रायपूर : रोड सेफ्टी वर्ल्ड सीरीजच्या अंतिम सामन्यात इंडिया लेजेंड्स ने श्रीलंका लेजेंड्सचा १४ धावांनी पराभव केला. सचिन तेंडुलकरच्या नेतृत्वाखाली भारताने पहिल्या रोड सेफ्टी वर्ल्ड सीरीजचे विजेतेपद मिळवले. भारताने प्रथम फलंदाजी करत १८१ धावा केल्या होत्या. या धावसंख्येचा पाठलाग करताना श्रीलंकेला १६७ धावा करता आल्या.

अंतिम सामन्यात श्रीलंकेच्या संघाने नाणेफेक जिंकून प्रथम गोलंदाजी करण्याचा निर्णय घेतला. भारताच्या डावाची सुरूवात विरेंद्र सेहवाग आणि सचिन तेंडुलकर यांनी केली. सेहवाग १० धावा करून बॅड झाला. त्यानंतर सनथ जयसूर्याने बद्रीनाथची विकेट घेत भारताला दुसरा धक्का दिला. भारताची २ बाद ३५ अशी अवस्था झाली. त्यानंतर सचिन ३० धावा करुन माघारी परतला. नंतर युसूफ पठाणने युवराज सिंगसह श्रीलंकेच्या गोलंदाजांची धुलाई केली. युवराजने ३५ चेंडूत ३ षटकार आणि ४ चौकारांसह ५० धावा केल्या. या दोघांनी चौथ्या विकेटसाठी ९५ धावांची भागिदारी केली. त्यानंतर युवराज ६० धावांवर बाद झाला. युसूफ पठाणने ६२ धावा केल्या. तर इरफानने ३ चेंडूत ८ धावा केल्या.

विजयासाठी १८२ धावांचे लक्ष्य घेऊन मैदानात उतरलेल्या श्रीलंकेने चांगली सुरूवात केली. तिलकरत्ने आणि जयसूर्या यांनी पहिल्या विकेटसाठी ६२ धावांची भागिदारी केली. युसूफने तिलकरत्नेला २१ धावांवर बाद केले. त्यानंतर दिलशान 21 धावांवर बाद झाला आणि त्यानंतर चमारा सिल्वा अवघ्या दोन धावांवर पॅव्हेलियनमध्ये परतला. त्यानंतर इरफानने जयसूर्यला ४३ धावांवर बाद केले. उपुल थरंगाने संघासाठी 13 धावांचे योगदान दिले. जयसिंगाने 39 धावा केल्या तर नुवान कुलशेखरा एक धाव घेऊन नाबाद राहिला. भारतीय गोलंदाजांनी शानदार गोलंदाजी करत भारताला १४ धावांनी विजय मिळवून दिला. युसूफ पठाण आणि इरफान पठाण यांनी प्रत्येकी २ विकेट तर गोनी आणि पटेल यांनी प्रत्येकी एक विकेट घेतली.

The post सचिन तेंडुलकरच्या नेतृत्वात भारताने जिंकली पहिली रोड सेफ्टी वर्ल्ड सीरिज appeared first on थोडक्यात घडामोडी.

नवी दिल्ली : सचिन तेंडुलकर आणि वीरेंद्र सेहवाग ही सलामीवीर जोडी खूप दिवसानंतर पुन्हा मैदानात दिसणार आहेत. रोड सेफ्टी वर्ल्ड सीरिजच्या पहिल्या सामन्यात भारताकडून हे दोघे डावाची सुरुवात करतील. 5 मार्च ते 21 मार्च या कालावधीत खेळल्या जाणाऱ्या या सीरिजमध्ये एकूण 6 संघ सहभाग घेत आहेत. छत्तीसगडची राजधानी रायपूरमध्ये ही सीरिज खेळवली जाणार आहे.

रोड सेफ्टी वर्ल्ड सिरीज आजपासून सुरू होणार आहे. या सीरिजच्या पहिल्या सामन्यात भारताचा सामना बांग्लादेश संघाशी होईल. ही बहुप्रतिक्षित सीरिज रायपुरमधील शहीद वीरनारायण स्टेडियमवर सुरू होणार आहे. राज्याचे मुख्यमंत्री भूपेश बघेल या  सीरिजचा शुभारंभ करणार आहेत.

या सीरिजमध्ये केवळ क्रिकेटमधून निवृत्ती घेतलेल्या दिग्गजांचा समावेश असतो. अलीकडेच भारताचा अष्टपैलू युसुफ पठाण, वेगवान गोलंदाज आर. विनय कुमार आणि यष्टीरक्षक नमन ओझा यांनी आंतरराष्ट्रीय क्रिकेटला निरोप दिला आहे. ते सर्व या मालिकेत खेळताना दिसतील. भारताचे प्रमुख खेळाडू सचिन तेंडुलकर, वीरेंद्र सेहवाग, इरफान पठाण, युवराज सिंग अशी मोठी नावे देखील यात आहेत.

वेस्ट इंडिजचा ब्रायन लारा, दक्षिण आफ्रिकेचा जॉन्टी रोड्स, इंग्लंडचा केविन पीटरसन आणि बांग्लादेशचा मोहम्मद नाझीमुद्दीन या जगभरातील अन्य मोठ्या खेळाडूंचा देखील यात सहभाग आहे. या मालिकेत भारत, बांगलादेश, श्रीलंका, दक्षिण आफ्रिका आणि इंग्लंड सहभागी होतील. आज संध्याकाळी पहिल्या सामन्यात भारत आणि बांग्लादेश हे संघ खेळणार आहेत. मालिकेचा उपांत्य सामना 17 आणि 19 मार्च रोजी खेळला जाईल. आणि 21 मार्चला फायनल सामना खेळवला जाईल.

The post सचिन तेंडुलकर आणि वीरेंद्र सेहवाग ही ओपनिंग जोडी आज मैदानात उतरणार, ‘या’ संघाबरोबर होणार सामना appeared first on थोडक्यात घडामोडी.