पालघर : वसई औद्योगिक परिसरात एक धक्कादायक खून प्रकरण उघडकीस आले आहे. वैयक्तिक वादातून एका तरुणाने आपल्या ऑफिसमधील सहकाऱ्याची हत्या करून मृतदेह कंपनीच्या आवारातील पाण्याच्या टाकीत फेकून दिल्याची घटना सोमवारी घडली. या प्रकरणात पोलिसांनी काही तासांतच आरोपीला अटक केली आहे.

पोलिसांनी दिलेल्या माहितीनुसार, अटक करण्यात आलेल्या आरोपीचे नाव २७ वर्षीय आसाराम राकेश असून मृताचे नाव राकेश सिंग आहे. दोघेही वसईतील एका औद्योगिक क्षेत्रात असलेल्या खासगी कंपनीत एकत्र काम करत होते.

प्राथमिक तपासात असे समोर आले आहे की, आरोपी आणि मृत यांच्यात कोणत्यातरी वैयक्तिक कारणावरून वाद झाला होता. हा वाद इतका तीव्र झाला की रागाच्या भरात आसारामने राकेश सिंग यांच्यावर लोखंडी रॉडने हल्ला केला. या हल्ल्यात राकेश सिंग यांचा जागीच मृत्यू झाला.

घटनेनंतर गुन्ह्याचे पुरावे लपवण्याच्या उद्देशाने आरोपीने मृतदेह कंपनीच्या आवारातील पाण्याच्या टाकीत फेकून दिला. मात्र, कंपनीतील इतर कर्मचाऱ्यांना संशयास्पद हालचाली आढळून आल्याने त्यांनी तत्काळ मृताच्या कुटुंबीयांना आणि पोलिसांना माहिती दिली.

पोलिसांनी घटनास्थळी धाव घेऊन पाण्याच्या टाकीतून मृतदेह बाहेर काढला आणि शवविच्छेदनासाठी पाठवला. एका वरिष्ठ पोलिस अधिकाऱ्यांनी सांगितले की, माहिती मिळताच तातडीने तपास सुरू करण्यात आला आणि काही तासांतच आरोपीला ताब्यात घेण्यात आले. चौकशीदरम्यान आरोपीने गुन्ह्याची कबुली दिली आहे.

या प्रकरणी पोलिसांनी भारतीय दंड संहितेच्या (IPC) कलम १०३ अंतर्गत गुन्हा दाखल केला असून पुढील तपास सुरू आहे. वादाचे नेमके कारण काय होते, तसेच या घटनेत आणखी कोणी सहभागी होते का, याचाही सखोल तपास केला जात आहे. कंपनी व्यवस्थापन आणि इतर कर्मचाऱ्यांचीही चौकशी पोलिसांकडून सुरू आहे.

The post पालघर हादरले! किरकोळ वादातून ऑफिसमधील सहकाऱ्याची हत्या, मृतदेह पाण्याच्या टाकीत फेकला… appeared first on थोडक्यात घडामोडी.

मुंबई : शुक्रवारी मुंबईत झालेल्या मायक्रोसॉफ्ट एआय टूर २०२५ दरम्यान, मायक्रोसॉफ्टचे सीईओ आणि अध्यक्ष सत्य नाडेला यांनी महाक्राइमओएस एआयच्या राज्यव्यापी अंमलबजावणीची घोषणा केली. या एआय-संचालित तपास प्लॅटफॉर्मला आता महाराष्ट्रातील सर्व १,१०० पोलिस ठाण्यांमध्ये तैनात केले जाईल, ज्यामुळे सायबर गुन्ह्यांच्या प्रकरणांचे जलद आणि अधिक प्रभावी निराकरण शक्य होणार आहे.

नडेला यांनी आपल्या भाषणात सांगितले की, “एआय आणि डिजिटल सार्वजनिक पायाभूत सुविधांवरील काम आता प्रत्यक्ष परिणाम देत आहे. महाक्राइमओएस एआय नागपूरमध्ये आधीच कार्यरत असून, पोलिस अधिकारी आता काही मिनिटांत सायबर गुन्ह्यांचे प्रकरण नोंदवू शकतात. पूर्वी मॅन्युअल प्रक्रियेमुळे महिने लागू शकत होती, परंतु आता एआयच्या मदतीने तपास गतीने पार पडतात.”

