भिवंडी : भिवंडी शहरातील हनुमान टेकडी इथं देह व्यापार करणाऱ्या महिलेची शास्त्री नगर येथील इमारतीत तिच्या सोबत राहणाऱ्या प्रियकराने हत्या केल्याची घटना समोर आली आहे. धक्कादायक म्हणजे, हत्या केल्यानंतर मृतदेह कर्नाटक इथं घेऊन जाताना आरोपीला पुण्यात अटक केली आहे.

पोलिसांनी दिलेल्या माहितीनुसार, कविता रामप्पा मादर उर्फ मुस्कान सद्दाम सय्यद (वय 24) असे हत्या झालेल्या महिलेचे नाव आहे. कविता रामप्पा मादर उर्फ मुस्कान सद्दाम सय्यद ही देहव्यापार करणारी महिला त्याच परिसरात राहणाऱ्या सद्दाम शरिफ सय्यद (वय 30) याच्या सोबत प्रेम संबंध असल्याने ते एकत्र राहत होते. हनुमान टेकडी परिसरात पोलीस कारवाई होणार असल्याचे अफवेने येथील महिला रात्री या वस्तीतून बाहेर निघून जात असल्याने कविता ही सुद्धा तिच्यासोबत राहणाऱ्या सद्दाम याच्या शास्त्रीनगर येथील गुलशन अपार्टमेंट या इमारती मधील फ्लॅटमध्ये रात्री राहण्यास गेली होती. कविता दारू पिऊन त्याच्या फ्लॅटवर गेली होती. त्यामुळे यावेळी दोघे बेडरूममध्ये असताना त्यांच्यात वाद झाला. या वादातून सद्दाम याने कविता हीची गळा आणि तोंड दाबून हत्या केली.

22 सप्टेंबर रोजी पहाटे चार वाजेच्या सुमारास कविताची हत्या केल्यानंतर विजापूर येथील कविता हिच्या आजीला तिने आत्महत्या केल्याचे सांगत मृतदेह गावी घेऊन येत असल्याचे सांगितलं. त्यानुसार रुग्णवाहिकेत मृतदेह घेऊन सद्दाम गावी जाण्यास निघाला. परंतु सकाळी कविता वस्तीत न आल्याने तिच्याबद्दल इतर महिलांनी माहिती घेण्याचा प्रयत्न केला असता त्यांना संशय बळावला. महिलांनी या बाबत शहर पोलीस ठाण्यास माहिती दिल्या नंतर वरिष्ठ पोलीस निरीक्षक चेतन काकडे यांनी घटनेचे गांभीर्य ओळखून पोलीस पथकांना कामाला लावून रुग्णवाहिका व तिच्या चालकाचा शोध घेतला.

रुग्णवाहिका पुणे परिसरातून जात असल्याचे समजल्याने पोलिसांनी पुणे नियंत्रण कक्षाशी संपर्क साधून रुग्णवाहिका महामार्गावर नाकाबंदी करीत थांबविली. रुग्णवाहिकेतील मृतदेहाचे पुणे शासकीय रुग्णालयात शवविच्छेदन केले. त्यामध्ये गळा आवळून हत्या झाल्याचे निष्पन्न झाले. तोपर्यंत भिवंडी शहर पोलीस पथक पुणे येथे दाखल होत सद्दामला ताब्यात घेत मृतदेह भिवंडी येथे घेऊन आले आहेत. पोलिसांनी दिलेल्या फिर्यादीवरून कविता हिच्या हत्येचा गुन्हा दाखल करीत प्रियकर सद्दाम शरिफ सय्यद यास अटक केली आहे. या गुन्ह्याचा अधिक तपास वरिष्ठ पो निरी चेतन काकडे हे करीत आहेत.

The post देहव्यापार करणारी प्रेयसी दारू पिऊन घरी आली, प्रियकराने आवळला गळा, आत्महत्येचा बनाव करून मृतदेह परस्पर विल्हेवाट लावण्याचा प्रयत्न पण… appeared first on थोडक्यात घडामोडी.

ठाणे : ठाणे जिल्ह्यातील भिवंडी शहरात रविवारी सकाळी एका शेजारील घराचा भाग कोसळल्याने एका महिलेचा मृत्यू झाला आणि इतर दोन जण जखमी झालेआहेत, याबाबत नागरी अधिकाऱ्यांनी माहिती दिली. ही घटना आज सकाळी सहाच्या सुमारास घडली.

एका मशिदीच्या शेजारी असलेल्या घरावर एकमजली घराची बाल्कनी कोसळली, अशी माहिती ठाणे महापालिकेच्या प्रादेशिक आपत्ती व्यवस्थापन कक्षाचे (RDMC) प्रमुख अविनाश सावंत यांनी दिली. शेजारील घराची बाल्कनी ज्या घरावर कोसळली त्या घरातील रहिवासी गुलशन सगीर अन्सारी (४५) यांचा जागीच मृत्यू झाला. तर सगीर अन्सारी (४५) आणि मेहताब अन्सारी हे दोघे जखमी झाले.

घटनेची माहिती मिळाल्यानंतर, स्थानिक अग्निशमन दलाचे कर्मचारी आणि आरडीएमसीचे एक पथक घटनास्थळी दाखल झाले आणि त्यांनी मदत आणि बचाव कार्य केले. मृतदेह शवविच्छेदनासाठी शासकीय रुग्णालयात पाठवण्यात आला. जखमींना सुरुवातीला स्थानिक रुग्णालयात दाखल करण्यात आले आणि नंतर उपचारासाठी मुंबईतील वैद्यकीय सुविधेत हलवण्यात आले. स्थानिक पोलीस या घटनेचा तपास करत आहेत.

