हिमाचल प्रदेश : हिमाचल प्रदेशातील उना जिल्ह्यातील लमलेहडी येथे खासगी शाळेची बस उलटली आहे. या अपघातात बसमधील १२ मुले जखमी झाली आहेत. त्यापैकी ३ जणांची प्रकृती गंभीर असल्याचे सांगण्यात येत आहे. सर्व जखमी मुलांना उना प्रादेशिक रुग्णालयात दाखल करण्यात आले आहे. बसचे ब्रेक फेल झाल्याने हा अपघात झाल्याचे शाळा प्रशासनाने सांगितले.

शाळा सुटल्यानंतर बस मुलांना सोडण्यासाठी जात होती. यावेळी बसचे ब्रेक फेल झाल्याने हा अपघात झाला. ही बस 20-30 मीटर खड्ड्यात पडली. अपघाताची माहिती मिळताच पोलीस आणि प्रशासनाचे पथक घटनास्थळी पोहोचले आणि सर्व जखमी मुलांना तातडीने रुग्णालयात दाखल केले. मुलांचे पालकही घटनास्थळी पोहोचले. पोलिसांनी गुन्हा दाखल करून अपघाताच्या कारणांचा शोध सुरू केला आहे.

The post खासगी शाळेची बस उलटून झालेल्या अपघातात 12 मुले जखमी, तिघांची प्रकृती गंभीर appeared first on थोडक्यात घडामोडी.

हिमाचल प्रदेश : हिमाचल प्रदेशातील सिरमोर येथे शुक्रवारी दुपारी एक मोठी दुर्घटना टळली. येथे शिलाईमधील बोहराद खड्डजवळ नॅशनल हायवे-707 वर एक खासगी बस घसरून दरीत लटकली. यावेळी बसमध्ये 24 प्रवासी होते. प्रसंगावधान दाखवत ड्रायव्हरने ब्रेक लावला आणि सर्व प्रवाशांना खाली उतरेपर्यंत ड्रायव्हरने ब्रेक दाबून ठेवला. यानंतर प्रवासी आणि क्लीनर यांनी मिळून ड्रायव्हरचा जीव वाचवला.

मिळालेल्या माहितीनुसार, चालत्या बसचा अचानक एक्सल तुटल्यामुळे ड्रायव्हरचे गाडीवरील नियंत्रण सुटले. यामुळे बस दरीच्या बाजूला गेली. तेथून खाली 300 मीटर खोल दरी आहे. यावेळी ड्रायव्हरने ब्रेक लावून ठेवला. ही बस पांवटा साहिबवरुन गत्ताधार मार्गावर जात होती. कफोटाहून तब्बल 10 किमी अंतरावर आल्यानंतर बसचा एक्सल तुटला. यावेळी ड्रायव्हरने न घाबरता प्रसंगावधान दाखवलं. त्याने जोरात ब्रेक दाबला. आणि जोपर्यंत शेवटचा प्रवासी बसमधून उतरत नाही तोपर्यंत ब्रेकवर पाय तसाच ठेवला. सर्व प्रवासी खाली उतरल्यानंतर लोकांनी बसच्या टायरखाली मोठा दगड ठेवून ड्रायव्हरलाही बाहेर काढलं. त्यामुळे पुढील मोठी दुर्घटना टळली. पोलिसांची टीम घटनास्थळी दाखल झाली आणि त्यांनी प्रवाशांची पुढे जाण्याची सोय करून दिली.

The post मोठी दुर्घटना टळली! बस घसरून दरीत लटकली, ड्रायव्हरने सर्व प्रवाशांना खाली उतरेपर्यंत ब्रेक दाबून ठेवला… appeared first on थोडक्यात घडामोडी.

हिमाचल प्रदेश : एका महिलेने आपल्या नवजात बाळाला मुख्यमंत्र्यांच्या निवासस्थानासमोर बेवारस अवस्थेत सोडून दिल्याची घटना समोर आली आहे. हिमाचल प्रदेशचे मुख्यमंत्री जयराम ठाकूर यांच्या सरकारी निवासस्थानाजवळ हे नवजात बाळ सुरक्षा रक्षकांना आढळलं. त्यानंतर हा प्रकार समोर आला. त्यानंतर काही तासांतच हे बाळ एका अविवाहीत महिलेचं असल्याचं समोर आलं. त्यानंतर पोलिसांनी या महिलेला ताब्यात घेतलं असून तिच्यावर सध्या उपचार सुरु आहेत.

पोलिसांनी दिलेल्या माहितीनुसार, गेल्या शनिवारी महिलेने कमला नेहरू रुग्णालयाजवळ (KNH) आपल्या नवजात बाळाला बेवारस अवस्थेत सोडून दिलं होतं. हे ठिकाण मुख्यमंत्री निवासस्थानाच्या जवळ असल्यामुळे मुख्यमंत्र्यांच्या काही सुरक्षारक्षकांनी बाळाच्या रडण्याचा आवाज ऐकला. त्यानंतर त्यांनी तात्काळ याबाबत पोलिसांना माहिती दिली. पोलिसांनी घटनास्थळी जाऊन बाळाला ताब्यात घेत उपचारासाठी इंदिरा गांधी मेडिकल कॉलेज रुग्णालयात दाखल केले. बाळाची प्रकृती उत्तम असल्याचं डॉक्टरांनी स्पष्ट केले. त्यानंतर रस्त्यावर सापडलेल्या रक्ताच्या ठशांवरून पोलीस या महिलेपर्यंत पोहचले आणि पोलिसांनी तिच्या घरी जाऊन तिला ताब्यात घेतले.