मुंबईतील सत्रात नडेला म्हणाले, “तंत्रज्ञान म्हणजे लोकांना सक्षम करणे. आमच्यासाठी तंत्रज्ञानाचा अर्थ नेहमीच लोक आणि संस्थांना नवीन क्षितिजे गाठण्यास सक्षम करणे असा आहे. हे आपल्याला नव्या संधी शोधण्यास आणि आपल्या कामाच्या क्षमतेची पुनर्कल्पना करण्यास मदत करते.”

या घोषणा महाराष्ट्रातील पोलिस तपास प्रक्रियेत मोठ्या प्रमाणात सुधारणा घडवून आणणार असल्याचे अपेक्षित आहे, विशेषतः सायबर गुन्ह्यांच्या त्वरित निवारणात.

The post महाराष्ट्रातील सर्व ११०० पोलिस ठाण्यांमध्ये लागू केले जाणार महाक्राइमओएस एआय appeared first on थोडक्यात घडामोडी.

जालना : एका पत्नीने दिरासोबत मिळून पतीची निर्घृण हत्या केल्याचे समोर आले आहे. सुमारे एक महिन्यापासून बेपत्ता असलेल्या 30 वर्षीय परमेश्वर तायडे यांच्या मृत्यूचा उलगडा पोलिसांनी केला आहे. या प्रकरणी परमेश्वर तायडे यांचा भाऊ ध्यानेश्वर तायडे (28) आणि पत्नी मनीषा तायडे (25) आणि यांना अटक करण्यात आली आहे. जालना जिल्ह्यातील बदनापूर तालुक्यामधील सोमठाणा गावात हे धक्कादायक खून प्रकरण उघडकीस आले आहे.

परमेश्वर तायडे एक महिन्यापूर्वी रहस्यमयरीत्या बेपत्ता झाले होते. त्यांच्या पत्नीने याबाबत पोलिसांकडे तक्रार दाखल करून शोध सुरू असल्याचे भासवले. मात्र बुधवारी गावातील तलावात अज्ञात मृतदेह आढळल्यानंतर पोलिसांनी तपासाची दिशा बदलली. चौकशीदरम्यान कुटुंबीयांचे जबाब एकमेकांशी जुळत नसल्याने पोलिसांचा संशय अधिक बळावला. तपास पुढे जात असताना मनीषा आणि तिचा दिर ध्यानेश्वर यांचे अवैध संबंध असल्याचे उघडकीस आले. परमेश्वर यांनी या संबंधांना विरोध केला होता, ज्यामुळे खूनाचा कट रचल्याचे पोलिसांना आढळले.

पोलिसांनी दिलेल्या माहितीनुसार, 15 ऑक्टोबरच्या रात्री परमेश्वर तायडे झोपलेले असताना ध्यानेश्वरने परमेश्वरवर दगडाने हल्ला केला, तर मनीषाने त्याचा गळा दाबून हत्या केली. गुन्हा लपवण्यासाठी दोघांनी मृतदेह पॉलिथीनमध्ये गुंडाळला, त्याला दगड बांधले आणि जवळच्या जलाशयात फेकून दिला. महिनाभरानंतर मृतदेह पाण्यावर आल्यानंतर या भयंकर प्रकरणाचा उलगडा झाला.

शवविच्छेदनात परमेश्वर यांची हत्या झाल्याची पुष्टी झाल्यानंतर पोलिसांनी दोघांना ताब्यात घेतले. चौकशीत त्यांनी गुन्ह्याची कबुली दिल्याची माहिती मिळाली आहे. पोलिस या प्रकरणाचा सर्वंकष तपास करत असून आणखी कोणाचा यात सहभाग आहे का, याचाही शोध घेतला जात आहे.

परमेश्वर तायडे यांच्या मृत्यूनंतर त्यांच्या दोन लहान मुलांसह वडिलांवर दु:खाचा डोंगर कोसळला आहे. सोमठाणा गावात या घटनेने मोठी खळबळ उडाली असून ग्रामस्थांकडून संताप व्यक्त केला जात आहे.

