मुंबई : रायगड जिल्ह्यातील खोपोलीजवळ मुंबई-पुणे एक्सप्रेसवेवर शुक्रवारी कार आणि ट्रकचा भीषण अपघात झाला. कारने ट्रकला मागून धडक दिल्याने हा अपघात झाला, या अपघातात पाच जण ठार तर चार जण जखमी झाले. गुरुवारी मध्यरात्रीच्या सुमारास ढेकू गावाजवळ हा अपघात झाला. सर्व मृत पुरुष असून चार जखमींपैकी एक महिला असल्याची माहिती मिळाली आहे.

मिळालेल्या माहितीनुसार, पुण्याहून मुंबईकडे जात असताना रात्री 12 च्या सुमारास कार ट्रकला मागून धडकली. सर्व 9 जण एर्टिगामध्ये प्रवास करत असताना हा अपघात झाला. या अपघातात चार जणांचा जागीच मृत्यू झाला, तर अन्य एकाचा रुग्णालयात नेत असताना मृत्यू झाला. कार चालकाचे नियंत्रण सुटल्याने कार ट्रकला धडकली, असे प्राथमिक तपासात समोर आले आहे. चालकावर गुन्हा दाखल करण्यात आला असून पुढील तपास सुरू असल्याचे पोलिसांनी सांगितले.

The post मुंबई-पुणे एक्सप्रेसवेवर भीषण अपघात, पाच जणांचा मृत्यू तर चार जण जखमी appeared first on थोडक्यात घडामोडी.

नंदुरबार जिल्ह्यातील खामचौंदर गावाजवळ प्रवाशांनी भरलेली बस दरीत कोसळल्याने घडलेल्या भीषण अपघातात पाच जणांचा मृत्यू झाला, तर ३५ प्रवासी जखमी झाले आहेत. बचावकार्य युद्ध पातळीवर काम करत असून जखमींना तातडीने रुग्णालयात दाखल करण्यात आलं आहे.

सुरत राष्ट्रीय महामार्ग क्रमांक ०६ वर नवापुर तालुक्यातील कोंडाईबारी घाटात खासगी बस पुलावरुन दरीत कोसळल्याने हा भीषण अपघात झाला आहे. घाटातील दर्ग्याजवळ असणाऱ्या पुलावर रात्री तीन वाजेच्या सुमारास बस दरीत कोसळल्याने परिसरात मोठा आवाज झाला होता. हे सर्व प्रवासी ‘अंकल ट्रॅव्हल्स’च्या खासगी बसने जळगावहुन सुरतच्या दिशेने प्रवास करत होते. जवळपास ४० पेक्षा अधिक प्रवासी या बसमध्ये होते.

घटनेची माहीती मिळताच पोलीस घटनास्थळी दाखल झाले. स्थानिक ग्रामस्थांच्या मदतीने पोलिसांनी मदतकार्य राबवत जखमींना उपचारासाठी विसरवाडी ग्रामीण रुग्णालायत दाखल केले. या अपघातात पाच जणांचा मृत्यू झाला आहे. तर, ३५ जण जखमी झाल्याची प्राथमिक माहिती हाती आली आहे. या अपघातातील गंभीर जखमींची संख्या अधिक असल्याने पोलिसांनी विसरवाडीहुन खासगी गाड्यांनी या जखमींना जिल्हा शासकीय रुग्णालयात उपचारासाठी हलवले.

The post नंदुरबारमध्ये बस दरीत कोसळून भीषण अपघात, पाच ठार, ३५ जखमी appeared first on थोडक्यात घडामोडी.