मुंबई : नवी मुंबई महापालिकेत समाविष्ट १४ गावांमध्ये पाणीपुरवठा, रस्ते, आरोग्य सुविधा, शाळा ह्या कामांना तातडीने प्राधान्य द्या. या भागातील दप्तर हस्तांतरणाची कार्यवाही त्वरीत पूर्ण करण्याचे निर्देश उपमुख्यमंत्री एकनाथ शिंदे यांनी नवी मुंबई महापालिका आयुक्तांना दिले.

सह्याद्री अतिथीगृह येथे नवी मुंबई महापालिका हद्दीत समाविष्ट झालेल्या १४ गावांच्या विविध मागण्यांबाबत बैठक झाली. त्यावेळी उपमुख्यमंत्री शिंदे बोलत होते. यावेळी खासदार डॉ. श्रीकांत शिंदे, आमदार राजेश मोरे, उपमुख्यमंत्र्यांचे अपर मुख्य सचिव असीम गुप्ता, नगरविकास विभागाचे अपर मुख्य सचिव गोविंदराज, नवी मुंबई महापालिका आयुक्त कैलास शिंदे, ठाणे जिल्हाधिकारी श्रीकृष्ण पांचाळ आदी उपस्थित होते.

या गावांमध्ये तातडीने मुलभूत सुविधा उपलब्ध करून देण्यासाठी नवी मुंबई महापालिकेने कार्यवाहीला वेग द्यावा. तात्पुरती आरोग्य सुविधा उपलब्ध करून देण्यासाठी पोर्टा केबिनच्या सहाय्याने दवाखाने सुरू करण्यात यावे. नावाळी येथे असलेल्या जुन्या इमारतीमध्ये नव्याने रुग्णालय सुरू करण्यासाठी संबंधिताना निर्देश द्यावे, असे उपमुख्यमंत्र्यांनी यावेळी सांगितले.

वाकळण येथील तलावाचे सुशोभीकरण करून नवी मुंबई महापालिकेच्या सफाई कर्मचाऱ्यांमार्फत या गावांमधील साफसफाई करण्यात यावी. शासकीय जमिनीवरील अतिक्रमणे तातडीने हटविण्यात यावी तसेच या गावांमधील शासकीय दप्तर नवी मुंबईकडे हस्तांतरीत करण्याच्या प्रक्रियेला वेग देण्याचे निर्देश उपमुख्यमंत्री शिंदे यांनी दिले.

या गावांचा नियोजन आराखडा तयार करण्याचे काम सुरू असून रस्ते, पायाभूत सुविधा, जमिनीचा उपयोग आदी घटकांचे सर्वेक्षण ड्रोनच्या माध्यमातून करण्यात येत असल्याचे आयुक्त शिंदे यांनी सांगितले. नवी मुंबई महापालिकेच्या २०२५-२६ च्या अर्थसंकल्पात या १४ गावांसाठी १९ कोटी ७० लाख रुपयांची तरतूद करण्यात आली असून त्यामध्ये प्राधान्याने शाळा, आरोग्य केंद्र, पाणी पुरवठा, मलनिस्सारण, पायवाटा, रस्ते या सुविधाचा समावेश असल्याचे आयुक्तांनी सांगितले.

The post नवी मुंबई महापालिकेत समाविष्ट १४ गावांमध्ये पाणीपुरवठा, रस्ते, आरोग्य सुविधा, शाळेच्या कामांना तातडीने प्राधान्य द्यावे, एकनाथ शिंदे यांचे निर्देश appeared first on थोडक्यात घडामोडी.

पुणे : पुणे शहरातील शाळांमधील बालके, लहान मुले, कॉलेजमधील व अन्य प्रशिक्षण संस्थेतील, आश्रमशाळेतील अथवा तत्सम संस्थेतील मुले-मुली यांची सुरक्षा व समस्यांचे निराकरण करण्यासाठी पोलीस काका/दिदी यांची नेमणूक करण्यात आली आहे. याव्यतिरिक्त शाळेत न जाणारी बालके, निराश्रीत, निराधार, रस्त्यावरुन किंवा निर्जन ठिकाणी एकटी-दुकटी फिरणारी लहान मुले, बालके यांच्या समस्या, सुरक्षा याबाबतचे कामसुध्दा पोलीस काका/दिदी पाहतील.

