सोलापूर : सोलापूर-विजापूर रोडवरील सोरेगाव येथे सोमवारी रात्री एक हृदयद्रावक घटना घडली. सात वर्षांचा ऋषी लक्ष्मण भरले या चिमुकल्याचा विजेचा शॉक लागून मृत्यू झाला. ही घटना रात्री सुमारे ९ वाजण्याच्या सुमारास घडली असून, परिसरात शोककळा पसरली आहे.

मिळालेल्या माहितीनुसार, ऋषी शौचासाठी घराशेजारी असलेल्या पाण्याच्या टाकीजवळ गेला होता. परंतु बराच वेळ झाला तरी तो घरी परतला नाही. त्यामुळे त्याच्या कुटुंबीयांनी त्याचा शोध घेतला असता, ऋषी टाकीजवळ बेशुद्ध अवस्थेत पडलेला आढळून आला. तातडीने त्याला छत्रपती शिवाजी महाराज शासकीय रुग्णालयात दाखल करण्यात आले, मात्र डॉक्टरांनी तपासून त्याला मृत घोषित केले.

घटनास्थळापासून ऋषीच्या नातेवाईकांची घरे अगदी जवळच असल्यामुळे सुरुवातीला कुटुंबीयांना वाटले की तो कुठे तरी खेळत असेल. मात्र बराच वेळ झाला तरी तो न आल्याने शोधाशोध करण्यात आली. त्याचा चुलत भाऊ त्याला शोधायला गेला असता, त्याला टाकीजवळ ऋषी बेशुद्ध अवस्थेत आढळून आला. ही माहिती त्याने तात्काळ कुटुंबीयांना दिली, त्यांनी त्याला तातडीने रुग्णालयात नेले, परंतु उपचार सुरू होण्याआधीच ऋषीचा मृत्यू झाला होता.

ऋषीच्या मृत्यूमुळे त्याच्या आई-वडिलांसह संपूर्ण कुटुंबावर दुःखाचा डोंगर कोसळला आहे. त्याच्या पश्चात आई, वडील, भाऊ आणि बहीण असा परिवार आहे. या दुर्दैवी घटनेनंतर परिसरात शोककळा पसरली आहे.

दरम्यान, घटनेची माहिती मिळताच विजापूर नाका पोलीस स्टेशनचे पोलीस हवालदार हरिश्चंद्र केंजळे यांनी घटनास्थळी भेट दिली. त्यांनी पंचनामा करून घटनेची नोंद पोलीस स्टेशनच्या नोंदवहीत घेतली आहे. याबाबत पुढील तपास पोलीस करत आहेत.

The post सात वर्षांच्या चिमुकल्याचा विजेचा धक्का लागून मृत्यू appeared first on थोडक्यात घडामोडी.

पुणे : राज्यभरात आत्महत्येच्या घटनांमध्ये सातत्याने वाढ होत असतानाच, पुणे जिल्ह्यातील उरुळी कांचन परिसरातील कोरेगाव मूळ येथे एका ३२ वर्षीय तरुणाने आत्महत्या केल्याची धक्कादायक घटना समोर आली आहे. पत्नीच्या सततच्या छळाला कंटाळून त्याने आयुष्य संपवल्याचा आरोप कुटुंबीयांनी केला असून, आत्महत्येपूर्वी त्याने मोबाईलमध्ये स्वतःचे दु:ख सांगणारा व्हिडिओही शूट केला आहे. आत्महत्या करणाऱ्या तरुणाचे नाव सुरज दामोदर पवार (वय ३२, रा. कोरेगाव मूळ, ता. हवेली) असे आहे. ही घटना बुधवारी दुपारी २ वाजण्याच्या सुमारास घडली.

पोलिसांनी दिलेल्या माहितीनुसार, सुरज आणि मयुरी यांचा दोन वर्षांपूर्वी विवाह झाला होता. ते कोरेगाव मूळ येथील इनामदार वस्ती परिसरात राहत होते. गेल्या काही काळात दोघांमध्ये सतत वाद होत असल्याची माहिती कुटुंबीयांनी दिली. बुधवारी किरकोळ कारणावरून त्यांच्यात पुन्हा एकदा वाद झाला, आणि त्यानंतर सुरजने राहत्या घरात छताच्या अँगलला साडीच्या सहाय्याने गळफास घेऊन आत्महत्या केली.

