मुंबई : राज्य शासनाच्या नव्या पीक विमा योजनेबाबत विधानसभेत चर्चेदरम्यान कृषिमंत्री यांनी सविस्तर माहिती देताना स्पष्ट केले की, दोषी ठरलेल्या विमा कंपन्यांवर कठोर कारवाई केली जाईल आणि अशा कंपन्यांना शासनाकडून ब्लॅकलिस्ट करण्यात येईल. तसेच शेतकऱ्यांना पीक कापणी प्रयोगाच्या आधारे योग्य आणि हमखास नुकसान भरपाई मिळेल, याची खात्री शासन घेत असल्याचे कृषिमंत्री ॲड. माणिकराव कोकाटे यांनी विधानपरिषदेत सांगितले.

पीक विमा कंपन्यांना होत असलेल्या नफ्याबाबत सदस्य अमोल मिटकरी यांनी उपस्थित केलेल्या प्रश्नाला उत्तर देताना मंत्री ॲड. कोकाटे बोलत होते. चर्चेमध्ये विरोधी पक्ष नेते अंबादास दानवे, सदस्य सदाभाऊ खोत, सतेज पाटील यांनी सहभाग घेतला.

कृषिमंत्री ॲड.कोकाटे म्हणाले की, ज्या कंपन्यांचा दोष सिद्ध होईल, त्यांच्यावर कारवाई होईलच, शिवाय त्यांना शासनाच्या यादीतून कायमस्वरूपी वगळण्यात येईल. लोकप्रतिनिधींना विश्वासात घेऊनच पंचनाम्यांची प्रक्रिया राबवली जात आहे. त्यांच्या सूचनाही गांभीर्याने घेण्यात येतात.

पीक कापणी प्रयोगावर भर

नवीन योजनेत पीक कापणी प्रयोगाला केंद्रस्थानी ठेवण्यात आले आहे. शेतकऱ्यांच्या दृष्टीने ही योजना अधिक पारदर्शक आणि फायदेशीर असल्याचे कृषिमंत्र्यांनी सांगितले. त्यांनी स्पष्ट केले की, जर पिकाची कापणी झाल्यानंतर उत्पादन अपेक्षेपेक्षा कमी निघाले, तर त्या दृष्टिकोनातून नुकसानभरपाई दिली जाईल. एनडीआरएफमार्फत मदत मिळणार असून कोणताही शेतकरी या योजनेतून वंचित राहणार नाही.

विमा योजना आणि भांडवली गुंतवणूक वेगळी

सदस्य पाटील यांनी उपस्थित केलेल्या प्रश्नाला उत्तर देताना कृषिमंत्र्यांनी स्पष्ट केले की, “पीक विमा योजना आणि भांडवली गुंतवणूक या दोन वेगळ्या बाबी आहेत. विमा कंपन्यांना पूर्वी शासनाकडून ५-६ हजार कोटी रुपये दिले जात होते. आता ही रक्कम ७६० कोटींवर आली आहे. त्यामुळे बचत झालेली ५ हजार कोटींची रक्कम आता मल्चिंग, ड्रिप सिंचन, गोदामे आदी भांडवली गुंतवणुकीसाठी वापरण्यात येईल. पुढील पाच वर्षांत २५ हजार कोटींची गुंतवणूक शेतीमध्ये करण्यात येईल.”

सूचना ग्राह्य धरून बैठक घेण्याचे आश्वासन

कृषिमंत्र्यांनी सदस्य सदाभाऊ खोत, सतेज पाटील आणि अन्य लोकप्रतिनिधींनी उपस्थित केलेल्या मुद्द्यांची दखल घेत, “जर योजनेमध्ये सुधारणा आवश्यक वाटली, तर पक्षनेते आणि आमदारांसोबत बैठक आयोजित करून त्या सुधारणा निश्चितच केल्या जातील,” असे आश्वासन दिले.

The post शेतकऱ्यांना हमखास भरपाई; विमा कंपन्यांवर दोष सिद्ध झाल्यास ब्लॅकलिस्ट appeared first on थोडक्यात घडामोडी.

कोल्हापूर : राज्यात फेन्सिंग (तलवारबाजी) खेळाला चालना मिळावी, या खेळात राष्ट्रीय व आंतरराष्ट्रीय पातळीवर प्रतिनिधीत्व करण्याची संधी राज्यातील खेळाडूंना उपलब्ध व्हावी, यासाठी राज्यातील पाच जिल्ह्यात फेन्सिंग (तलवारबाजी) साठी डेडिकेटीव्ह हॉल निर्माण करण्यात येणार आहेत. या हॉलसाठी जिल्हा वार्षिक योजनेतून व महाराष्ट्र फेन्सिंग असोसिएशनच्या माध्यमातून निधी उपलब्ध करुन देण्याचा मानस असल्याचे प्रतिपादन पालकमंत्री सतेज पाटील यांनी ३२ व्या राज्यस्तर वरिष्ठगट फेन्सिंग अजिंक्यपद स्पर्धेच्या उद्घाटन कार्यक्रमात बोलताना केले.