चौकशी अधिकारी रंजना शर्मा यांनी सांगितले की संबंधित महिलेला केएनएच रुग्णालयात उपचारासाठी दाखल करण्यात आले आहे. उपचारानंतर तिला न्यायालयासमोर हजर करण्यात येणार आहे. या महिलेविरुद्ध भारतीय दंड विधानाच्या कलम ३१७ (१२ वर्षांहून कमी वयाच्या बाळाचा परित्याग करणे) नुसार गुन्हा दाखल करण्यात आला आहे.

The post महिलेने नवजात बाळाला मुख्यमंत्री निवासस्थानाजवळ बेवारस सोडलं, रक्ताच्या ठशांवरून महिलेचा शोध appeared first on थोडक्यात घडामोडी.

हिमाचल प्रदेशातील चंबा जिल्ह्यात एका खासगी बसचा अतिशय भीषण अपघात झाला आहे. चंबा येथील तीसामध्ये प्रवाशांनी भरलेली खासगी बस दरीत कोसळल्याने हा अपघात झाला. या अपघातात 7 जणांचा मृत्यू तर 10 जण जखमी झाल्याची माहिती मिळाली आहे. पोलिसांनी ७ मृतदेह ताब्यात घेतले आहेत. हा अपघात सकाळी १० च्या सुमारास झाला. अपघाताचे कारण अद्याप समोर आलेले नाही. परंतु, चालकाचे बसवरील नियंत्रण सुटल्याने बस दरीत कोसळल्याचा अंदाज वर्तविला जात आहे.

मिळालेल्या माहितीनुसार, चंबा येथील तीसा मध्ये हा भीषण अपघात झाला आहे. खासगी बसमध्ये 20-25 जण होते. ही बस बुंदेडीहून चंबाकडे येत होती. यादरम्यान बस वळणावरून खाली घसरली आणि दरीत कोसळली. अपघाताची माहिती मिळताच पोलिस प्रशासन आणि बचाव दल तसेच स्थानिकांनी जखमींना बाहेर काढण्याचे काम सुरु केले. जखमींना जवळच्या रुग्णालयात उपचारासाठी दाखल करण्यात आले आहे.

दरम्यान, हिमाचल प्रदेशचे मुख्यमंत्री जयराम ठाकूर यांनी 7 जणांच्या मृत्यूची पुष्टी केली आहे. ते म्हणाले कि, डीसी आणि एसपी घटनास्थळी रवाना झाले आहेत. बचाव कार्य सुरू असून जिल्हा प्रशासनाला आवश्यक मार्गदर्शक सूचना देण्यात आल्या आहेत.

The post खासगी बस दरीत कोसळून भीषण अपघात, 7 जणांचा मृत्यू appeared first on थोडक्यात घडामोडी.

नवी दिल्लीः  केंद्र सरकारने जीएसटी भरपाईचा पहिला हप्ता म्हणून आंध्र प्रदेश, आसाम, बिहार, गोवा, गुजरात, हरियाणा, हिमाचल प्रदेश, कर्नाटक, मध्य प्रदेश, महाराष्ट्र, मेघालय, ओडिशा, तामिळनाडू, त्रिपुरा, उत्तर प्रदेश, उत्तराखंड यांना 6 हजार कोटी रुपयांची रक्कम वितरीत केली.

केंद्र सरकारने जीएसटी भरपाईबाबत गेल्या आठवड्यात विरोधी पक्षांनी केलेली मागणी मान्य केली. केंद्र सरकार आता स्वतः कर्ज घेऊन राज्यांच्या जीएसटीची भरपाई करणार आहे. वित्त मंत्रालयाने म्हटले आहे की, जीएसटी संकलनातील राज्यांची 1.1 लाख कोटी रुपयांच्या भरपाई देण्यासाठी केंद्र सरकार बाजारातून कर्ज घेऊन ती रक्कम राज्यांना हप्त्यांमध्ये देणार आहे.

मोदी सरकारने 2020-21मध्ये जीएसटी संकलनातील तूट दूर करण्यासाठी विशेष कर्जाची व्यवस्था केली आहे. एकूण 21 राज्ये आणि दोन केंद्रशासित प्रदेशांना ही रक्कम दिली जाणार आहे. केंद्रीय अर्थ मंत्रालय कर्जासाठी समन्वय राखणार असून, यातील पाच राज्यांच्या जीएसटी भरपाईमध्ये कोणतीही कपात केलेली नाही.

मंत्रालयाने निवेदनात म्हटले आहे की, “केंद्र सरकारने आज 16 राज्यांना 6,000 कोटी रुपयांचे कर्ज दिले आहे. आंध्र प्रदेश, आसाम, बिहार, गोवा, गुजरात, हरियाणा, हिमाचल प्रदेश, कर्नाटक, मध्य प्रदेश, महाराष्ट्र, मेघालय, ओडिशा, तामिळनाडू, त्रिपुरा, उत्तर प्रदेश, उत्तराखंड अशी ही 16 राज्ये आहेत. या व्यतिरिक्त दिल्ली आणि जम्मू-काश्मीर या दोन केंद्रशासित प्रदेशांनाही निधी हस्तांतरित करण्यात आला आहे. “निवेदनानुसार हे कर्ज 5.19 टक्के व्याजावर घेतले जाते आणि त्याचा कार्यकाळ 3 ते 5 वर्षांसाठी आहे. ते दर आठवड्याला राज्यांना 6,000 कोटी रुपये देणार आहेत. या व्यवस्थेचा केंद्राच्या वित्तीय तुटीवर परिणाम होणार नाही. तसेच राज्य सरकारच्या भांडवली नफ्यातही ते दिसून येईल, असं वित्त मंत्रालयाने म्हटले आहे.

The post जीएसटी भरपाईचा पहिला हप्ता वर्ग; केंद्राकडून १६ राज्यांना 6000 कोटी रुपये जारी appeared first on थोडक्यात घडामोडी.