वरिष्ठ पोलीस निरिक्षक, पोलीस अधिकारी, पोलीस काका/दिदी हे त्यांच्या पोलीस स्टेशन हद्दीतील शाळा-कॉलेज येथे भेटी देऊन योजनेची कार्यपध्दती सर्व विद्यार्थी व शिक्षक यांना समजावून सांगतील. शाळा-कॉलेजमधील मुला-मुलींच्या मनात पोलीस म्हणजे संकट काळात कायदेशिर मदत करण्यासाठी धाऊन येणारे मित्र व मार्गदर्शक आहेत, अशी प्रतिमा तयार करतील. पोलीस काका/दिदी हे शाळा, कॉलेज, तसेच अन्य प्रशिक्षण संस्थांना नियमीतपणे भेटी देतील. शाळा-कॉलेज येथे भेटीच्या दरम्यान मुलींचे छेडछाडीचे प्रकार, दादागिरी, रॅगिंग, सायबर क्राईम अथवा अन्य तत्सम गैरप्रकारांच्या संबंधात विद्यार्थ्यांना कोणत्याही प्रकारची अडचण अथवा त्रास होत असल्यास त्याबाबत मुलांनी आपल्या शाळेतील पोलीस काका व दिदी यांना कळवावे. त्यामुळे त्यांना तात्काळ मार्गदर्शन व मदत मिळेल.

संबंधित शाळा, कॉलेज, प्रशिक्षण संस्थेतील मुख्याध्यापक/प्राचार्य अथवा अन्य वरिष्ठ अधिकाऱ्यांनी पोलीसांच्या कामकाजात आवश्यक ते सहकार्य करावे. शाळा, कॉलेज, प्रशिक्षण संस्थांमध्ये पोलीस काका व दिदी यांच्याकडुन कार्यशाळा, शॉर्ट फिल्मचे आयोजन करुन विद्यार्थ्यांमध्ये लैंगिक शोषण, गुड टच-बॅड टच तसेच, अन्य गैरप्रकारांबाबत व्याख्याने देऊन जागृती व प्रबोधन करण्यात येईल. मुलींची, महिलांची वसतिगृहे, आश्रमशाळा, महिला सुधारगृहे इत्यादी ठिकाणी पोलीस काका/दिदी नियमितपणे भेट देतील व तेथील मुलींच्या, महिलांच्या समस्या, तक्रारी समजून घेतील व त्याचा निपटारा करतील.

या कामगिरीकडे पोलीस स्टेशनचे प्रभारी अधिकारी कटाक्षाने लक्ष देतील. कोणत्याही अडचणीच्या प्रसंगी पोलीस काका/दिदी यांना विद्यार्थ्यांकडून फोन आल्यास, पोलीस काका/दिदी त्यांना तात्काळ मार्गदर्शन व मदत करतील. शाळा-कॉलेजमध्ये तक्रारपेटी बसवून, ती दर सोमवारी शाळेतील नोडल अधिकारी यांच्या समक्ष उघडून, प्राप्त तक्रारींवर योग्य ती कायदेशीर कार्यवाही करण्यात येणार आहे. शाळा, कॉलेज मधील विद्यार्थ्यांना पॉक्सो ऍक्ट, जे.जे. ऍक्ट यांच्याबाबत व्याख्याने देऊन, कायद्यामध्ये मुला-मुलींविषयक असलेल्या तरतुदींबाबत मार्गदर्शन देण्यात येईल.

महाराष्ट्र शासन निर्णयानुसार सर्व शाळांमध्ये सी.सी.टी.व्ही. कॅमेरे बसविण्याबाबत कळविण्यात आले आहे. खाजगी तसेच मनपाच्या शाळा-कॉलेजच्या आवारात विद्यार्थ्यांच्या सुरक्षिततेसाठी आवश्यक सुरक्षा उपाय करण्यासाठी शाळा-कॉलेज यांना प्रोत्साहीत करावे. उदा. उच्च क्षमतेचे सी.सी.टी.व्ही. कॅमेरे बसविणे, शाळेत अनोळखी इसमास प्रवेश न देणे, संस्थेच्या मुख्य प्रवेशव्दारात बाहेरुन येणाऱ्यांची नोंदणी पुस्तिका ठेवणे (संपूर्ण नाव, पत्ता, मोबाईल क्रमांक), विद्यार्थी वाहतूक करणाऱ्या वाहनचालकांचा परवाना, आधार कार्ड, चारित्र्य पडताळणी प्रत पोलीस ठाण्यात जमा करण्यात यावी, पालक शाळेत विद्यार्थ्यांना घेण्यासाठी येईपर्यंत विद्यार्थ्यांबरोबर शाळेतील सेवकवर्गाने थांबणे गरजेचे आहे, इत्यादी. विद्यार्थ्यांच्या सुरक्षिततेवर परिणाम करणारी कोणतीही मोठी बाब संबंधित पोलीस स्टेशनच्या वरिष्ठ पोलीस अधिकारी यांच्या निदर्शनास आणून द्यावी.