महाराष्ट्र फेन्सिंग असोसिएशन, शिवाजी विद्यापीठ, कोल्हापूर, डी. वाय. पाटील अभिमत विद्यापीठ, कोल्हापूर आणि कोल्हापूर फेन्सिंग असोसिएशन यांच्या संयुक्त विद्यमाने आयोजित ३२ व्या राज्यस्तर वरिष्ठगट फेन्सिंग अजिंक्यपद स्पर्धेचे उद्घाटन शिवाजी विद्यापीठाच्या राजमाता जिजाऊसाहेब बहुउद्देशीय सभागृहात छत्रपती शाहू महाराज व पालकमंत्री सतेज पाटील यांच्या हस्ते करण्यात आले.

पालकमंत्री पाटील म्हणाले, कोव्हिडनंतर आता स्पर्धा सुरु झाल्या आहेत. कोल्हापूर ही शौर्याची भूमी आहे. या भूमित फेन्सिंग(तलवारबाजी) राज्यस्तरीय स्पर्धा आयोजित करण्याचा सन्मान जिल्ह्याला लाभला आहे. कोल्हापुरातील या स्पर्धेतून राष्ट्रीय पातळीवरील स्पर्धेसाठी राज्याची टीम तयार होणार आहे, हा अभिमान कोल्हापुरकर म्हणून मोठा आहे. या स्पर्धेतून 24 खेळाडूंची निवड पटियाला येथे होणाऱ्या राष्ट्रीय स्पर्धेसाठी निवडली जाणार आहे. राज्याचा झेंडा राष्ट्रीय पातळीवर फडकविण्यासाठी खेळाडूंनी आपले कौशल्य दाखवावे. या स्पर्धेतून निवड झालेले खेळाडू राष्ट्रीय पातळीवरील स्पर्धेत महाराष्ट्रला सांघिक व वैयक्तिक गटात विजतेपद मिळवून देतील, असा विश्वास त्यांनी व्यक्त केला व स्पर्धेतील सर्व खेळाडूंना शुभेच्छा दिल्या.

फेन्सिंगला प्रतिष्ठा मिळवून देण्यासाठी असोसिएशनमार्फत पुढील काळात प्रयत्न केले जाणार आहेत. कोणताही होतकरु खेळाडू आर्थिक समस्येमुळे मागे राहणार नाही. त्याच्यावर अन्याय होणार नाही, याची दक्षता घेतली जाईल, अशा खेळाडूस असोसिएशनमार्फत दत्तक घेतले जाईल. फेन्सिंग खेळाडूंच्या पाठीमागे असोसिएशन खंबीरपणे उभी राहील अशी ग्वाही पालकमंत्री पाटील यांनी दिली. फेन्सिंग खेळाचा विकास करण्यासाठी चांगल्या योजना राबविण्यात येतील. यासाठी या क्षेत्रातील तज्ज्ञ व खेळाडूंनी आपल्या सूचना असोसिएशनकडे पाठवाव्यात.

पालकमंत्री पाटील म्हणाले, क्रीडा क्षेत्राच्या विकासासाठी जिल्ह्यातील क्रीडा संघटनांना आवश्यक साहित्य खरेदीसाठी जिल्हा वार्षिक योजनेतून निधी उपलब्ध करुन देणारा कोल्हापूर जिल्हा हा राज्यातील पहिला जिल्हा आहे. असा उपक्रम राज्यातील सर्व जिल्ह्यात राबविण्याबाबत पाठपुरावा करण्यात येणार आहे.

श्रीमंत शाहू महाराज म्हणाले, तलवारबाजी हा पारंपरिक पद्धतीने खेळला जाणारा खेळ आता आधुनिक पद्धतीने खेळला जात आहे. फेन्सिंगमध्ये राज्यातून ऑलम्पिकसाठी खेळाडू घडावेत, यासाठी शासनाने खेळाडूंना सर्व सुविधा उपलब्ध करुन द्याव्यात. पालकमंत्री सतेज पाटील यांनी आता यामध्ये पुढाकार घेतला आहे, त्याबद्दल त्यांचे आभार मानावे लागतील. राष्ट्रीय स्पर्धेत राज्यातील खेळाडूंनी चांगली कामगिरी करावी, अशी अपेक्षा व्यक्त करुन त्यांनी स्पर्धेतील खेळाडूंना शुभेच्छा दिल्या.

