बुलढाणा : भाजपाच्या एका महिला आमदाराला जीवे मारण्याची धमकी देण्यात आली आहे. उपमुख्यमंत्री एकनाथ शिंदे यांच्या गाडीला बॉम्बने उडवण्याची धमकी आल्याची घटना ताजी असतानाच बुलढाण्यातील चिखलीच्या भाजपा आमदार श्वेता महाले यांना थेट पत्राद्वारे जीवे मारण्याची धमकी देण्यात आली आहे. श्वेता महाले यांच्या निवासस्थानी हे धमकीचे पत्र पाठवण्यात आल्यामुळे मोठी खळबळ उडाली आहे.

मिळालेल्या माहितीनुसार, आमदार श्वेता महाले यांना जीवे मारण्याची धमकी दिली असून पत्रात अतिशय खालच्या पातळीची भाषा वापरली आहे. श्वेता महाले यांना हे पत्र कोणी पाठवले आणि त्यांच्या निवासस्थानापर्यंत हे कसे पोहोचले याबद्दल अद्याप माहिती मिळू शकली नाही. श्वेता महाले दुपारच्या वेळी आपल्या काही कार्यकर्त्यांसोबत चिखली पोलिस ठाण्यात तक्रार देण्यासाठी जाणार असल्याची माहिती आहे.

उपमुख्यमंत्री एकनाथ शिंदे यांना बुलढाण्यातील देऊळगावच्या मही येथूनच धमकीचा ईमेल पाठवण्यात आला होता. पोलिसांनी मही येथून दोन जणांना अटक केली. एकनाथ शिंदे यांना मिळालेल्या धमकीनंतर आरोपींना अवघ्या काही तासांमध्ये पकडण्यात पोलिसांना यश मिळाले.

अशा प्रकारच्या घटनांमुळे राज्यातील राजकीय वातावरण तणावपूर्ण होऊ शकते. यामुळे लोकशाही प्रणालीवर गंभीर परिणाम होऊ शकतात, आणि प्रत्येक राजकीय व्यक्तीला तसेच सामान्य नागरिकांना सुरक्षिततेची हमी देणे अत्यंत महत्त्वाचे आहे.

The post एकनाथ शिंदेंनंतर आता भाजपच्या महिला आमदाराला जीवे मारण्याची धमकी appeared first on थोडक्यात घडामोडी.

जळगावच्या महिला वसतीगृहात पोलिसांनी महिलांना कपडे काढून डान्स करायला लावल्याची धक्कादायक घटना घडली होती. या संतापजनक प्रकारची दखल आज विधीमंडळात घेण्यात आली. भाजपच्या आमदार श्वेता महाले यांनी हा मुद्दा विधानसभेत उपस्थित केला.

तरुणींना कपडे काढून डान्स करायला लावून त्याचा व्हिडीओ बनवला गेला. या गंभीर प्रकाराबद्दल दोषींवर कारवाई झाली पाहिजे. गृहमंत्र्यांना विनंती आहे की संबंधित पोलिसांचं निलंबन करावं, अशी मागणी श्वेता महाले यांनी केली. यावर गृहमंत्र्यांनी ‘नोंद घेतो’ एवढंच उत्तर दिलं. यावर सुधीर मुनगंटीवार यांनी आक्रमक भूमिका घेतली.

सुधीर मुनगंटीवार यांनी संताप व्यक्त करत म्हटलं कि, “सभागृहात सदस्यांनी अतिशय गंभीर मुद्दा उपस्थित केला आहे. हा इतका गंभीर विषय आहे अध्यक्ष महोदय की, उद्या माझी बहीण, तुमची बहीण एवढं एक सेकंद नजरेत आणा…तुम्ही जर गृहमंत्री असता तर खून केला असता. अशा पद्धतीने तुमच्या, माझ्या आई बहिणीला नग्न करुन, कपडे काढून नाचायला लावलं जातंय आणि आम्ही नोंद घेवू म्हणतात. इथं मृत मनाचे आमदार आहेत? आमचं मन जिवंत आहे. तळपायाची आग मस्तकात गेली पाहिजे. उत्तरात सांगितलं पाहिजे की, एक तासात चौकशी करतो. काय कारवाई करणार आहे याचा अहवाल घेतो…पण म्हणतात नोंद घेतो…हे पाप फेडावं लागेल. आमच्या आई-बहिणीला नग्न केलं जातं या महाराष्ट्रात आणि आम्ही नोंद घेतो.”

मग गृहमंत्री अनिल देशमुख यांनीही घटनेची गंभीर दखल घेत दोषींवर कारवाई होईल असं आश्वासन दिलं आहे. गृहमंत्र्यांनी विधानसभेत सांगितलं कि, “जळगावमधील आशादीप वसतीगृहात घडलेला प्रकार दुर्दैवी आहे. घटनेची चौकशी करण्यासाठी चार उच्चस्थरीय अधिकाऱ्यांची समिती गठीत करण्यात आली आहे. या समितीचा अहवाल दोन दिवसात प्राप्त होणार आहे. त्यानंतर नियमानुसार दोषींवर कारवाई होईल.”

काय आहे प्रकरण ?

जळगावच्या आशादीप वसतीगृहातील महिला आणि मुलींना काही पोलिसांनी कपडे काढून डान्स करायला लावल्याचा प्रकार घडला. या महिलांनी घडलेल्या प्रकाराची शहरातील सामाजिक कार्यकर्त्यांकडे तक्रार केल्याने ही संपूर्ण घटना उघडकीस आली. या महिलांनी आपल्यावर अन्याय, अत्याचार केला जात असल्याची तक्रार केली आहे. यामध्ये रात्री काही तरुण पैसे घेऊन या ठिकाणी प्रवेश करून अनैतिक कृत्य करत असल्याचं म्हटलं आहे.

इंदूबाई बहुउद्देशीय संघटनेच्या अध्यक्ष आणि सामाजिक कार्यकर्त्या मंगला सोनवणे आणि जनायक फाउंडेशनचे फिरोज पिंजारी यांनी जिल्हाधिकारी अभिजित राऊत यांना निवेदन देऊन योग्य ती कारवाई करण्याची मागणी केली. कारवाई न झाल्यास आंदोलनचा इशाराही त्यांनी दिला आहे. त्यावर आपण चौकशी समिती गठीत केली असून ही चौकशी समिती संपूर्ण घटनेचा तपास करून अहवाल देणार आहे. या अहवालानुसार कारवाई करण्यात येईल. अशी प्रतिक्रिया जिल्हाधिकारी अभिजित राऊत यांनी दिली.

The post जळगावच्या महिला वसतीगृहात झालेल्या ‘त्या’ संतापजनक प्रकारावरून विधानसभेत चर्चा, जाणून घ्या प्रकरण.. appeared first on थोडक्यात घडामोडी.