महाराष्ट्र शासन परिपत्रकान्वये प्रत्येक शाळेने “सखी सावित्री” समिती शाळेमध्ये गठित करावी. सदर समितीमध्ये संबंधित पोलीस ठाण्यातील महिला अधिकारी/महिला अंमलदार (पोलीस दिदी) या सदस्य आहेत. त्या शाळेमध्ये होणाऱ्या बैठकीला हजर राहतील. पोलीस स्टेशनकडील नोडल अधिकाऱ्यांकडून “पोलीस काका/दिदी” ही योजना प्रभावीपणे राबविली जात आहे, याचा साप्ताहिक आढावा घेण्यात येणार आहे. शाळा-कॉलेजमधील नोडल अधिकारी (शिक्षक/कर्मचारी) परिपाठ अगर प्रार्थनेच्या वेळी सदर योजनेचा विद्यार्थ्यांकडून योग्य प्रकारे लाभ घेतला जात आहे, याची वेळोवेळी खात्री करतील. शाळा, कॉलेज सुरु होण्याच्या वेळी व सुटण्याच्या वेळी संबंधित पोलीस स्टेशनकडील बीट मार्शल व दामिनी पथक गस्त घालतील. कोव्हीड-19 संसर्गजन्य प्रादुर्भावाच्या नंतर सदर योजना सुरळीत चालू झाली आहे.

The post दिलासादायक! पुण्यात मुलांच्या सुरक्षेसाठी पोलीस काका/दिदी यांची नेमणूक, जाणून घ्या सविस्तर… appeared first on थोडक्यात घडामोडी.

पुणे : जिल्ह्यात गेल्या काही दिवसांपासून कोविड संसर्गाचे प्रमाण कमी झाले असल्याने कोविडविषयक मार्गदर्शक सूचनांचे पालन करून 1 फेब्रुवारीपासून शाळा सुरू करण्यात याव्यात आणि महानगरपालिका क्षेत्रातील शाळांमध्ये फिरत्या पथकाद्वारे लसीकरणाची सुविधा उपलब्ध करून देण्यात यावी, असे निर्देश उपमुख्यमंत्री अजित पवार यांनी दिले. विभागीय आयुक्त कार्यालयात झालेल्या पुणे जिल्हा कोविड व्यवस्थापन आढावा बैठकीत ते बालेत होते. यावेळी गृहमंत्री दिलीप वळसे पाटील, विधानपरिषदेच्या उपसभापती डॉ.नीलम गोऱ्हे, खासदार डॉ.अमोल कोल्हे, विभागीय आयुक्त सौरभ राव, जिल्हाधिकारी डॉ.राजेश देशमुख उपस्थित होते.

पवार म्हणाले, पहिली ते आठवीचे वर्ग अर्धवेळ सुरू करण्यात यावे, तर नववी ते बारावीचे वर्ग पूर्णवेळ सुरू करावेत. पुढील आठवड्यात कोविड परिस्थितीचा आढावा घेऊन सर्व शाळा पूर्णवेळ सुरू करण्याबाबत निर्णय घेण्यात येईल. विद्यार्थ्यांना शाळेत पाठविण्याबाबतचा निर्णय पालकांनी घ्यावा, त्याबाबत तूर्तास सक्ती करू नये. 1 फेब्रुवारीपासून महाविद्यालये सुरू होत असल्याने लशीच्या दोन मात्रा घेतलेल्या विद्यार्थ्यांना प्रवेश देण्यात यावा, लसीकरण झाले नसल्यास विद्यार्थ्यांना लसीकरणाबाबत सूचना देण्यात याव्या.

