पुणे : महिला आयोगाच्या अध्यक्षा रूपाली चाकणकर यांच्या अध्यक्षतेखाली सिंहगड रोड क्षेत्रीय कार्यालयात समाविष्ट गावांसह परिसरातील विविध समस्यांचा आढावा घेण्यासाठी बैठक आयोजित करण्यात आली. या बैठकीत पाणीपुरवठा, ड्रेनेज, कचरा व्यवस्थापन आदी मूलभूत प्रश्नांवर सविस्तर चर्चा झाली. यावेळी सहाय्यक आयुक्त श्रद्धा पोतदार, पुणे महापालिकेचे विविध विभागांचे अधिकारी, तसेच राष्ट्रवादी काँग्रेसचे पदाधिकारी व स्थानिक नागरिक उपस्थित होते.

सामाजिक कार्यकर्ते व राष्ट्रवादी काँग्रेसचे खडकवासला कार्याध्यक्ष भूपेंद्र मोरे यांनी नालेसफाई, कचरा व्यवस्थापन, ट्रॅफिक समस्या तसेच नवले पुलाजवळ सुरू असलेल्या वेश्याव्यवसायावर ठामपणे आवाज उठवला. मागील चक्काजाम आंदोलनानंतर प्रशासनाने काही कामे हाती घेतल्याबद्दल त्यांनी समाधान व्यक्त केले. तसेच, परिसरात अधिक स्ट्रीट लाईट व इतर सुविधा उपलब्ध व्हाव्यात, अशी मागणीही केली.

रूपाली चाकणकर यांनी मोरे यांनी मांडलेल्या प्रश्नांवर संबंधित अधिकाऱ्यांना जाब विचारत तात्काळ कार्यवाही करण्याचे निर्देश दिले. सहाय्यक आयुक्त प्रज्ञा पोतदार-पवार यांनीही या विषयांवर लवकरात लवकर कार्यवाही करण्यात येईल, असे सांगितले. या बैठकीस राष्ट्रवादी काँग्रेसचे प्रदेश प्रवक्ते राहुल पोकळे, सौरभ मते, सागर कोल्हे, विकास हगवणे, भाग्यश्री कामटे, सायली टिळेकर, विठ्ठल सूर्यवंशी, राजेभाऊ जाधव, सुरज दांगडे यांच्यासह अनेक नेते व नागरिक मोठ्या संख्येने उपस्थित होते.

सत्तेत असूनही मोरेंचा चक्काजाम; चाकणकरांकडून कौतुक

नऱ्हे परिसरातील भूपेंद्र मोरे हे राष्ट्रवादी काँग्रेस पक्षाचे खडकवासला कार्याध्यक्ष आहेत. तरीही ते सातत्याने आंदोलने करत असतात. मागील आठवड्यात चक्काजाम आंदोलनाची जोरात चर्चा झाली होती. यासंबंधी पत्रकारांनी चाकणकर यांना विचारले असता, त्या म्हणाल्या, “मोरे हे जनतेसाठी हिरारीने धावणारे नेतृत्व आहे. जनतेच्या हिताखातर केलेले आंदोलन हे कौतुकास्पद आहे. त्यातून जनतेचे प्रश्न सोडवण्याचा त्यांचा ठाम संकल्प दिसतो.”

The post नऱ्हे परिसरातील विविध प्रश्नांवर भूपेंद्र मोरेंची ठाम भूमिका; आढावा बैठकीत चाकणकरांकडून कौतुक appeared first on थोडक्यात घडामोडी.

पुणे : राष्ट्रवादी काँग्रेस (शरदचंद्र पवार) पक्षाच्या महिला शाखेच्या महाराष्ट्र अध्यक्षा, रोहिणी खडसे यांनी राज्यातील महिला सुरक्षेच्या मुद्द्यांवर गंभीर चिंता व्यक्त केली आहे आणि महाराष्ट्र महिला आयोगाच्या अध्यक्षा, रूपाली चाकणकर यांच्यावर तीव्र टीका केली आहे. खडसे यांनी चाकणकर यांच्यावर आरोप करत सांगितले की, महिला आयोगाच्या अध्यक्षांचे एकमेव काम म्हणजे चांगल्या मेकअपसह पक्षाच्या कार्यक्रमात उपस्थित राहणे, आणि त्यांना कोणत्याही पक्षाच्या कामकाजाशी काहीही घेणं देणं नाही. त्यांच्या म्हणण्यानुसार, चाकणकर यांना बाकी मुद्द्यांपेक्षा त्यांचे बाह्य रूप अधिक महत्त्वाचे वाटते.

महिलांवरील हिंसाचाराच्या वाढत्या घटनांविरोधात पुण्यात झालेल्या निदर्शनादरम्यान खडसे यांनी त्यांचे हे विचार व्यक्त केले. त्यांनी प्रश्न उपस्थित केला की, पोलिस गुन्हेगारांवर जलद कारवाई का करत नाहीत आणि पीडितांना न्याय मिळवण्यासाठी असलेला विलंब का सहन करावा लागतो. यावरून त्यांनी राज्यातील कायदा आणि सुव्यवस्था सुधारण्याची आवश्यकता व्यक्त केली आहे.