The post अनैतिक संबंधातून पत्नी आणि भावाने केला तरुणाचा खून, पोलीस तपासात धक्कादायक खुलासा… appeared first on थोडक्यात घडामोडी.

पुणे : शहर हादरवून टाकणाऱ्या नकुल भोईर हत्येच्या प्रकरणात नवा धक्कादायक खुलासा झाला आहे. पोलिस तपासात उघड झाले आहे की नकुल भोईरची हत्या ही त्याची पत्नी चैताली भोईर आणि तिचा प्रियकर सिद्धार्थ दीपक पवार (वय २१) यांनी एकत्रितपणे नियोजित करून केली होती.

चिंचवड पोलिसांनी सिद्धार्थ पवारला अटक केली असून, या प्रकरणाचा तपास अधिक गतीने सुरू आहे. यापूर्वी असे समजले जात होते की चैतालीनेच एकट्याने आपल्या पतीचा खून केला होता. मात्र, सखोल चौकशीत दोघांनी मिळून हा कट रचल्याचे पोलिसांच्या तपासात स्पष्ट झाले आहे.

ही घटना गेल्या शुक्रवारी घडली असून, सोशल मीडियावर या प्रकरणाने मोठे लक्ष वेधले होते. अनेकांनी या घटनेबद्दल संताप व धक्का व्यक्त केला होता. हत्येनंतर तात्काळ चैतालीला अटक करण्यात आली होती.

पोलिस चौकशीदरम्यान तिच्या जबाबात विसंगती आढळून आली, ज्यामुळे तपास अधिकाऱ्यांना संशय आला. पुढील चौकशीत तिने अखेर कबुली दिली की तिने आणि सिद्धार्थ पवारने मिळून पती नकुल भोईरच्या हत्येची योजना आखली व ती अंमलात आणली.

चैतालीच्या कबुलीजबाबानंतर सिद्धार्थ पवारला पोलिसांनी अटक केली आहे. सध्या चिंचवड पोलीस हत्येचा हेतू, नियोजनाचा क्रम आणि घटनाक्रमाची पुनर्रचना करण्याचे काम करत आहेत. अधिकाऱ्यांनी सांगितले की, तपास पुढे सरकत असून लवकरच या प्रकरणातील आणखी महत्त्वाचे तपशील उघड केले जातील.

The post नकुल भोईर हत्या प्रकरणात धक्कादायक खुलासा, पत्नी व तिच्या प्रियकराने रचला खूनाचा कट appeared first on थोडक्यात घडामोडी.

रायगड : रायगड जिल्ह्यातील नागोठणे परिसरात सोशल मीडियावर सुरू झालेल्या प्रेमसंबंधातून उद्भवलेल्या एका थरकाप उडवणाऱ्या खून प्रकरणाने संपूर्ण जिल्हा हादरला आहे. पत्नीनेच आपल्या प्रियकर आणि मैत्रिणीच्या मदतीने पतीचा काटा काढल्याचे समोर आले असून पोलिसांनी केवळ २४ तासांत गुन्ह्याची उकल केली आहे.

मृत व्यक्तीचे नाव कृष्णा नामदेव खंडवी (वय 23, रा. गौळवाडी, पाबळ, पेण) असे आहे. त्याचा खून त्याची पत्नी दिपाली अशोक निरगुडे (19) हिने आपल्या प्रियकर उमेश सदु महाकाळ (21) आणि मैत्रीण सुप्रिया चौधरी (19) यांच्या मदतीने केला. या तिघांना नागोठणे पोलिसांनी अटक केली आहे.

मिळालेल्या माहितीनुसार, दिपालीचे पती कृष्णाशी संबंध ताणलेले होते. त्यातच काही महिन्यांपूर्वी तिची ओळख सोशल मीडियावर उमेश महाकाळ या तरुणाशी झाली. हळूहळू दोघांचे ‘इंस्टाग्राम प्रेम’ वाढत गेले आणि त्यांनी कृष्णाला संपवण्याचा कट रचला.