लसीकरणामुळे मृत्यूच्या प्रमाणात घट होत असल्याने लसीकरणावर विशेष भर द्यावा. ग्रामीण भागात 15 ते 18 वयोगटातील मुलांच्या लसीकरणाचे प्रमाण चांगले आहे तर शहरी भागात कमी आहे. ग्रामीण भागातील शाळांमधून लसीकरणाची सुविधा दिल्याने हे प्रमाण वाढले असल्याने महापालिका क्षेत्रातील शाळांमधून फिरत्या लसीकरण केंद्राद्वारे लसीकरणाची सुविधा उपलब्ध करून द्यावी.

लसीकरण वाहनासोबत वैद्यकीय अधिकाऱ्याची नियुक्ती करावी. संस्थाचालकांनी शाळेत कोविड नियमांचे पालन होईल आणि पात्र विद्यार्थ्यांचे 100 टक्के लसीकरण होईल याची दक्षता घ्यावी. विद्यार्थी शाळेतदेखील मास्कचा वापर करतील याकडे विशेष लक्ष द्यावे, असे त्यांनी सांगितले.

मास्क आवश्यकच!

मास्क न वापरण्याविषयी मंत्रिमंडळ बैठकीत कोणतीही चर्चा झाली नसल्याचे पवार यांनी सांगितले. ते म्हणाले, अद्यापही कोविडचे संकट असल्याने नागरिकांनी मास्क वापरणे आणि मार्गदर्शक सूचनांचे पालन करणे आवश्यकच आहे. नागरिकांनी संसर्गापासून बचाव करण्यासाठी चांगला मास्क वापरावा. मास्क न वापरणाऱ्यांविरोधात कारवाई सुरूच ठेवावी, असे त्यांनी सांगितले.

बैठकीत राव यांनी सादरीकरणाद्वारे जिल्ह्यातील कोविड परिस्थितीची माहिती दिली. जिल्ह्यात मागील आठवड्यात 90 हजार 137 नवीन रुग्ण आढळले आहेत. जिल्ह्यातील 109 टक्के लाभार्थ्यांनी लशीची पहिली मात्रा तर 85 टक्के लाभार्थ्यांनी दुसरी मात्रा घेतली आहे. 60 वर्षावरील सहव्याधी असलेल्या 23 टक्के नागरिकांनी लशीची वर्धक मात्रा घेतली आहे. कोविड नियमांचे उल्लंघन करणाऱ्याविरोधात कारवाई करून 75 लक्ष 92 हजार रुपये दंड वसूल करण्यात आला आहे अशी माहिती त्यांनी दिली.

The post महापालिका क्षेत्रातील शाळांमधून फिरत्या पथकाद्वारे लसीकरण करण्याचे उपमुख्यमंत्र्यांचे निर्देश appeared first on थोडक्यात घडामोडी.

पुणे : कोरोनाबाधितांची वाढती संख्या लक्षात घेता पुण्यातील सर्व शाळा आणि महाविद्यालये बंदच ठेवण्याचा निर्णय आज झालेल्या पालकमंत्र्यांच्या कोरोना आढावा बैठकीत घेण्यात आला. पुणे जिल्ह्याचे महापौर मुरलीधर मोहोळ यांनी शाळांसंबंधीची माहिती सोशल मिडीयाद्वारे दिली. पुढील बैठकीत रुग्णसंख्येचा आढावा घेऊन याबाबत निर्णय घेतला जाणार आहे.

दरम्यान, राज्यातील पूर्व प्राथमिक ते बारावी पर्यंतच्या शाळा २४ जानेवारीपासून सुरू करण्याचा निर्णय घेण्यात आला आहे. शाळा सुरू करताना विद्यार्थ्यांचे आरोग्य आणि सुरक्षिततेला सर्वोच्च प्राथमिकता असून कोविडविषयक मार्गदर्शक सूचनांचे सर्वांनी काटेकोर पालन करावे, असे निर्देश शालेय शिक्षणमंत्री वर्षा गायकवाड यांनी दिले आहेत.

पुण्यात सर्व शाळा-महाविद्यालये बंदच राहणार !

