पुणे : पुण्यातील एका नामांकित आयटी कंपनीत कार्यरत असलेल्या अभिलाषा भाऊसाहेब कोथिंबिरे (वय २५) या तरुणीने हिंजवडीतील क्राउन ग्रीन हाउसिंग सोसायटीच्या २१ व्या मजल्यावरून उडी मारून आत्महत्या केल्याची दुर्दैवी घटना उघडकीस आली आहे.

अभिलाषा मूळची रांजणगाव येथील असून सध्या हिंजवडी परिसरात वास्तव्यास होती. ती सेनापती बापट रस्त्यावर (एसबी रोड) स्थित एका प्रतिष्ठित आयटी कंपनीत कार्यरत होती.

३१ मे रोजी अभिलाषा दुचाकीवरून मैत्रिणीच्या इमारतीत आली होती. मात्र, ती तिच्या मैत्रिणीकडे न जाता थेट २१ व्या मजल्यावर गेली. तिथून उडी मारून तिने आपले आयुष्य संपवले.

घटनेनंतर काही वेळातच सोसायटीतील रहिवाशांनी आवारात मृतदेह पाहून पोलिसांना याबाबत माहिती दिली. हिंजवडी पोलिस ठाण्याचे पथक तपासासाठी घटनास्थळी पोहोचले, त्यांनी सीसीटीव्ही फुटेज तपासले आणि ती पहाटे ४.३८ वाजता दुचाकीवरून सोसायटीत आल्याचे पुष्टी केली. काही तासांनंतर ती मृतावस्थेत आढळली. पोलिसांनी तिच्या वाहनावरून तिची ओळख पटवली. तपासादरम्यान तिच्याकडे एक सुसाईड नोट देखील सापडली आहे. त्यामध्ये तिने लिहिले होते, “मी माझं आयुष्य संपवते आहे. आता जगायची इच्छा नाही. कृपया मला माफ करा.” मात्र, आत्महत्येचे नेमके कारण तिने स्पष्ट केलेले नाही.

हिंजवडी पोलिसांनी दिलेल्या माहितीनुसार, मृत तरुणी नैराश्यग्रस्त होती, परंतु कुटुंबीयांना याबाबत कोणतीही कल्पना नव्हती. तिचे वडील म्हणाले की, ती नेहमीप्रमाणे आनंदी आणि सामान्य वागत होती.

या घटनेबाबत बोलताना हिंजवडी पोलिस ठाण्याचे प्रभारी वरिष्ठ पोलिस निरीक्षक कन्हैया थोरात म्हणाले, “३१ मे रोजी आम्हाला मृतदेह मिळाला. घटनास्थळी सुसाईड नोट सापडल्यामुळे प्राथमिक तपासात ही आत्महत्येची घटना असल्याचे स्पष्ट झाले आहे. आम्ही अपघाती मृत्यूची नोंद केली असून पुढील तपास सुरू आहे.” अभिलाषाच्या शव विच्छेदन अहवालात तिच्या शरीरावरील महत्वाच्या अवयवांना गंभीर इजा झाल्याचे म्हटले आहे.

The post पुणे : आयटी अभियंता तरुणीची २१व्या मजल्यावरून उडी घेऊन आत्महत्या; सुसाईड नोट सापडली… appeared first on थोडक्यात घडामोडी.

पुणे : हिंजवडीत मसाज सेंटरच्या नावाखाली चालणाऱ्या वेश्याव्यवसाय रॅकेटचा यशस्वीपणे पर्दाफाश करण्यात पिंपरी चिंचवड पोलिसांच्या गुन्हे शाखेच्या मानव तस्करी विरोधी युनिटला (AHTU) यश मिळाले आहे. 21 जून रोजी केलेल्या महत्त्वपूर्ण कारवाईत सेक्स रॅकेटचा पर्दाफाश झाला. कारवाईदरम्यान या बेकायदेशीर कृत्याला बळी पडलेल्या दोन महिलांची सुटका करण्यात आली. मसाज सेंटरच्या मालकावर गुन्हा दाखल करण्यात आला आहे.