यासाठी त्यांनी “वारगुडे” या नावाने बनावट इंस्टाग्राम खाते तयार केले. या खात्यामार्फत कृष्णाशी संवाद साधून त्याला “मैत्रिणी”च्या नावाखाली जाळ्यात ओढण्यात आले. १० ऑक्टोबर रोजी आरोपींनी कृष्णाला नागोठणे एस.टी. स्टँडवर बोलावले. त्यानंतर त्याचे अपहरण करून वासगावच्या जंगलात नेण्यात आले. तिथे ओढणीने गळा आवळून त्याचा खून करण्यात आला. खूनानंतर ओळख पटू नये म्हणून आरोपींनी त्याच्या चेहऱ्यावर आणि शरीरावर केमिकल टाकले तसेच मोबाईल फोडून पाली रोडलगत फेकून दिला.

तांत्रिक तपासातून आरोपी पोलिसांच्या जाळ्यात
सुरुवातीला हे प्रकरण बेपत्ता म्हणून नोंदवण्यात आले होते. मात्र, नागोठणे पोलिसांनी सीसीटीव्ही फुटेज, कॉल डिटेल्स आणि मोबाईल लोकेशन यांच्या आधारे तपासाची दिशा बदलली. तांत्रिक तपासाच्या मदतीने पोलिस आरोपींपर्यंत पोहोचले आणि अखेर तिघेही जाळ्यात अडकले.

आरोपी पत्नीची कबुली
पोलिस चौकशीत आरोपी दिपालीने गुन्ह्याची कबुली दिली आहे. पतीकडून त्रास होत असल्याची भावना तिच्या मनात निर्माण झाली होती. त्यामुळे तिने प्रियकर उमेशच्या मदतीने पतीला संपवण्याची योजना आखली होती. या कटात तिची मैत्रीण सुप्रिया देखील सहभागी होती.

पोलिसांची जलद कारवाई
ही कारवाई पोलीस अधीक्षक आंचल दलाल, अपर पोलीस अधीक्षक अभिजित शिवथरे, आणि उपविभागीय अधिकारी प्रसाद गोकुळे यांच्या मार्गदर्शनाखाली सहायक पोलीस निरीक्षक सचिन कुलकर्णी यांच्या पथकाने केली. गुन्ह्याचा तपास अत्यंत व्यावसायिक आणि वेगाने केल्याने नागोठणे पोलिस ठाण्याचे सर्वत्र कौतुक होत आहे.

पोलिसांचा नागरिकांना इशारा
“सोशल मीडियावर अपरिचित व्यक्तींशी संवाद साधताना सावध राहा. कोणतीही संशयास्पद माहिती किंवा हालचाल दिसल्यास त्वरित जवळच्या पोलीस ठाण्याशी संपर्क साधा,” असे आवाहन रायगड पोलिसांकडून करण्यात आले आहे.

The post सोशल मीडियावर सुरू झालेल्या प्रेमाचा रक्तरंजित शेवट! पत्नीने प्रियकर आणि मैत्रिणीसह केली पतीची निर्घृण हत्या, आणि… appeared first on थोडक्यात घडामोडी.

हरियाणा : हरियाणाच्या रोहतक जिल्ह्यात काँग्रेस पार्टीच्या नेत्या हिमानी नरवाल यांच्या हत्येच्या प्रकरणात एक आरोपी सचिन कानोडा याला अटक करण्यात आली आहे. आरोपीने गुन्हा कबूल केला असून, त्याने सांगितले की हिमानीने त्याच्यासोबत शारीरिक संबंध ठेवलेले व्हिडीओ बनवून त्याला ब्लॅकमेल केले आणि त्याच्यावर पैशांची मागणी केली. त्यानंतर, त्याने सततच्या ब्लॅकमेलिंगला कंटाळून हिमानीची हत्या केली.