मोबाईलमध्ये मृत्यूपूर्वीचा व्हिडिओ
सुरजने आत्महत्या करण्याआधी मोबाईल फोनमध्ये एक व्हिडिओ शूट केला होता. या व्हिडिओमध्ये त्याने पत्नी मयुरीने दिलेला मानसिक त्रास, वारंवार होणारी भांडणे, आणि शारीरिक व भावनिक छळ यांचा उल्लेख केला आहे. या त्रासाला कंटाळूनच त्याने टोकाचे पाऊल उचलल्याचे त्याच्या निवेदनातून स्पष्ट होत असल्याचे पोलिसांनी सांगितले.

पत्नीविरोधात गुन्हा दाखल, अटक
या प्रकरणी सुरज पवार यांचे वडील दामोदर निवृत्ती पवार (वय ६०, व्यवसाय – शेती, रा. वाल्हे, वागदरवाडी, ता. पुरंदर) यांनी हडपसर पोलिस ठाण्यात तक्रार दाखल केली आहे. त्यांच्या तक्रारीवरून सुरज यांची पत्नी मयुरी सुरज पवार ऊर्फ मयुरी अनिल जाधव (वय २६) हिच्यावर भारतीय दंड संहितेच्या बीएनएस कलम १०८, ११८(१), ११५(२) अन्वये गुन्हा दाखल करून अटक करण्यात आली आहे.

दरम्यान, या घटनेनंतर पवार कुटुंबावर दुःखाचा डोंगर कोसळला आहे. परिसरात आणि नातलगांमध्ये मोठ्या प्रमाणात हळहळ व्यक्त होत असून, अशा दुर्दैवी घटनांपासून तरुण पिढीला वाचवण्यासाठी पुढे येण्याची गरज असल्याचे बोलले जात आहे.

The post पत्नीच्या सततच्या छळाला कंटाळून तरुणाची आत्महत्या, मोबाईलमध्ये मृत्यूपूर्वीचा व्हिडिओ, पत्नीला अटक appeared first on थोडक्यात घडामोडी.

सोलापूर : सोलापुरात एमबीबीएसचे शिक्षण पूर्ण केलेल्या एका डॉक्टराने स्वतःचा गळा कापून आत्महत्या केली आहे. आदित्य नांबीयार असे आत्महत्या केलेल्या शिकाऊ डॉक्टरचे नाव आहे. तो सध्या सोलापुरात राहत होता, तर मूळचा मुंबईचा असल्याची माहिती मिळाली आहे. आदित्यने अलीकडेच एमबीबीएसचे शिक्षण पूर्ण केले होते.अशी प्राथमिक माहिती समोर आली आहे.

आदित्यने सोलापूर शहरातील डॉ व्ही एम वैशंपायन शासकीय महाविद्यालयात एमबीबीएसचे शिक्षण पूर्ण केले होते. वैद्यकीय शिक्षण पूर्ण झाल्यानंतर आदित्यने शिकाऊ डॉक्टर म्हणून आपल्या कामाला सुरुवात केली होती. आदित्य हा सोलापूर शहरातील नामांकित सोसायटीत भाड्याने घर घेऊन राहत होता. दरम्यान, त्याने आपल्या राहत्या घरात गळा कापून घेत आत्महत्या केली आहे. सोलापुरात डॉ. शिरीष वळसंगकर आत्महत्या प्रकरण ताजे असताना आता ही घटना घडल्यामुळे वैद्यकीय क्षेत्रात खळबळ उडाली आहे.

मंगळवारी सकाळी आदित्यचा मृतदेह राहत्या घरात बाथरूममध्ये रक्ताच्या थारोळ्यात आढळून आला. घटनेची माहिती मिळताच विजापूर नाका पोलीस ठाण्याचे पोलीस कर्मचारी व अधिकारी घटनास्थळी दाखल झाले आणि त्यांनी पंचनामा केला. बाथरूममध्ये चाकू, कैंची असे साहित्य आढळून आले. आदित्यच्या आत्महत्येबद्दल कळताच त्याच्या मित्रांनी रूग्णालयात धाव घेतली, त्यांना मोठा धक्का बसला आहे.