महाराष्ट्र फेन्सिंग असोसिएशनचे सचिव उदय डोंगरे यांनी प्रास्ताविकात फेन्सिंग स्पर्धेबाबतची माहिती दिली. या स्पर्धेत 450 खेळाडूंनी नावनोंदणी केली असून यामधून अखिल भारतीय स्पर्धेसाठी महाराष्ट्र राज्य संघ निवड केली जाणार आहे. ही स्पर्धा इपी, फॉईल व सेबर या तीन प्रकारात होणार असून स्पर्धेचा सोमवारी समारोप होणार असल्याचे त्यांनी सांगितले. स्पर्धा संयोजन समितीचे अध्यक्ष संजय जाधव यांनी आभार मानले.

The post राज्यातील पाच जिल्ह्यात फेन्सिंगसाठी डेडिकेटीव्ह हॉल निर्माण करणार – सतेज पाटील appeared first on थोडक्यात घडामोडी.

कोल्हापूरः कोल्हापूर जिल्हा प्रशासनाने एक अतिशय कौतुकास्पद निर्णय घेतला आहे. ज्या मुलांच्या पालकांचे कोरोनामुळे निधन झाले आहे, अशा मुलांचे पालकत्व कोल्हापूर जिल्हा प्रशासन स्वीकारणार करणार असल्याची माहिती जिल्हयाचे पालकमंत्री सतेज पाटील यांनी दिली. या मुलांची माहिती संकलित करण्याचं काम सुरु असून त्यानंतर काही मुलांना दत्तक घेण्यात येणार असल्याचे त्यांनी सांगितले.

पालकमंत्री सतेज पाटील म्हणाले कि, “कोरोना संसर्गामुळे अनेक कुटूंबातील कर्त्या व्यक्तींना आपला जीव गमवावा लागला आहे. त्यामध्ये महिलांचाही समावेश आहे. आज जवळपास जिल्ह्यातील ४५ मुलांच्या आई वडिलांपैकी एकाचा कोरोनाने मृत्यू झाला आहे. अशा मुलांच्या सामाजिक आणि शैक्षणिक भविष्याचे नुकसान होवू नये, यासाठी जिल्हा प्रशासनाच्या वतीने त्यांची माहिती संकलनाचे काम सुरू आहे. जिल्ह्यात ४५ मुलांचे आई किंवा वडील नसल्याचे समोर आले आहे. तसेच दोन मुलांचे आई-वडील असे दोन्ही हिरावून घेतल्याचे समोर आले आहे. अशा मुलांची पालनपोषणाची जबाबदारी आता कोल्हापूर जिल्हा प्रशासन घेणार आहे. वेळ पडल्यास त्यांना जिल्हा प्रशासन दत्तक ही घेणार असल्याची तयारी केली जात आहे. त्यांच्या भवितव्यासाठी सर्वोतोपरी प्रयत्न केले जाणार आहेत.”

The post कोरोनाकाळात आई-वडिलांचे छत्र हरपलेल्या बालकांसाठी प्रशासनाचा मोठा निर्णय appeared first on थोडक्यात घडामोडी.

मुंबई : भाजपचे प्रदेशाध्यक्ष चंद्रकांत पाटील यांनी कोल्हापुरमधून निवडणूक लढवूनच दाखवावी. आम्ही त्यांचे डिपॉझिट जप्त करून दाखवू, असा दावा राष्ट्रवादी काँग्रेसचे नेते नवाब मलिक यांनी केला.

चंद्रकांत पाटील यांनी सोमवारी कोथरुड येथील कार्यक्रमात विरोधकांवर टीकास्त्र सोडले होते. मी कोल्हापूर सोडून कोथरुडमधून निवडणूक लढलो म्हणून मी पळून आलो, असे विरोधक म्हणतात. माझी आताही कोल्हापुरातून निवडणूक लढण्याची तयारी आहे. हवं तर कोल्हापुरातील कोणत्याही आमदाराने राजीनामा द्यावा, मी पोटनिवडणुकीला उभा राहीन. या निवडणुकीत जिंकून आलो नाही तर मी हिमालयात निघून जाईन, असे चंद्रकांत पाटील यांनी ठणकावून सांगितले होते.

चंद्रकांत पाटलांच्या या वक्तव्याला नवाब मलिक यांनी प्रत्युत्तर दिले. कोल्हापूरमधील आमदाराचा राजीनामा घ्यावा. भाजपने त्या जागेवर चंद्रकांत पाटील यांना उभे करावे. निवडणुकीत चंद्रकांत पाटील यांचे डिपॉझिट करण्याची ताकद आमच्यात आहे, असे नवाब मलिक यांनी सांगितले.

The post चंद्रकांत पाटलांनी कोल्हापुरातून उभे राहावेच; आम्ही डिपॉझिट जप्त करुन दाखवू – नवाब मलिक appeared first on थोडक्यात घडामोडी.