मुंबई : अण्णासाहेब पाटील आर्थिक मागास विकास महामंडळ, महाराष्ट्र राज्य इतर मागासवर्गीय वित्त आणि विकास महामंडळ, वसंतराव नाईक विमुक्त जाती व भटक्या जमाती विकास महामंडळामध्ये वैयक्तिक व गट कर्ज व्याज परतावा योजनेच्या लाभार्थी महिलांना व्यवसाय सुरू करणे व आर्थिकरित्या सक्षम करण्यासाठी विशेष कर्ज धोरण राबविण्यात येत आहे. या कर्ज योजनेशी सांगड घालण्यासाठी महामंडळांनी मुंबई जिल्हा मध्यवर्ती सहकारी बँकेशी करार करावा, असे निर्देश महिला व बालविकास मंत्री आदिती तटकरे यांनी दिले.

मुंबई बँकेने सुरू केलेल्या विशेष कर्ज योजना, अंगणवाडी बांधकाम संदर्भात मंत्रालयात आयोजित बैठकीत मंत्री आदिती तटकरे बोलत होत्या. यावेळी मुंबई बँकेचे अध्यक्ष प्रवीण दरेकर, आमदार चित्रा वाघ, अण्णासाहेब पाटील आर्थिक मागास विकास महामंडळाचे अध्यक्ष नरेंद्र पाटील, सहसचिव वि. रा. ठाकूर, वित्त विभागाच्या सहसचिव स्मिता निवतकर, सहसचिव मु. प्र. साबळे, वसंतराव नाईक विमुक्त जाती व भटक्या जमाती विकास महामंडळाचे व्यवस्थापकीय संचालक प्रताप पवार, महाराष्ट्र राज्य इतर मागासवर्गीय वित्त आणि विकास महामंडळाचे महाव्यवस्थापक आनंद लोमटे आदी उपस्थित होते.

मंत्री तटकरे म्हणाल्या की, मुंबई बँकेला व्याज परतावा योजनांसाठी प्राधिकृत करून तातडीने सामंजस्य करार करावा. महामंडळाच्या व्याज परतावा योजनेच्या लाभार्थी महिलांना लाडकी बहीण योजनेअंतर्गत लाभ देण्यात येणार असल्याने यांना अपात्र ठरवता येणार नाही. यासंदर्भात विशेष सूचना जारी करण्यात याव्यात. या योजनेच्या माध्यमातून मुंबईतील पात्र महिलांना आर्थिकरित्या सक्षम करण्यास सहकार्य लाभणार आहे.

मुंबई बँकेच्या या उपक्रमांतर्गत महिलांना एक लाख रुपयांपर्यंत कर्ज मिळणार आहे. यामध्ये ५ ते १० महिला एकत्र येऊन व्यवसाय करू शकतात. ₹१०,००० ते ₹१,००,००० पर्यंत कर्ज उपलब्ध करण्यात येणार आहे, असे मुंबई बँकेचे अध्यक्ष प्रवीण दरेकर यांनी सांगितले. मुंबई बँकेची मुंबईत एकूण १६.०७ लाख बचत खाती आहेत. त्यापैकी ‘माझी लाडकी बहीण योजना’ अंतर्गत ५३,३५७ महिलांची झिरो बॅलन्स खाती उघडली. पात्र महिलांना शासनाकडून दरमहा ₹१५०० थेट खात्यात जमा होत आहेत.

अंगणवाडी बांधकामात एकसमानता व आधुनिक तंत्राचा वापर आवश्यक
राज्यातील अंगणवाड्यांच्या बांधकामात एकसमान पद्धत असावी तसेच आधुनिक तंत्राचा वापर करून अंगणवाड्या उभाराव्यात असे निर्देश मंत्री तटकरे यांनी दिले. अंगणवाड्या उभारताना राज्यभर एकच पद्धत वापरावी तसेच आधुनिक तंत्राचा वापर करावा. वीज पुरवठा करताना ऊर्जा बचतीसाठी सोलार प्रकल्पाला प्राधान्य द्यावे. तसेच अंगणवाडीमध्ये पुरवठा करण्यात येणाऱ्या पोषण आहाराची गुणवत्ता वाढावी, यासाठी तातडीने उपाययोजना आखाव्यात. बालकांच्या सर्वांगिण विकासासाठी अंगणवाडी महत्त्वपूर्ण भूमिका बजावत असताना त्यांचे आरोग्य आणि शिक्षण उत्तम दर्जाचे देण्यासाठी शासन प्रयत्नशील असल्याचेही त्या म्हणाल्या.