कोरोनाबाधितांची वाढती संख्या लक्षात घेता पुण्यातील सर्व शाळा आणि महाविद्यालये बंदच ठेवण्याचा निर्णय आज झालेल्या पालकमंत्र्यांच्या कोरोना आढावा बैठकीत घेण्यात आला. पुढील बैठकीत रुग्णसंख्येचा आढावा घेऊन याबाबत निर्णय घेतला जाणार आहे.

— Murlidhar Mohol (@mohol_murlidhar) January 22, 2022

दरम्यान, पुणे शहरातील जलतरण तलाव सुरु करण्याचा निर्णय पालकमंत्री कोरोना संसर्ग आढावा बैठकीत घेण्यात आला असून दोन डोस घेतलेले नागरिक आणि स्पर्धांसाठी तयारी करणारे खेळाडू यांनाच जलतरण तलावात प्रवेश मिळणार आहे.

The post पुण्यात सर्व शाळा-महाविद्यालये बंदच राहणार appeared first on थोडक्यात घडामोडी.

पुणे : राज्य सरकारने राज्यात कोरोनामुळे बंद असलेल्या शाळा येत्या १ डिसेंबरपासून सुरू करण्याचा निर्णय नुकताच घेतला होता. त्यानुसार सर्व तयारी देखील सुरु होती. मात्र, दक्षिण अफ्रिकेत कोरोनाचा ओमिक्रॉन नावाचा नवा व्हेरिएंट आढळल्यानंतर आता शाळा सुरू करण्याच्या निर्णय लांबणीवर टाकण्यात आला आहे.

राज्य सरकारने सुरुवातीला १ डिसेंबरपासून शाळा सुरू करण्याचा निर्णय घेतला होता. मात्र, आता स्थानिक पातळीवरील परिस्थिती पाहून निर्णय घेण्याचे अधिकार स्थानिक प्रशासनाला देण्यात आले आहेत. त्यानुसार पुणे महानगर पालिकेने १ डिसेंबरपासून शाळा सुरू न करण्याचा निर्णय घेतला आहे. पुणे महानगर पालिकेचे महापौर मुरलीधर मोहोळ यांनी सांगितलं कि, “पहिली ते सातवीपर्यंतच्या शाळा १५ डिसेंबरपर्यंत सुरु करण्यात येणार नाहीत. यासंदर्भात सविस्तर विचार करून निर्णय घ्यावा लागेल. आपल्याकडे लहान मुलांसाठी अजूनही लस आलेली नाही. त्यामुळे लहान मुलांच्या आरोग्याचा विचार करून शाळा सुरु करण्याचा निर्णय १५ डिसेंबरपर्यंत पुढे ढकलण्यात आला आहे. त्यानंतरच यासंदर्भात निर्णय घेतला जाईल. याबाबत महापालिका क्षेत्रातील पालक संघटनांशी चर्चा करूनच निर्णय घेऊ.”

IMP : पहिली ते सातवीपर्यंत शाळा बंदच राहणार !

पुणे मनपा हद्दीतील इयत्ता पहिली ते सातवीपर्यंतच्या शाळा १५ डिसेंबरपर्यंत बंदच ठेवण्याचा निर्णय आपण घेतला असून १५ डिसेंबरला एकूणच आढावा घेऊन पुढील निर्णय जाहीर केला जाईल. पुणेकर पालकांनी याची नोंद घ्यावी. pic.twitter.com/bktFCBwrPf

— Murlidhar Mohol (@mohol_murlidhar) November 30, 2021

मुंबई महानगरपालिकेने देखील  १ डिसेंबरपासून शाळा सुरू न करण्याचा निर्णय घेतला आहे. मुंबई पालिकेच्या हद्दीतील शाळा आता १५ डिसेंबरपासून सुरू होणार आहेत.

मुंबई-पुण्यापाठोपाठ नाशिक महानगरपालिकेच्या हद्दीतील शाळा सुरु करण्याचा निर्णय देखील १० डिसेंबरपर्यंत स्थगित करण्यात आल्याचं नाशिक महानगर पालिका प्रशासनाकडून सांगण्यात आलं आहे.

The post पहिली ते सातवीपर्यंत शाळा बंदच राहणार, शाळा सुरू करण्याच्या निर्णय लांबणीवर appeared first on थोडक्यात घडामोडी.

