लोणावळा : पवना धरणात पोहण्यासाठी गेलेल्या एका पर्यटकाचा बुडून मृत्यू झाल्याची दुर्दैवी घटना घडली आहे. या तरुणाला पाण्याच्या खोलीचा अंदाज न आल्याने त्याचा धरणाच्या पाण्यात बुडून मृत्यू झाला. ही घटना आज (११ जुलै) दुपारी २ वाजण्याच्या सुमारास वाघेश्वर मंदिर परिसरात घडली. शुभम सुरेश दुधाळ (वय- २१, पुणे) असे धरणात बुडून मृत्यू झालेल्या तरूणाचे नाव आहे.

मिळालेल्या माहितीनुसार, शुभम आणि त्याचा भाऊ संकेत यांच्यासह सहा मित्र रविवारी सकाळी तुंग किल्ला येथे फिरण्यासाठी गेले होते. त्यानंतर ते दुपारी १२ च्या सुमारस पवना धरणातील श्री. वाघेश्वर मंदिर येथे दर्शनासाठी आले. मंदिरात दर्शन घेतल्यानंतर ते पवनाधरणात पोहण्यासाठी गेले. मात्र, पोहत असताना शुभम पाण्यात बुडाला. त्याला बुडताना बघून त्याच्या मित्रांनी घाबरून आरडाओरडा केला. पण त्याचा काहीच उपयोग झाला नाही. या घटनेची माहिती तात्काळ लोणावळा ग्रामीण पोलिसांना देण्यात आली. माहिती मिळताच पोलिसांनी घटनास्थळी जाऊन स्थानिक युवक रोहित उर्फ छोट्या जाधव, अक्षय उंबरकर, रमेश गोणते, तानाजी घारे यांच्या मदतीने शोधकार्य सुरू केले. दोन तास प्रयत्न केल्यानंतर बुडालेल्या तरूणाला बाहेर काढण्यात यश आले.

ज्या ठिकाणी युवक बुडाला ती हद्द वाघेश्वर गावची असल्याने ती वडगाव पोलिसांची असल्याचे समजल्यानंतर येथे वडगाव पोलिसांना पंचनाम्यासाठी बोलवले गेले. त्यानंतर वडगाव पोलिस येथे दाखल झाले. या घटनेचा पुढील तपास वडगाव पोलिस करत आहेत.

The post पुण्यातील तरुणाचा पवना धरणात बुडून मृत्यू appeared first on थोडक्यात घडामोडी.

दापोली तालुक्यातील आंजर्ले समुद्रकिनारी पुण्यातील तीन पर्यटकांचा बुडून मृत्यू झाला. शुक्रवारी दुपारी तीनच्या सुमारास ही दुर्दैवी घटना घडली. मृतांमध्ये अक्षय राखेलकर, विकास श्रीवास्तव, मनोज गावंडे यांचा समावेश आहे. उबेद खान, सोहम चव्हाण, रोहित पलांडे यांना वाचवलं गेलं असून यांच्यावर आंजर्ले येथील प्राथमिक आरोग्य केंद्रात उपचार सुरू आहेत.

पुणे जिल्ह्यातील औंध येथील एका कंपनीत कामाला असलेले १४ जण आज दापोलीत पर्यटनाकरिता आले होते. हे सर्वजण सकाळी साडेनऊ वाजता आंजर्ले येथील समुद्र पाहण्याकरिता गेले. तेथे समुद्रात पोहायला गेल्यानंतर सहा जणांना पाण्याचा अंदाज न आल्याने ते खोल समुद्रात ओढले गेले. आरडाओरड झाल्यानंतर या सहा जणांना वाचविण्यासाठी स्थानिक लोकांनी शर्थीचे प्रयत्न केले. पण किनाऱ्यावर येण्यापूर्वीच त्यापैकी तीन जणांना आपले प्राण गमवावे लागले, तर एकाची प्रकृती गंभीर आहे.

मदतकार्यामध्ये अभिनय केळसकर, नितेश देवकर, नीलेश गुहागरकर, तृशांत भाटकर, अभिजीत भाटकर, बाळा केळसकर, आवा मयेकर, दीपा आरेकर, पपू केळसकर हे मदतीसाठी धावून आले. त्यामुळे सहापैकी तीन जणांचे जीव वाचविण्यात यश आले.

The post आंजर्ले समुद्रकिनारी पुण्यातील तीन पर्यटकांचा बुडून मृत्यू appeared first on थोडक्यात घडामोडी.