The post महिलांच्या आर्थिक सक्षमीकरणासाठी विशेष कर्ज धोरण योजनेचा लाभ द्या – मंत्री आदिती तटकरे appeared first on थोडक्यात घडामोडी.

पुणे : देहूतल्या कार्यक्रमात उपमुख्यमंत्री अजित पवारांना बोलू न देणे हा महाराष्ट्राचा अपमान आहे, अशी प्रतिक्रिया राष्ट्रवादीच्या खासदार सुप्रिया सुळे यांनी व्यक्त केली. देहूमध्ये आज पंतप्रधान नरेंद्र मोदी यांच्या हस्ते संत तुकाराम महाराज यांच्या शिळा मंदिराचा लोकार्पण सोहळा पार पडला. या सोहळ्यानंतर पंतप्रधान नरेंद्र मोदी आणि विरोधी पक्षनेते देवेंद्र फडणवीस या कार्यक्रमात बोलले. मात्र, अजित पवारांना बोलण्याची संधी मिळाली नाही. हा महाराष्ट्राचा अपमान आहे, अशी प्रतिक्रिया सुप्रिया सुळे यांनी दिली आहे.

देहू येथील पंतप्रधान मा.नरेंद्रजी मोदी (@narendramodi) यांच्या कार्यक्रमात विरोधी पक्षनेते देवेंद्र फडणवीस(@Dev_Fadnavis) यांना बोलण्याची संधी दिली.परंतु राज्याचे उपमुख्यमंत्री तथा पुण्याचे पालकमंत्री अजितदादा पवार (@AjitPawarSpeaks)यांना बोलू दिले नाही.हा महाराष्ट्राचा अपमान आहे

— Supriya Sule (@supriya_sule) June 14, 2022

सुप्रिया सुळे म्हणाल्या की, अजित पवार हे पुण्याचे पालकमंत्री आहेत. ज्या जिल्ह्यात पंतप्रधान जातात तेथील पालकमंत्र्याला त्यांच्यासोबत राहावे लागते तो या देशाचा प्रोटोकॉल आहे. त्यामुळे अजित दादांचे हे कर्तव्य आहे. पण त्या कार्यक्रमात अजित दादांना बोलू न देणे हे मला अयोग्य वाटले. अजित पवारांच्या कार्यालयाने पीएम ऑफिसला विनंती केली होती की, अजित पवारांना भाषण करायचे आहे. दादा हे राज्याचे उपमुख्यमंत्री तसेच जिल्ह्याचे पालकमंत्री असल्याने हा त्यांचा अधिकार आहे. मात्र, पीएम कार्यालयाने अजित दादांच्या भाषणाला परवागणी दिली नाही, हे गंभीर असल्याचे सुप्रिया सुळे यांनी म्हटले आहे.

देहू संस्थानकडून संत तुकाराम महाराजांच्या शिळा मंदिराच्या लोकार्पण सोहळ्याचा कार्यक्रम आयोजित करण्यात आला होता. यावेळी जेव्हा फडणवीसांचे भाषण झाले, त्यानंतर सुत्रसंचालन करणाऱ्या व्यक्तीने थेट पंतप्रधान मोदींना भाषण करण्यासाठी सांगितले. त्यामुळे अजित पवारांना भाषण करता आले नाही. यावेळी मोदींनी ‘अजितदादांना बोलू द्या’, असा इशारा केला. पण अजितदादांनी ‘तुम्ही बोला’ म्हणत मोदींना खुणावलं. कार्यक्रमाच्या सूत्रसंचालकाने थेट मोदींचं नाव घेतल्याने ते भाषणासाठी डायसकडे गेले.

पंतप्रधान मोदी यांनी माफी मागावी – अमोल मिटकरी
प्रधानमंत्री हे पद संवैधानिक आहे, त्या प्रोटोकॉलनुसार स्थानिक पालकमंत्री म्हणजे अजित पवारांना त्यांच्या स्वागतासाठी जाणे अपेक्षित आहे आणि ते गेले देखील. मात्र, असे असताना त्या प्रोटोकॉलमध्ये संवैधानिक पदावर मोदी आणि अजित पवार देखील आहेत. अजित पवारांना जर जाणिवपूर्वक डावलले असेल तर हा महाराष्ट्राचा अपमान आहे. हा संविधानिक पदाचा अपमान आहे, मोदीजी चूक दुरुस्त करा, अशी मागणी राष्ट्रवादीचे आमदार अमोल मिटकरी यांनी केली आहे. धार्मिक ठिकाणी जर राजकारण करत असाल तर वारकरी सांप्रदाय व महाराष्ट्रातील जनता हे कधीच खपवुन घेणार नाही, असेही ते म्हणाले.