सचिन आणि हिमानी यांची मैत्री एक वर्षापूर्वी सोशल मीडियावर झाली होती. सचिनने पोलिसांना दिलेल्या आपल्या जबाबात म्हटले की, हिमानीने त्याला तिच्या घरी बोलावले, तिथे दोघांनी शारीरिक संबंध ठेवले. मात्र, हिमानीने या सर्वाचा व्हिडीओ तयार केला आणि त्याच व्हिडीओच्या आधारे ती सचिनला ब्लॅकमेल करू लागली. सचिनकडून लाखो रुपये वसूल केल्यानंतरही ब्लॅकमेलिंग सुरूच होते. हिमानीने आणखी पैसे मागितल्यामुळे सचिनने अखेर तिची हत्या केली.

हत्या आणि मृतदेहाची विल्हेवाट:
हिमानीने सचिनला आणखी पैसे मागण्यासाठी घरी बोलावलं. सचिनने तिला समजवण्याचा प्रयत्न केला, पण ती अजूनही पैशांची मागणी करत होती. त्यानंतर, सचिनने मोबाइल चार्जरच्या तारेने हिमानीचा गळा दाबून तिची हत्या केली. हत्या केल्यानंतर, तो तिचा मृतदेह घरी तसाच सोडून आपल्या दुकानात गेला. नंतर सचिन हिमानीच्या मृतदेहाची विल्हेवाट लावण्यासाठी पुन्हा तिच्या घरी परतला, मृतदेह सुटकेसमध्ये भरला आणि रिक्षाने, नंतर बसने मृतदेह सांपला स्टँडपर्यंत आणला. तिथे सुटकेस सोडून तो पळून गेला. काही तासांनी पोलिसांना एका बेवारस सुटकेसबद्दल माहिती मिळाली, ज्यात हिमानीचा मृतदेह आढळला.

धक्कादायक! काँग्रेस कार्यकर्त्या हिमानी नरवाल यांचा मृतदेह सूटकेसमध्ये आढळला, पक्षाकडून उच्चस्तरीय चौकशीची मागणी

दरम्यान, पोलिसांनी तात्काळ तपास सुरू केला आणि आरोपी सचिनला अटक केली. सचिनने गुन्हा कबूल केला आहे, परंतु पोलिसांनी अजून अधिकृतपणे काहीही सांगितलेलं नाही. तपास सुरू असून, अधिक धक्कादायक पुरावे समोर येण्याची शक्यता आहे. सचिनच्या वैयक्तिक जीवनाबद्दल देखील माहिती समोर आली आहे. तो विवाहित असून त्याला दोन मुले आहेत. या प्रकरणामुळे हरियाणामधील राजकीय वातावरण तापले आहे. हिमानीच्या कुटुंबीयांनी आरोपीला फाशीची शिक्षा देण्याची मागणी केली आहे.

The post हिमानी नरवाल हत्येचे गूढ उकलले, आरोपीचा धक्कादायक खुलासा, हिमानी शारीरिक संबंधाचा व्हिडीओ बनवून करत होती ब्लॅकमेल, अखेर… appeared first on थोडक्यात घडामोडी.

बीड : बीड जिल्ह्यातील मस्साजोग येथील सरपंच संतोष देशमुख हत्याप्रकरणी ‘सीआयडी’ने बीडच्या विशेष मकोका न्यायालयात आरोपपत्र दाखल केले. यामध्ये देशमुख यांच्या हत्येचा वाल्मीक कराडच सूत्रधार होता व अवादा कंपनीला खंडणी मागितल्याच्या प्रकरणातून देशमुख यांचा खून झाल्याचे तपासात उघड झाल्याचे म्हटले आहे. संतोष देशमुख यांची नऊ डिसेंबर रोजी हत्या करण्यात आली होती. या प्रकरणाचा ‘सीआयडी’द्वारे तपास करण्यात आला. ‘सीआयडी’ने तपास पूर्ण करून, बीडच्या विशेष मकोका न्यायालयात गुरुवारी आरोपपत्र दाखल केले होते. या आरोपपत्रात अनेक धक्कादायक खुलासे समोर आले आहेत.