मिळालेल्या माहितीनुसार, ल्युमिनस एसपीए येथे सुरू असलेल्या वेश्या व्यवसायाबाबत पोलिसांना माहिती मिळाली होती. त्यानंतर पुरावे गोळा करण्यासाठी आणि मिळालेल्या माहितीची पडताळणी करण्यासाठी तेथे काही गुप्त अधिकारी पाठवण्यात आले. पुष्टी झाल्यानंतर सापळा रचून त्याठिकाणी छापा टाकण्यात आला. या कारवाईदरम्यान वेश्याव्यवसायाला बळी पडलेल्या दोन महिलांची सुटका करण्यात आली.

वेश्याव्यवसायाचा मुख्य सूत्रधार कांगणे याच्यावर अनैतिक तस्करी प्रतिबंधक कायदा 1956 च्या कलम 3, 4 आणि 5 आणि भारतीय दंड संहितेच्या कलम 370 (3) अंतर्गत आरोप ठेवण्यात आले आहेत. राहुल नवनाथ कांगणे (२८) असे या व्यक्तीचे नाव असून तो मूळचा लातूर जिल्ह्यातील असून तो हिंजवडी येथील सुरतवाला मार्क प्लाझा येथील दुसऱ्या मजल्यावर ल्युमिनस एसपीए या नावाने अवैध वेश्याव्यवसाय चालवत असल्याचे निष्पन्न झाले आहे.

The post पुणे : मसाज सेंटरच्या नावाखाली सुरु असलेल्या सेक्स रॅकेटचा पर्दाफाश, 2 महिलांची सुटका appeared first on थोडक्यात घडामोडी.

पिंपरी चिंचवड : अल्पवयीन मुलाने सुसाट गाडी चालविल्याने पिंपरी चिंचवडमध्ये एक थरारक अपघात झाला. याचप्रकरणी आता या अल्पवयीन मुलाच्या वडिलांना तुरुंगात जाण्याची वेळ आली आहे. सोबतच सर्व्हिसिंग सेंटरवरील एका व्यक्तीस देखील अटक झाली आहे, त्याने गाडीची चावी या अल्पवयीन मुलाला दिली होती.

मिळालेल्या माहितीनुसार, वडिलांचे नाव तानाजी शिंदे तर सर्व्हिसिंग सेंटरवरील व्यक्तीचे आकाश बोडके असे नाव आहे. तानाजी शिंदेंनी सेकंड हँड घेतलेली गाडी मंगळवारी सर्व्हीसिंगला टाकली होती. त्यांनी त्यांच्या अल्पवयीन मुलाला गाडी घरी घेऊन यायला सांगितली. तो त्याच्या तीन मित्रांना सोबत घेऊन सर्व्हिसिंग सेंटरवर गेला. तिथं आकाश बोडके नामक व्यक्तीने शिंदेंचा मुलगा अल्पवयीन असतानासुद्धा त्याच्या हातात गाडीची चावी दिली. तो अल्पवयीन मुलगा सुसाट वेगाने गाडी चालवत होता. पुणे-बेंगलोर महामार्गलगत पुनावळे परिसरात नियंत्रण सुटल्याने गाडी पलटली आणि थेट फर्निचर आणि ग्लास डेकोरच्या दुकानांना धडक दिली.

हिंजवडी पोलिसांना याबाबत माहिती मिळताच त्यांनी घटनास्थळी धाव घेतली आणि चौघांना ताब्यात घेतलं, चौकशी केली असता तो अल्पवयीन असून अकरावीचं शिक्षण घेत असल्याचं समोर आलं. याप्रकरणी अल्पवयीन चालकावर गुन्हा दाखल करून, त्याच्या वडिलांना पोलीस स्टेशनमध्ये हजर राहण्याची नोटीस देण्यात आली. त्यानंतर अल्पवयीन मुलगा आणि वडिलांच्या जबाबात संपूर्ण घटनाक्रम समोर आला. त्यामुळं पोलिसांनी आज मुलाच्या वडिलांना आणि आकाश बोडके या दोघांना अटक केली.

The post थरारक अपघात : अल्पवयीन मुलाच्या हातात गाडी देणं वडिलांना पडलं महागात, दोन जणांना अटक appeared first on थोडक्यात घडामोडी.