वारकर्‍यांच्या आनंदात मिठाचा खडा टाकू नका – प्रवीण दरेकर

प्रवीण दरेकर म्हणाले कि, “पंतप्रधान नरेंद्र मोदी यांनी आज जगदगुरु तुकाराम महाराज यांच्या शिळामंदिराचे लोकार्पण करून महाराष्ट्राचा, वारकरी परंपरेचा गौरव केला असताना काहींच्या पोटात दुखण्याचे कारण काय? वारकर्‍यांचा सन्मान झाला, म्हणून महाराष्ट्राच्या अपमानाचा कांगावा कशाला? राष्ट्रवादी काँग्रेसला लाज वाटली पाहिजे. भाषणे कुणाची व्हावीत आणि कुणाची नाहीत, यापेक्षा आमच्यासाठी वारकर्‍यांचा सन्मान अधिक महत्त्वाचा आहे. तो होतोय, याचा अधिक आनंद आहे. वारकर्‍यांच्या आनंदात मिठाचा खडा टाकू नका, ही माझी विनंती आहे.”

राष्ट्रवादी काँग्रेसला लाज वाटली पाहिजे.
भाषणे कुणाची व्हावीत आणि कुणाची नाहीत, यापेक्षा आमच्यासाठी वारकर्‍यांचा सन्मान अधिक महत्त्वाचा आहे. तो होतोय, याचा अधिक आनंद आहे. वारकर्‍यांच्या आनंदात मिठाचा खडा टाकू नका, ही माझी विनंती आहे. (2/2)@NCPspeaks#Maharashtra

— Pravin Darekar – प्रविण दरेकर (@mipravindarekar) June 14, 2022

The post देहूमध्ये अजित पवारांना बोलू न देणे हा महाराष्ट्राचा अपमान असल्याची सुप्रिया सुळेंची प्रतिक्रिया, प्रवीण दरेकरांनी केली ‘ही’ विनंती appeared first on थोडक्यात घडामोडी.

मुंबई : मुंबई बँक बोगस मजूर प्रकरणात गुन्हा दाखल झाल्यानंतर आज विधानपरिषदेचे विरोधी पक्षनेते प्रवीण दरेकर यांना अटक होण्याची शक्यता आहे. मात्र न्यायालयाच्या आदेशामुळे दरेकर यांची तात्काळ जामिनावर सुटका होणार आहे.

आम आदमी पक्षाचे महाराष्ट्र सचिव धनंजय शिंदे यांच्या तक्रारीवरून माता रमाबाई आंबेडकर पोलीस ठाण्यात दरेकर यांच्याविरोधात पोलिसांनी एफआयआर नोंदवला होता. प्रत्यक्षात मजूर नसतानाही बनावट कागदपत्रांच्या आधारे मजूर असल्याचं दाखवून आणि १९९९ पासून २०२१ पर्यंत मुंबै बँकेच्या संचालक मंडळावर मजूर प्रवर्गातून निवडून येऊन नागरिकांबरोबरच सरकारचीही फसवणूक केली, अशा आरोपाखाली प्रवीण दरेकर यांच्यावर गुन्हा दाखल करण्यात आला होता. मात्र न्यायालयाने या प्रकरणात अटक झाल्यास दरेकर यांची जामिनावर सुटका करण्यात यावी, असा निर्णय दिल्यामुळे दरेकर यांना दिलासा मिळाला आहे.

The post बोगस मजूर प्रकरणात प्रवीण दरेकर यांना अटक होण्याची शक्यता appeared first on थोडक्यात घडामोडी.

मुंबई : मुंबै बँक बोगस मजूर प्रकरणात विधानपरिषदेचे विरोधी पक्षनेते प्रवीण दरेकर यांची आज मुंबईतील रमाबाई आंबेडकर पोलीस स्टेशनमध्ये सुमारे चार तास चौकशी करण्यात आली. यादरम्यान त्यांना विविध प्रश्न विचारले. चौकशी संपल्यानंतर माध्यमांशी बोलताना त्यांनी चौकशीचा तपशील सांगितला तसंच सरकारचा पोलिस अधिकाऱ्यांवर दबाव असल्याचा आरोप केला.