बीडचे सरपंच संतोष देशमुख यांच्या हत्येमध्ये मंत्री धनंजय मुंडे यांचे जवळचे सहकारी वाल्मिक कराड यांच्या भूमिकेचे पुरावे चार्जशीटमध्ये दिले आहेत आणि इतर सात आरोपींनी ही हत्या कशी घडवली याचे तपशीलवार वर्णन केले आहे. राज्य गुन्हे अन्वेषण विभागाच्या (सीआयडी) विशेष तपास पथकाने (एसआयटी) बीड येथील विशेष महाराष्ट्र संघटित गुन्हेगारी नियंत्रण कायदा (मकोका) न्यायालयात सादर केलेल्या १४०० पानांच्या आरोपपत्रात तपशीलवार वर्णन करण्यात आले आहे. आरोपपत्रानुसार कराडला आरोपी क्रमांक एक म्हणून दाखवण्यात आले आहे तर दुसरा आरोपी सुदर्शन घुले यांना टोळीचा प्रमुख म्हणून संबोधण्यात आले आहे. आरोपपत्रात प्रत्येक आरोपीने बजावलेल्या भूमिकांचे वर्णन केले आहे आणि कराड आणि आरोपी विष्णू चाटे यांनी केलेल्या खंडणीच्या प्रयत्नावर प्रकाश टाकला आहे, जो थेट हत्येशी संबंधित आहे.

बीड पोलिसांनी अत्याचार, खंडणी आणि खून असे तीन गुन्हे दाखल केले होते, परंतु सीआयडी-एसआयटीने अंतिम आरोपपत्रात हे सर्व प्रकरण एकत्रित केले आहेत. अधिकाऱ्यांनी १८० साक्षीदारांची तपासणी केली. कराडने केलेल्या २ कोटी रुपयांच्या खंडणी मागणीशी संबंधित सीसीटीव्ही फुटेज आणि कराड आणि इतर आरोपींनी अवदा कंपनीच्या अधिकाऱ्यांसमोर पैशाची मागणी केली होती या दाव्याला समर्थन देण्यासाठी तपासकर्त्यांनी गोळा केलेले आवाजाचे नमुने या आरोपपत्रात आहेत. एसआयटी प्रमुख बसवराज तेली यांनी आरोपपत्रासोबत पुरावा म्हणून फॉरेन्सिक प्रयोगशाळेने तपासलेले आणि प्रमाणित केलेले डिजिटल पुरावे सादर केले आहेत.

विष्णू चाटेला आरोपी म्हणून सूचीबद्ध केले आहे, ज्यामध्ये कराडने २९ नोव्हेंबर २०२४ रोजी अवदा पवन ऊर्जा अधिकाऱ्याला त्यांच्या नंबरवरून खंडणीची मागणी करणारा मोबाइल कॉल केला होता. “ते काम थांबवा. ते ताबडतोब करा, अन्यथा गंभीर परिणाम होतील. जर तुम्ही पुन्हा काम सुरू केले तर लक्षात ठेवा,” असे मोबाइल कॉल रेकॉर्डमध्ये म्हटले आहे. नंतर, २ कोटी रुपयांची मागणी करण्यात आली. सीआयडी-एसआयटीने आरोपपत्रात मेमरी कार्डच्या स्वरूपात सर्व आरोपींचे आवाजाचे नमुने सूचीबद्ध केले आहेत. तथापि, तपास यंत्रणेने चाटेचा फोन नष्ट केल्याचे मान्य केले आहे. तथापि, देशमुखवर हल्ला होत असताना सुदर्शन घुले हसताना दिसत आहे आणि त्याचा व्हिडिओ पुरावा म्हणून सादर करण्यात आला आहे.

कराडला अटक केल्यानंतर, तपासकर्त्यांनी हलक्या निळ्या रंगाचा आयफोन आणि दोन सोनेरी रंगाचे मोबाईल हँडसेट जप्त केले आहेत. इतर आरोपींशी त्याचे संभाषण आणि आवाजाचे नमुने सादर केले आहेत. देशमुखच्या हत्येसाठी वापरलेली शस्त्रे, आरोपींनी वापरलेले काळे वाहन, रक्ताने माखलेले पाईप, गाडीत सापडलेले टी-शर्ट, गुगल, एटीएम कार्ड, आरटीओ कार्ड आणि आरोपींकडून जप्त केलेल्या इतर वस्तूंचा आरोपपत्रात उल्लेख आहे.

