रांची : झारखंडच्या पलामू जिल्ह्यात भाजप नेत्याच्या मुलीवर सामुहिक बलात्कार झाल्याची खळबळजनक घटना घडली आहे. पलामू जिल्ह्यातील ललिमती जंगलात बुधवारी या 16 वर्षाच्या मुलीचा मृतदेह झाडाला लटकलेला आढळला. या अल्पवयीन मुलीचा उजवा डोळा काढण्यात आला नंतर तिनं आत्महत्या केल्याचं भासवण्यासाठी तिचा मृतदेह झाडाला टांगला. पोलीसांनी प्रदीपकुमार सिंह धानुक नावाच्या एका आरोपीला अटक केली असून इतर आरोपींचा शोध सुरु आहे.

मिळालेल्या माहितीनुसार, 7 जून रोजी पीडीत मुलगी सकाळी 10 वाजता घराबाहेर पडली होती आणि त्यानंतर ती बेपत्ता झाली. मुलगी परतली नाही म्हणून आई वडीलांनी तिची शोधाशोध केली, पण तिचा काहीच पत्ता लागला नाही. त्यानंतर भाजपचे स्थानिक नेता असलेल्या वडीलांनी पांकी पोलीसात तक्रार दाखल केली. पोलीसांनी मुलीचा शोध सुरु केला. दरम्यान, स्थानिकांना ललिमती जंगलात बुधवारी (9 जून) या मुलीचा मृतदेह झाडाला लटकलेला आढळला. कुटुंबियांनी ओळख पटवून ही त्यांचीच मुलगी असल्याची खात्री केली.

पोलिसांना घटनास्थळावरुन एक मोबाईल हाती लागला आहे, फोनच्या कॉल रेकॉर्ड्सवरून प्रदीप कुमारसिंग धानुक (वय 23) याला अटक करण्यात आली आहे. प्रदीप कुमारसिंग धानुक हा एक विवाहित पुरुष आहे. खुनामध्ये एकाधिक लोकांचा सहभाग असल्याचा पोलिसांना संशय आहे. गुन्हेगारांनी मुलीला ठार मारण्यापूर्वीच तिला निर्दयीपणे मारहाण केली आणि तिचा उजवा डोळा काढला. मुलीच्या कुटुंबीयांनी आरोप केला आहे की मुलीची हत्या करण्यापूर्वी तिच्यावर लैंगिक अत्याचार करण्यात आले. तथापि, अद्याप याची पुष्टी होणे बाकी आहे.

पोलिसांनी मृतदेह ताब्यात घेऊन पोस्टमार्टमसाठी मेदिनीनगर येथील मेदिनी राय मेडिकल कॉलेजमध्ये पाठविला. पोस्टमार्टम अहवाल येणे अद्याप बाकी आहे. त्यानंतर हे बलात्काराचे प्रकरण आहे की नाही हे निश्चित केले जाईल, अशी माहिती पोलिसांनी दिली आहे. स्थानिक भाजपा नेत्याला चार मुली आणि एक मुलगा आहे. या पाच मुलांमध्ये पीडित मुलगी सर्वात मोठी होती. तिच्या पार्थिवावर बुधवारी सायंकाळी स्थानिक स्मशानभूमीत अंत्यसंस्कार करण्यात आले.

दरम्यान, पोलिस तपासात मुलीचे कुटुंब समाधानी नसेल तर पक्ष स्वतंत्र चौकशीची मागणी करेल, असे आश्वासन झारखंड भाजपाचे प्रवक्ते प्रतुल शाहदेव यांनी दिले आहे.

The post भयंकर! भाजप नेत्याच्या मुलीवर सामुहिक बलात्कार, मुलीला मारहाण करून तिचा डोळा काढला आणि… appeared first on थोडक्यात घडामोडी.

झारखंड : रांचीमध्ये कांची नदीवर करोडो रुपये खर्च करून बांधलेला पूल कोसळला आहे. हा पूल ‘यास’ वादळाचा सामना करू शकला नाही. हाराडीह-बुधाडीह पूल गुरुवारी सायंकाळी साडेचारच्या सुमारास मधून तुटला आणि कोसळला. हा पुल रांची जिल्ह्यातील तमाड, बुंडू आणि सोनाहातू यांना जोडत होता. हा 600 मीटर लांबीचा पूल अचानक कोसळल्याने दोन्ही बाजूचे गावकरी पुलाच्या दोन्ही बाजुला अडकले आहेत. तीन वर्षांपूर्वीच ग्रामविकास विभागाकडून 13 कोटी रुपये खर्च करून हा पूल बांधण्यात आला होता.