चौकशीदरम्यान अधिकाऱ्यांनी विचारलेल्या प्रश्नांची मी सगळी उत्तरं दिली. पोलिसांनी पाहिजे असलेली सगळी माहिती दिली. पण पोलिसांवर सरकारचा प्रचंड दबाव असल्याचं प्रत्येक क्षणी जाणवत होतं. गुन्ह्याशी संबंधित जी जी माहिती विचारली गेली, त्या सर्व प्रश्नांची मी माहिती दिली. काही राज्यस्तरीय फेडरेशनचे प्रश्न विचारले गेले, काही बँकिंगचे प्रश्न विचारले गेले. पण मी मला माहिती असलेली सगळी उत्तरं दिली, असं प्रवीण दरेकर यांनी सांगितलं.

अधिकारी प्रश्न विचारत असताना त्यांच्यावर सरकारचा दबाव असल्याचं चौकशी अधिकाऱ्यांच्या प्रश्नांमधून जाणवत होतं. विषय छोटा आहे, परंतु त्याला ताणून मी अधिकाधिक कसा अडकेन, हा राज्य सरकारचा प्रयत्न असल्याचं दिसतंय. अधून मधून अधिकाऱ्यांना कुणाचे तरी फोन येत होते, ते कुणाचे फोन होते, ते मला माहिती नाही. पण मला अडकवण्यासाठी सरकार पोलिसांचा नाहक वापर करतंय. मी पोलिसांना सांगितलं, जेव्हा जेव्हा आपण मला चौकशीला बोलवाल, तेव्हा तेव्हा मी हजर राहिन. राज्याचा विरोधी पक्षनेता असल्याने मला पोलिस प्रोटेक्शन आहे. त्यामुळे घाबरण्याचा प्रश्नच नाही, असंही दरेकर म्हणाले.

काय आहे प्रकरण :
आम आदमी पक्षाचे नेते धनंजय शिंदे यांनी दरेकर यांच्या विरोधात प्रतिज्ञा मजूर सहकारी संस्थेचे सदस्य होण्यासाठी काही कागदपत्रे बनावट असल्याचा आरोप करत पोलिसांनी त्यांच्याविरुद्ध एफआयआर दाखल केला होता. आज चौकशीसाठी हजर राहण्याची नोटीस पाठवली होती. ते म्हणणे नोंदवण्यासाठी आज एमआरए मार्ग पोलिस ठाण्यात पोहोचले. मुंबईतील माता रमाबाई आंबेडकर पोलीस ठाण्यात त्यांची तीन तास चौकशी करण्यात आली.

The post प्रवीण दरेकरांची ४ तास चौकशी, पोलिसांवर राज्य सरकारचा प्रचंड दबाव, नियमबाह्य प्रश्न विचारले, दरेकरांचा आरोप… appeared first on थोडक्यात घडामोडी.

राज्यपाल भगतसिंग कोश्यारी यांच्या हवाई प्रवासाला मुख्यमंत्री कार्यालयाने परवानगी नाकारल्याचं समोर आलं आहे. विशेष म्हणजे, राज्यपाल कोश्यारी विमानात बसल्यानंतर त्यांना परवानगी नसल्याचं कळलं. त्यामुळे राज्यपालांना विमानातून उतरुन परत राजभवनावर यावं लागलं.

मुख्यमंत्री कार्यालयाने परवानगी नाकारली, विमानात बसलेल्या राज्यपालांना खाली उतरावं लागलं

देवेंद्र फडणवीस यांची प्रतिक्रिया :

देवेंद्र फडणवीस यांनी यावर प्रतिक्रिया देताना म्हटलं कि, “हा सगळा प्रकार दुर्दैवी आहे. कुणाची खासगी मालमत्ता नाही. राज्यपाल या राज्याचे प्रमुख आहेत. ते मुख्यमंत्री आणि मंत्रिमंडळ अपॉईंट करतात. राज्यपालांना कुठे जायचं असेल तर ते GAD ला पत्र लिहितात, ते त्याबाबत ऑर्डर काढतात. मी माहिती काढली, कालच GAD ला परवानगी दिली होती. मुख्यमंत्र्यांपर्यंतही हे पत्र पोहोचलं. पण तरीही परवानगी नाकारली. महाराष्ट्राच्या इतिहासातलं इगो असलेलं सरकार मी पाहिलं नव्हतं, आपण कुणाचा अपमान करतोय, हे कळालं पाहिजे, राज्यपाल संविधानिक पद आहे, असं देवेंद्र फडणवीस म्हणाले.