कराड हा हत्येच्या कटाचा सूत्रधार आहे. सुदर्शन आणि त्याचा साथीदार गेल्या दहा वर्षांपासून धाराशिवमधील केज, अंबाजोगाई आणि कळंब येथे संघटित गुन्ह्यांमध्ये सहभागी आहेत आणि ११ गुन्हेगारी प्रकरणांमध्ये सहभागी होते, असे आरोपपत्रात म्हटले आहे. त्यात असेही म्हटले आहे की ८ ऑक्टोबर २०२४ रोजी भूसंपादन अधिकारी शिवाजी थोपटे यांनी कराडची त्याच्या परळी कार्यालयात भेट घेतली. त्यावेळी चाटे उपस्थित होता. कराडने थोपटे यांना धमकी दिली की, “जर तुम्हाला या क्षेत्रात कंपनी चालवायची असेल तर २ कोटी रुपये द्या अन्यथा अवादा पवन ऊर्जा संपूर्ण जिल्ह्यात काम करू दिली जाणार नाही”. या धमकीत भर घालत, २९ नोव्हेंबर रोजी सुदर्शन घुलेने अवादा कंपनीला धमकी दिली की, त्यांनी “वाल्मिक अण्णा” ची मागणी पूर्ण करावी अन्यथा प्लांट बंद करावा आणि अधिकाऱ्याला कराडला भेटण्यास सांगितले.

२९ नोव्हेंबर रोजी दुपारी कराड, चाटे, सुदर्शन, प्रतीक घुले, सुधीर सांगळे आणि कृष्णा आंधळे यांनी केत येथील चाटेच्या कार्यालयात भेट घेतली आणि अवादा पवन ऊर्जा कंपनीकडून खंडणीची रक्कम वसूल करण्याचा कट रचला. ६ डिसेंबर २०२४ रोजी सुदर्शन, प्रतीक आणि सांगळे यांनी अवादा पवन ऊर्जा कंपनीच्या कारखान्यात घुसून सुरक्षा रक्षकावर शारीरिक हल्ला केला आणि जातीवाचक शिवीगाळ केली, असे त्यात म्हटले आहे. २ कोटी रुपये न दिल्याबद्दल धमकी दिल्यानंतर थोपटे यांना मारहाण करण्यात आली. कंपनीच्या अधिकाऱ्यांनी सरपंच संतोष देशमुख यांना फोनवरून घटनेची माहिती दिली. घुले आणि त्यांच्या सहकाऱ्यांना विनंती केली की, “कृपया कंपनी बंद करू नका. लोकांना रोजगार मिळू द्या.” त्यावेळी चाटेने देशमुख यांना जीवे मारण्याची धमकी दिली आणि म्हटले की, ते त्यांच्या आणि कंपनीच्या मध्ये येत आहेत.

७ डिसेंबर रोजी सुदर्शन घुलेने कराडला फोन केला, ज्यात नंतर म्हणाले, “जर लोक मध्ये आले तर कोणतीही कंपनी आम्हाला पैसे देणार नाही. जो कोणी मध्ये येईल त्याला खाली खेचले पाहिजे”. नंतर, देशमुख यांची निर्घृण हत्या करण्यात आली, असे आरोपपत्रात म्हटले आहे.

गेल्या वर्षी ९ डिसेंबर रोजी बीडमधील मस्साजोग गावचे सरपंच देशमुख यांच्या हत्येमुळे राज्यात राजकीय वादळ निर्माण झाले आहे कारण राष्ट्रवादी काँग्रेस पक्षाचे (एनसीपी) मंत्री धनंजय मुंडे यांचे जवळचे सहकारी कराडला संबंधित खंडणी प्रकरणात अटक करण्यात आली आहे.

The post वाल्मीक कराडनेच सरपंच संतोष देशमुख यांच्या हत्येचे आदेश दिले, ‘सीआयडी’ने आरोपपत्रात केले अनेक धक्कादायक खुलासे appeared first on थोडक्यात घडामोडी.