मिळालेल्या माहितीनुसार, पुलाच्या बांधकामाच्या वेळी अनेक गोष्टींकडे दुर्लक्ष केल्याचे समोर आले आहे. पुलाचे खांब उभे करताना कोणतीही दाखल न घेता ते खांब दलदलीत उभे केले होते, ज्यामुळे पुलाचा पाया कमजोर होता. त्यातच हा पूल ‘यास’ वादळाचा सामना करू शकला नाही. या पुलाच्या गुणवत्तेवर प्रश्न उपस्थित होत आहेत. तसेच पूल कोसळण्याचे कारण नदीतून दररोज होणारे वाळूचे अवैध उत्खनन देखील असल्याचे सांगितले जात आहे. वाळू तस्कर पुलाच्या भोवती जेसीबी लावून वाळू उत्खनन करत असतात, मात्र त्याकडे दुर्लक्ष करण्यात आले. हे अवैध उत्खनन थांबविण्यासाठी प्रशासनाकडून अद्यापही कोणतीही कार्यवाही केलेली नाही.

स्थानिक आमदार विकास मुंडा यांनी पूल कोसळल्याची बातमी मिळाल्यानंतर घटनास्थळी येऊन पाहणी केली. ते म्हणाले कि, “यापूर्वी देखील असाच एक उच्चस्तरीय पूल कोसळला असून दोन्ही पुलांचे बांधकाम करणारी कंपनी एकच आहे. त्यामुळे या प्रकरणाची उच्चस्तरीय चौकशी झाली पाहिजे आणि दोषींवर कठोर कारवाई करायला हवी. अवैध वाळू उत्खननामुळे यापूर्वी देखील दोन पूल कोसळले आहेत. आता हा तिसरा पूल कोसळला आहे.

The post 3 वर्षांपूर्वी करोडो रुपये खर्च करून बांधलेला पूल कोसळला, ‘या’ गोष्टींकडे दुर्लक्ष केल्याचे आले समोर appeared first on थोडक्यात घडामोडी.

रांची : नक्षलवाद्यांनी झारखंडच्या चक्रधरपूर रेल्वे विभागात रविवारी रात्री रेल्वे ट्रॅकवर स्फोट घडवून आणला. रात्री २ वाजताच्या सुमारास ही घटना घडली. यामुळे हावडा-मुंबई मुख्य रेल्वे मार्ग ठप्प झाला आहे. या घटनेची माहिती मिळताच चक्रधरपूर रेल्वे विभागाकडून तातडीने संबंधित रेल्वेचं संचालन रोखण्यात आलं.

मिळालेल्या माहितीनुसार, चक्रधरपूर रेल्वे विभागाच्या लोटापहाडजवळ नक्षलवाद्यांनी लँडमाईन्सच्या मदतीनं रेल्वे ट्रॅकवरच स्फोट घडवून आणला. लँडमाईन्स स्फोटामुळे रेल्वे ट्रॅकला मोठं नुकसानं झालं. त्यामुळे हावडा – मुंबई मुख्य रेल्वे मार्गावर रेल्वेचं संचालन आताच शक्य नाही. चक्रधरपूर रेल्वे विभागाच्या वेगवेगळ्या स्टेशन्सवर प्रवासी रेल्वे अडकून पडल्या आहेत.

नक्षलवाद्यांकडून रेल्वे ट्रॅक उडवण्यात आल्याचं माहिती मिळताच जिल्हा पोलीस, आरपीएफ सोबतच रेल्वे अधिकारी घटनास्थळी दाखल झाले. घटनेची अधिक चौकशी सुरू आहे. लवकरच रेल्वे ट्रॅक दुरुस्त करून थांबलेल्या रेल्वेचं संचालन सुरू करण्यात येईल आणि परिस्थिती पूर्ववत होईल, अशी माहिती संबंधित अधिकाऱ्यांनी दिली आहे.

The post नक्षलवाद्यांनी लँडमाईन्सनं रेल्वे ट्रॅकवर केला स्फोट; रेल्वेमार्ग ठप्प झाल्याने प्रवासी रेल्वे अडकून पडल्या appeared first on थोडक्यात घडामोडी.