बीड : कोविड कालावधीच्या मोठ्या ब्रेकनंतर प्रथमच परळी तालुक्यातील टोकवाडी येथील जिल्हा परिषद शाळेत उपस्थित झालेल्या विद्यार्थ्यांना पालकमंत्री धनंजय मुंडे यांनी गुलाब पुष्प देत त्यांचे शाळेत स्वागत केले. विद्यार्थ्यांच्या वर्गात जाऊन त्यांच्याशी संवाद साधत पालकमंत्री मुंडे यांनी ‘वेलकम बॅक टू स्कूल…’ म्हणताच विद्यार्थ्यांनी एका सुरात ‘थँक यू सर…’ म्हणत दिलेल्या प्रतिसादाने शाळेत चैतन्याचे वातावरण निर्माण झाले.

कोविडच्या काळात जवळपास दीड वर्ष शाळा बंद राहिल्यानंतर, आता दुसरी लाट ओसरली आहे. राज्य सरकारने शाळांची घंटा वाजवण्याचा निर्णय घेतला असून राज्यात शाळा सुरू झाल्या असून राज्यभरात शिक्षणोत्सव साजरा केला जात आहे. या पार्श्वभूमीवर बीड जिल्ह्याचे पालकमंत्री धनंजय मुंडे यांनी जिल्हा परिषद शाळा, टोकवाडी येथे जाऊन विद्यार्थ्यांचे पुष्पगुच्छ देऊन स्वागत केले व शिक्षणोत्सव पुढे अखंडित सुरू राहावा, अशा शुभेच्छा दिल्या.

पुन्हा नव्याने शाळा सुरू झाल्या आहेत, त्या आता कायम सुरू राहाव्यात यासाठी मास्क, सॅनिटायझर, अन्य स्वछता याबाबत दक्षता घेण्यात यावी. यासह शिक्षक व शिक्षकेतर कर्मचाऱ्यांचे प्राधान्याने लसीकरण केले जावे, शाळेचा परिसर स्वच्छ ठेवावा याबाबत संबंधितांना सक्त सूचना पालकमंत्री धनंजय मुंडे यांनी दिल्या आहेत. यावेळी पालकमंत्री धनंजय मुंडे यांच्या हस्ते मान्यवरांच्या उपस्थितीत शाळेच्या आवारात वृक्षारोपण देखील करण्यात आले.

मधल्या काळात शाळा बंद राहिल्या पण शाळा पुन्हा सुरू होताना विद्यार्थी व शिक्षकांच्या मनातील उत्साह एक वेगळाच आनंद देतो आहे. तसेच मधल्या काळात झालेले शैक्षणिक नुकसानही भरून निघेल असा विश्वास वाटत असल्याची प्रतिक्रिया मंत्री धनंजय मुंडे यांनी व्यक्त केली आहे.

The post विद्यार्थी व शिक्षकांचा उत्साह पाहून वेगळाच आनंद झाला – धनंजय मुंडे appeared first on थोडक्यात घडामोडी.

मुंबई : मुख्यमंत्री उद्धव ठाकरे यांनी विद्यार्थी, शिक्षक आणि पालकांशी संवाद साधताना शाळा सुरू झाल्याबद्दल शिक्षकांना शुभेच्छा दिल्या. मुख्यमंत्री म्हणाले की, शाळेच्या पहिल्या दिवशी सर्व विद्यार्थ्यांना, पालकांना, शिक्षकांना शुभेच्छा देतो. आपण सगळे जण एकत्र आहोत. एकदा उघडलेल्या शाळा पुन्हा बंद होऊ द्यायच्या नाही हा निर्धार करू या आणि आपण नव्या आयुष्याला सुरुवात करुया.

मुख्यमंत्री उद्धव ठाकरे यांनी यावेळी आपल्या शालेय जीवनातील आठवणींना उजाळा दिला. ते म्हणाले, मला माझे शाळेतले दिवस आठवतात. सुट्टीनंतर शाळेचा पहिला दिवस उत्साहाने भरलेला असायचा. पूर्वीचे दिवस वेगळेच असायचे. मित्रांना भेटण्याची उत्सुकता, नवीन वह्या पुस्तके, गणवेश मिळायचे. आत्ताच्या विद्यार्थ्यांच्या आयुष्यातला हा आव्हानात्मक काळ सुरू आहे. शाळा सुरू करण्याचा निर्णय घेणे कठीण आणि आव्हानात्मक होते आणि आहे. मुले नाजूक असतात, त्यांचे वय घडण्याचे असते. आज आपण मुलांच्या विकासाचे, प्रगतीचे दार मुलांसाठी उघडतो आहोत. त्यामुळे अधिक काळजी घेणे गरजेचे आहे. मी नेहमी या विषयावर टास्क फोर्सशी चर्चा करतो.

