऊट सराव
पंजाबमधील फिरोजपूर छावणी बोर्डाने नुकतीच ब्लॅक आऊट रिहर्सल घेतली. रविवारी रात्री ९ ते ९:३० दरम्यान ३० मिनिटे लाईट बंद ठेवून युद्धजन्य स्थितीची रिहर्सल करण्यात आली. यामध्ये नागरिकांनी अंधारात कसे सुरक्षित राहावे, याचे प्रात्यक्षिक दिले गेले. हा सराव यशस्वी झाला असून इतर भागांमध्येही यासारख्या कृती केल्या जातील.

नागरिकांना आवाहन
७ मे रोजी होणाऱ्या मॉक ड्रिलमध्ये सर्व नागरिकांनी सक्रिय सहभाग घ्यावा, असे आवाहन प्रशासन आणि गृह मंत्रालयाकडून करण्यात आले आहे. या सरावाचा उद्देश भीती निर्माण करणे नसून, आपत्कालीन प्रसंगी नागरिकांचा जीव वाचवणे हा आहे.

The post देशभरात ७ मे रोजी मॉक ड्रिल, का आवश्यक आहे मॉक ड्रिल? जाणून घ्या संपूर्ण माहिती… appeared first on थोडक्यात घडामोडी.

उत्तर प्रदेश : नोएडा येथील एका हॉटेलच्या खोलीत पत्नी आणि सासरच्यांच्या छळाला कंटाळून एका फील्ड इंजिनिअरने गळफास घेऊन आत्महत्या केली. आत्महत्या करण्यापूर्वी त्याने पत्नी आणि तिच्या कुटुंबाकडून होणाऱ्या मानसिक छळाचे वर्णन करणारा एक व्हिडिओ रेकॉर्ड केला. रेल्वे स्टेशन रोडजवळील जॉली हॉटेलच्या खोली १०५ मधून पोलिसांनी त्याचा मृतदेह ताब्यात घेतला.

व्हिडिओमध्ये मोहित कुमारने दावा केला की त्याच्यावर त्याची सर्व मालमत्ता त्याच्या पत्नी आणि सासरच्यांच्या नावावर हस्तांतरित करण्यासाठी दबाव आणला जात होता. तसेच हुंड्याच्या खोट्या आरोपांमध्ये अडकवण्याची धमकी देण्यात आली होती. मोहित कुमार म्हणाला, “तुम्हाला हा व्हिडिओ मिळेल तेव्हा मी या जगातून निघून गेलेला असेन. जर पुरुषांसाठी कायदा असता तर कदाचित मी हे पाऊल उचलले नसते. मला माझ्या पत्नी आणि तिच्या कुटुंबाकडून होणारा मानसिक छळ सहन करावा लागला नसता.” व्हिडिओमध्ये मोहित पुढे म्हणाला, “माझी पत्नी प्रिया यादवच्या आईने जबरदस्तीने प्रियाचा गर्भपात करून घेतला आणि सर्व दागिने आणि साड्या तिच्याकडे ठेवल्या. माझी पत्नी मला धमकी देत ​​आहे की जर मी घर आणि मालमत्ता तिच्या नावावर केली नाही तर ती माझ्यावर आणि माझ्या कुटुंबावर हुंड्याचा खोटा खटला दाखल करेल.” व्यथित आणि निराश झालेल्या मोहितने म्हटले की, “जर माझ्या मृत्यूनंतरही मला न्याय मिळाला नाही, तर माझी राख नाल्यात विसर्जित करा. आई आणि बाबा, कृपया मला माफ करा. मी तुमच्या अपेक्षा पूर्ण करू शकलो नाही.”

उत्तर प्रदेशातील औरैया जिल्ह्यातील रहिवासी असलेला मोहित कुमार प्रिया यादवसोबत दीर्घकाळापासून संबंधात होता, जिच्याशी नंतर त्याने लग्न केले. मोहितच्या कुटुंबीयांनी सांगितले की, प्रियाला बिहारच्या समस्तीपूरमध्ये प्राथमिक शिक्षिकेची नोकरी मिळेपर्यंत सर्व काही ठीक चालले होते. त्यानंतर, ती वेगळी वागू लागली आणि तिच्या आई आणि भावाच्या प्रभावाखाली मोहितला मानसिक त्रास देऊ लागली.

पोलिसांनी रेल्वे स्टेशन रोडवरील जॉली हॉटेलच्या खोली क्रमांक १०५ मधून मोहितचा मृतदेह ताब्यात घेतला. फॉरेन्सिक तपासणी केली आणि अहवाल तयार केला. शवविच्छेदनानंतर, मोहितचा मृतदेह त्याच्या कुटुंबाकडे सोपवण्यात आला, ते औरैया येथे अंत्यसंस्कारासाठी त्याचा मृतदेह घेऊन गेले.

