नवी दिल्ली : काँग्रेस अध्यक्षपदाच्या निवडणुकीत दिग्गज नेते मल्लिकार्जुन खर्गे यांनी शशी थरूर यांचा चुरशीच्या लढतीत पराभव केल्यानंतर काही तासांनी पंतप्रधान नरेंद्र मोदी यांनी खर्गे यांना काँग्रेस अध्यक्ष म्हणून नवीन जबाबदारीसाठी शुभेच्छा दिल्या.

पंतप्रधान मोदींनी ट्विट केले कि, “श्री मल्लिकार्जुन खर्गे जी यांना काँग्रेसचे अध्यक्ष म्हणून त्यांच्या नवीन जबाबदारीसाठी माझ्या शुभेच्छा. त्यांचा पुढील कार्यकाळ फलदायी जावो.”

My best wishes to Shri Mallikarjun Kharge Ji for his new responsibility as President of @INCIndia. May he have a fruitful tenure ahead. @kharge

— Narendra Modi (@narendramodi) October 19, 2022

The post पंतप्रधान नरेंद्र मोदी यांनी दिल्या काँग्रेस अध्यक्ष म्हणून नवीन जबाबदारीसाठी खर्गे यांना शुभेच्छा appeared first on थोडक्यात घडामोडी.

नवी दिल्ली : काँग्रेसचे नवे अध्यक्ष म्हणून मल्लिकार्जुन खर्गे यांची निवड झाली असून, त्यांनी त्यांचे प्रतिस्पर्धी शशी थरूर यांचा पराभव करून विजय मिळवला आहे. सकाळी 10 नंतर सुरू झालेली मतमोजणी दुपारी 1.30 वाजेपर्यंत सुरू होती. त्यानंतर आज काँग्रेस अध्यक्षपदाच्या निवडणुकीचा निकाल जाहीर झाला. एआयसीसीच्या मुख्यालयात मतमोजणी झाली.

काँग्रेसच्या 137 वर्षांच्या इतिहासात अध्यक्षपदासाठी सहाव्यांदा निवडणूक होत असून 24 वर्षांनंतर पहिल्यांदाच काँग्रेसला गांधी घराण्याबाहेरचा अध्यक्ष मिळाला आहे. काँग्रेस अध्यक्षपदाच्या निवडणुकीत मल्लिकार्जुन खर्गे 7897 मतांनी विजयी झाले, शशी थरूर यांना 1072 मते मिळाली, 416 मते बाद झाली.

काँग्रेस अध्यक्षपदाच्या निवडणुकीसाठी सोमवारी मतदान पार पडले होते. विद्यमान अध्यक्ष सोनिया गांधी, माजी पंतप्रधान मनमोहन सिंह, काँग्रेसचे माजी अध्यक्ष राहुल गांधी, काँग्रेस महासचिव प्रियंका गांधी यांच्यासह अनेक दिग्गज नेत्यांनी मतदानाचा हक्क बजावला होता. या निवडणुकीत जवळपास 95 टक्के मतदारांनी मतदानाचा हक्क बजावला होता.

नव्या अध्यक्षांसमोर मोठी आव्हाने
काँग्रेसचे नवीन अध्यक्ष मल्लिकार्जुन खर्गे यांच्यासमोर पक्षाला उभारी देण्याचे मोठे आव्हान असणार आहे. आपल्या राजकीय अस्तित्वासाठी काँग्रेसला संघर्ष करावा लागत आहे. काँग्रेसला नवचैतन्य देण्याचे आव्हान खर्गे यांच्यासमोर असणार आहे. हिमाचल प्रदेश आणि गुजरात विधानसभा निवडणूक आता मल्लिकार्जुन खर्गे यांच्या नेतृत्वाखाली लढवली जाणार आहे. त्यामुळे काँग्रेसच्या कामगिरीकडे अनेकांचे लक्ष असणार आहे.

The post काँग्रेसचे नवे अध्यक्ष म्हणून मल्लिकार्जुन खर्गे यांची निवड, 9385 पैकी मिळाली 7897 मते appeared first on थोडक्यात घडामोडी.

नवी दिल्ली : नागालँडच्या मोन जिल्ह्यात शनिवारी रात्री सुरक्षा दलाच्या जवानांनी एका माहितीच्या आधारे दहशतवादी समजून एका वाहनावर गोळीबार केला. पण या वाहनात दहशतवादी नव्हते, तर कोळसा खाणीत काम करणारे मजूर असल्याचं गोळीबारानंतर लक्षात आलं. या गोळीबारात १३ मजूर ठार झाले. यानंतर संतप्त गावकऱ्यांनी सुरक्षा दलांची वाहनं पेटवून दिली. या घटनेत १ जवान ठार झाला. केंद्रीय गृहमंत्री अमित शहा यांनी या घटनेचा निषेध करत चौकशीचे आदेश दिले. नागालँडच्या मुख्यमंत्र्यांनीही एसआयटी नेमली आहे. दुसरीकडे, लष्कराने कोर्ट ऑप इन्क्वॉयरीचे आदेश दिले आहेत.

दरम्यान, नागालँडमधील गोळीबाराचे पडसाद आज संसदेच्या हिवाळी अधिवेशनात उमटले. विरोधी पक्षांनी या प्रकरणी केंद्रीय गृहमंत्री अमित शहा यांनी स्पष्टीकरण द्यावे, अशी मागणी राज्यसभेत करत गदारोळ केला. विरोधकांच्या गदारोळामुळे राज्यसभेचं कामकाज दुपारी १२ पर्यंत तहकूब करण्यात आलं आहे. नागालँडमधील गोळीबाराची घटना हे अतिशय संवेदनशील प्रकरण आहे. ही घटना दुर्दैवी आहे. ती कशी काय घडली? या प्रकरणी केंद्रीय गृहमंत्र्यांनी संसदेच्या दोन्ही सभागृहांमध्ये स्पष्टीकरण द्यावं, अशी मागणी राज्यसभेतील विरोधी पक्षनेते मल्लिकार्जुन खर्गे यांनी केली.

दुसरीकडे, पंतप्रधान नरेंद्र मोदींनी मंत्रिमंडळातील वरिष्ठ मंत्र्यांसोबत बैठक बोलावली असून यात नागालँडमधील गोळीबाराच्या मुद्द्यावरही चर्चेची शक्यता आहे. नागालँडमधील गोळीबाराच्या घटनेवर केंद्रीय गृहमंत्री अमित शहा हे आज संसदेच्या दोन्ही सभागृहांमध्ये निवेदन देणार आहेत, असं वृत्त एएनआयने दिलं आहे. नागालँड गोळीबाराच्या घटनेप्रकरणी एमआयएमचे नेते खासदार असदुद्दीन ओवेसी यांनी चर्चेची मागणी करत लोकसभेत स्थगन प्रस्ताव मांडला आहे.

The post नागालँड गोळीबार प्रकरणाचे संसदेत पडसाद, अमित शहा देणार स्पष्टीकरण appeared first on थोडक्यात घडामोडी.