दरम्यान, या घटनेनंतर विविध चर्चांना उधाण आले आहे. मात्र, या शिकाऊ डॉक्टरने अशाप्रकारे आत्महत्या का केली, याचा शोध पोलिसांनी सुरु केला आहे.

The post सोलापुरात आणखी एका डॉक्टरची आत्महत्या, बाथरूममध्ये रक्ताच्या थारोळ्यात आढळला मृतदेह appeared first on थोडक्यात घडामोडी.

उत्तर प्रदेश : नोएडा येथील एका हॉटेलच्या खोलीत पत्नी आणि सासरच्यांच्या छळाला कंटाळून एका फील्ड इंजिनिअरने गळफास घेऊन आत्महत्या केली. आत्महत्या करण्यापूर्वी त्याने पत्नी आणि तिच्या कुटुंबाकडून होणाऱ्या मानसिक छळाचे वर्णन करणारा एक व्हिडिओ रेकॉर्ड केला. रेल्वे स्टेशन रोडजवळील जॉली हॉटेलच्या खोली १०५ मधून पोलिसांनी त्याचा मृतदेह ताब्यात घेतला.

व्हिडिओमध्ये मोहित कुमारने दावा केला की त्याच्यावर त्याची सर्व मालमत्ता त्याच्या पत्नी आणि सासरच्यांच्या नावावर हस्तांतरित करण्यासाठी दबाव आणला जात होता. तसेच हुंड्याच्या खोट्या आरोपांमध्ये अडकवण्याची धमकी देण्यात आली होती. मोहित कुमार म्हणाला, “तुम्हाला हा व्हिडिओ मिळेल तेव्हा मी या जगातून निघून गेलेला असेन. जर पुरुषांसाठी कायदा असता तर कदाचित मी हे पाऊल उचलले नसते. मला माझ्या पत्नी आणि तिच्या कुटुंबाकडून होणारा मानसिक छळ सहन करावा लागला नसता.” व्हिडिओमध्ये मोहित पुढे म्हणाला, “माझी पत्नी प्रिया यादवच्या आईने जबरदस्तीने प्रियाचा गर्भपात करून घेतला आणि सर्व दागिने आणि साड्या तिच्याकडे ठेवल्या. माझी पत्नी मला धमकी देत ​​आहे की जर मी घर आणि मालमत्ता तिच्या नावावर केली नाही तर ती माझ्यावर आणि माझ्या कुटुंबावर हुंड्याचा खोटा खटला दाखल करेल.” व्यथित आणि निराश झालेल्या मोहितने म्हटले की, “जर माझ्या मृत्यूनंतरही मला न्याय मिळाला नाही, तर माझी राख नाल्यात विसर्जित करा. आई आणि बाबा, कृपया मला माफ करा. मी तुमच्या अपेक्षा पूर्ण करू शकलो नाही.”

उत्तर प्रदेशातील औरैया जिल्ह्यातील रहिवासी असलेला मोहित कुमार प्रिया यादवसोबत दीर्घकाळापासून संबंधात होता, जिच्याशी नंतर त्याने लग्न केले. मोहितच्या कुटुंबीयांनी सांगितले की, प्रियाला बिहारच्या समस्तीपूरमध्ये प्राथमिक शिक्षिकेची नोकरी मिळेपर्यंत सर्व काही ठीक चालले होते. त्यानंतर, ती वेगळी वागू लागली आणि तिच्या आई आणि भावाच्या प्रभावाखाली मोहितला मानसिक त्रास देऊ लागली.

पोलिसांनी रेल्वे स्टेशन रोडवरील जॉली हॉटेलच्या खोली क्रमांक १०५ मधून मोहितचा मृतदेह ताब्यात घेतला. फॉरेन्सिक तपासणी केली आणि अहवाल तयार केला. शवविच्छेदनानंतर, मोहितचा मृतदेह त्याच्या कुटुंबाकडे सोपवण्यात आला, ते औरैया येथे अंत्यसंस्कारासाठी त्याचा मृतदेह घेऊन गेले.

The post पत्नी आणि सासरच्यांच्या छळाला कंटाळून इंजिनिअरची आत्महत्या, व्हिडिओ रेकॉर्ड केला आणि… appeared first on थोडक्यात घडामोडी.