मुख्यमंत्र्यांनी केलेल्या सूचना :

1. आपल्या पाल्याची जबाबदारी आपण स्वतः घ्या.
2. शिक्षकाला बरे वाटत नसेल तर त्याने लगेच चाचणी करून घ्यावी.
3. पावसाळा अजून संपला नाही. साथीचे रोगही येतात. त्यामुळे प्रकृतीकडे लक्ष ठेऊन सर्वानी काम करावे.
4. शाळांच्या खोल्यांची दारे बंद नको, हवा खेळती हवी
5. निर्जंतुकीकरण करून घ्या. निर्जंतुकीकरण करतांना देखील काळजी घ्या.
6. मुलांच्या बसण्यात अंतर ठेवणे, मास्क घालणे, स्वच्छतालयांची स्वच्छता हवी.

The post उघडलेल्या शाळा पुन्हा बंद होऊ द्यायच्या नाही, मुख्यमंत्र्यांनी दिले ‘हे’ निर्देश appeared first on थोडक्यात घडामोडी.

मुंबई : राज्यातील शाळा 17 ऑगस्टपासून सुरु होणार नाहीत. शाळा सुरु करण्याचा निर्णय तूर्तास लांबणीवर टाकण्याचा निर्णय घेण्यात आला आहे. बुधवारी रात्री उशीरा राज्याचे मुख्य सचिव सीताराम कुंटे यांच्या उपस्थितीत एक बैठक पार पडली. त्यावेळी हा निर्णय घेण्यात आला आहे.

राज्यातील शाळा 17 ऑगस्टपासून सुरु करायच्या की नाहीत यावर काल राज्याचे मुख्य सचिव सीताराम कुंटे यांच्या उपस्थितीत बैठक पार पडली. या बैठकीला टास्क फोर्सचे सदस्य, शिक्षण विभागाचे अधिकारी आणि काही जिल्ह्यांचे जिल्हाधिकारी उपस्थित होते. त्यामध्ये लहान मुलांच्या आरोग्य संदर्भात आणि शाळा सुरू करायच्या की नाही यावर चर्चा झाली. ज्या ग्रामीण भागांमध्ये कोरोनाचा प्रादुर्भाव नाही अशा ठिकाणी शाळा सुरु राहतील, मात्र सरसकट शाळा सुरु करता येणार नाही असं मत तज्ञांनी व्यक्त केलं.

इतर राज्यात लहान मुलांमध्ये कोरोनाचा संसर्ग झपाट्याने वाढत आहे. लहान मुलांचे लसीकरण अथवा औषधेही उपलब्ध नसल्याने लगेच शाळा सुरु करण्याचा निर्णय घेऊ नये असं टास्क फोर्सच्या तज्ञांनी सूचित केलं. शाळा सुरु करण्याबाबतचा अंतिम निर्णय मुख्यमंत्री उद्धव ठाकरे घेतील. मुख्यमंत्री उद्धव ठाकरे शिक्षण विभाग आणि टास्क फोर्स यांची बैठक पार पडेल. त्यानंतर अंतिम निर्णय घेतला जाईल. सध्या 8 वी ते 12 वी पर्यंतचे वर्ग सुरू आहेत.

The post राज्यातील शाळा 17 ऑगस्टपासून सुरु होणार नाहीत, अंतिम निर्णय मुख्यमंत्री घेणार… appeared first on थोडक्यात घडामोडी.

मुंबई : राज्यातील सर्व शाळा लवकरच सुरू करण्याचा शिक्षण विभागाचा विचार सुरु आहे. याबाबत निर्णय घेण्यासाठी शिक्षण विभागाची पुढील आठवड्यात बैठक पार पडणार आहे. सध्या आठवी ते बारावी पर्यंतचे वर्ग सुरू आहेत. उर्वरित वर्ग लवकरच सुरू होणार आहेत.