पुणे, जे एकेकाळी महाराष्ट्राची सांस्कृतिक राजधानी आणि शैक्षणिक केंद्र म्हणून ओळखले जात होते, ते आता गुन्हेगारीचे आणि हिंसाचाराचे केंद्र बनत चालले आहे, असे खडसे यांनी नमूद केले. पुण्यातील वाढत्या कार अपघात, टोळी हिंसाचार, दिवसाढवळ्या गोळीबार, चेन स्नॅचिंग, बलात्कार आणि खून यासारख्या गुन्ह्यांमध्ये लक्षणीय वाढ झाली आहे. यावरून त्यांनी राज्य सरकारच्या पोलिस प्रशासनावर टीका केली आणि मुख्यमंत्री देवेंद्र फडणवीस आणि गृहमंत्री यांच्या नेतृत्वाखाली पोलिस प्रशासन प्रभावीपणे कार्यरत नाही, अशी टीका केली.

याशिवाय, खडसे यांनी मागील सरकारच्या काळात मंजूर झालेल्या, परंतु साडेतीन वर्षांहून अधिक काळ रखडलेल्या ‘शक्ती कायदा’च्या अंमलबजावणीची गरज अधोरेखित केली. महिलांवरील हिंसाचार रोखण्यासाठी बनवण्यात आलेला हा कायदा अद्याप अंमलात का आणला गेलेला नाही, असा सवाल त्यांनी केला.

याद्वारे, खडसे यांनी राज्य सरकारच्या महिला सुरक्षेशी संबंधित धोरणांवर गंभीर प्रश्न उपस्थित केले आणि त्यामध्ये सुधारणा होण्याची आवश्यकता व्यक्त केली.

The post फक्त चांगल्या मेकअपसह कार्यक्रमांना उपस्थिती…, रोहिणी खडसे यांचे रूपाली चाकणकर यांच्यावर टीकास्त्र appeared first on थोडक्यात घडामोडी.

पुणे : पुण्यातील स्वारगेट स्थानकामध्ये पहाटेच्या सुमारास २६ वर्षीय तरूणीवर बलात्कार झाल्याचे भयंकर प्रकरण समोर आले आहे. नेहमी वर्दळ असलेल्या ठिकाणी अशा प्रकारचा गुन्हा घडल्यामुळे चिंता व्यक्त केली जात आहे. त्यातच आता ज्या बसमध्ये हा अत्याचार झाला ती बस स्टेशनच्या मध्यभागी उभी असल्याची माहिती समोर आली आहे. दत्तात्रय गाडे असं आरोपीचं नाव आहे. आता याप्रकरणावर राज्य महिला आयोगाच्या अध्यक्ष रूपाल चाकणकर यांनी प्रतिक्रिया दिली आहे.

रूपाली चाकणकर यांनी सांगितलं कि, पुणे हे विद्येचे माहेरघर आहे, येथे अनेक जिल्हे, तालुके आणि वाड्या वस्त्यांमधून मुली शिक्षणासाठी येतात. पुणे कायम सुरक्षित राहिलं आहे, त्याच्यामुळे मुलींना पुण्यात सुरक्षित वाटत असतं. स्वारगेटमध्ये घडलेली घटना धक्कादायक असून सकाळी सहाच्या सुमारास ही घटना घडली आहे. संबंधित मुलीवर अत्याचार करून आरोपी फरार झाला आहे. मुलीने स्वारगेट पोलीस स्टेशनला नऊ वाजता तक्रार नोंदवली. तिथल्या पोलीस अधिकारी पूनम पाटील आणि डीसीपी स्मार्तना पाटील यांनी जातीने या प्रकरणात लक्ष घातलं आहे. सीसीटीव्ही फुटेज आणि मुलीने सांगितलेल्या वर्णनानुसार आरोपीचे फोटो कलेक्ट करत तो कोण आहे याची माहिती पोलिसांना समजली आहे. आरोपीच्या तपासासाठी आठ पोलीस पथके तयार केले असून ग्रामीण भागात आणि स्वारगेट परिसरात तपास करत आहेत. आरोपीचा सीडीआर काढला असून लोकेशन मिळेल आणि आज किंवा उद्या आरोपीला अटक होईल.

रूपाली चाकणकर पुढे म्हणाल्या कि, अनोळखी व्यक्तीसोबत संवाद साधू नका, संबंधित तरूणी मास्क घालून आलेल्या व्यक्तीशी बोलल्यानंतर त्या व्यक्तीने चौकशी केली, कुठे जायचंय, कोणतं गाव आहे, मी सोडतो असं बोलून आरोपी त्या तरूणीला गाडीमध्ये घेऊन गेला. त्यामुळे अनोळखी व्यक्तीशी बोलणं टाळा, तसेच अशा प्रसंगी आरडाओरडा करायला हवं.

येथे काही गोष्टी महत्वाच्या आहेत, संबंधित तरूणीच्या बाबतीत जे घडले, त्यावरून हे स्पष्ट होते की, अनोळखी लोकांसोबत संवाद साधणे धोक्याचं ठरू शकतं. त्याशिवाय, अशा प्रसंगी आवाज उठवणे आणि मदतीसाठी आरडाओरडा करणे महत्त्वाचे असते. आपली सुरक्षा कायम राखण्यासाठी सर्वांनीच सजग राहणं आवश्यक आहे.

The post स्वारगेट बस स्थानकातील बलात्कार प्रकरणाबाबत रूपाली चाकणकरांची माहिती, तरूणी मास्क घालून आलेल्या व्यक्तीशी बोलली आणि… appeared first on थोडक्यात घडामोडी.