The post पत्नी आणि सासरच्यांच्या छळाला कंटाळून इंजिनिअरची आत्महत्या, व्हिडिओ रेकॉर्ड केला आणि… appeared first on थोडक्यात घडामोडी.

नवी दिल्ली : देशात पेट्रोल आणि डिझेलच्या किमतींमध्ये आणखी वाढ होणार आहे. सोमवारी केंद्र सरकारने पेट्रोल आणि डिझेलवरील उत्पादन शुल्कात 2 रुपयांची वाढ केली आहे. ही वाढ मंगळवारपासून म्हणजेच 8 एप्रिल 2025 पासून लागू होणार आहे.

सध्याची स्थिती पाहता, पेट्रोलवरील उत्पादन शुल्क 19.90 रुपये प्रति लिटर आहे, तर डिझेलवरील उत्पादन शुल्क 15.80 रुपये प्रति लिटर आहे. 2014 मध्ये, पेट्रोलवर 9.48 रुपये आणि डिझेलवर 3.56 रुपये उत्पादन शुल्क होते. यानंतर हे शुल्क अनेक वेळा वाढवण्यात आले आहेत. विशेष म्हणजे, 2021 मध्ये पेट्रोलवरील उत्पादन शुल्क 27.90 रुपये आणि डिझेलवरील 21.80 रुपये प्रति लिटर झाले होते.

मे 2022 मध्ये, केंद्र सरकारने काही प्रमाणात दिलासा देत पेट्रोलच्या किमतीत 8 रुपये आणि डिझेलच्या किमतीत 6 रुपयांची कपात केली होती. त्यानंतर सध्याचे दर लागू झाले. सध्यातरी भारतात पेट्रोल आणि डिझेलच्या मूळ किंमती 32 रुपये प्रति लिटर आहेत, त्यावर 33 रुपये उत्पादन शुल्क आकारले जाते. या दरावर राज्य सरकारांनी आपापल्या व्हॅट आणि उपकराची अतिरिक्त रक्कम लावली आहे, ज्यामुळे पेट्रोल आणि डिझेलच्या किमती तीन पटींनी वाढतात.

सध्याच्या परिस्थितीवरून, नवीन उत्पादन शुल्क वाढीमुळे इंधनाच्या किमतींमध्ये आणखी वाढ होण्याची शक्यता आहे. त्यासोबतच, इंधनाच्या किमतींमध्ये होणारी ही वाढ नागरिकांसाठी आर्थिक ताण निर्माण करू शकते.

वर्तमान दर:

नवी दिल्ली: पेट्रोल – ₹94.72, डिझेल – ₹87.62

मुंबई: पेट्रोल – ₹104.21, डिझेल – ₹92.15

कोलकाता: पेट्रोल – ₹103.94, डिझेल – ₹90.76

चेन्नई: पेट्रोल – ₹100.75, डिझेल – ₹92.34

The post महागाईचे चटके! उद्यापासून पेट्रोल-डिझेल महागणार appeared first on थोडक्यात घडामोडी.

लखनौ : सौदी अरेबियाहून घरी परतणाऱ्या बिहारमधील एका व्यक्तीचा लखनऊ येथील चौधरी चरण सिंग आंतरराष्ट्रीय विमानतळ (CCISA) येथे एअर इंडियाच्या विमानात मृतदेह आढळला. मृत व्यक्तीचे नाव आशिफ दौल्ला अन्सारी (वय ५३) असून, तो उत्तर प्रदेशातील गोपाळगंज जिल्ह्यातील जलालपूर येथील रहिवासी होता.

आशिफ दौल्ला अन्सारी यांनी जेद्दाह (सौदी अरेबिया) येथून एअर इंडिया (AI 992) विमानाने उड्डाण केले होते. या विमानाने इंदिरा गांधी आंतरराष्ट्रीय विमानतळ (IGIA), नवी दिल्ली येथे ५:३१ वाजता लँडिंग केले. त्यानंतर, आशिफ AI 2485 या विमानाने लखनऊच्या CCSIA विमानतळासाठी मार्गस्थ झाले आणि सकाळी ८:११ वाजता लखनऊ येथे पोहोचले.

विमानाच्या लँडिंगच्या वेळी स्टुअर्ड मोहित अन्सारी यांच्या सीटवर फूड प्लेट आणि ड्रिंक कप घेण्यासाठी गेला. त्यावेळी त्याला आढळले की आशिफ अन्सारी सीट बेल्ट लावून बेशुद्ध अवस्थेत पडले होते आणि त्यांनी प्लेटला स्पर्श देखील केला नव्हता, ज्यामुळे असे दिसून आले की ते अनेक तासांपासून बेशुद्ध होते. सुदैवाने, विमानात इंडियन नॅशनल स्ट्रोक कॉन्फरन्स २०२५ मध्ये सहभागी होणारे दोन डॉक्टर होते. ते ताबडतोब अन्सारी यांची तपासणी करण्यासाठी गेले, परंतु त्यांना कळले की अन्सारी श्वास घेत नव्हते. CCSIA विमानतळाच्या वैद्यकीय पथकाने त्वरित अन्सारी यांना प्राथमिक उपचार दिले आणि ऍडव्हान्स लाईफ सपोर्ट ऍम्ब्युलन्सद्वारे खाजगी रुग्णालयात पाठवले, जिथे त्यांना मृत घोषित केले.