1 ऑगस्टला ‘ब्रेक द चेन’ अंतर्गत जारी झालेल्या नियमावलीत शाळा सुरू करण्याचा निर्णय घेण्याचे अधिकार राज्य सरकारला देण्यात आले आहेत. आज मुख्यमंत्री उद्धव ठाकरे, शालेय शिक्षण मंत्री वर्षा गायकवाड यांच्या उपस्थितीत पहिली बैठक पार पडली. पहिल्या टप्प्यात सीएसआर फंडातून राज्य सरकार 471 शासकीय शाळांचे परिवर्तन करणार आहे. या शाळांमध्ये अत्याधुनिक शैक्षणिक सुविधा, इमारत आणि इतर सुविधा उपलब्ध असणार आहेत. तसेच २०२४ पर्यंत ५ हजार शाळांचे परिवर्तन करणार आहे.

For the first phase of the scheme implementation, we plan to turn 471 government schools into model schools. By 2024,we’ll transform 5000 schools. @empathyfound@lfe_ed pic.twitter.com/1QiVHoauwV

— Varsha Gaikwad (@VarshaEGaikwad) August 6, 2021

The post राज्यातील सर्व शाळा लवकरच सुरू होणार, राज्य सरकार करणार 471 शासकीय शाळांचे परिवर्तन appeared first on थोडक्यात घडामोडी.

मुंबई : शाळांच्या वाढीव फीमुळे चिंतेत असलेल्या पालकांना मुंबई हायकोर्टाच्या निर्णयाने मोठा दिलासा मिळाला आहे. वाढीव फी भरली नाही हे कारण देऊन मुलांना शाळेतून काढता येणार नाही, असा निर्णय हायकोर्टाने दिला.

शाळांच्या फी वाढीप्रकरणी महाराष्ट्र सरकारने काढलेल्या आठ मे २०२० रोजीच्या अध्यादेशावरील स्थगिती मुंबई हायकोर्टाने रद्द केली. त्यामुळे हा अध्यादेश पुन्हा महाराष्ट्रात लागू झाला. या अध्यादेशानुसार शैक्षणिक वर्ष २०२० आणि २०२१ या कालावधीत शिक्षणासाठी वाढीव फी भरली नाही म्हणून कोणत्याही विद्यार्थ्याला शाळेतून काढून टाकता येणार नाही. हा नियम ऑनलाइन किंवा ऑफलाइन अथवा दोन्ही पद्धतीने शिक्षण देणाऱ्या राज्यातील सर्व अनुदानीत आणि विनाअनुदानीत तसेच खासगी शाळांना लागू आहे.

कोरोनामुळे २०२०-२१ या शैक्षणिक वर्षात ऑनलाइन पद्धतीने शिक्षण सुरू झाले. त्यानंतर कोरोना संकट काहीसे नियंत्रणात आल्यानंतर ऑनलाइन आणि ऑफलाइन अशा दोन्ही पद्धतीने शिक्षणास सुरुवात झाली. मात्र ऑनलाइन शिक्षण सुरू होते तेव्हा मोबाइल, इंटरनेट, ट्रायपॉड अशा यंत्रणेवर खर्च होत होता. सर्व शिक्षकांसाठी शाळा व्यवस्थापनाला हायस्पीड इंटरनेट सेवेचा खर्च करावा लागला. हे खर्च भरुन काढण्याचे कारण पुढे करत अनेक शाळांच्या व्यवस्थापनाने फी वाढ केली. याला पालकांचा विरोध होता.

असोसिएशन ऑफ इंडियन स्कूल, ग्लोबल एज्युकेशन फाउंडेशन, ज्ञानेश्वर माऊली संस्था या शिक्षण संस्थांनी मुंबईच्या हायकोर्टात दाद मागितली. हायकोर्टाने शिक्षण संस्था, पालकांच्या संघटना आणि राज्याच्या शालेय शिक्षण मंत्रालयाची बाजू ऐकून घेतली. सुनावणीच्या काळात अध्यादेशावर स्थगिती लागू करण्यात आली. सुनावणीअंती मुंबईच्या हायकोर्टाने फी वाढीप्रकरणी एक मोठा निर्णय दिला.

The post शाळांच्या फी वाढीप्रकरणी हायकोर्टाचा मोठा निर्णय, महाराष्ट्र सरकारच्या ‘त्या’ अध्यादेशावरील स्थगिती रद्द appeared first on थोडक्यात घडामोडी.