मुंबई : जलसंपदा (विदर्भ, तापी, कोकण खोरे विकास महामंडळ) व आपत्ती व्यवस्थापन मंत्री गिरीश महाजन यांनी मुख्यमंत्री सहायता निधीसाठी वर्षभराचे संपूर्ण वेतन रुपये ३१ लाख १८ हजार २८६ इतक्या रकमेचा धनादेश मुख्यमंत्री देवेंद्र फडणवीस यांच्याकडे सुपूर्द केला.

राज्यात मुसळधार पाऊस व महापुरामुळे शेती आणि मालमत्तेचे मोठ्या प्रमाणावर नुकसान झाले आहे. बाधित नागरिकांना मदत पुरविण्यासाठी मुख्यमंत्री सहायता निधीतून अर्थसहाय्य दिले जात आहे. या पार्श्वभूमीवर जलसंपदा मंत्री गिरीश महाजन यांनी स्वतःचा वर्षभराचा पगार मदतीसाठी देण्याचा निर्णय घेतला. जलसंपदा मंत्री गिरीश महाजन यांनी मंत्रीपदाची शपथ घेतल्यापासून डिसेंबर २०२४ ते नोव्हेंबर २०२५ या कालावधीतील संपूर्ण वेतन मुख्यमंत्री सहायता निधीस दिले आहे.

आपत्ती व्यवस्थापन मंत्री म्हणून त्यांनी जालना, बीड, छत्रपती संभाजीनगर, धाराशिव, सोलापूर, जळगाव आणि नाशिक जिल्ह्यांतील पूरग्रस्त भागांना भेट देऊन नुकसानीचा आढावा घेऊन राज्य शासन शेतकऱ्यांच्या आणि जनतेच्या पाठीशी खंबीरपणे उभे असल्याची हमी त्यांनी या आपत्तीग्रस्तांना दिली. राज्यात मुसळधार पावसामुळे आणि महापुरामुळे मोठ्या प्रमाणावर नुकसान झाले असून या आपत्तीग्रस्तांना शासन मदत करत आहे. शासनाच्या मदतीसोबत गिरीश महाजन यांनी वर्षभराचे वेतन मुख्यमंत्री सहायता निधीस दिले आहे.

The post जलसंपदा मंत्री गिरीश महाजन यांच्याकडून वर्षभराचे वेतन मुख्यमंत्री सहायता निधीस appeared first on थोडक्यात घडामोडी.

पुणे : सणसर गावात झालेल्या अतिवृष्टीच्या पार्श्वभूमीवर राज्याचे कृषिमंत्री दत्तात्रय भरणे यांनी भेट देऊन नुकसानीची पाहणी केली; पूरग्रस्त भागातील नागरिकांशी संवाद साधून त्यांना धीर दिला. प्रशासनाने तालुक्यात झालेल्या नुकसानाचे पंचनामे करुन बाधितांना तातडीची मदत करण्याचे त्यांनी निर्देश दिले.

अतिवृष्टीमुळे निर्माण झालेल्या नैसर्गिक आपत्तीची माहिती मंत्री भरणे यांनी उपविभागीय अधिकारी वैभव नावडकर यांच्याकडून घेऊन ते म्हणाले, सणसर येथील ओढ्याला पूर येऊन लोकवस्तीत पाणी शिरल्याने गावकऱ्यांना मोठ्या अडचणींना सामोरे जावे लागले. मोठ्या प्रमाणात पाणी शिरलेल्या वस्त्यांतील नागरिकांना मदत करण्यासाठी सर्व विभागांनी समन्वयाने कामे करावी.

पुरामुळे झालेल्या नुकसानीचा पंचनामा करण्याचे काम प्रशासनाकडून सुरू असून ते लवकरात लवकर पूर्ण करावे. नागरिकांची ओढा खोलीकरणाची मागणी विचारात घेता, त्यांना होणारा त्रास कमी करण्याकरिता प्रशासनाने लवकरात लवकरात ओढ्याचे खोलीकरण काम करण्याची कार्यवाही करावी, असे निर्देश मंत्री भरणे यांनी दिले.

यावेळी तहसीलदार जीवन बनसोडे, गटविकास अधिकारी सचिन खुडे, तालुका कृषी अधिकारी दीपक गरगडे, संबंधित विभागाचे अधिकारी, स्थानिक लोकप्रतिनिधी, नागरिक उपस्थित होते.

The post कृषिमंत्री दत्तात्रय भरणे यांच्याकडून सणसर येथील नुकसानग्रस्त भागाची पाहणी appeared first on थोडक्यात घडामोडी.

लोणी : कोकण आणि परिसरातील नागरीकांच्या मदतीसाठी भाजपा नेते आ. राधाकृष्ण विखे पाटील यांच्या आवाहनाला प्रतिसाद म्हणून भाजयुमोचे उपाध्यक्ष राहूल घोगरे यांनी आपल्या वाढदिवसानिमित्त ११ हजार रूपयांची रक्कम मदतनिधीस सुपूर्द केली.

कोकणामध्ये मोठ्या प्रमाणात पावसाने झालेल्या नूकसानीत तिथल्या नागरीकांचे मोठ्या प्रमाणात नूकसान झाले. या नागरीकांना दिलासा देण्यासाठी शिर्डी मतदारसंघातील नागरीक आणि कार्यकर्त्यांनी गावपातळीवर पुढाकार घेण्याचे आवाहन भाजपा नेते आ.राधाकृष्ण विखे पाटील यांनी केले. याचाच एक भाग म्हणून आ. विखे पाटील यांनी आपले स्वतःचे एक महीन्याचे वेतन या मदतनिधीस देण्याचे जाहीर केले.

आ. विखे पाटील यांनी केलेल्या आवाहनाला प्रतिसाद म्हणून स्थानिक कार्यकर्त्यांनी पुढाकार घेतला आहे. भारतीय जनता युवा मोर्चाचे उतर नगर जिल्ह्याचे उपाध्यक्ष राहूल घोगरे यांनी आपल्या वाढदिवसानिमित्त ११ हजार रूपयांची रक्कम कोकण येथील पूरग्रस्तांसाठी आ. विखे पाटील यांच्याकडे सुपूर्त केली. याप्रसंगी भाजयुमोचे सचिव सचिन शिंदे शरद आहेर एस पी आहेर बंटी आहेर रविंद्र गाढे, महेश लोखंडे आदी उपस्थित होते.

कोकण आणि इतरही काही जिल्ह्यांमध्ये अतिवृष्टीमुळे मोठे नूकसान झाले आहे. या भागातील नागरीकांना माणूसकीच्या भूमिकेतून मदत करण्यासाठी प्रत्येकाने पुढे येण्याचे आवाहन आ. विखे पाटील यांनी पदाधिकारी कार्यकर्ते आणि नागरीकांना केले आहे.

The post भारतीय जनता युवा मोर्चाचे उपाध्यक्ष राहूल घोगरे यांच्या कडून पूरग्रस्तांसाठी मदतनिधी सुपूर्द appeared first on थोडक्यात घडामोडी.