विमानतळाच्या प्रवक्त्याने सांगितले की, विमानतळाच्या वैद्यकीय पथकाने प्रथमोपचार प्रदान केले आणि अन्सारी यांना रुग्णालयात नेले. तथापि, त्यांचा मृत्यू झाला. विमानतळाच्या खाजगी रुग्णालयाशी वैद्यकीय मदतीचा करार असल्याची माहिती मिळाली. तथापि, गंभीर परिस्थिती लक्षात घेऊन, अन्सारी यांना खाजगी रुग्णालयात नेण्यात आले. एअरलाइनने या बाबतीत वैद्यकीय खर्च उचलला आहे.

विमानतळाचे अधिकारी म्हणाले की, “अन्सारी यांचे शवविच्छेदन त्याच्या कुटुंबियांच्या उपस्थितीत आणि संमतीनेच केले जाईल.”

The post लखनऊ विमानतळावर एअर इंडियाच्या विमानात आढळला प्रवाशाचा मृतदेह appeared first on थोडक्यात घडामोडी.

मुंबई : मुख्यमंत्री देवेंद्र फडणवीस यांनी बुधवारी विधानसभेत कायदा आणि सुव्यवस्थेची परिस्थिती आणि नागपूरमधील अलिकडच्या हिंसाचाराबद्दल विचारलेल्या प्रश्नांना उत्तरे दिली. प्रशासनाची भूमिका स्पष्ट करताना त्यांनी घटनेला जबाबदार असलेल्यांवर कठोर कारवाई करण्याचे आश्वासन दिले.

मुख्यमंत्री फडणवीस यांनी पुन्हा सांगितले की पोलिस आयुक्तांनी (सीपी) असे म्हटले आहे की चौकशी सुरू आहे आणि अद्याप कोणताही अंतिम निष्कर्ष निघाला नाही. “माझ्या आणि पोलिस आयुक्तांच्या विधानात कोणताही फरक नाही,” असे त्यांनी ठामपणे सांगितले. तसेच हिंसाचारात सहभागी असलेल्यांविरुद्ध कठोर भूमिका घेत फडणवीस म्हणाले, “ज्यांनी हल्ला केला आहे, आम्ही त्यांना कबरीतूनही बाहेर काढू आणि कारवाई करू.”

मुख्यमंत्री फडणवीस यांनी स्पष्ट केले कि, ज्यावरून वाद निर्माण झाला होता त्यावर कुराणातील कोणतेही पवित्र श्लोक किंवा आयात लिहिलेले नव्हते. ते म्हणाले की काही लोक खोट्या अफवा पसरवतात, आयात जाळल्याच्या अफवा पसरवण्यात आल्या, ज्यामुळे परिस्थिती आणखी बिकट झाली. पोलिसांनी या प्रकरणाची सखोल चौकशी केली आहे आणि खोट्या बातम्यांमुळे हिंसाचार भडकल्याचे आढळून आले आहे. पोलिस आयुक्त अमितेश सिंघल आणि त्यांनी दिलेली माहिती सारखीच होती. या मुद्द्यावर पोलिस आणि सरकारमध्ये कोणतेही मतभेद नाहीत.

कायदा आणि सुव्यवस्था राखण्यात येणाऱ्या आव्हानांची कबुली देत ​​मुख्यमंत्री म्हणाले, “कायदा आणि सुव्यवस्था राखण्यात अनेक आव्हाने आहेत, परंतु आम्ही त्यांचा सामना करण्यासाठी पूर्णपणे वचनबद्ध आहोत.”

‘नागपूर शांत आहे, १९९२ पासून दंगल नाही’
नागपूर अनेक दशकांपासून शांत आहे यावर भर देत मुख्यमंत्री म्हणाले, “१९९२ पासून नागपुरात जातीय दंगली झालेल्या नाहीत. यावेळी काही लोकांनी जाणूनबुजून हिंसाचार भडकवण्याचा प्रयत्न केला.”

खोट्या अफवा पसरवणाऱ्या आणि हिंसाचार भडकवणाऱ्यांवर कठोर कारवाई केली जाईल असे आश्वासन सरकारने दिले आहे. दरम्यान, चौकशी सुरू असताना नागपूर शांत आहे.

The post नागपूर हिंसाचार प्रकरणी मुख्यमंत्र्यांचे कठोर कारवाईचे आश्वासन, म्हणाले, ‘त्यांना’ कबरीतूनही बाहेर काढू… appeared first on थोडक्यात घडामोडी.