नागपूर : “अहो ऐका ना, एक सेल्फी घ्या!” असं म्हणत पुलावर थांबलेल्या महिलेने काही क्षणांतच नदीत उडी घेतल्याची धक्कादायक घटना शनिवारी दुपारी घडली. कन्हान नदीवरील नेरी पुलावर घडलेल्या या घटनेमुळे परिसरात एकच खळबळ उडाली.

मृत महिलेचे नाव ज्ञानेश्वरी विजय साकोरे (वय २३) असून, त्या सध्या नागपूरच्या मानेवाडा परिसरात पतीसोबत राहत होत्या. मूळच्या त्या रामटेक तालुक्यातील काचूरवाही गावच्या रहिवासी होत्या.

मिळालेल्या माहितीनुसार, शनिवारी दुपारी साडेतीनच्या सुमारास विजय साकोरे पत्नी ज्ञानेश्वरी यांच्यासह कारमधून काचूरवाही गावाकडे जात होते. वाटेत नेरी पुलावर दोघांनी गाडी थांबवून काही वेळ घालवला. यावेळी त्यांनी मोबाईलवर सेल्फी देखील घेतला. त्यानंतर नदीत निर्माल्य विसर्जित करण्यास सुरुवात केली.

दरम्यान, निर्माल्य टाकतानाच ज्ञानेश्वरी यांनी कोणालाही काही समजण्याच्या आत पुलावरून थेट नदीत उडी मारली. हा प्रसंग पती विजय यांच्या डोळ्यासमोर घडला. त्यांनी आरडाओरडा करत मदतीची हाक दिली.

घटनेची माहिती मिळताच नवीन कामठी पोलिस तातडीने घटनास्थळी दाखल झाले. स्थानिक गोताखोरांच्या मदतीने शोधमोहीम सुरू करण्यात आली. मात्र सायंकाळपर्यंत महिलेचा काहीही थांगपत्ता लागला नाही. अंधार पडल्याने शोध थांबवावा लागला. रविवारी सकाळपासून पुन्हा शोधमोहीम सुरू करण्यात आली.

प्राथमिक माहितीनुसार, पती-पत्नीमध्ये गेल्या काही दिवसांपासून कौटुंबिक वाद सुरू असल्याचे बोलले जात आहे. पोलिसांनी विजय साकोरे यांचा जबाब नोंदवला असून, अधिक तपास सुरू आहे.

शनिवारी दिवसभर आणि रविवारी सकाळी अनेक नागरिकांनी घटनास्थळी गर्दी केली होती. पुलावर काढलेला सेल्फी आणि नंतर घडलेली ही दुर्दैवी घटना सोशल मीडियावरही चर्चेचा विषय बनली आहे.

या घटनेबाबत कोणत्याही प्रकारचा अपप्रचार करू नये, असे आवाहन पोलिसांनी नागरिकांना केले आहे.

The post पुलावर सेल्फी घेतला आणि क्षणार्धात नदीत उडी; २३ वर्षीय महिलेचा दुर्दैवी अंत appeared first on थोडक्यात घडामोडी.

पुणे : पुण्यातील एका नामांकित आयटी कंपनीत कार्यरत असलेल्या अभिलाषा भाऊसाहेब कोथिंबिरे (वय २५) या तरुणीने हिंजवडीतील क्राउन ग्रीन हाउसिंग सोसायटीच्या २१ व्या मजल्यावरून उडी मारून आत्महत्या केल्याची दुर्दैवी घटना उघडकीस आली आहे.

अभिलाषा मूळची रांजणगाव येथील असून सध्या हिंजवडी परिसरात वास्तव्यास होती. ती सेनापती बापट रस्त्यावर (एसबी रोड) स्थित एका प्रतिष्ठित आयटी कंपनीत कार्यरत होती.

३१ मे रोजी अभिलाषा दुचाकीवरून मैत्रिणीच्या इमारतीत आली होती. मात्र, ती तिच्या मैत्रिणीकडे न जाता थेट २१ व्या मजल्यावर गेली. तिथून उडी मारून तिने आपले आयुष्य संपवले.

घटनेनंतर काही वेळातच सोसायटीतील रहिवाशांनी आवारात मृतदेह पाहून पोलिसांना याबाबत माहिती दिली. हिंजवडी पोलिस ठाण्याचे पथक तपासासाठी घटनास्थळी पोहोचले, त्यांनी सीसीटीव्ही फुटेज तपासले आणि ती पहाटे ४.३८ वाजता दुचाकीवरून सोसायटीत आल्याचे पुष्टी केली. काही तासांनंतर ती मृतावस्थेत आढळली. पोलिसांनी तिच्या वाहनावरून तिची ओळख पटवली. तपासादरम्यान तिच्याकडे एक सुसाईड नोट देखील सापडली आहे. त्यामध्ये तिने लिहिले होते, “मी माझं आयुष्य संपवते आहे. आता जगायची इच्छा नाही. कृपया मला माफ करा.” मात्र, आत्महत्येचे नेमके कारण तिने स्पष्ट केलेले नाही.

हिंजवडी पोलिसांनी दिलेल्या माहितीनुसार, मृत तरुणी नैराश्यग्रस्त होती, परंतु कुटुंबीयांना याबाबत कोणतीही कल्पना नव्हती. तिचे वडील म्हणाले की, ती नेहमीप्रमाणे आनंदी आणि सामान्य वागत होती.

या घटनेबाबत बोलताना हिंजवडी पोलिस ठाण्याचे प्रभारी वरिष्ठ पोलिस निरीक्षक कन्हैया थोरात म्हणाले, “३१ मे रोजी आम्हाला मृतदेह मिळाला. घटनास्थळी सुसाईड नोट सापडल्यामुळे प्राथमिक तपासात ही आत्महत्येची घटना असल्याचे स्पष्ट झाले आहे. आम्ही अपघाती मृत्यूची नोंद केली असून पुढील तपास सुरू आहे.” अभिलाषाच्या शव विच्छेदन अहवालात तिच्या शरीरावरील महत्वाच्या अवयवांना गंभीर इजा झाल्याचे म्हटले आहे.

The post पुणे : आयटी अभियंता तरुणीची २१व्या मजल्यावरून उडी घेऊन आत्महत्या; सुसाईड नोट सापडली… appeared first on थोडक्यात घडामोडी.