The post भिवंडीत शेजारील घराचा भाग कोसळल्याने एका महिलेचा मृत्यू, 2 जण जखमी appeared first on थोडक्यात घडामोडी.

ठाणे : ठाण्यातील भिवंडी तालुक्यातील वज्रेश्वरी परिसरात एका वृद्ध दाम्पत्याची हत्या झाल्याने एकच खळबळ उडाली आहे. शुक्रवारी मध्यरात्री ही घटना घडली असून, हत्येचे कारण अद्याप अस्पष्ट आहे. पोलिसांनी या प्रकरणी गुन्हा दाखल करून तपास सुरू केला आहे. जगन्नाथ पाटील (८३) आणि सत्यभामा जगन्नाथ पाटील (७५) अशी हत्या झालेल्या वृद्ध व्यक्तींची नावे आहेत.

मिळालेल्या माहितीनुसार, भिवंडी तालुक्यातील तीर्थक्षेत्र वज्रेश्वरी येथील अकलोली परिसरातील पेंढारपाडा येथे हे वृद्ध पती-पत्नी राहत होते. शुक्रवारी मध्यरात्री त्या दोघांचीही धारदार शस्त्राने गळा कापून हत्या करण्यात आली आहे. त्यांच्या घराचा दरवाजा उघडा असल्यामुळे शेजाऱ्यांनी आत जाऊन बघितले असता त्यांना धक्का बसला. दोघे वृद्ध पती-पत्नी घरात रक्ताच्या थारोळ्यात पडलेले होते. शेजाऱ्यांनी तात्काळ पोलिसांना माहिती दिली. पोलिसांनी घटनास्थळी धाव घेत तपास सुरु केला. पोलिसांनी अज्ञात मारेकऱ्याविरोधात गुन्हा दाखल केला.

पोलिसांनी या घटनेचा तपास सुरू केला आहे. वृद्ध महिलेच्या अंगावरील दागिने तसेच होते. चोरीच्या उद्देशाने दरोडेखोर किंवा चोरट्यांनी ही हत्या केली नसून, ओळखीच्या व्यक्तीनेच हे कृत्य केले असावे, असा अंदाज पोलिसांनी व्यक्त केला आहे. मात्र या दाम्पत्याची हत्या का करण्यात आली याचे कारण अद्याप स्पष्ट झालेले नाही.

The post वृद्ध दाम्पत्याच्या हत्याकांडाने ठाण्यात खळबळ, धारदार शस्त्राने गळा कापून हत्या appeared first on थोडक्यात घडामोडी.

ठाणे : भिवंडी शहरातील अवचित पाडा परिसरात असलेल्या भंगार गोदामांना मध्यरात्रीच्या सुमारास भीषण आग लागली. या आगीत एकूण 15 भंगार गोदामे जळून खाक झाली आहेत. या भंगार गोदामात कापड, चिंध्या, पुठ्ठे, प्लस्टिक, तागे, पीओपी आणि इतर भंगार साहित्य मोठ्या प्रमाणात ठेवण्यात आले होते. या आगीचे नेमके कारण समजले नाही. सुदैवाने या आगीत कोणत्याही प्रकारची जीवितहानी झालेली नाही.

गोदामांना आग लागल्याची माहिती मिळताच अग्निशमन दलाच्या तीन गाड्या घटनास्थळी दाखल झाल्या होत्या. या भंगार गोदामांच्या आजूबाजूला रहिवासी घरे आणि यंत्रमाग कारखाने आहेत, त्यामुळे परिसरात भीतीचे वातावरण निर्माण झाले होते. परिसरात धुराचे लोट निर्माण झाल्यामुळे आजूबाजूच्या नागरिकांना त्रास सहन करावा लागला. अग्निशमन दलाच्या जवानांनी तब्बल चार तास युद्धपातळीवर प्रयत्न करून ही आग आटोक्यात आणली आणि आगीवर नियंत्रण मिळवले. परंतु, या आगीत 15 भंगार गोदामे जळून खाक झाली.

The post भिवंडीत भंगार गोदामांना भीषण आग, 15 गोदामं जळून खाक appeared first on थोडक्यात घडामोडी.

भिवंडी: भिवंडीमध्ये पटेल कंपाउंड परिसरात मध्यरात्री साडेतीनच्या सुमारास तीन मजली इमारत कोसळली. ही इमारत जिलानी अपार्टमेंट या नावाने ओळखली जात होती. जिलानी अपार्टमेंट १९८४ मध्ये बांधण्यात आली होती. इमारतीत तीन मजले आणि २१ फ्लॅट (२१ घरे) आहेत. इमारत रात्री कोसळली, त्यावेळी सर्व घरात रहिवासी झोपलेले होते. या दुर्घटनेत आठ जणांचा मृत्यू झाला. इमारतीच्या ढिगाऱ्याखाली आणखी २० ते २५ जण दबले असल्याचा प्राथमिक अंदाज आहे.

घटनास्थळी मदतकार्य सुरू आहे. स्थानिकांनी २० जणांना ढिगाऱ्यातून बाहेर काढून वाचवले. मात्र आणखी काहीजण ढिगाऱ्यात अडकल्याची शक्यता आहे. एनडीआरएफ, अग्नीशमन दल, पोलीस, वैद्यकीय पथक आणि स्थानिक नागरिक मदतकार्यात गुंतले आहेत.

The post भिवंडीत पटेल कंपाउंड परिसरात तीन मजली इमारत कोसळली, ८ ठार appeared first on थोडक्यात घडामोडी.