पुणे : पुण्यात बुधवारी सकाळी हिंजवडी आयटी पार्क परिसरात एका कंपनीच्या कर्मचाऱ्यांना घेऊन जाणाऱ्या मिनी बसला आग लागल्याने चार जणांचा मृत्यू झाला. यात दहा प्रवासी भाजले असून त्यापैकी दोघांची प्रकृती गंभीर असल्याचे पोलिसांनी सांगितले. आयटी पार्कच्या फेज १ मधील हिंजवडी इंडस्ट्रीज असोसिएशनच्या कार्यालयाजवळ सकाळी ७.३० वाजताच्या सुमारास गाडीला आग लागली. सुभाष भोसले, शंकर शिंदे, गुरुदास लोकरे आणि राजू चव्हाण अशी या अपघातात मृत्युमुखी पडलेल्यांची नावे आहेत.

मिळालेल्या माहितीनुसार, मिनी बसमध्ये व्योमा ग्राफिक्स कंपनीचे १४ कर्मचारी होते. वाहन धावत असताना चालकाच्या सीटजवळ आग लागली आणि त्यानंतर चालकाने उडी मारली. ड्रायव्हरने उडी मारल्याने गाडी दुभाजकाला धडकल्याचे पोलिसांनी सांगितले. दरम्यान, यातील आठ प्रवासी बाहेर पडण्यात यशस्वी झाले, तर पळू न शकलेले चार जण आगीमध्ये होरपळून मरण पावले. अधिक तपास सुरू आहे.

सर्व जखमींना हिंजवडी येथील रुबी हॉल क्लिनिकच्या आपत्कालीन काळजी विभागात हलवण्यात आले आहे. “त्यापैकी दोन जण ४० टक्क्यांहून अधिक भाजले आहेत आणि त्यांची प्रकृती गंभीर आहे, एक २० टक्के भाजला आहे आणि ५ टक्के भाजलेला दुसरा रुग्ण अजूनही बेशुद्ध आहे. किरकोळ भाजलेल्या एका व्यक्तीची प्रकृती स्थिर आहे. आमची टीम जखमींना उच्च दर्जाची काळजी आणि सहाय्यता देत आहे,” असे रुग्णालयाचे सीओओ डॉ. सुधीर राय आणि सीईओ बेहराम खोडाजी यांनी सांगितले.

हिंजवडीजवळ झालेल्या अपघातानंतर, आयटी कर्मचारी संघटनेने कर्मचाऱ्यांना त्यांच्या कार्यालयात घेऊन जाणाऱ्या वाहनांचे सुरक्षिततेसाठी ऑडिट करण्याची मागणी केली.

The post हिंजवडी आयटी पार्कमध्ये मिनी बसला भीषण आग, ४ जणांचा होरपळून मृत्यू, १० जखमी appeared first on थोडक्यात घडामोडी.

पुणे : पाणीपुरवठा करणाऱ्या टेम्पोखाली चिरडल्याने एका दोन वर्षांच्या मुलाला आपला जीव गमवावा लागला. लोणीकंदमध्ये ही दुःखद घटना घडली. टेम्पोचा चालक अल्पवयीन मुलगा असल्याचे समोर आले आहे. पोलिसांनी अल्पवयीन चालक आणि त्याच्या वडिलांविरुद्ध गुन्हा दाखल केला आहे. मृत मुलाचे नाव मल्हार अक्षय चापोडे (वय २) असे आहे.

पोलिसांनी दिलेल्या माहितीनुसार, हा टेम्पो सदर परिसरात पाणीपुरवठा करत असताना अल्पवयीन मुलगा गाडी चालवत होता. यादरम्यान, गाडीने चुकून मल्हारला धडक दिली आणि तो पुढच्या चाकाखाली आला. मल्हारला तातडीने रुग्णालयात नेण्यात आले, मात्र उपचार मिळण्यापूर्वीच त्याचा मृत्यू झाला. अक्षय चापोडे यांनी दाखल केलेल्या तक्रारीनंतर पोलिसांनी अल्पवयीन चालक आणि त्याच्या वडिलांविरुद्ध गुन्हा दाखल केला आहे. लोणीकंद पोलिस या घटनेचा अधिक तपास करत आहेत.

The post पाणीपुरवठा करणाऱ्या टेम्पोखाली चिरडल्याने दोन वर्षांच्या मुलाचा मृत्यू appeared first on थोडक्यात घडामोडी.