उपमुख्यमंत्री अजित पवार यांची प्रतिक्रिया :

उपमुख्यमंत्री अजित पवार म्हणाले कि, “राज्यपाल प्रकरणावर मला काहीही माहिती नाही. मला आत्ताच याबद्दल कळालं. मी अधिकाऱ्यांकडून माहिती घेऊन सांगेन. काय नक्की घडलं हे पूर्ण माहिती झाल्याशिवाय सांगता येणार नाही.”

प्रवीण दरेकर यांची प्रतिक्रिया :

प्रवीण दरेकर यांनी घणाघाती टीका करत म्हटलं कि, “सूडभावनेचा अतिरेक झालाय. एव्हढं सूडभावनेने वागणारं सरकार आजपर्यंत पाहिलं नाही. राजकारण आणि सूडभावना समजू शकतो. पण राज्यपाल हे संविधानिक पद आहे, त्याची गरिमा राखली पाहिजे. मात्र सूडभावना किती नसानसात भरली आहे, हे ठाकरे सरकारने दाखवून दिलं आहे. सगळ्या प्रथा, परंपरा या सर्वांना हरताळ भासण्याचं काम या सरकारने केलं.

शिवसेना खासदार विनायक राऊत यांची प्रतिक्रिया :

राज्यपालांना अद्यापही महाराष्ट्र सरकारचे विमान वापरण्याची परवानगी दिली नव्हती. त्यांनी परवानगी मागितली होती. पण ते विमान उड्डाणास सक्षम आहे की नाही यासंदर्भात पुरेपूर माहिती नव्हती. त्यामुळे कदाचित परवानगी दिली नसेल. परवानगी नसताना तांत्रिकदृष्ट्या प्रवास करणे योग्य नाही. मी अधिक माहिती नक्की घेईन. आम्ही महाविकास आघाडी सरकारने राज्यपालांचा नेहमीच आदर केला आहे. त्यांचा अवमान कदापिही होणार नाही, असं शिवसेना खासदार विनायक राऊत म्हणाले.

The post आपण कुणाचा अपमान करतोय, हे कळालं पाहिजे, राज्यपालांना परवानगी नाकारल्याने उमटल्या प्रतिक्रिया appeared first on थोडक्यात घडामोडी.

मुंबई : खासदार संजय राऊत यांचं वक्तव्य बेताल आणि बेजाबदार आहे. न्यायालयाने काय केलं पाहिजे ते संजय राऊत सांगत आहेत, हे दुर्दैव आहे. संजय राऊत यांच्यावर न्यायालयीन कारवाई करण्याची गरज आहे, असं भाजप नेते प्रवीण दरेकर यांनी म्हटलं आहे.

मेट्रो कारशेडचा विषय विरोधी पक्षानं राजकीय केला असून त्यात न्यायालयाने पडू नये आणि ते योग्य आहे. अशी टीका करतानाच राऊत यांनी न्यायालयाच्या कामकाजावर टिपण्णी केली आहे. संजय राऊत यांनी केलेल्या या टीकेला भाजपनं जोरदार प्रत्युत्तर दिलं आहे. भाजप नेते प्रवीण दरेकर यांनी थेट त्यांच्यावर न्यायालयीन कारवाई करण्याची मागणी केली आहे.

‘संजय राऊत यांनी न्यायालयावर टीका करत न्यायालयाने काय करावं असं मार्गदर्शनच ते करु लागले आहेत. हा एक प्रकारे न्यायालयावरील अविश्वास असून हे लोकशाहीसाठी घातक आहे. न्यायालय कोणत्याही सरकारच्या आदेशावर चालत नसतं. कोर्टावर कोणताही आरोप करणं म्हणजे न्यायालयाचा अवमान आहे. त्यामुळं राऊत यांच्यावर न्यायालयीन कारवाई करण्याची गरज आहे,’ असं दरेकर म्हणाले.

‘सामनाच्या अग्रलेखातून बेजबाबदार टीका केली तसंच, नेत्यांवर आक्षेप घेतले ते आपण राजकीय टीका-टिप्पणी म्हणून समजून घेऊ. परंतु, या देशात बाबासाहेब आंबेडकरांनी सर्वोच्च न्यायव्यवस्था केली आहे. या न्यायव्यवस्थेच्या बाबतीत असे आक्षेप घेतले जात असतील तर यापेक्षा दुर्देव काय असू शकतं. त्यामुळं यात न्यायव्यवस्थेनं दखल घेण्याची गरज आहे,’ अशी मागणी त्यांनी केली.

खासदार @rautsanjay61 अहंकारातून बोलतं असून,अत्यंत बेताल आणि बेजबाबदार वक्तव्य करत आहेत.न्यायालयाने काय केलं पाहिजे? हे ते सांगतायत. जो की न्याय व्यवस्थेवरचा अविश्वास आहे. तसेच राज्यात अघोषित आणीबाणी असताना लोकशाहीसाठी हा प्रकार घातक आहे. @BJP4Maharashtra @TV9Marathi @TheMahaMTB pic.twitter.com/tC9gxmn6W8

— Pravin Darekar – प्रविण दरेकर (@mipravindarekar) December 17, 2020

The post न्यायालयाने काय करावं हे सांगणं दुर्दैव, संजय राऊत यांच्यावर न्यायालयीन कारवाईची गरज appeared first on थोडक्यात घडामोडी.

मनी लाँड्रिंग प्रकरणी ईडीने सरनाईक यांच्या निवासस्थानी आणि कार्यालयांवर छापे मारले आहेत. मुंबई आणि ठाण्यातील ठिकाणांवर झाडाझडती घेतली जात आहे. प्रामुख्याने बांधकाम क्षेत्र व निवासी संकुलांशी संबंधित विविध प्रकल्पांत गैरव्यवहार झाल्याचा संशय आहे. या प्रकरणावरुन राजकीय आरोप प्रत्यारोपही सुरु झाले आहे. प्रताप सरनाईक घरी नाहीत हे पाहून धाड टाकलीये. ही नामर्दानगी आहे, असा गंभीर आरोप संजय राऊत यांनी केला होता. राऊतांच्या या आरोपांवर भाजप नेते प्रवीण दरेकर यांनी उत्तर दिलं.

‘शिवसेनेच्या आरोपांना उत्तर देतांना प्रवीण दरेकर यांनी ट्विट केलं आहे. प्रताप सरनाईक घरी नसताना ईडीने धाड टाकली, यात कसली मर्दानगी, असं म्हणणाऱ्या संजय राऊत यांना विचारलं पाहिजे, एक महिला घरी नसताना. सर्व लवाजमा आणि फौजफाटा घेऊन तिचं ऑफिस उद्ध्वस्त केलं, यात कोणती मर्दानगी,’ असा पलटवार प्रवीण दरेकर यांनी केला आहे.

“प्रताप सरनाईक घरी नसताना ईडीने धाड टाकली,यात कसली मर्दानगी”,असं म्हणणाऱ्या @rautsanjay61यांना विचारलं पाहिजे,एक महिला घरी नसताना…सर्व लवाजमा आणि फौजफाटा घेऊन तिचं ऑफिस उद्ध्वस्त केलं, यात कोणती मर्दानगी होती?@BJP4Maharashtra @TV9Marathi @abpmajhatv @TheMahaMTB

— Pravin Darekar – प्रविण दरेकर (@mipravindarekar) November 24, 2020

संजय राऊत यांनी म्हटलं होतं कि, प्रताप सरनाईक यांनी गेल्या काही काळात अर्णव गोस्वामी, कंगना राणावत व अन्वय नाईक ही प्रकरणं सरनाईक यांनी लावून धरली. त्या आकसातूनच त्यांच्यावर कारवाई केली जात आहे. पण आम्ही पर्वा करत नाही. आम्ही कोणाच्या बापाला भीत नाही. नोटिसा कसल्या पाठवता? घरी या. अटक करायची तर अटक करा. प्रताप सरनाईक घरी नाहीत हे पाहून धाड टाकलीय. ही नामर्दानगी आहे. भाजपनं सरळ लढावी. शिखंडीसारखं ईडी, सीबीआयचा वापर करून लढत असलात तरी विजय आमचाच होईल.

The post ‘यात कसली मर्दानगी’ म्हणणाऱ्या संजय राऊत यांच्यावर भाजपचा पलटवार appeared first on थोडक्यात घडामोडी.